Read kalabari Danẹlị 7 Bible Online

Danẹlị 7 - kalabari bible

Danẹlị 7

¹Bẹlịsaza Babịlonịya da tarị kụra mẹ ḅụ à ḍawọm, tẹ ḍin mẹ ḅụ ịkịan ẹrịm. À ḍawọ mẹ kẹẹ koromam, tẹ mie à kẹẹ koroma ye mẹ,

²anị ḍin mẹ ḅụ àrị ẹrị ye ḅụ. Fẹrụ pakịrị-pakịrị mamgba ḅụ fie-fie ḅo abajị mẹ saramam.

³Inia mamataḅaye opu anama abajị mẹ ḅio paka-ḅom, jen-na jen-na kịka-a.

⁴Tarị ye ḅe ọkụkụ kịkam, kụma igo kịka tẹ maa apamba-sụam. À paa kweinma ḍikiarị ogbo ịn pamba ma anyịma siinm. Ịn nama ḅe saakị-gelema tẹ ọ̀ kẹ tomḅọ kịkama sịẹmam. Anịtẹso ịn tomina kuroma kẹ ọ̀ pịrịm.

⁵Maaịn karama nama ḅe tuu kịkam, ori ori ọḅụjụ ḅẹ maa ḅụọ ma kẹ sịẹ wararị ḅara. Ori aka maa ise ma ogbo ọ̀ tẹra agaga ḅẹ mgbe kpapụ sịẹmam, tẹ gbọrụ pọkọ ọ̀ ḅẹẹm, “Mu ma-muu, í ine-ḅara ine-ḅara kẹ nama pẹị!”

⁶À kweinma ḍikiarị ogbo, jen nama tolu-pakam. Ọ̀ kịka ye sịrị, kụma ori oḅukulo ḅụ ori ini apamba-sụam, feni apamba pembe aị, tẹ ini asịḅị nyanam. Ḍiki-tọrụ ḅụ ọ̀ kụrọ nyana ḅara simem.

⁷À paa Kireinma ḍikiarị ogbo ini karama nama tolu-pakam. Ọ̀ kụrọ nyanam, pịkị opuma ḅalafamam. Ori ọ̀ ḍụḅa-ḅụratẹ ikulele aka ma kẹ ò kun ye goyegoye tokuru kọsịmam, anịtẹso ori arị nanga ḅọrọm. Osi anama ma kịka-a ḅara ḅụ, inia ịfalị ọ̀ nwẹn sụam.

⁸À bio-bioma ịfalị ma ḍikiarị sakị, arị ẹrịm gbọrụ kala ịfalị osi-aị ma ogboku paka-ḅoarị. Anị anị kụra-ḅio sime-sime aị ma ḅẹ tẹrẹị pịọnị siinm. Mị ịfalị mẹ tomina atọrụngbọ na ḅịḅị na nyanam, tẹ ḅụụ-gelema ḅara kẹ ḅụụ-bomarị.

⁹À paa ḍikiarị ogbo ini emine-emine kẹ ọrụtọn ḅara koromam. Anịngẹ-kụraḅio ḍumo-sime ḅọ ḅe emine ma ḅẹ gberie ọgọnọ lẹgịm. Ọ̀ kapa kpootẹ eene minji ḅịya ḅara ḅịyam, tẹ ọ̀ sịḅị-ḅẹ-inume nwẹnị muno gbọrụmgbọ-sọ la-a afalafa kịkam. Ori emine, fongolo-korotẹ kirimẹnjị-aḅụọ ọgọnọ ḅụ anị sịẹm, tẹ fịnị arị ḅụ kọrị-kọrị kamam,

¹⁰tẹ fịnị-oloko anị ḅụ minji ọsụma-ọsụma pakamarị. Anị anga ḅụ kịnị maa ẹndẹ oyia asi finji-finji ḅẹ tọnwa akiri sime tẹ fịrịmẹnjị ọ̀ pịrị ḅẹm, tẹ kịẹnkịẹn-ọkụ-ofori atomi ọ̀ tọrọkọ sịẹsimem. Ḅẹrẹ-siri nwẹnị saakị, tẹ ḍiri ma nwẹnị finji.

¹¹À ḍikiarị ogbo, àrị inetẹ naam kala ịfalị mẹ paa ḅaịn-ḅaịn tẹ ḅụụ-bomam. À kweinma ḍiki sime sakị, ini karama nama ḅe ini ọ̀ ḅaam, tẹ ori oju-akpakpa mẹ kẹ vuru-vuruarị fịnị ḅio gbin suu dọkịma famam.

¹²Osi anama ma akụrọ ịna aḅara ini ọkị tẹ minini ịn pịrịm mịnẹ ịn paa ḍumo mu ịn kẹ ịn ḅẹ sakị la.

¹³À mịẹ ịkịan mẹ ẹrịarị sakị ḍin mẹ ḅụ, à tomḅọ kịkaye ẹrịm. Ọ̀ mẹnjị ị̀ dama-ḅoarị, oḅuto ori ikelema-koro wararị ḅara ḅụ, tẹ ò mu ḍumo mu ḅẹẹ-sakị ḅẹẹ-sakị laarị ḅo ḅe la tẹ ini ọ̀ kẹ ọ̀ pịrịm.

¹⁴Ịn kụrọ, kụn, na amada-kụrọ na kẹ ọ̀ pịrịm, mịẹ tẹ sịẹ-sịẹ mamgba ḅẹ atomi, tomi kịrị-kịrị na ẹkwẹn-ḅịḅị ḅịḅị na fịrịmẹnjị ọ̀ pịrị ḅẹm. Ọ̀ kụrọ sime mu ḅẹẹ-sakị ḅẹẹ-sakị la ḅẹm, tẹ gbala-gbala ori ama-daa ḅo kunoma ḅịa.

¹⁵Àrị ẹrị ịkịan ma kpọma ị̀ ḅalafama lamam, tẹ ị̀ ḅụụ-ḅalaḅala mu la jụ ḅakam.

¹⁶À mẹnjị iwo mu anịanga sịẹsime apụ ma ḅẹ gbọrụḅọ la tẹ ọ̀ ḅẹẹm ori anịmgba fie ye puu-finji ị̀ pịrị. Mie ḅụ ori anị fie ye ḍuko ị̀ pịrịm.

¹⁷Ọ̀ ḅẹẹm, “Mịna inia opu anama ma anie inia asịẹ tẹ tomikiri paka tẹ inia amadapụ daa ḅarị asịẹ.

¹⁸Tẹ Kụrọmamgba-Nyana Tamụnọ ḅe atomi ma ama-da kụrọ daa-ọkị tẹ anị ọlọ mu ḅẹẹ-sakị ḅẹẹ-sakị la ḅa.”

¹⁹Anịtẹso à ḅiim àrị ini karama nama ḅe gboloma ja aị nimi, anie osi-aị ma ḅẹ gberie-sọ na kịka-a ḅọ ḅe — ḅalafamarị nama ḅe tẹ amịna ojo imime ma na ikulele aka ma na kẹ ò kun apụ kọsịma tẹso, ịn nanga ḅọrọarị ḅọ ḅe.

²⁰Tẹ à ḅiim àrị ọ̀ sịḅị sime oyi ịfalị ma fiearị ye nimi, pịkị ịfalị mẹ tẹ ọḅụkọ kọn tẹ paka-ḅo ye mẹ tẹ tẹrẹị mịẹ tẹ arị ḅịkị ye mẹ. Anị tọrụngbọ na ḅịḅị na nyanam, tẹ ḅụụ-gelema ḅara kẹ ḅụụ-bomam. Anị ḅalafama osi-aị ma nẹngịm.

²¹À ḍikiarị ogbo anị ịfalị mẹ ọmụ kẹ Tamụnọ atomi ma paka tẹ ịn nẹngịmam.

²²Anịtẹso ḍumo mu ḅẹẹ-sakị ḅẹẹ-sakị laarị ḅọ ḅe ḅo tẹ ḅẹrẹkọn Tẹịn-Ḅẹrẹtọn-Kụrọ-Nyana Tamụnọ ḅe atomi ma ḅara iḅimam. Tamụnọ atomi ma ama-da kụrọ daa-ọkị ḅẹ sakị mẹ ḅo la tẹ.

²³Mie ḍuko-finji mẹ tẹ ịn kẹ ị̀ pịrị ye: “Ini karama nama ḅe anie ini karama tomikiri tẹ gbọrụḅọ da ḅarịye, tẹ anị osi gbọrụḅọ-gbọrụḅọ da ḅẹ atomikiri mamgba ḅụ kịrị ḅa. Anị bebe tomikiri mẹ nẹngịma tẹ anị nanga iderima ḅa.

²⁴Oyia ịfalị ma anie oyia amadapụ tẹ anị tomikiri mẹ ḅụ ḅẹrẹtọn ḅarị apụ. Anịtẹso jen amadaḅọ paka-ḅo ḅa, ori ḅe ọ̀ tarị paka-ḅo apụ ḅụ kịrị ḅa tẹ tẹra amadapụ siin koroma ḅa ịna ama-da kụrọ ḅụ.

²⁵Ọ̀ Kụrọmamgba-Nyana Tamụnọ ḅe na tụḅụrụ ẹkwẹn kọn tẹ Tamụnọ atomi ma ponoma ḅa. Ọ̀ ḅụụkụrọma tẹ ịna Tamụnọ-nimi-ḅara ḅẹ oloko ma na alalị ma na ḍima ḅẹ ḍọkị ḅa, tẹ Tamụnọ atomi ma tẹra kụra na pakịrị na kẹ ọ̀ kụrọ suku-ḅio sime ḅa.

²⁶Anịtẹso so ḅẹ ḅẹrẹkọn-siri mẹ lẹgị ḅa, ọ̀ ḅara ọ̀ kụrọ ọkị, tẹ gbọrsịḅị ò guluguluma fama ḅa.

²⁷Tomikiri mamgba ḅẹ ama-da kụrọ na opu na ịn saḅama Kụrọmamgba-Nyana Tamụnọ ḅe atomi ma pịrị ḅa. Ịna ama-da kụrọ mẹ gbala-gbala kunoma ḅịa, tẹ tomikiri ḅẹ ḅẹrẹtọn apụ mamgba fịrịmẹnjị ịn pịrị tẹ ịna ḅịḅịpoki ḅa.”

²⁸Mie ḍukoye mẹ kunoma mẹ. Ị̀ ḅalafa la ḅara mịẹ tẹ à bosolo ḅara simem, tẹ à ye goyegoye kẹ ị̀ ḅụụ ḅio wẹrịm.