Read kalabari Hosiya 1 Bible Online

Hosiya 1 - kalabari bible

Hosiya 1

¹Mie KỊNỊNYANAḄỌ ḅe kẹ Hosiya, Bẹrị tụḅọ ḅe pịrị oku mẹ, Uzaya na, Jotamụ na, Ahazi na Hẹzịkaya na Juda ḅụ ama-da sime asakị mẹ, tẹ Jerobohamụ, Jehohazị tụḅọ ḅe pịkị Izirẹlị ḅụ ama-da sime sakị mẹ.

²KỊNỊNYANAḄỌ ḅe tarị-tarị Hosiya ḅụ ḅọrọ tẹ ẹkwẹn Izirẹlị pịrị sakị, ori Hosiya ḅẹẹm, “Mu ẹrẹḅọ simee; ị́ ta ma á sẹfị ḍumo kọn ḅa, tẹ ị́ awọmẹ sọ á kịka tẹ á sime-ḅara sime ḅa. Anị gbọrụ ḅara ḅụ, ị̀ atomi sẹfị[2] tẹ ì koroma-so tẹẹ.”

³Mie ḅụ Hosiya nwẹnị Goma, Dibilemu ẹrẹḅọtụḅọ ma sime. Árị á tarị tụḅọ iyim, owiḅọtụḅọ.

⁴KỊNỊNYANAḄỌ ḅe nwẹnị Hosiya ḅẹẹ, “Jẹzirili[3] kẹ ọ̀ sịịn, kẹ gotẹ ọkọ ḅẹẹarị, ala ḅịa sakị ḅụ, àrị ori elemu ḍaḅọ Jehu Jẹzirili ḅụ kura-a ḅara kẹ ḅaa apụ ma gbẹẹfị fomu-ḅara kẹ Izirẹlị ḅẹ amadaḅọ ḅe pịrị ḅa. À Jehu amada-furo mẹ kunoma ḅa.

⁵Tẹ Jẹzirili tụndụ-suku mẹ ḅụ àrị Izirẹlị ọmụ kụrọ mẹ guluguluma ḅa anị ene mẹ ḅụ.”

⁶Goma maaịn karama tụḅọ iyim; mị sakị ẹrẹḅọtụḅọ. KỊNỊNYANAḄỌ ḅe Hosiya ḅẹẹm, “Á sịịn, Lo-ruhama[4], kẹ gotẹ ọkọ ḅẹẹarị, à ḅarị jen kẹ ọkụrụkụrụ nyana Izirẹlịapụ ma pịrị ḅịa, anịanịa si-wẹrịso ịn pịrị.

⁷Kụma Juda ḅẹ apụ ma, yẹrị KỊNỊNYANAḄỌ ịna Tamụnọ ḅe ọkụrụkụrụ nyana ịn pịrị tẹ ịn ḅọrọma ḅa — àrị iboli na, okologie na, ọmụ na, asụ na, asụ-ọgọnọ ọmụgbin-apụ na kụrọ kẹ ịn ḅọrọma ḅịa.”

⁸Goma ẹrẹḅọtụḅọ ma ndo-kụma tẹso, á jen fura tẹ pịkị jen owiḅọtụḅọ iyim.

⁹KỊNỊNYANAḄỌ ḅe Hosiya ḅẹẹm, “Ọ̀ sịịn, Lo-ami[5], kẹ gotẹ ọkọ ḅẹẹarị, Izirẹlịapụ ma ị̀ atomi-a, tẹ yẹrị sọ pịkị ịna Tamụnọ-a.”

¹⁰Izirẹlịapụ ma ḅo tọrụ-kọngọ ḅẹ onwi na kịka ḅa, ịn ḅaka ḅarị ḅara kịẹnkịẹn-ọkụ-ofori ḅara anịanịa iku-la-ḅara tọn-ḍikiḍiki-a ḅara. Mịọkụ Tamụnọ ịn ḅẹẹm, “Ọmịnị ị̀ atomi-a,” kụma gbọrụ ene ḅụ ori ịn ḅẹẹ ḅa, “Ọmịnị ḍumo wararị Tamụnọ ḅe awọmẹ!”

¹¹Juda ḅẹ apụ ma na Izirẹlịapụ ma na gbọrụ apụ sọ ḅa. Ịn gbọrụ sịḅịdaḅọ sẹlẹ-pakama-ḅo ịna aḅụụ pịrị ḅa, tẹ gbọrụ sakị kẹ siin ịna amakiri mẹ ḅụ gburo-gburotẹ lolo ḅa. Inn, Jẹzirili ene mẹ gburo-gburotẹ ene sọ ḅa!