Read kalabari Izikẹlị 6 Bible Online

Izikẹlị 6 - kalabari bible

Izikẹlị 6

¹KỊNỊNYANAḄỌ ḅe ẹkwẹn ị̀ pịrịm.

²Ori mẹẹ, “Fịị-fịị tomḅọ, tọrụ kẹ Izirẹlị ḅẹ tụndụ ma ḍiki tẹ ì oku ḍuko ịn pịrị.

³Ḍuko Izirẹlị ḅẹ tụndụ ma pịrị ịn KỊNỊNYANAḄỌ ḅe ẹkwẹn mẹ naa — ini yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko tụndụ ma na, tụndụ ma na, tụndụ ma puu ideri-koro wararị ayọ ma na, tụndụ-suku ma na pịrịarị ye mẹ naa; àrị okologie fịrịma mu in sime tẹ oru-afụḅara tẹkẹarị anga ma guluguluma ḅa.

⁴Agbamịẹ-anga ma à kan kiri lama ḅa, pịkị ịn dọkịma-agba mịẹarị ayọ ma kan sara ḅa. Anị anga sime apụ mamgba ḅaa ḅa ịna oru-afụḅara ma tọrọkọ.

⁵Àrị Izirẹlịapụ ma fịtẹ oju-akpakpa ma gala-galama ḅa. Àrị ịna mgbe ma gala-galama ịna agbamịẹ-anga ma ikelema-koro ḅa.

⁶Izirẹlị ḅẹ opu ama mamgba in guluguluma ḅa, mịẹ tẹ ịna agbamịẹ-anga mamgba na ịna oru-afụḅara ma na kọsị-sara ḅarị ḅara, ini ịna kụnụaị-dọkịma-ayọ à sima fama ḅa, tẹ mịẹ ye goyegoye kịnị ḅarị ẹrị ḅịa.

⁷Anga mamgba ḅụ ịn kịnị ḅaa ḅa, tẹ fịị-a so apụ ma nimi ḅa mịnẹ yẹrị anie KỊNỊNYANAḄỌ ḅe.

⁸“Ḅaa sara mẹ ḅụ à mịẹ tẹ ja apụ pụkọ-paka-so ḅa, tẹ ini kẹ sịẹ-sịẹ ma ogboku gala-galama ḅa,

⁹ịn nwẹnị arị ayọ ma ḅụ kun-soapụ ḅara kẹ anga ḅa. Anịjụ ḅụ ini ị̀ kẹ ḅiokoroma tẹ nimi ḅa mịnẹ yẹrị in fomum, pịkị ịna atọrụ tuum, ịna minini nyana-a aḅioḅẹngbọ ma ị̀ ḅụ mangị-so tẹ oru-afụḅara kẹ ye-sịn ị̀ nẹngị tẹẹ ẹrẹsị. Ịna ḅụụ-ngụngụma siye na ḅụụ kẹ iderima kiri koroma aị na tẹ ịn mịẹ tẹ aị gotẹ.

¹⁰In nimi ḅa mịnẹ yẹrị anie KỊNỊNYANAḄỌ ḅe, tẹ à kẹ ịna aḅeri nụnụ sime aị ma ye-ḅụ-ofori papaa ẹrẹma-a.”

¹¹Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Ḅara ḅaa! Ḅụọ kẹ kiri tẹịn! Kururu ḅụ owu, anie siye mẹmgba na ḅụụ-ngụngụma aị na tẹ Izirẹlịapụ mịẹ tẹ aị gotẹ. In mu ọmụ ḅio na, ḅuru-ḅa na obi na ḅụ fịị ḅẹ-yearị.

¹²Ala-jụ simearị apụ obi tẹ fịị ḅa; kpeki anga simarị apụ ọmụ ḅio fịị ḅa; arị aị ma gbarị apụ ḅuru-ḅa ḅụ fịị ḅa. Ini ị̀ ịganị ḅẹ kụrọmamgba da ḅa.

¹³Ḍụẹịn-ḍụẹịn-ḍụẹịn gala-gala sara ḅa oru-afụḅara ma na agbamịẹ-anga ma na ogboku, tụndụ goyegoye ọgọnọ-jụ na, gele tụndụ goyegoye na ọgọnọ-jụ, ịwọ sịn goyegoye na oku nwẹn-sịn asịn ma na suku, anga goyegoye tẹ in mu dọkịma-agba mịẹ ịna oru-afụḅara pịrị-pịrị ayọ mamgba. Anịtẹso ḅẹḅọ-ḅẹḅọ nimi ḅa mịnẹ yẹrị anie KỊNỊNYANAḄỌ ḅe.

¹⁴Inn, àrị ì opu kụrọ kẹ ịna bebe amakiri mẹ guluguluma ḅa. Anị kẹ fa tẹ yọ sọma ḅa, abajị-suku da ịkpa mẹ ḅụ saakị mu Ribila opu ama mẹ la ọgọnọ-jụ mẹ ḅụ, Izirẹlịapụ angarị gbọrụ anga sọ kẹ tọrụ gbarịma-a ḅara. Anịtẹso ḅẹḅọ-ḅẹḅọ nimi ḅa nimi ḅa mịnẹ yẹrị anie KỊNỊNYANAḄỌ ḅe.”