Read kalabari Danẹlị 5 Bible Online

Danẹlị 5 - kalabari bible

Danẹlị 5

¹Gbọrụ ḍin ḅụ, Amadaḅọ Bẹlịsaza nwẹnị maa ẹndẹ oyia asi finji opu fịrịmẹnjịapụ sịn, in ḅo ori na opu kopini afịaị fịị, ịn nwẹnị pịkị ori na iru ḅuu gboloma.

²Ịn mị-ḅara kẹ ḅuuarị ogbo, Bẹlịsaza nwẹnị tọn mịnẹ in mu golu-golu na seleḅa-seleḅa na kẹ tẹmẹ wararị amọngị ma na panị ma na tẹ ọ̀ ḍa Nebukadineza Jeruselemu Tẹkẹ-warị ḅio dogi-so aị ma kẹ ḅoo. Ori amadaḅọ ḅe arị fịrịma ḅom, gbala ori na, ori opu fịrịmẹnjịapụ na, ori ereme na, ori oloapụ na arị kẹ minji ḅuu ḅẹm ẹrẹsị.

³Anị-gbọrụ-kirikiri, ịn mịna golu-golu amọngị ma na panị ma na kẹ ḅom, tẹ ịn nwẹnị arị kẹ iru sụa-sụa ḅuu.

⁴Ịn nwẹnị in golu na, seleḅa na, ojo na, ikulele na, ḍụḅọ na pịkị ẹkẹkẹ-pakịrị kẹ tẹmẹ atamụnọ ma tokini.

⁵Bẹkẹ-ḅara-ḅụ, tomina aḅara-tụngbalị nwẹnị paka-ḅo tẹ sakị amada-warị ḅẹ warị-anga mẹ ọgọnọ ye kẹẹ, anị yọ mẹ tẹ tọnjọ bele mẹ gbọrsịḅị ḅịya pakarị anga mẹ. Tẹ amadaḅọ ḅe tomḅọ ḅara ye kẹẹarị ye mẹ ẹrịm.

⁶Ọ̀ tọrụkuḅu anị gbọrụ sakị ḅụ epe ḅịyam tẹ opu ḅalafa ḅo ọ̀ la ḅara gotẹ ori aḅụọ-kụkụ nwẹnị jike.

⁷Ọ̀ nwẹnị oloku tẹ ḅẹẹ mịnẹ kịnị fọnya-fọnya mu ibiam-tiapụ ma na, arịapụ ma na pịkị so-ḍikiapụ ma na sịn ḅoo. Ịn sọ ḅo tẹso, amadaḅọ ḅe nwẹnị ịn ḅẹẹ, “Mị kẹẹ ye mẹ go, pịkị anị fieye ḍuko ị̀ pịrị ḅọ goḅọ-goḅọ, ịn amadaḅọ vọrọrọ-kapa kẹ mḅọ sụa ḅa, pịkị kpọma ye la golu-golu pọkọsụaye kẹ mḅọ pọkọ sụa ḅa, tẹ mḅọ tẹrẹị karama opu ḅọ sọ ḅa mị sịẹ mẹ ḅụ.

⁸Ama-da ḅeri-nụnụapụ ma ọ̀ tọrọkọ ḅom, kụma ịna ogboku gbọrụḅọ-sọ inetẹ kẹẹ ye mẹ go-a, anịanịa anị puu-finji ọ̀ pịrị.

⁹Ọ̀ ḅalaḅala ḅụ, Amadaḅọ Bẹlịsaza tọrụkuḅu nwẹnị epe ḅịa tarị ḅara nẹngị, tẹ ori opu afịrịmẹnjịapụ ịn mịẹ ḅẹ gberie-sọ nimi-a.”

¹⁰Amada-iyingiḅọ ma amadaḅọ ḅe na ori opu afịrịmẹnjịapụ ma na ye-yọ fiemarị ye mẹ naam, tẹ kopini fị warị mẹ ḅio so mum. Á ḅẹẹm, “Gburo-gburo Opuḅọ, ḍumo gbamasoo! Sisi ḅụụ ḅalaḅala nyana tẹ ị́ tọrụkuḅu epe ḅịa ma.

¹¹Ị́ ama ḅio gbọrụ owiḅọ emi tẹ oru-atamụnọ ma kịrị-ḅeletẹ kụrọ kẹ pịrị wararị ḅọ. Ị́ ḍa ama-daarị sakị, ḅị tomḅọ ḅe aka na, ye lekiri ḅo na pịkị nimi na kẹ tomi ḍiem, gbalaa oru-atamụnọ ma nimi nyana ḅara.

¹²Kịrị-ḅeletẹ sịḅịḅio ọ̀ nwẹn nyanam, tẹ nimi na aka na kẹ ḍawọ puu-finjiarị, egberi na ḅọị aị na sọkịrị pakama-ḅoarị; anị ẹrẹsị ḅị Danẹlị ḅe fịrịma ḅoo, amadaḅọ ḅe Bẹlịtisaza ẹrẹ kẹ koro ḅọ ḅe, tẹ ọ̀ mịna aị ma fiearị ye ḍuko ị́ pịrị ḅa.”

¹³Ịn nwẹnị anị-gbọrụ-kirikiri Danẹlị kẹ amadaḅọ ḅe tọrọkọ ḅo, tẹ amadaḅọ ḅe nwẹnị ọ̀ ḅẹẹ, “Ị́yẹrị anie Danẹlị ḅe aro, anị Juu-ḅẹ omoniḅọ ḅe tẹ ị̀ ḍa Juda sịẹ ḅụ ọkị-ḅo ḅe?

¹⁴À naa tẹ mịnẹ oru-atamụnọ ma kịrị-ḅeletẹ kụrọ ị́ ḅụụ ḅụ emi tẹ ị́ pịkị aka na, ye lekiri na, nimi na nyana wararị.

¹⁵Ḅeri-nụnụapụ ma na ibiam-tiapụ ma na ịn nwẹn kẹ ḅom ịn mị kẹẹ ye mẹ go tẹ pịkị anị fieye puu-finji ị̀ pịrị, kụma in inetẹ anị fieye lekiri ḅo-a.

¹⁶Mịọkụ à naa tẹ mịnẹ í inetẹ ye fieye ḍọkị-ḅo ḅa pịkị ḅọị aị puu-finji ḅa. Ị́ inetẹ mị kẹẹ ye mẹ go tẹ anị fieye puu-finji ị̀ pịrị ḅarị ḅẹḅẹ, ịn amadaḅọ vọrọrọ-kapa kẹ ị́ sụa ḅa, pịkị kpọma ye la golu-golu pọkọsụaye kẹ ị́ pọkọ sụa ḅa, tẹ ị́ tẹrẹị karama opu ḅọ sọ ḅa mị sịẹ mẹ ḅụ.”

¹⁷Danẹlị pakịrịm, “Yee ḍiepịrị-aị ma sime ị́ pịrị, anịanịa kẹ jụmọ pịrịị. À kẹẹ wararị ye mẹ go ị́ pịrị ḅa, Gburo-gburo Opuḅọ, tẹ anị fieye ḍuko ị́ pịrị ḅa.”

¹⁸“Kụrọmamgba-Nyana Tamụnọ ḅe ị́ ḍa kẹ gburo-gburo amadaḅọ sọmam tẹ ebube na opu na kẹ ọ̀ pịrịm.

¹⁹Ò gburo-gburo ḅara gotẹ tomikiri mẹ ḅụ simearị sịẹ-sịẹ mamgba na, kpo-kpo mamgba na pịkị ḅẹlẹ kịrị-kịrị mamgba na ḅẹ atomi ma ò ḍiki-ḅalafa tẹ sịḅị-tuu ọ̀ pịrịm. Ọ̀ kịnị ḅaa ḅẹ-ḅiiarị ḅẹḅẹ, ọ̀ ḅaam; ọ̀ kịnị ḍumoma ḅẹ-ḅiiarị ḅẹḅẹ, ò ḍumomam. Ọ̀ kụn, anịanịa ḅụụ-jịrị kẹ pịrị ḅẹ ḅọ goḅọ-goḅọ pịrịm.

²⁰Kụma ò ḅo ọ̀ ḅụụ-gelema tẹ kụrọ-sịḅị sụa tẹ pịkị mbasị sakị, in ori emine ọgọnọ ọ̀ fọnọ-sịịm tẹ ọ̀ nwẹnị ḅarị kụn nyana-a ḅọ sọ.

²¹In ò dee-pakamam tomi ogboku ḅụ, tẹ ò ḅioḅẹngbọ pịkị-ḅo nama ḅioḅẹngbọ kịkam. Ò piri-ḅio-ḅẹ anama na angam, tẹ nambulo osuka fị ḅara kẹ osuka fịm, tẹ gberie-sọ ọ̀ sịḅị igirigi kikima-a ḅara kẹ etela-ogbo monom. Anị ḅẹ kunoma, ò mininim mịnẹ Kụrọmamgba-Nyana Tamụnọ ḅe anie tomina asịẹ ma ḅụ kụrọ kọn-arị ḅọ, tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa.”

²²Kụma ị́yẹrị, ọ̀ tụḅọ, amụ ị́ ḅụụ-iderima-a, karakaraye ị́ mie-mẹmgba nimi wararị nwẹn ḅẹẹ sọ.

²³Ị́ kọngọ-kụrọma So-ḅio ḅẹ KỊNỊNYANAḄỌ ḅe pịrịm tẹ ọ̀ Warị ḅio ịn fọịn ọkị amọngị ma na panị ma na ọkịm. Ị́yẹrị na, ị́ opu afịrịmẹnjịapụ na, í ereme na, í oloapụ na arị kẹ iri ḅuu-ḅuu tẹ nwẹnị in golu na, seleḅa na, ojo na, ikulele na, ḍụḅọ na pịkị ẹkẹkẹ-pakịrị kẹ tẹmẹ atamụnọ ma tokinim — oru-atamụnọ tẹ inetẹ ye ẹrị-a anịanịa ye naa-a, pịkị gberie-sọ nimi-a atamụnọ ma.

²⁴Miemẹ gotẹ anie Tamụnọ mị-ḅara mẹ fịrịma tẹ mịna ẹkwẹn-aḅịḅị ma kẹẹ ye.

²⁵Miemẹ anie kẹẹ ye: “Kịẹn-ḅịḅị, kịẹn-ḅịḅị, iku ye, ḍiya-aị.”

²⁶“Miemẹ anie anị fiearị ye: kịẹn-ḅịḅị, Tamụnọ ị́ ama-da ene ma kịẹn tẹ arị kẹ ḅo kunoma la tẹẹ;

²⁷iku ye, in í iku-ḅara tọn ḍiki tẹ ẹrị tẹ mịnẹ í feke-feke ḅakam;

²⁸ḍiya-aị, ị́ ama-da mẹ in anị ḍiya tẹ anị kẹ Midiya na Pasịya apụ na pịrị tẹẹ.”

²⁹Anị-gbọrụ-kirikiri Bẹlịsaza tọn ọ̀ fịrịmẹnjịapụ pịrịm mịnẹ ịn amadaḅọ vọrọrọ-kapa kẹ Danẹlị sụa, tẹ pịkị kpọma ye la golu-golu pọkọsụaye kẹ ọ̀ pọkọ sụaa. Ọ̀ nwẹnị tẹrẹị karama opuḅọ kẹ ọ̀ sọma sịẹ mẹ ḅụ.

³⁰Anị gbọrụ ḍin mẹ ḅụ ịn nwẹnị Bẹlịsaza, Babịlonịya amadaḅọ ḅe ḅaam,

³¹tẹ Darịyọsị Midi ḅẹ ḅọ ḅe, anie sịḅị ḅụ kụra atesi maaịn finji ḅọrọ tẹ ḅọ ḅe, ama-da kụrọ mẹ pụkọ-ọkịm.