Read kalabari Izikẹlị 5 Bible Online

Izikẹlị 5 - kalabari bible

Izikẹlị 5

¹KỊNỊNYANAḄỌ ḅe ḅẹẹm, “Fịị-fịị tomḅọ, oḅuarị okologie ọkị tẹ kẹ ị́ mpọrị na ị́ sịḅị-ḅẹ-inume na, í oju simearị inume mamgba na sẹịn-siin. Anịtẹso inume mẹ kẹ ye-tọnye ọgọnọ tọn ḍiki tẹ anị kẹ tẹra anga ḍie.

²Gbọrụ anga dọkịma opuma mẹ ḅio ini anị ọkị tẹso. Osi tẹra kiri ḅẹ gbọrụ pakịrị mẹ okologie kẹ pẹlẹ-pẹlẹ sara í opu ama mẹ ḅio mẹnjị-pakarị ogbo. Kirikọn tẹra kiri ḍie ḅẹ gbọrụ kiri mẹ kẹ fẹrụ ḅio wakị-wakị nguma, tẹ yẹrị ì okologie kẹ anị ḍuka ḅa.

³Inume ma ḅẹ boowa jaị ọlọ wẹrị tẹ kẹ ị́ ḅịtẹ-ḅịḅị ḅụ kpọọ-wẹrịị.

⁴Tẹso, pịkị boowa jaị kẹ fịnị ḅio gbin suu tẹ arị dọkị kpatakpata. Anị sakị ḅụ fịnị sakị kọrị bebe Izirẹlị sịẹ mẹ ikelema ḅa.”

⁵Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Jeruselemu ḍikii. Yẹrị á kẹ tomikiri mẹ karakara ogboku koromam, osi asịẹ mamgba nwẹnị á gbori-ikelema.

⁶Jeruselemu kọngọ-kụrọma à tọn-koroma-aị ma pịrị tẹ á ḍie-pakamam árị si-sịḅịḅio-sụa osi asịẹ ma nẹngịm, ḅịḅịpoki-a árị ikelema-koro wararị asịẹ ma nẹngị. Jeruselemu à tọn-koroma-aị ma sịkị tẹ ḅarị ḍụkụ tẹ ì oloko ma koko-a.

⁷Mịọkụ Jeruselemu, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye pokii. Ì oloko ma ma poki tẹ mịẹ-a na à tọn-koroma-aị ma koko-a na ḅụ ị́ ḅụụ-fụka dogi-ḅo í ikelema wararị asịẹ ma nẹngị tẹẹ. Ị́ jen asịẹ ḅẹ apụ ama-anganga-aḅara ḍukamẹnjị tẹẹ.

⁸Tẹ anie ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ị́ na fịya-a ḅọ sọ tẹẹ. Sịẹ-sịẹ mamgba inetẹ ẹrị ḅẹ anga mie à ḅẹrẹ-pẹlẹ ị́ ọgọnọ gbana ḅarịye.

⁹Ma mamgba tẹ ị́ mịẹarị aị ma àrị arị ḍiki-ḅioḅuarị, à kẹ Jeruselemu fomu ḅarị ḅara mẹ jen sakị amụ arị ọkọ sime-ḅara mịẹ-a, tọrọkọ-jụ sọ à ḅarị ọkọ sime ye mịẹ ḅịa.

¹⁰Anị dogi-ḅo ḅarịye anie, Jeruselemu ḅụ ḍapụ-na-iyingiapụ-na ịna awọmẹ pẹị ḅa, tẹ awọmẹ sọ ịna ḍapụ-na-iyingiapụ-na pẹị ḅa. Àrị ó fomu tẹ ọmịna ḅụ kirikọntẹ ḍumo wararị apụ ma gala-galama anga-anga mu ḅa.

¹¹“Ọkọ ẹrẹsị, yẹrị ḍumo wararị Tamụnọ ḅara ḅụ — miemẹ anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye — ị́ si na sịḅị-ngụngụnma aị na kẹ ị̀ Warị pilema ye ẹrẹsị arị ị́ pẹlẹ-gbin ḅa, ọkụrụkụrụ ofori ḅara ḅụ.

¹²Ị́ atomi ma kẹ tẹra akiri ḍiya ḅẹ gbọrụ kiri opu ama mẹ ḅio sime tẹ fịị ḅa obi na ḅuru-ḅa na ḅụ kẹ tẹra akiri ḍiya ḅẹ gbọrụ kiri ịn nwẹn kẹ okologie kẹ pẹlẹ sara ḅa opu ama mẹ ḅio ḅụ paka ḅụ; tẹ kunoma gbọrụ kiri mẹ arị ịn gala-galama ḅa fẹrụ ḅio tẹ okologie kẹ in ḍuka ḅa.”

¹³“Ị́ ị̀ ịganị mẹmgba ḅẹ kụrọ da ḅa tẹ anị ị́ ḅụụ ọfịrị nwẹnị ì furo ḅin sakị la ḅa. Mie-mẹmgba pakarị sakị, í ḅo minini ḅa mịnẹ yẹrị, KỊNỊNYANAḄỌ ḅe, ẹkwẹn ị́ pịrị tẹẹ, ị́ ị́ minini ye mịẹ-a ye mẹ ị̀ ịganịma tẹ gotẹ.

¹⁴Í ikelema-koro wararị asịẹ ma ḅẹ ḅọ tẹ mẹnjị-ḅọrọarịḅọ-ḅọrọarịḅọ nini-suku sụa ị́ pịrị tẹ ḅele tẹ ḅọrọ-so ḅa.

¹⁵Àrị ịganị kụrọma tẹ fomu-ḅara kẹ ị́ pịrị sakị ị́ ikelema-koro wararị asịẹ mamgba tẹmẹ-naịn-naịn ḅa. In si-tọrụ kẹ í ḍiki tẹ í kombo ḅa.

¹⁶Àrị ị́ fịye ḅọkọ kiki tẹ ḅuru ị́ ḅaa ḅa. Ḅuru-pọkọtarị mẹ kẹ ị́ ịnọ ḅarị ḅara ḍịn fịrịma tẹ kẹ ị́ tẹịn ḅaa gulugulumarị ye ọkụ.

¹⁷À ḅuru-pọkọtarị na piri-ḅio-ḅẹ anama na kẹ fịrịma tẹ ị́ aḍọkọḍọkọ-awọmẹ ḅaa ḅa; tẹ obi na kụrọ-kụrọ ḅara kẹ ị́ mịẹ na ọmụ na kẹ ị́ ḅaa ḅa. Yẹrị KỊNỊNYANAḄỌ ḅe ọkọ ḅẹẹm.”