Read kalabari Danẹlị 6 Bible Online

Danẹlị 6 - kalabari bible

Danẹlị 6

¹Darịyọsị nwẹnị tọn-pẹlẹ mịnẹ ọ̀ gọvịna sonioa si tọn tẹ ini ọ̀ daarị bebe tomikiri mẹ ḅẹ pakịrị-pakịrị ḅụ sịḅịda ḅẹm.

²Kẹ anie ḅụ sụa ḅụ ọ̀ pịkị Danẹlị na ja maa apụ na tọn ini tọrụ kẹ gọvịna apụ ma ḅụ wẹrị, mịẹ tẹ amadaḅọ fa nyana ḅịa ḅara.

³Ala-a sakị ḅụ Danẹlị ḅo iḅi osi sịḅịdapụ ma na gọvịna-apụ ma na nẹngịm, ọ̀ kịrị-ḅeletẹ aka nyana tẹ kọrịnama kọrị ḅara ẹrẹsị. Anie mịẹtẹ amadaḅọ ḅe kuromam ori ọ̀ kẹ ọ̀ daarị bebe tomikiri mẹ ḍikiḍikiḅọ sọma.

⁴Anịtẹso osi ye-ḍikiḍikiapụ ma ma gọvịna apụ ma na mịẹ tẹ siye kẹ Danẹlị sịḅị-sẹịn ḅẹ ḅara ḍọkịm ọ̀ wẹrị Darịyọsị daarị tomikiri mẹ ḍikiḍikiarị ḅara ḅụ, kụma ini inetẹ siye ḍọkị-ẹrịa, anie Danẹlị ḅe ḅioḅẹngbọ kẹ ḅụụ ḅụ gbana na-iḅi ḅara sime tẹ pịkị kura-aye mịẹ-mịẹ-a, anịanịa kịnị mingirima ma tomḅọ-a ẹrẹsị.

⁵Ịn nwẹnị jụmọ-jụmọ ḅẹ, “Wa kẹ Danẹlị sịḅị-sẹịn ḅẹ siye wa ẹrị ḅịa, anị ḅọrọ ọ̀ Tamụnọ nimi ḅara gboloma ye ḅarị ḅoto.”

⁶Mie ḅụ ini amadaḅọ ḅe dama-mu tẹ ḅẹẹm, “Ama-da Darịyọsị, Í Opu ḅụ, ḍumo mu ḅẹẹ-sakị ḅẹẹ-sakị la!

⁷Wamịnị-mgba tẹ ị́ daarị tomikiri mẹ ḅụ ḅẹrẹtọn kiri ḅụ simearị apụ — ye-ḍikiḍikiapụ ma, gọvịna apụ ma na osi fịrịmẹnjị-opuapụ ma na ḅịḅị-kẹ-ogbosọm mịnẹ Ị́yẹrị Amada-opu-nyanaḅọ oloko sụa tẹ anị mịẹ kụrọma lama. Oloko sụa kụrọma mịnẹ ḍin suei sakị ḅụ gbọrụḅọ-sọ ịn ḍụkụ mḅọ pịrị-a mịnẹ mḅọ gbọrụ tamụnọ sọ anịanịa tomḅọ ḅara ye ḅii ḅịa, Ị́yẹrị Amada-opu-nyanaḅọ ḅara sikima. Mị oloko mẹ kanḅọ-kanḅọ ini mḅọ kẹ ọkụkụ ḅin wararị olulu mẹ ḅio gbin suu.

⁸Mie ḅụ yee Ị́yẹrị Amada-opu-nyanaḅọ mị oloko mẹ sụa tẹ ḅara kẹ ḍiri mẹ ḅụ sụa, tẹ anị kụrọ nyana ḅa, Midiyapụ ma na Pasịyapụ ma na oloko ḅara ḅụ, anie inetẹ ḍima ḅịa ye mẹ.”

⁹Anịtẹso Ama-da Darịyọsị ḅara kẹ oloko ḍiri mẹ ḅụ sụam.

¹⁰Danẹlị ḅo nimi tẹ mịnẹ amadaḅọ ḅe ḅara kẹ oloko ḍiri ḅụ sụatẹ ḅẹ sakị ò so warị mum. Ò ḅekin-warị ọgọnọ-jụ ḅụ Jeruselemu da ikiḅa-ḅọkọ simem. Anị anga, sakị mamgba ọ̀ mịẹ tẹ ḅara ḅụ, ò finji sara wararị ikiḅa-ḅọkọ ma akaka kparakị tẹ Tamụnọ tẹkẹm, ene tẹra sakị tẹra sakị.

¹¹Si kẹ Danẹlị tọn apụ ma ọ̀ Tamụnọ tẹkẹarị ye kẹ elekima sụatẹ so,

¹²inimgba gbọrụ ḅụụ ḅụ amadaḅọ ḅe dama-mu tẹ ḅẹrẹ kẹ Danẹlị sịḅị-sẹịnm. Ini mẹẹ, “Ị́yẹrị Amada-opu-nyanaḅọ, ị́ oloko sụa tẹ ḅara kẹ anị kẹẹm mịnẹ ḍin suei ḅụ ị́ ḅara sikima tẹ, ḅẹẹ tamụnọ tamụnọ ḅara ye ḅiiḅọ-ḅiiḅọ ini mḅọ kẹ ọkụkụ-ọkụkụ ḅin wararị olulu ḅio gbin suu.” Amadaḅọ ḅe nwẹnị pakịrị, “Inn, kụrọtẹ oloko, Midiyapụ na Pasịyapụ na oloko, anie inetẹ ḍima ḅịa ye mẹ.”

¹³Anịtẹso ini amadaḅọ ḅe ḅẹẹm, “Danẹlị, Juda ḅụ kun-ḅo apụ ma ḅẹ gbọrụḅọ, Ị́yẹrị Amada-opu-nyanaḅọ ḅe mangịma-a, anịanịa ị́ sụa oloko mẹ poki tẹ mịẹ. Gbarịma-a ḅara ḅụ ene tẹra sakị tẹra sakị ọ̀ nwẹn kẹ tẹkẹarị.”

¹⁴Amadaḅọ ḅe mie naa sakị, ọ̀ ḅụụ-ḅalaḅala tẹ ori ori ine-ḅara ine-ḅara mịẹ tẹ Danẹlị pụkọ-pakamaḅo ḅẹ ḅara ḍọkịm. Ọ̀ paa ḅụụkụrọma nwenii ịrụa warị sọm.

¹⁵Anịtẹso tomi ma pịkịma amadaḅọ ḅe dama-ḅo tẹ ọ̀ ḅẹẹm, “Ị́yẹrị Amada-opu-nyanaḅọ, í nimi wararị mịnẹ Midiyapụ na Pasịyapụ na oloko ma sime-ḅara ḅụ, gbọrụ oloko tẹ amadaḅọ ḅe sụa tẹ inetẹ ḍima ḅẹ ye ofori.”

¹⁶Mie ḅụ amadaḅọ ḅe tọnm in mu ò kun, tẹso, ini ọ̀ kẹ ọkụkụ-ọkụkụ ḅin wararị olulu mẹ ḅio gbin suum. Ọ̀ nwẹnị Danẹlị ḅẹẹ, “Yee ị́ Tamụnọ, tẹ ị́ ḅioḅẹngbọ kẹ ḅụụ ḅụ gbana na-iḅi ḅara kẹ fịrịmẹnjị pịrịarị ḅọ ḅe ị́ pụkọ-pakamaḅo.”

¹⁷Ịn ḍụḅarị kẹ olulu mẹ ḅịḅị kikimam, tẹ amadaḅọ ḅe ori ama-da elekima kẹ ḍụḅarị mẹ ḅụ sụam, pịkị ori opu atomi ma elekima sọ, mịẹ tẹ gbọrụḅọ-sọ inetẹ Danẹlị pụkọ-pakamaḅo ḅịa ḅara.

¹⁸Anịtẹso amadaḅọ ḅe pịkị-so amada-opu-warị mẹ mu tẹ bebe ḍin mẹ ḅụ mono-a ḅara kẹ simem, yefị-a anịanịa gbọrụ tọrụ-ḅẹlẹma ye sọ ofori ḅara.

¹⁹Ene ḅaa ḅụ amadaḅọ saakị tẹ fọnya-fọnya olulu mẹ mum.

²⁰Ò mu anịanga la sakị ò ḅio-sẹsẹ ḅara kẹ sịnm pakamam, “Danẹlị, ḍumo wararị Tamụnọ ḅe fịrịmẹnjịḅọ! Í ḅioḅẹngbọ kẹ ḅụụ ḅụ gbana na-iḅi ḅara kẹ fịrịmẹnjị pịrịarị Tamụnọ ḅe ori inetẹ ị́ ḅọrọma, ọkụkụ ma aḅara-ḅio?”

²¹Danẹlị nwẹnị pakịrị, “Yee Ị́yẹrị Amada-opu-nyanaḅọ ḍumo gbamaso!

²²Tamụnọ ori enjẹlị fịrịma tẹ ori ọkụkụ ma aḅịḅị gbaịnm, mịẹtẹ in ye kẹ ị̀ lama ḅịa ḅara. Ò gotẹ miemẹ mịẹ ye ò nimim à mịẹ siye ofori, tẹ amụ à pịkị í iri-a ẹrẹsị, Ị́yẹrị Amada-opu-nyanaḅọ.”

²³Amadaḅọ ḅe ḍereku ḅụra tẹ tọnm mịnẹ ịn Danẹlị nụnụ pakama-ḅo olulu mẹ ḅio. Mie ḅụ ini ọ̀ nụnụ pakama-ḅo tẹ ẹrịm gbala-gbala ye ọ̀ la-a, ọ̀ Tamụnọ kẹ ḅiokpọmam ẹrẹsị.

²⁴Anịtẹso amadaḅọ ḅe tọnm ịn ḅẹrẹ kẹ Danẹlị sịḅị-sẹịn atomi mamgba kun, tẹ ini ịna tapụ na ịna awọmẹ na kẹ ịna ḅụ sụa gbin ọkụkụ-ọkụkụ ḅin wararị olulu mẹ ḅio suum. Tẹrẹmẹ ini ideri koro mu otolo mẹ suku-ḅio kiri la ọkụkụ ma ḍosi mu ịn zụ tẹ ịna mgbe mamgba anyịmam.

²⁵Anịtẹso Ama-da Darịyọsị ḍiri kẹ tẹ kẹ tomikiri ḅẹ asịẹ mamgba, tomi kịrị-kịrị ma na ẹkwẹn-ḅịḅị ḅịḅị ma na fịrịmam: “Àrị ọ́ sịnm!

²⁶Àrị oloko sụarị mịnẹ à daarị tomikiri mẹ ikelema-koro ḅụ, ọrụḅọ-ọrụḅọ Danẹlị Tamụnọ ḅe ḍiki-ḅalafa tẹ ọ̀ mangịma nyanam. “Ori anie ḍumo wararị Tamụnọọ, tẹ ọ̀ ḅẹrẹtọn mu ḅẹẹ-sakị ḅẹẹ-sakị la ḅa. Ori ama-da mẹ gbala-gbala gulugulu ḅịa, tẹ ọ̀ kụrọ gbala-gbala kunoma ḅịa;

²⁷Ọ̀ ḅọrọmarị, pịkị pụkọ-pakamaḅoarị; ọ̀ ḅụụ-gbiripuma-aị na ḅụụ-buama-aị mịẹarị So-ḅio na tomikiri na ḅụ. Ọ̀ Danẹlị ḅọrọmam ọkụkụ amẹẹ ọ̀ ḅaa ḅẹ ye ḅụ.”

²⁸Danẹlị lolom Darịyọsị ama-da sakị na Sayịrọsị Pasịya ḅọ ḅe sakị na ḅụ.