Read kalabari Danẹlị 9 Bible Online

Danẹlị 9 - kalabari bible

Danẹlị 9

¹Darịyọsị, Midi ḅọ ḅe, anie Zajẹsị tụḅọ ḅe, Babịlonịya ḅẹ ama-da yọ mẹ ḅụ ama-dam.

²Ori ama-da mẹ ḅẹ tarị kụra mẹ ḅụ à fịafịa aḍiri ma ḍawọarị tẹ Jeruselemu kẹ kan sara sime ḅe kụra tesi oyi finji ma kẹ kuroma ḅụ suum, anie KỊNỊNYANAḄỌ ḅe ḍuko ịkịankoro Jerimaya pịrị ḅara mẹ.

³Tẹ à kpọma tẹmẹ-la ḅara kẹ KỊNỊNYANAḄỌ Tamụnọ ḅe tẹkẹm, ye sime-ḅara kẹ ori na ẹkwẹnmarị, ḅuru-ịmọarị, akpa ḅiriarị, pịkị fọọn ḅio lẹgịarị.

⁴À KỊNỊNYANAḄỌ ị̀ Tamụnọ ḅe tẹkẹ tẹ ị̀ atomi ma asi ma ḍuko-pakamam. À ḅẹẹm, “KỊNỊNYANA-TAMỤNỌ, Ị́ ḍụḅam, tẹ wa ị́ kụn-arị. Í ḅioḅẹngbọ kẹ ḅụụ ḅụ gbana na-iḅi ḅara sime ị́ ọḅọkụ mẹ pịrịarị tẹ kuno-kuno-a ḅẹlẹma kẹ ị́ ḅẹlẹma tẹ í oloko kokoarị apụ ma ḍiearị.”

⁵“Wa si mịẹ tẹẹ, wa si tẹẹ, wa kura-aye mịẹ tẹẹ. Wa ị́ tọn wa pịrịm wa mịẹ ḅẹ ye sịkị tẹ ọḅụ pịkị ị́ kẹ wa ḍie kuraye mẹ gbin tẹẹ.

⁶Amụ wa ị́ afịrịmẹnjịapụ ịkịankoroapụ ma poki-a, anie ị́ ẹrẹ ḅụ ẹkwẹn wamịna amadapụ, wamịna ḅẹrẹtọn-apụ, wamịna elemu-aḍapụ na wamịna bebe sịẹ na pịrị apụ ma.

⁷Ị́yẹrị, KỊNỊNYANAḄỌ, sakị mamgba kuraye mịẹarị, kụma wamịnị sakị mamgba tọrụ-tuu dogi-ḅo ḅụụ pịrịarị. Mie anị sime wamịnị-mgba tẹ Juda na Jeruselemu na Izirẹlịapụ mamgba tẹ ị́ kẹ sịẹ-sịẹ ma, kpeki anga sime aị na sụma-jụ sime aị na ogboku gala-galama wararị apụ ma na sime-ḅara, wa ḅioḅẹngbọ-kẹ-sịrẹrẹ-niḅi ḅara sime ị́ pịrị-a ẹrẹsị.

⁸KỊNỊNYANAḄỌ, wamịna amadapụ, wamịna ḅẹrẹtọn-apụ na wamịna elemu-aḍapụ na ḅụụ-jịrịma ḅara mịẹ tẹ si kẹ ị́ mịẹ tẹ.

⁹Ị́ yẹrị anie ọkụrụkụrụ nyana tẹ si wẹrịsoarị ḅọ, karakaraye wa kọngọ-kụrọma ị́ pịrị tẹ sọ.

¹⁰Yei, KỊNỊNYANAḄỌ wamịna Tamụnọ, wa í poki-a, í ḍuko wa pịrị sakị mịnẹ wa í oloko ma ḍiki anga, anie ị́ ị́ afịrịmẹnjịapụ ịkịankoroapụ ma ḅụ ḅọrọ tẹ kẹ wa pịrị aị ma.

¹¹Izirẹlị mamgba í oloko ma kan tẹ ḍụkụ tẹ í ḍuko ye poki-a. Wa si kẹ ị́ mịẹm, tẹ anie ḅụ í wori-anume ma tẹ Mozizi, ị́ fịrịmẹnjịḅọ kẹ koroma aị ọkị-ḅo wamịna ọgọnọ gbanam.

¹²Í ḍukom ị́ kẹ wamịnị na wamịna ḅẹrẹtọn-apụ na mịẹ ḅẹ ye mẹ ị́ mịẹm. Tomikiri ḅẹ jen opu ama tẹ ị́ ị́ kẹ Jeruselemu fomu-ḅara fomu ye ofori,

¹³Mozizi Oloko ma ḅio in ḍuko koroma fomu-ḅara mamgba kẹ wa pịrị ḅụ. Kụma mịọkụ mẹ sọ, yei, KỊNỊNYANAḄỌ, wamịna Tamụnọ, amụ wa ḅụụkụrọma tẹ í ḅioḅẹlẹma-a wamịna asi ḅụ pịkị ḅụ, anịanịa ị́ karakara mẹ ḍukamẹnjị.

¹⁴Ị́ yẹrị Yei KỊNỊNYANAḄỌ, wamịna Tamụnọ, tẹlẹmam ị́ wa fomu, tẹ ị́ mịẹm, sakị mamgba í kuraye mịẹarị ẹrẹsị, tẹ wa í poki-a.”

¹⁵“Yei, KỊNỊNYANAḄỌ wamịna Tamụnọ, ị́ ị́ kụrọ ḍie-pakamam Ijiputi ḅụ ị́ atomi pakama-ḅo ḅụ, tẹ ị́ kụrọ mẹ kịnị paa kẹ ḅiokoromarị. Wa si mịẹ tẹ; wa kura-aye mịẹ tẹ.

¹⁶Ḅọrọtẹ sakị ḅụ ị́ wa ḍụam, mie ḅụ ḅarị jen kẹ Jeruselemu ḍiki-ịganị ma. Í opu amaa, ị́ fịafịa tụndụu. Kpeki wararị asịẹ ma ḅẹ apụ mamgba Jeruselemu ḍiki iderimarị, pịkị ị́ atomi ma sọ, wamịna asi na wamịna elemu-aḍapụ mịẹ siye na ẹrẹsị.

¹⁷Yei Tamụnọ, ị̀ tẹkẹ naa, pịkị à kẹ ị́ tọrọkọ koromarị ḅẹrẹ mẹ na. Ị́ warị siin nama, anie kan-saratẹ ye mẹ; anị siin nama, mịẹ tẹ ḅẹḅọ-ḅẹḅọ nimi ḅarị mịnẹ Tamụnọọ.

¹⁸Wa poki, Yei Tamụnọ; wa ḍiki, tẹ wa daarị ḅụụ-fụka mẹ ẹrị, pịkị ị́ ị́ ẹrẹ kẹ koro wararị opu ama mẹ tọrụsiẹrị mẹ na. Wa ị́ tẹkẹarị ị́ ọkụrụkụrụ nyana wararị ẹrẹsị, wa kuraye mịẹ tẹẹ ẹrẹsị-a.

¹⁹KỊNỊNYANAḄỌ, wa naa. KỊNỊNYANAḄỌ, wẹrịso wa pịrịị. KỊNỊNYANAḄỌ, wa pokii, tẹ ye mịẹẹ! Mịẹtẹ ḅẹḅọ-ḅẹḅọ nimi ḅarị ḅara mịnẹ ị́yẹrị Tamụnọọ; wẹrị alama ma! Mị opu ama mẹ na mịna atomi ma na sime ị́ pịrịm.”

²⁰“À paa tẹkẹ simem, ị̀ asi na ị̀ atomi Izirẹlị ḅẹ apụ ma asi na ḍuko-pakama, pịkị tamụnọ-warị mẹ siin nama ḅẹ ye mẹ kẹ KỊNỊNYANAḄỌ ị̀ Tamụnọ ḅe tọrọkọ koromam.

²¹Àrị ọkọ kẹ tẹkẹarị ogbo, Gebịrẹlị, à tarị pịrị-pịrị ḅụ ẹrị ịkịan mẹ ḅụ ẹrị ḅọ ḅe, fiin ma ideri-ḅo à sime anga korom. Sakị mẹ anie ḅoḅiri agba mịẹ-mịẹ sakị mẹ.

²²Ọ̀ nwẹnị ḍuko-finji, ‘Danẹlị, à mị yọ ḅo tẹẹ, ḅarasụa ị́ pịrị tẹ í koro ịkịan mẹ fiearị ye naa ḅẹ ḅara.

²³Ị́ saakị ye mẹ kẹ Tamụnọ tọrọkọ koroma sakị ori ị́ pakịrịm. Ori ị́ ḅẹlẹmarị, tẹ anie ḅụ à pakịrị-ḅịḅị mẹ kẹ ị́ pịrị ḅẹ ḅo tẹ. Mịọkụ iḅi ḅeri kẹ pokii, àrị ịkịan mẹ fiearị ye ḍukoarị sakị.’ ”

²⁴“Kụra atesi oyi finji-finji sọnọma akiri anie Tamụnọ tọn-pẹlẹm ọ̀ kẹ ị́ atomi ma na ị́ fịafịa ama mẹ na pakama-ḅo si na siye na ḅio. Ò si-wẹrịso tẹ tomi karakara mịẹ gbamaso ḅa, mịẹtẹ ị́ ẹrị ịkịan mẹ na í koro-ịkịan mẹ na ḅo karakara ye sọ tẹ in siin fịafịa Tamụnọ-warị mẹ wẹrị fịafịama ọ̀ pịrị ḅa.

²⁵Mie kẹ elekima sụa tẹ anị fiearị ye naa: siin Jeruselemu nama ḅẹ oloko mẹ sụa sakị ḅụ ọkị-ḅo Tamụnọ sẹlẹ pakama-ḅo sịḅịdaḅọ ḅe ḅoarị sakị la sọnọma akụra sọnọma kụra sọnọma kiri ḅọrọ ḅa. In siin Jeruselemu nama ḅa, oḅoroma-oḅoroma ama mẹ ḅio, pịkị kụrọtẹ ama ḍụa ayeyọ, tẹ anị sime mu kụra atesi maa akụra finji finji, sọnọma asakị la ḅa. Kụma sakị mẹ kpọma ḅụụ-fụka sakị sọ ḅa.

²⁶Anị sakị mẹ ḅẹ kunoma ḅụ ịn Tamụnọ sẹlẹ pakama-ḅo sịḅịdaḅọ ḅe ḅaa ḅa inoma ḅọkọ ḅụ. Opu ama mẹ na Tamụnọ-warị mẹ na kụrọtẹ ḅẹrẹtọnḅọ ama koro ọmụ-ogbo arị kan-sara ḅa. Kunoma mẹ ḅo ḅarị ḅara ẹgẹnẹ-minji seri sọ ḅara, ọmụ na guluguluma na ọkị-ḅoarị Tamụnọ tẹlẹma wẹrị ḅara ḅụ.

²⁷Anị ḅẹrẹtọnḅọ ḅe tọnwa-apụ na kụrọ-nyanatẹ ḅịḅị-kẹ-ogbosọ nyana ḅa sọnọma kụra ḅụ, tẹ anị sakị mẹ kẹ maa anga ḍiya ḅẹ gbọrụ anga ḅọrọtẹ so ori agbamịẹ ma na ḍiepịrị-aị na dasịẹma ḅa. ‘Ḅalafa Sịḅị-jịrịmaye Mẹ’ ịn nwẹn kẹ Tamụnọ-warị mẹ ḅio geletẹịn anga ḅụ gbana ḅa, tẹ anịanga sime nwenii anị kẹ anị kẹ anịanga koroma ḅọ ḅe ḅo Tamụnọ tẹlẹma ọ̀ pịrị kunoma mẹ na bịama ḅa.”