Read kalabari Hosiya 11 Bible Online

Hosiya 11 - kalabari bible

Hosiya 11

¹KỊNỊNYANAḄỌ ḅe ḅẹẹarị, “Izirẹlị kala-sakị, àrị ọ̀ ḅẹlẹmam, tẹ ị̀ tụḅọ ḅara ḅụ ọ̀ sịn pakama-ḅom.

²Kụma àrị ọ̀ sịn-sịn-sịn ḅara, mie ọ̀ kẹ ị̀ ḅụ pịkị-so so ḅara. Ị̀ atomi agbamịẹ Balị pịrịm; ịn kụnụaị dọkịma oru-afụḅara pịrịm.

³Anịsọ yẹrị anie Izirẹlị toluma tẹ ịn mẹnjị ḍịn ḅọ ḅee. Àrị ì kuḅu ḅio ị̀ atomi saakị dogim, kụma yẹrị in ḍikiḍiki pakama-ḅo ye mẹ in minini ḍụkụ-a.

⁴Àrị in gotẹ ḅioḅẹlẹ na ḅẹlẹma na kẹ ịn nụnụ ḅụụ pịrịm. Àrị ịn saakị dogi tẹ amgba kẹ in oḅolom; À tuuideri tẹ fịye kẹ ịn pịrịm.”

⁵Ịn ḍụkụ tẹ pịkị ị̀ ḍọkụma-ḅoa, tẹ mie ḅụ ịn pịkị Ijiputi mu nyanam, tẹ Asiriya ḅẹrẹtọn ịn pịrị ḅa.

⁶Ọmụ ịna opu ama ma ọfịn tẹ opu ama ma ogigo-aḅọkọ ma kan kiri lama ḅa. Anị ị̀ atomi guluguluma ḅa ini in kuromarị ịna ḅụụ ḅụ iḅi tẹịn ye mịẹarị ẹrẹsị.

⁷Ini ịgbanịarị ini ị̀ ḅụ pịkị so. Ịna kọngọ jịjịmarị kọngọ-kpọ-sịn mẹ gotẹ ini oloku pakama ḅa, kụma gbọrụḅọ-sọ anị saakị sin ịn pịrị ḅịa.

⁸Izirẹlị, ndẹẹ à gotẹ ị́ ḅụ ḅara-siin ḅẹ ḅara? Ndẹẹ àrị inetẹ ị́ kẹ gbin koroma so ḅẹ ḅara? Àrị à kẹ Adima mịẹ ḅara kẹ inetẹ í guluguluma ḅẹm aro? Anịanịa Zeboyimu na mịẹ ḅara kẹ ị́ na mịẹ? Ì ḅioḅẹngbọ ḍụkụ tẹ àrị anị mịẹ ḅịa! À nyana ị́ pịrị ḅẹlẹma kụrọ ḅakam.

⁹Àrị ị̀ ịganị ḅụ í fomu ḅịa; à ḅarị jen kẹ Izirẹlị guluguluma ḅịa. Gbala yẹrị Tamụnọọ, yẹrị tomḅọ-a. Yẹrị Fịafịa Ḅọ ḅe ị́nịna emi. Àrị ịganị ḅụ ḅo ị́ la ḅịa.

¹⁰“Ị̀ atomi ị̀ ḍukamẹnjị ḅa àrị ọkụkụ kịka tẹ oloku si kẹ ịn tọn apụ pịrịarị sakị. Ini ịrụa-ideriarị-anga sime tẹ sarama ị̀ ḍọkụma-ḅo ḅa.

¹¹Ini Ijiputi ḅụ sime tẹ ḅo ḅa, feni sarasara ḅara, pịkị Asiriya ḅụ, olosịkịya amẹẹ ọkụ. À siin ini ọkị-ḅo ịna sime-ayọ lama ḅa. Yẹrị, KỊNỊNYANAḄỌ ḅe, ọkọ ḅẹẹm.”

¹²KỊNỊNYANAḄỌ ḅe ḅẹẹarị, “Izirẹlịapụ ma iruo-iruo-iruo na oḅori-kẹ-kịnịsịn na kẹ ì gbori-ikelema tẹẹ, tẹ Juda ḅẹ apụ ma paa kọngọ-kụrọma ị̀ pịrịarị, yẹrị sịrẹrẹ na-iḅi pịkị Fịafịa Tamụnọ ḅe.”