Read kalabari Danẹlị 11 Bible Online

Danẹlị 11 - kalabari bible

Danẹlị 11

¹Ori anie ḅarasụa na ḍụa na fịrị mẹ ḅara ḅụ sime ḅọ.

²Tẹ mịọkụ à ḍuko ọ́ pịrị ḅẹ-yearị ye mẹ karakara yee. Enjẹlị ḅe ḅẹẹm, “Jen tẹra amadapụ Pasịya da ḅa, ini karama ḅọ ịn ḍuka ma-ḅo ḅa, anie ngọ-kọn osi apụ mamgba nẹngị ḅarị ḅọ. Ọ̀ kụrọ na pẹrẹ na ḅo arịḅẹ opu kiri la sakị ò Girisi ama-da yọ na dama ḅa.”

³Anịtẹso kụrọ tẹmẹ nyana amadaḅọ tolu-sịẹ ḅa. Ò tomikiri mẹ ḅẹ opu anga da ḅa, tẹ ò ḅii-ye ḅii-ye mịẹ ḅa.

⁴Kụma ọ̀ kụrọ ḅo anị la ḅẹ opu anga la sakị ọ̀ daarị tomikiri mẹ inia pakịrị ḍie ḅa. Ori ama-da ọrụ ḅụ paka-a amadapụ ò kiri ọkị tẹ ḅẹrẹ tọn ḅa, kụma ini ọ̀ nyana kụrọ nyana ḅịa.

⁵Ijiputi ḅẹ amadaḅọ ḅe ḅo kụrọ ḅa. Anị sime-ḅara sime-ḅara sọ ori ọmụ-alapụ ma ḅẹ gbọrụḅọ kụrọ ọ̀ nẹngị tẹ kụrọ ori ama-da yọ nẹngị ama-da yọ ḅụ ḅẹrẹtọn ḅa.

⁶Kụra-kụra ḅọrọtẹ so, Ijiputi ḅẹ amadaḅọ ḅe Siriya ḅẹ amadaḅọ ḅe na ḅarasụa jụmọ-jụmọ pịrị ḅịḅị-kẹ-ogbosọ nyana ḅa, tẹ ori ẹrẹḅọtụḅọ kẹ ọ̀ pịrị sime ḅa. Kụma ḅịḅị-kẹ-ogbosọ mẹ sime-alama ḅịa, tẹ árị na, á di na, á tụḅọ na, tẹ fịrịmẹnjịapụ ma tẹ árị na mu apụ ma kẹ á ḅụ sụa, fịị fama ḅa.

⁷Sakị ḅọrọtẹ soarị-soarị, árị amịnapụ ḅẹ gbọrụḅọ amadaḅọ sọ ḅa. Ori owu kẹ Siriya ḅẹ amadaḅọ ḅe ọmụ-ogbo mẹ paka tẹ ịna kụrọnị-anga sọ-mu tẹ ịn nẹngịma ḅa.

⁸Ịna atamụnọ ma afụḅara ma na golu na seleḅa na tẹ kẹ tọn ḅara wẹrị ịna atamụnọ pịrị aị ma ori ọkị pịkị so Ijiputi mu ḅa. Ịn tọnwa akụra kẹ dein ḅụ sime tẹso,

⁹Siriya ḅẹ amadaḅọ ḅe ọmụ kẹ Ijiputi koro ḅa, kụma ini in dee pịkị ḅa.

¹⁰Siriya ḅẹ amadaḅọ ḅe owiapụ-awọmẹ ḅụụ-tẹlẹma ọmụ pịrị tẹ gbọrụ opu ọmụ-ogbo kobiri ḅa. Ini ḅẹ gberie seri-minji owi sọ ḅara kẹ mu owu kẹ ini na fịya-a apụ kụrọnị-yọ paka ḅa.

¹¹Ori ịganị ḅụ Ijiputi ḅẹ amadaḅọ ḅe owu kẹ Siriya ḅẹ amadaḅọ paka tẹ ori opu ḍụḅa ḅakatẹ ọmụ-ogbo kun ḅa;

¹²Ori ori owu-ḅara-iḅi mẹ kẹ ḅụụ-tọn ḅa pịkị ọ̀ ḅaa tẹ tọnwa ọmụapụ ma na, kụma ori owu-ḅara-iḅi nyana tọrọkọ-tọrọkọ mu ḅịa.

¹³Siriya ḅẹ amadaḅọ ḅe pịkị so tẹ tarị ọ̀ nyana ọmụ-ogbo mẹ nẹngị ye kobiri ḅa. Karakara sakị mẹ ḅo sakị, ori opu ọmụ-ogbo kẹ pịkị-ḅo ḅa, nyana na-iḅi ye iḅi ye nyana tẹ ọmụ-ogbo.

¹⁴Anịtẹso tọnwa-apụ kọngọ-kụrọma Ijiputi ḅẹ amadaḅọ ḅe pịrị ḅa. Danẹlị, ja guda-guda atomi tẹ ị́ sịẹ ḅẹ apụ, ini ẹrị tẹ ịkịan ẹrẹsị kọngọ kụrọma ḅa, kụma owu ịna ḅara si ḅa.

¹⁵Mie ḅụ Siriya ḅẹ amadaḅọ ḅe gbọrụ kụrọnị ama ọkị ḅẹ tẹ ọmụapụ kẹ anị gbori-ikelema tẹ anị ọkị ḅa. Ijiputi ọmụapụ ḅarị owu mẹ sọọ tọrọkọ mu ḅịa; ịna ḅụ iḅitẹịn-apụ kịngẹ sọ ḅarị ịnyọ nyana ḅịa.

¹⁶Ama ọkị ḅẹ ḅo Siriya ḅẹ ḅọ ḅe ịn kẹ ọ̀ ḅụụ-ḅẹlẹ-ḅẹlẹ ḅara mịẹ ḅa, ini ori na kuḅu dama-a ḅara ḅụ. Ori nwẹnị Minini pịrị Amakiri mẹ ḅụ sịẹsime tẹ gbọrsịḅị anị ḅụ kụrọ nyana ḅa.

¹⁷Siriya ḅẹ amadaḅọ ḅe ò bebe ọmụ-ogbo kẹ saakị paka ọmụ mu ḅẹ ye tọn ḅa. Anịtẹso ori ori na fịya-a ḅọ ḅe daarị yọ mẹ kan gotẹ ori ori na gbọrụ ḅụ sime ḅẹ ḅịḅị-kẹ-ogbosọ nyana tẹ ọ̀ tụḅọ kẹ ọ̀ pịrị sime ḅa; kụma ọ̀ mịẹ ḅẹ tẹ tọn ye mẹ ọ̀ ḅara-ḅẹsọ ḅịa.

¹⁸Anie ḅọrọtẹ so ori owu kẹ tọrụ akaka simearị ama ma paka tẹ arị ḅụ tọnwa aị nẹngịma ḅa. Kụma jen sịẹ ḅẹ sịḅịdaḅọ ọ̀ nẹngịma tẹ ori Opu ẹkwẹn ḅo kuno ḅa; karakaraye ḅụ ò Siriya ḅẹ amadaḅọ ḅe Opu ẹkwẹn mẹ pịkị ori ọgọnọ gbana ḅa.

¹⁹Amadaḅọ ḅe pịkị so ò soku-ḅẹ ama ḅẹ kụrọnị-ayọ mu ḅa, kụma owu ọ̀ ḅara sii ḅa, tẹ anie ò kunoma sọ ḅa.

²⁰Jen amadaḅọ ò pono ḅo ḅa, anie fịrịmẹnjị-opuḅọ kẹ fịrịma mu tẹ takịsị-takịsị kẹ tomi ma ponoma tẹ tọnwa ngọ nyana ọ̀ daarị yọ mẹ pịrị ḅẹ ḅọ. Kpụlụ sakị ḅụ anị amadaḅọ ḅe ini ọ̀ ḅaa ḅa, ama nimi ḅara-a, pịkị ọmụ ḅio-a.

²¹Enjẹlị ḅe paa ḍuko finji ma mum: “Osi ḅọ da tẹ soarị-soarị ḅo Siriya da ḅarị ḅọ ḅe si tomḅọ sọ ḅa, anie ama-da sime pịrị-a ḅọ, kụma ọ̀ kịnị tọrụ kẹ ḍiki-a ḅara kẹ epele ḅara kẹ ama-da kụrọ pụkọ-ọkị ḅa.

²²Ori na tụḅụrụḅọ tụḅụrụḅọ, anị ḅọrọ Tamụnọ Sịḅịda-Agbamịẹḅọ ḅe sọ, ori mḅọ kpọrọrọ anga pịrị tẹ mḅọ fama ḅa.

²³Gbọrụ ḅụ sime ḅịḅị-kẹ-ogbosọ ḅụ ọ̀ ḅọrọ tẹ obiri osi asịẹ ma sịn ḅa, tẹ ọ̀ kụrọ tọrọkọ-tọrọkọ mu ḅa, karakaraye kala sịẹ kịngẹ mie ọ̀ daarị sọ.

²⁴Ori ngọ Kọn-sara wararị ibe ọkị ḅẹ tẹ sọ-mu ḅa ịna ḅụụ nimi-a ḅara ḅụ, tẹ jene-jene ori elemu-aḍapụ amụ mịẹ-a aị mịẹ ḅa. Anịtẹso ori ọmụ ḅio ọ̀ fọịn ḅo aị ma na ọ̀ nyanaḅọ jaị na ḍie ò ḍukamẹnjịapụ pịrị ḅa. Ọ̀ tọn pẹlẹ-pẹlẹ tẹ owu kẹ kụrọnị-ayọ paka ḅa, kụma ala-a ọ̀ sakị ḅo kuno ḅa.”

²⁵Ò ḅiokpọma tẹ gbọrụ opu ọmụ-ogbo mị pakama-ḅo tẹ kẹ owu kẹ Ijiputi ḅẹ amadaḅọ ḅe paka ḅa, anie tẹlẹma tẹ gbọrụ ḍụḅa ḅụra tẹ kụrọ lamatẹ ọmụ-ogbo kẹ ori na bịama ḅarị ḅọ ḅe. Kụma ori oḅori kẹ Ijiputi ḅẹ amadaḅọ sịn tẹ ye ori na iḅi ḅịa.

²⁶Ori sẹlẹtẹ ḅẹrẹ ḍuko ò toluma ḅẹ apụ mie ọ̀ fama ḅarịye. Ini ịna ọmụapụ ḅẹ tọnwa-apụ ḅaa ḅa, tẹ ori ọmụ-ogbo fa-fama ḅa.

²⁷Anịtẹso maa amadapụ ma lẹgị sime tẹ gbọrụ dẹbịlẹ suku ye fị ḅa, kụma in siye kẹ ḅiotọn tẹ iruo jụmọ-jụmọ pịrị ḅa. In ḅii ye ịn nyana ḅịa, anị ḅẹ sakị amụ ḅo-a ẹrẹsị.

²⁸Siriya ḅẹ amadaḅọ ḅe ọ̀ fọịn ḅo aị mamgba na pịkị so ama mu ḅa, tọn kụrọma wararị ọ̀ Tamụnọ atomi ma Tamụnọ-nimi-ḅara mẹ guluguluma ḅa. Ori ọ̀ ḅụụ-ḅẹlẹ ḅara mịẹ tẹ pịkị so ò soku-ḅẹ amakiri mu ḅa.

²⁹Sakị ḅọrọ tẹso, ò siin ọmụ kẹ Ijiputi koro ḅa, kụma mịẹ sakị ye jen ḅara sime ḅa.

³⁰Romu ḅẹ apụ ma minji arụ kẹ ḅo tẹ ori na bịama tẹ ọ̀ tẹmẹ-naịn-naịnma ḅa. Anịtẹso ọ̀ pịkị tẹ ịganị ḅụra tẹ ḅụụkụrọma tẹ Tamụnọ atomi ma Tamụnọ-nimi-ḅara mẹ guluguluma ḅẹ ḍọkị ḅa. Anị Tamụnọ-nimi-ḅara mẹ sịkị tẹ apụ kẹ ò toluma ḅara mie ò ḍiki mịẹ ḅarị ḅara.

³¹Ori ọmụapụ ma ḅe jen-apụ Tamụnọ-warị mẹ pilema ḅa. Ini ene-ḅaaene-ḅaaene ḅẹ agba ma dasịẹma tẹ “Ḅalafama Sịḅị-jịrịmaye Mẹ” saakị sịẹma ḅa.

³²Oḅori kẹ ịn sịn ḅụ ọ̀ mịẹ tẹ anị kụra ḅio amịna Tamụnọ-nimi-ḅara sịkị tẹ apụ ma ọ̀ jụ sọ ḅa, kụma Tamụnọ ḍukamẹnjịarị apụ ma owu paka ḅa.

³³Tomi ma ḅẹ ye-nimi sịḅịdapụ ma ịna nimi kẹ tọnwa ja apụ na ḍiya ḅa. Kụma sakị mu ma muarị sakị ini ịna ḅụ jen-apụ ḅaa ḅa ọmụ ḅio anịanịa ịn dọkịma ḅaa ḅa, tẹ jen-apụ furu tẹ ịn kẹ ikoliapụ sọma ḅa.

³⁴Ḅaa mẹ mịẹ ma-muarị sakị, Tamụnọ atomi ma ḅarasụa kalịye nyana ḅa, karakaraye ịna ḅụ sọ ḅarị jen-apụ ini nyana ḅẹ ye gotẹ ọkọ mịẹ ḅarị sọ.

³⁵Arị ye-nimi sịḅịdapụ ma ḅẹ jen-apụ ini ịn ḅaa ḅa, kụma miemẹ dogi-ḅo ḅarịye anie tomi ma ḅo kpaịn ḅa. Miemẹ mịẹ ma-mu nwenii kunoma mẹ ḅo ḅa, Tamụnọ tọn wẹrị wararị sakị mẹ.

³⁶Siriya ḅẹ amadaḅọ ḅe ọ̀ ḅụụ-ḅẹlẹ ḅara mịẹ ḅa. Ọ̀ ḅụụ-boma ḅa mịnẹ ọ̀ tamụnọ nwẹn-sịn tẹ tamụnọ nẹngịm, ori ḍụḅa Tẹịn Tamụnọ ḅe sọ nẹngịm. Ori inetẹ miemẹ mịẹ nwenii Tamụnọ fomu-ḅara kẹ ọ̀ pịrị ḅẹ sakị la ḅa Tamụnọ ye so-a ḅara kẹ ọ̀ tọn ḅara mịẹ ḅa.

³⁷Amadaḅọ ḅe ori elemu-aḍapụ ma fịrịmẹnjị pịrị tamụnọ ḅe ḍiki-tọrụsin ḅa, pịkị ereme ma ḅẹlẹmarị tamụnọ ḅe sọ. Ye paka ḅara ḍuko ḅụ, ọ̀ tamụnọ goḅọ-goḅọ ḍiki-tọrụsin ḅa, ò kuroma ḅa mịnẹ ori ịna ḅụ nẹngị-a ḅọ ofori ẹrẹsị.

³⁸Anie nakara, kụrọnị-ayọ koko kpaịnmarị tamụnọ ḅe mie ọ̀ kụn ḅarịye. Ọ̀ nwẹnị golu na, seleḅa na, juwẹlị nwẹn-sịn aị na, opuma ye la ḍiepịrị-aị na kẹ jene-jene ori elemu-aḍapụ amụ sunsin pịrị-a oru-tamụnọ pịrị ḅa.

³⁹Ori akụrọnị-ayọ ma ḍụa-ḅọrọma ḅụ ọ̀ jen asịẹ ḅẹ tamụnọ tẹkẹarị apụ kẹ mịẹ ḅụ suu ḅa. Ḅẹrẹtọnḅọ ḅara kẹ ori ọkị ḅarị apụ ma ọ̀ kụn kẹ ịn pịrị ḅa, ori ịn kẹ opu fịrị-kiri ḅụ koroma ḅa, tẹ gbẹẹ-ye ḅara kẹ kiri kẹ ịn pịrị ḅa.

⁴⁰Siriya ḅẹ amadaḅọ ḅe kunoma sakị kẹlẹ kọnm ḅo la ḅarị sakị ḅụ, Ijiputi ḅẹ amadaḅọ owu kẹ ọ̀ paka ḅa, tẹ Siriya ḅẹ amadaḅọ ḅe ori na bịama ḅa ọ̀ kụrọ mamgba ḅụ, kiri mẹnjị ọmụ-arụ amẹẹ, asụ amẹẹ na tọnwa minji arụ na kẹ ọmụ mẹ gbin ḅụ. Ori ọmụ kẹ tọnwa asịẹ koro ḅa, opu minji seri sọ ḅara kịka ḅara.

⁴¹Minini pịrị Amakiri mẹ kịngẹ sọ ori ọmụ kẹ koro tẹ kịnị maa ẹndẹ oyi finji finji, oyia akiri oyia akiri, ḅaa ḅa, kụma Idọmụ, Mohabụ na Amọnị ḅụ kirikọn-apụ ma na mangị-so ḅa.

⁴²Ori ọmụ kẹ arị asịẹ mamgba koroarị sakị Ijiputi kịngẹ sọ ọ̀ wẹrịso ḅịa.

⁴³Ori Ijiputi kẹ koko ḅọị ḅụụ wẹrịma golu na seleḅa ngọ ma ọkị so ḅa, pịkị anị nyana ja yela lama aị sọ. Ò Libiya na Sudanị na nẹngịma ḅa.

⁴⁴Anịtẹso ịrụa-saakịarị-anga na ọgọnọ-jụ ḅụ na ḅoarị ịba ọ̀ tẹmẹ-naịn-naịnma tẹ ori “à fịị tẹẹ e!” ḅẹ ḅara kẹ owu sọ tẹ tọnwa-apụ ḅaa ḅa.

⁴⁵Ori ọ̀ ḍụḅa-ḅụra tẹ ama-da akpụrụ-awarị ma kẹ abajị mẹ na Tamụnọ-warị mẹ sịẹ wararị tụndụ mẹ na ogboku pike ḅa. Kụma ọ̀ fịị ḅa, ḅarasụa ọ̀ pịrị ḅọ ofori ḅara ḅụ.