Read kalabari Izikẹlị 47 Bible Online

Izikẹlị 47 - kalabari bible

Izikẹlị 47

¹Tomḅọ ḅe ị̀ tọrọkọ-sụn tẹ ị̀ kẹ pịkịma-mu Tamụnọ-warị mẹ ḅẹ mẹnjị-ḅọrọ-sọ-anga mẹ lam. Minji mẹ mẹnjị sọ mu anga mẹ suku-ḅio mẹnjị-mẹnjị paka-ḅo ịrụa-saakịarị-anga anga mẹ da-mum, Tamụnọ-warị mẹ tọrụ kẹ da pakịrị mẹ. Tamụnọ-warị mẹ ḅẹ suku-jụ da pakịrị mẹ suku-ḅio mie minji mẹ pakịrị mẹ ḅụ ḅọrọ ye.

²Anịtẹso tomḅọ ḅe ị̀ ọkị pakam Tamụnọ-warị mẹ ḅio, mu Tamụnọ-warị mẹ sịẹ kiri mẹ ḅụ ọgọnọ-jụ da etela mẹ ḅụ ḅọrọ mu anị ḅẹ ogigo-ḅọkọ mẹ la, tẹ ikelema-koro mu ịrụa-saakịarị-anga ḅẹ ogigo-ḅọkọ mẹ la. Gbọrụ kala tọrụ suku-jụ ḅẹ ogigo-ḅọkọ ḅụ mẹnjị-mẹnjị paka-ḅom.

³Tomḅọ ḅe ọ̀ ḅara sime ye-tọn sịn-ikiḅa mẹ kẹ tọrụ mẹ tọn iderima ịrụa saakịarị pakịrị mẹ da-mum, tẹ mita ẹndẹ sọnọa si finji ọ̀ nwẹn tọnm. Minji mẹ iwo ḅo ḅụọ-ịkarị lam.

⁴Anịtẹso ọ̀ pịkị jen mita ẹndẹ sọnọa si finji tọnm, tẹ minji mẹ iwo ḅo ḅụọ-kụkụ lam. Jen mita ẹndẹ sọnọa si finji ọ̀ pịkị nwẹn tọn iderimam, tẹ minji mẹ iwo ḅo konju lam.

⁵Ọ̀ pịkị jen mita ẹndẹ sọnọa si finji tọnm, tẹ tọrụ mẹ owolo mịẹ ḅaka tẹ à ḅarị inetẹ mẹnjị saḅa ḅọrọ-a. Anị owolo mịẹ la ḅaka ḅara ḅụ tomḅọ ḅarị inetẹ mẹnjị saḅa-a, mḅọ okin sikima.

⁶Ori ị̀ ḅẹẹm, “Fịị-fịị tomḅọ, mie-mẹmgba kẹ elekima sụa lamaa.” Anịtẹso tomḅọ ḅe ị̀ ọkị pịkịma mu tọrụ mẹ akaka mẹ lam,

⁷tẹ àrị anịanga la sakị àrị ẹrịm tọrụ mẹ akaka ma ḅụ tọnwa-tọnwa asịn emi.

⁸Ọ̀ nwẹnị ị̀ ḅẹẹ, “Mị minji mẹ mẹnjị tolu-ḅọrọ mu ịrụa-saakịarị-anga mẹ ḅụ Jodanị akaka ideri-mu Fịtẹ Opu Tọrụ mẹ laarị. Anị mẹnjị mu Fịtẹ Opu-tọrụ sọarị sakị anị opu-tọrụ mẹ ḅẹ ala mẹ kiri ọkị tẹ anị ḅuu-minji sọarị.

⁹Tọrụ mẹ minji mẹ mẹnjị mu laa anga laa anga nama ḅara-ḅara na inji ḅara-ḅara na paka ḅa. Mẹnjị sọ-ḅoarị minji mẹ mịẹ tẹ Fịtẹ Opu-tọrụ mẹ ḅo ḅuu-minji sọ ḅa, tẹ anị mẹnjị mu laa anga laa anga anị ḍumo ọkị-ḅo ḅa.

¹⁰Ẹn-Gedi ḅẹ Ngụngụḅa ma ḅụ ọkị mu nwenii mu Ẹngilemu ḅẹ Ngụngụḅa ma la, opu-tọrụ akaka ma ḅụ inji-ḅaapụ sime ḅa, tẹ ịna ịgbọ mẹ finjima-finjima iri ḅa anịjụ ḅụ. Tọnwa inji ḅara-ḅara anị anga paka ḅa, Mẹdịterenanị Opu-tọrụ mẹ ḅụ arị sime gbọrụ ḅara mẹ.

¹¹Kụma opou kiri mẹ ḅụ na minji sịẹ-sịẹ wararị ayọ ma na tẹ pọkụ-ḅọkọ mẹ bịan mẹ ḅụ simearị minji mẹ ḅuu-minji sọ ḅịa. Arị sime tẹ fụn paka-paka ḅo ḅarị anga sọ ḅa.

¹²Okolo mẹ ḅẹ maa akaka ma ḅụ simearị sịn aḅara ḅara mamgba so-paka-paka tẹ fịye pịrị ḅa. Arị ḅẹ ịnyịnya ma gbala-gbala kpatụ ḅịa, tẹ gbala-gbala arị pịkị dasịẹma ḅịa mgbọlụ sụa ḅụ. Akalụ goyegoye arị ịwọ mgbọlụ sụa ḅa, Tamụnọ-warị mẹ ḅio sime tẹ mẹnjị paka-ḅoarị okolo mẹ minji kẹ arị pịrịarị ẹrẹsị. Sịn ma fịye pịrị ḅa, tẹ arịḅẹ ịnyịnya ma ịn nwẹn kẹ kịnị gwọ ḅa.”

¹³Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Ma ma anie Kiri mẹ oke ma, anie puu oyi maa furo finji ma pịrị ḅẹ kiri mẹ, Josẹfụ furo mẹ maa akiri nyana ḅẹ ḅara ḅụ. (Josẹfụ maa owiapụ awọmẹ ma, Manasẹ na Iferemu na afuro ma, gbọrụ apụ gbọrụ apụ amịna nye).

¹⁴À tẹmẹ-la ḅara kẹ minini ọmịna elemu-aḍapụ ma pịrịm mịnẹ à mị kiri mẹ kẹ ịna nye sọma ḅa; mịọkụ ọmịnị anị ḍie gbasịma ọmịna ḅụ pịrị ọmịna ogboku.”

¹⁵Ọgọnọ-jụ ḅẹ oke mẹ ịrụa saakịarị pakịrị anga mẹ da-muarị, Mẹdịterenanị Opu-tọrụ mẹ ḅụ ọkị mu Ẹtịlọnị opu ama mẹ la, mu “Hamatị Tolu-ḅọrọ Anga” mẹ la, Zẹdadị opu ama mẹ la,

¹⁶Berota na Sibarimu opu ama ma la (ma opu ama ma simearị anga anie Damasịkọsị ama-da yọ na Hamatị ama-da yọ mẹ ogboku), pịkị mu Tikọnị opu ama la (anị simearị anga Hawuranị ama-da yọ mẹ oke mẹ ḅụ).

¹⁷Mie ḅụ ọgọnọ-jụ ḅẹ oke mẹ Mẹdịterenanị Opu-tọrụ mẹ ḅụ ọkị mu ịrụa saakịarị pakịrị mẹ da-mu Ẹnọnị opu ama mẹ la, Damasịkọsị na Hamatị na iri ma ḅẹ ọgọnọ-jụ nwẹnị anị na oke mị.

¹⁸Ịrụa-saakịarị-anga mẹ ḅẹ oke mẹ ḅọrọ mu suku-jụ Damasịkọsị kiri na Hawuranị na ogboku ḅiri lam, Jodanị Tọrụ nwẹnị oke mịẹ Izirẹlị kiri tẹ ịrụa-ideriarị-anga da anga na Giliyadi na pịrị, ịrụa-saakịarị-anga ḅụ, ọkị mu Tama la Fịtẹ Opu-tọrụ mẹ akaka.

¹⁹“Suku-jụ-pakịrị ḅẹ oke mẹ suku-jụ ḅẹ ịrụa-ideriarị-anga da-mu Kadẹsị ịkpa mẹ ḅẹ piri-otokoloḅa mẹ la tẹ nwẹnị pịkị mu Ijiputi oke ḅẹ ọgọnọ-jụ ịrụa-ideriarị-anga mẹ ḅụ ọkị mu Mẹdịterenanị Opu-tọrụ mẹ la.”

²⁰“Mẹdịterenanị Opu-tọrụ mẹ anie ịrụa-ideriarị-anga mẹ ḅẹ oke mẹ mịẹ ye, tẹ nwẹnị ọgọnọ-jụ pakịrị mẹnjị mu ịrụa-ideriarị-anga ḅẹ Hamatị Tolu ḅọrọ-yọ mẹ lam.”

²¹“Ọ́ mị kiri mẹ puu ọmịna afuro-furo ma pịrịị;

²²anị ọmịna nye sọ gbamaso ḅa. Jen asịẹ ḅẹ apụ tẹ ọmịna ogboku angarị apụ tẹ mịẹ anga awọmẹ iyi wararị apụ sọ kiri mẹ ḅụ ḍiekiri nyana ḅa ó kiri mẹ puu furo-furo ma pịrịarị sakị. Ọmịnị ini na mị ḅarị ḅara ini sọ pakịrị-pakịrị ḅụ Izirẹlị furo-awọmẹ ḅara, tẹ ḅara suu tẹ Izirẹlị afuro ma kiri mẹ ḅụ ịna kiri ọkị ḅa.

²³Jen sịẹ ḅẹ ḅọ tẹ Izirẹlị ḅio angarị ḅọ goḅọ-goḅọ ori angarị furo-ḅẹ-apụ na sọ tẹ amịna kiri nyana ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”