Read kalabari Jowẹlị 2 Bible Online

Jowẹlị 2 - kalabari bible

Jowẹlị 2

¹Ọdụ mẹ ofuroo; oloku Zayọnị ikelemaa, Tamụnọ fịafịa tụndụ mẹ. Juda ḅẹ apụ, yee ọmịna oju sẹkị! KỊNỊNYANAḄỌ ḅe ḅẹrẹkọn ama mẹ pịrị ḅarị ene mẹ kpeki tẹẹ.

²Anị ene mẹ kanakana tẹ kpiti ḅa, pịkị kurukuru tẹ oḅuto nyana ḅa. Tọnwa-tọnwa ḅẹ ọmụapụ ḅoarị, kanakana ḅo tụndụ ma gbaịn-arị ye ọkụ. Gbala-gbala jene-jene anị kịkaye amụ paka-a, tẹ pịkị ḅarị jen kẹ paka ḅịa gbala-gbala.

³Ini ịna tọrọkọ-jụ sime ye goyegoye gulugulumarị, gbala fịnị ọkụ; ịna ọḅụjụ ḅụ, in ye goyegoye ḅaa-famarị; Ịna tọrọkọ-jụ ḅụ, amakiri mẹ Ideni Ḍụọ iḅi ḅara iḅim, kụma ịna ọḅụjụ ḅụ, gbọrụ piri sọ ofori ḅẹ ịkpa kịkarị. Ịna atọrụ gbarịarị gberie-sọ ofori.

⁴Ḍiki-tọrụ ḅụ ịn kịkarị aị asụ amẹẹ; ịn ọmụgbin-asụ amẹẹ mangị ḅara mangịarị.

⁵Ịn tụndụ ma ọgọnọ-jụ ḅụ sime tẹ ḍosiarị sakị, ịn kirimẹnjị-ọmụarụ fie ḅara fiearị; ịn poloarị ḅara dọkịmarị osuka ọkụ. Ịn ọgbụrụ-sụn tẹ simearị ḅara opu ọmụ-ogbo tẹ tẹlẹma ọmụ pịrị wararị ye ọkụ.

⁶Ịn ḅoarị ḅara mẹ, ḅẹḅọ-ḅẹḅọ tẹmẹ-naịn-naịnarị, tọrụkuḅu goyegoye bosoloarị.

⁷Ọmụapụ kịka ḅara ịn nwẹn kẹ owu pakarị; ịn ọmụgbin-apụ kịka tẹ onu ma kpọlịarị. Inimgba da-daa mẹnjị tọrọkọ-tọrọkọ muarị, tẹ pịkị jen anga da-a.

⁸Ịn jụmọ-jụmọ tọrọkọ-pẹlẹma-a. In gbiima mu ịn ẹmgbẹsẹ wararị aị tolu-ḅọrọarị, tẹ gberie-sọ inetẹ ịn dasịẹma-a.

⁹In gbiima mu opu ama mẹ bịan-arị, ịn mangị mu onu ma ḍosi saḅarị; ịn warị ma kpọlị iwoarị, tẹ furuapụ kịka tẹ ikiḅa-aḅọkọ ma ḅụ ḅọrọ sọ-muarị.

¹⁰Ịn tọrọkọ-tọrọkọ muarị sakị, kiri mẹ jikearị; So-tọrụ mẹ ḍụrụkụarị. Ịrụa mẹ na akalụ mẹ na ḅo kanakanarị, tẹ lolia ma ḅarị jen kẹ ḅịya-a.

¹¹KỊNỊNYANAḄỌ ḅe tọn ori ọmụ-ogbo pịrịarị tẹ ịn so-alagba fie ḅara fiearị. Ọ̀ ḅịḅị pokiarị ọmụapụ ma tọnwa-apụ, tẹ ịn pịkị opu kụrọ nyanam. KỊNỊNYANAḄỌ ḅe ene mẹ ḅalafama la ḅara ḍikii! Tụḅọ fịị-a so ḅẹ anị ḅụ?

¹²KỊNỊNYANAḄỌ ḅe ḅẹẹm, “Kụma mịọkụ mẹ ḅụ sọ ọ́ tẹmẹ-la ḅara kẹ si ḅụ pịkị tẹ pịkịma ị̀ ḍọkụma-ḅoo; ó ḅuru-ịmọ tẹ owuu, pịkị kururuu.”

¹³Ọmịnị ọmịna aḅioḅẹngbọ mamgba kẹ si ḅụ pịkị tẹ mẹ ḍie pakamaa, ọmịnị ọmịna akapa kan ḅụ-a. Ọ́ pịkịma KỊNỊNYANAḄỌ ḅe tẹ ó sunsin pịrịarị Tamụnọ ḅe ḍọkụma-ḅoo. Ori iḅi ḅioḅẹngbọ nyana wararị, tẹ ọkụrụkụrụ pịkị ọ̀ ḅụụ ḅin wararị. Ò ye-inemarị tẹ ò minini ye mịẹarị. Sakị mamgba ọ̀ tẹlẹma tẹ si-wẹrịsoarị, fomu-ḅara kẹ kịnị pịrị-a.

¹⁴Tụḅọ nimi? Ẹbịsịya KỊNỊNYANAḄỌ ọmịna Tamụnọ ḅe ò kuroma ḍima tẹ tọnwa ḍiḅi-aị pakama sara tẹ kẹ ó boma ḅa. Anịtẹso ọmịnị inetẹ mgbọlị-fịaị na iru na kẹ agba mịẹ ọ̀ pịrị ḅa.

¹⁵Zayọnị ḅụ ọdụ mẹ ofuroo, ḅuru-ịmọ tọn pakama tẹ kịnị mamgba sịn ḅo kobirii!

¹⁶Tomi ma kobiri ḅo gbolomaa, tẹ ịn mịẹ fịafịama kobiri mẹ pịrịị; omongiapụ ma ọkị-ḅoo, awọmẹ ma kobirii, pịkị ḍọkọḍọkọ-awọmẹ sọ. Ịwọma simearị ama-na-ere-na sọ ịna kala-ḅio koroma so tẹ ḅo nyanam.

¹⁷Yee agbamịẹapụ ma tẹ fịrịmẹnjị KỊNỊNYANAḄỌ ḅe pịrịarị apụ ma agbamịẹ-anga mẹ na ḅọrọ Tamụnọ warị mẹ sọarị yọ mẹ na ogboku tẹkẹ tẹ ḅẹẹ: “KỊNỊNYANAḄỌ, ị́ atomi ḍiki-sịḅị-kụrụkụrụụ. Wa ḅelemaa mị ḅụụ-jịrị mẹ ḅio; ḍụkụ tẹ igoniapụ ma wa ḍiki-sima ma. Ndẹẹ jen sịẹ wa kombo tẹ gbela ḅẹ ḅara, ‘Ọmịna Tamụnọ ḅe ọ̀ tọ-anga emi?’ ”

¹⁸Anịtẹso KỊNỊNYANAḄỌ ḅe ori amakiri mẹ ọ̀ ḅụụ yela ḅara ḍie pakamam; ori ọkụrụkụrụ nyana ori atomi pịrịm.

¹⁹Ori ịn pakịrịm: “Mịọkụ à mgbọlị-fịaị na, iru na, pulo na kẹ ọ́ pịrị ḅẹ-yearị, tẹ arị ọmịnị na iḅi ḅa. Ja asịẹ ḅarị jen kẹ ó ḍiki-sima ḅịa.

²⁰Àrị ọmịna ogboku ọmụ-ogbo mẹ ḅelema ḅa, anie ọgọnọ-jụ sime tẹ ḅo aị ma; tẹ ịn ḅẹ jaị dee mu ịkpa mẹ ḅio suu ḅa. Àrị ịna tọrọkọ-sụn aị ma dee Fụn-Tọrụ mẹ ḅio suu ḅa, tẹ ịna ọḅụjụ ḅo aị nwẹnị Mẹdịterenanị abajị mẹ ḅio fịị ḅa. Ịna fịtẹ-oju ma nwẹnị fụrụ ḅa. Àrị ịn ḅaa guluguluma ḅa ịn kẹ ọ́ mịẹ aị mamgba ẹrẹsị.

²¹Ḍụọ kọrị akiri, ọ́ ḅalafa ma, kụma ó ḍerekuu, pịkị ḅioḅẹlẹẹ. KỊNỊNYANAḄỌ ḅe mịẹ ọ́ pịrị aị mamgba ẹrẹsị.

²²Nama amẹẹ, ọ́ ḅalafa ma. Osuka-fị-akiri ma ịwọ fama wararị; sịn ma arịḅẹ asịnmgbọlụ sụarị, tẹ tọnwa ịla asịnmgbọlụ na girepu asịnmgbọlụ na sụa sararị.

²³Zayọnị ḅẹ apụ, ó ḅioḅẹlẹẹ, ó ḍerekuu, KỊNỊNYANAḄỌ ọmịna Tamụnọ ḅe mịẹ ọ́ pịrị ye ḅụ. Ori ọmịnị na iḅi ḅẹ ḅara kẹ ḍụọ soku sakị ḅẹ eene kẹ ọ́ pịrị tẹẹ; ori ịwọ eene ọsụma sara ọ́ pịrị tẹẹ, pịkị ḍiḅi-aị ịwọma pakarị sakị ḅẹ eene mẹ sọ, tarị anị mịẹ-mịẹ ḅara ḅụ.

²⁴Mgbọlị-fịaị gugu-gugu ayọ ma ḅụ mgbọlị-fịaị ḅin ḅa; ye pọnjị anga ma ḅẹ otolo ma ḅụ sọ, iru na pulo na waa-waa sara ḅa.

²⁵Igurube ogbo ma ó ḍiḅi pakama ḅo aị ma fị siin akụra ma ḅụ ọ́ fama aị ma, à kẹ siin ọ́ pịrị ḅa. Yẹrị anie mị ọmụ-ogbo mẹ kẹ ọ́ fịrịma ye.

²⁶Mịọkụ ọ́ tọnwa fịaị nyana tẹ fị ḅa, tẹ anị ọmịnị na iḅi ḅa. Ọ́ KỊNỊNYANAḄỌ ọmịna Tamụnọ ḅe tokini ḅa, anie ḅụụ-buama-aị mịẹ ọ́ pịrị ḅọ ḅe. Kịnị ḅarị jen kẹ gbala-gbala ị̀ atomi ma ḍiki-sima ḅịa.

²⁷Anịtẹso, Izirẹlị, í nimi ḅa mịnẹ àrị ị́ ogboku emi, tẹ yẹrị, KỊNỊNYANAḄỌ ḅe, anie ị́ Tamụnọọ, anịsakị jụmọ ofori. Kịnị ḅarị jen kẹ gbala-gbala ị̀ atomi ḍiki-sima ḅịa.

²⁸Miemẹ ḅọrọ tẹso, à ḅaka ḅara kẹ ị̀ Tẹmẹ kẹ ḅẹḅọ-ḅẹḅọ ḅụụ ḅio su ḅa: ọmịna owiapụ-awọmẹ na eremịna-awọmẹ na ì oku ḍuko wasama ḅa; ọmịna omongitẹ owiapụ ḍawọ kọn-kọn-kọn ḅa, tẹ ọmịna asawọ ma ịkịan ẹrị-ẹrị-ẹrị ḅa.

²⁹Anị sakị mẹ ḅụ, à pịkị ḅaka ḅara kẹ ị̀ Tẹmẹ kẹ fịrịmẹnjịapụ ma aḅụụ ḅio sọ su ḅa, owiapụ na ereme na.

³⁰Àrị anị ene mẹ ḅẹ ḅeri nụnụ elekima ḍie-pakama ḅa So-ḅio na pịkị Kiri ḅio na ḅụ; ọmbie ọsụ na, kọrị-fịnị na, onwi oḅuto na paka ḅa.

³¹Ịrụa mẹ kanakana ḅa, tẹ akalụ mẹ ọmbie ḅịya ḅara kẹ awụ ḅịya ḅa, tẹrẹmẹ KỊNỊNYANAḄỌ ḅe ori atomi kọn ḅarị ḅalafama ene mẹ ḅo ḅa.

³² Kụma KỊNỊNYANAḄỌ ḅe ḅara ḅarasụa ḅii apụ mamgba ḅọrọma ḅa. Anie KỊNỊNYANAḄỌ ḅe ḅẹẹ ḅara mẹ, ‘Jeruselemu ḅụ simearị ja apụ mangị-so ḅa; yẹrị sẹlẹ-ọkị tẹ apụ ma fịị-a so ḅa.’ ”