Read kalabari Danẹlị 8 Bible Online

Danẹlị 8 - kalabari bible

Danẹlị 8

¹Bẹlịsaza ama-da tẹ tẹrẹị karama kụra mẹ ḅụ, à maaịn karama ịkịan ẹrịm.

²Àrị ẹrị ịkịan mẹ ḅụ ḍiki ḅarị sakị, à mu Susa Onu gbọrụ ikelema ama mẹ ḅio paka tẹẹ, Ẹlamụ ibe mẹ ḅụ. À Yulayị Tọrụ akaka mẹ ḅụ sịẹsimem,

³tẹ anịanga tọrụ mẹ kpeki ḅụ à gbọrụ ejimina ẹrịm, maa ịfalị sụa ye, gberie nangwọ pịkị ịwọ osi ye nẹngịm.

⁴À Kireinma ḍiki tẹ ẹrịm ejimina ḅe ori ịfalị ma kẹ ịrụa-ideriarị-anga mẹ, ọgọnọ-jụ mẹ na abajị-suku na dam. Ọ̀ dasịẹma ḅẹ gbọrụ nama ofori anịanịa ọ̀ kụrọ ḅụ pụkọ-so. Ọ̀ ḅụụ-ḅẹlẹye-ḅẹlẹye mie ọ̀ mịẹ tẹ pịkị opu aị ẹkwẹn-ẹkwẹn sara ye.

⁵À paa miemẹ tiye fiearị mọ ḅẹ ye kẹ ḅụụ-buarị ḅẹ sakị, gbọrụ oḅori ịrụa-ideriarị-anga mẹ ḅụ wiririma paka-ḅo tẹ, ọ̀ sarama mangị ḅara ori aḅụọ kiri la-a ḅara simem. Gbọrụ kịrị ịfalị ọ̀ nwẹn nyanam ori maa tọrụngbọ ma ogboku.

⁶Ọ̀ da-da ejimina ḅe dama-ḅom, anie tọrụ mẹ kpeki ḅụ sịẹsime tẹ àrị ẹrị ye ḅe, tẹ ọ̀ kụrọ mamgba kẹ wiririma mangị ḅe ejimina ḅe lam.

⁷À kweinma ò ḍikiarị tẹ ori owu kẹ ejimina ḅe pakam. Ọ̀ gbọrsịḅị ịganị famatẹ ḅara ḅụ, ori ejimina ḅe jine tẹ ori maa ịfalị ma anyịm. Ejimina ḅe ịnyọ nyana-a kẹ ori na damam. Ori ọ̀ kẹ kiri gbin tẹ ọ̀ nanga ḅọrọm, tẹ inetẹ ọ̀ ḅọrọma ḅẹ gbọrụḅọ-sọ paka-a.

⁸Oḅori ḅe opu aị opu aị ḍuko tọrọkọ-tọrọkọ mum, tẹ ọ̀ kụrọ mẹ iwo mu anị la ḅẹ anga la tẹso, ori ịfalị mẹ anyịm. Anị kiri ḍima ḅụ inia kịrị ịfalị sịẹ pakam, gberie-gberie amịna anga dam.

⁹Mịna ini ịfalị ma ḅẹ gberie ḅụ gbọrụ kala ịfalị paka-ḅom, anị ḅẹ kụrọ suku-jụ na, ịrụa saakịarị anga na Minini pịrị Amakiri mẹ na da-mum.

¹⁰Anị kụrọ la ḅẹ ḅara la tẹ owu kẹ so ḅẹ ọmụ-ogbo mẹ pakam, lolia ma ḅioju, tẹ anị ịna ḅụ ḅẹ jaị kẹ kiri gbin tẹ ịn nanga ḅọrọm.

¹¹Anị mịẹ ma-mu tẹ owu kẹ so ḅẹ ọmụ-ogbo mẹ sịḅịdaḅọ ḅe sọm, ene-ḅaaene-ḅaaene mịẹ ọ̀ pịrị-pịrị agba ma dasịẹmam, tẹ Tamụnọ-warị mẹ pilemam.

¹²Kịnị nwẹnị si mịẹ ene-ḅaaene-ḅaaene ḅẹ karakara agba ma mịẹ nakara, tẹ ịn karakara Tamụnọ nimi ḅara kẹ kiri gbinm. Ịfalị mẹ mịẹ ye mịẹ ye anị ḅara ḅẹ sọm.

¹³Anịtẹso à gbọrụ enjẹlị kẹ jen enjẹlị gbela ye naam, “Ma ma tẹ ịkịan ḅụ ẹrị aị ma mịẹ mu tọ-sakị la ḅẹ? Tọ-sakị na gbasị ye ḅalafama si ene-ḅaaene-ḅaaene ḅẹ agba ma kiri ọkị ḅẹ? Tọ-sakị na gbasị ye ịn nwẹn kẹ so ḅẹ ọmụ-ogbo mẹ na Tamụnọ-warị mẹ na nanga kiri pịrị ḅẹ?”

¹⁴Osi enjẹlị ḅe kẹ pakịrị ye à naam, “Anị mịẹ mu ḍin amesi oyi finji fa ḍin tẹra ẹndẹ la ḅa, arị ene ma ḅụ ḅoḅiri na dede na agba ma mịẹ ḅịa. Anịtẹso ịn Tamụnọ-warị mẹ kẹ ḅo anị sime-sime ḅara wẹrị ḅa.”

¹⁵À ḅụụkụrọma tẹ ịkịan mẹ fiearị ye nimi ḅẹ ḍọkịarị ogbo, ḅiotọn-a ḅara ḅụ gbọrụḅọ nwẹnị ị̀ tọrọkọ sịẹsime.

¹⁶À pọkọ naam Yulayị Tọrụ saḅa-anga ḅụ, “Gebịrẹlị, ori ẹrị ịkịan mẹ fiearị ye ḍuko finji ọ̀ pịrịị.”

¹⁷Gebịrẹlị ḅo ị̀ akaka sịẹ tẹ à ḅalafa lama tẹ ḅịkị kiri korom. Ori ị̀ ḅẹẹm, “Fịị-fịị tomḅọ, fie ye mẹ nimi. Ịkịan mẹ tomikiri mẹ ḅẹ kunoma faa ḅẹ sakị gboloma wararị.”

¹⁸Ori ẹkwẹn-arị ogbo à ḅịkị kiri koro tẹ naịn-ḅọrọm. Kụma ori ị̀ ọlọ tẹ ị̀ saakị sịẹma,

¹⁹tẹ ḅẹẹm, “À kẹ í ḍiearị ye anie Tamụnọ ịganị sakị-pakama ḅarị ḅẹrẹ. Ịkịan mẹ ḅara kẹ tọkịmarị ye anie kunoma sakị mẹ.”

²⁰“Ị́ ẹrị ejimina ḅe tẹ maa ịfalị nyana ye ḅe sịẹ Midiya na Pasịya na ama-da ma pịrị wararị.

²¹Oḅori ḅe sịẹ Girisi ama-da mẹ pịrị wararị, tẹ kịrị ịfalị tẹ maa tọrụngbọ ogboku paka ye mẹ anie tarị amadaḅọ ḅe

²²Inia ịfalị ma tẹ tarị ịfalị mẹ anyị sakị paka aị ma sịẹ inia ama-da ayọ pịrị wararị anie ini anị kẹ ḍie ḅarị apakịrị-apakịrị ma, tẹ arị tarị ama-da mẹ kụrọ ḅara kụrọ ḅịa.

²³“Arị ama-da ma ḅẹ kunoma ḅo kpeki tẹ arị ḅo si-sịḅịḅio-sụa lama tẹ fomu-ḅara da-a so ḅịa ḅara sime sakị, kọngọ-kụrọma, si mịẹ oru, tẹ pịkị oḅori-kẹ-kịnịsịn-arị amadaḅọ paka ḅa.

²⁴Ọ̀ kụrọ paka-ḅo ḅa, kụma ò soku-ḅẹ kụrọ ḅụ-a. Ọ̀ ḅalafama ḅara kẹ ye guluguluma ḅa tẹ ọ̀ mịẹ ye mịẹ ye pịkị ọ̀ ḅara-ḅẹsọ ḅa. Ò gulugulu-faa dogi-ḅo kụrọ atomi na pịkị sime Tamụnọ pịrị apụ ma na pịrị ḅa.

²⁵Ori aka-na-epele-na nyana wararị ẹrẹsị, ọ̀ kẹ oḅori-kẹ-kịnịsịn-arị etela ma ori na lolo ḅa. Ori ọ̀ ḅụụ kẹ ḅụụ-tọn tẹ tọnwa atomi ḅaa guluguluma ḅa, ò siye mịẹ ḅẹ-yearị elekima kẹ in ḍie-a ḅara ḅụ. Kịnị mamgba Amadaḅọ ḅe kịngẹ sọ ori ò ḍiki-iderima ḅa, kụma ini ọ̀ ḅaa guluguluma ḅa tomina kụrọ kẹ mịẹ-a ḅara ḅụ.

²⁶Mie ḅoḅiri na dede na agba ma gboloma ịkịan mẹ tẹ in ḍuko finji ị́ pịrị tẹ aị ma ḅo karakara ye sọ ḅa. Kụma mịọkụ ḅụ anị kẹ ḅọị ḅara wẹrị, anị ḅo karakara ye sọ ḅarị sakị mẹ ala wararị ẹrẹsị.”

²⁷Tọnwa aḍin à nwẹn kẹ ḅioḅẹngbọ si tẹ obim. Anịtẹso à saakị tẹ amadaḅọ ḅe kẹ ị̀ pịrị fịrị mẹnjịm, kụma à paa ḅioḅẹngbọ fụka nyanam àrị inetẹ ịkịan mẹ fie ye nimi-a ẹrẹsị.