Read kalabari Emọsị 1 Bible Online

Emọsị 1 - kalabari bible

Emọsị 1

¹Mịna ẹkwẹn-aḅịḅị ma anie Emọsị, anana-ḍikiḍikiḅọ tẹ Tẹkowa ama ḅụ ḅo ḅọ ḅe kọn ẹkwẹn-aḅịḅị ma. Maa akụra kọnm tẹrẹmẹ kiri-jike mẹ paka ḅụ, tẹ Uzaya Juda da sime sakị mẹ, Jerobohamụ, Jehohazị tụḅọ ḅe nwẹnị pịkị Izirẹlị da sime sakị mẹ ḅụ anie Tamụnọ ma mamgba tẹ Izirẹlị gboloma aị ma kẹ Emọsị ḍie yee.

²Emọsị ḅẹẹm, “KỊNỊNYANAḄỌ ḅe Zayọnị ḅụ ekirearị; Ọ̀ pọkọ Jeruselemu ḅụ so-alagba ḅara fiearị. Nama osuka fị-fị ayọ ma samụnọtẹẹ, anịsakị Kamẹlị tụndụ ọgọnọ simearị asịn ma na osuka ma na samụnọtẹ odo tọrụ sụa tẹẹ.”

³KỊNỊNYANAḄỌ ḅe ḅẹẹm, “Damasịkọsị ḅẹ apụ ma si kẹ jen-jen tongu mịẹ tẹẹ, tẹ mie gotẹ gbarị-a ḅara ḅụ àrị ịn fomu ḅa. In piri-ḅio-ḅẹ nama kịka tẹ si ḅara kẹ Giliyadi ḅẹ apụ na mịẹm.

⁴Mie ḅụ à fịnị fịrịma mu Hazẹlị nama ama-da warị mẹ dọkịma ḅa, pịkị Ama-da Bẹnị-hadadị kụrọnị-ayọ ma sọ à dọkịma kiri lama ḅa.

⁵À Damasịkọsị ḅẹ ogigo-aḅọkọ ma kan kọsịma sara tẹ Aveni Tụndụ-suku mẹ ḅụ angarị apụ ma saakị-sikima ḅa, pịkị Bẹtẹdeni ḅẹ ḅẹrẹtọn apụ ma sọ. In Siriya ḅẹ apụ ma ọkị-so Ka-a amakiri mu ḅa ikoliapụ ḅara ḅụ.”

⁶KỊNỊNYANAḄỌ ḅe ḍukoarị, “Gaza ḅẹ apụ si kẹ jen-jen tongu mịẹ tẹẹ, tẹ mie gotẹ gbarị-a ḅara ḅụ àrị in fomu ḅa. In bebe sịẹ dogi-so tẹ kẹ omoni ḅara kẹ Idọmụ ḅẹ apụ dẹrịm.

⁷Mie ḅụ à fịnị kẹ Gaza opu ama ḅẹ onu ma ḅụ sụa ḅa, pịkị anị ḅẹ kụrọnị-ayọ mamgba dọkịma ḅa.

⁸Àrị Asịdọdị na Asịkẹlọnị opu ama ma ḅẹ ḅẹrẹtọn-apụ ma saakịma ḅa. Àrị Ẹkịrọnị opu ama mẹ fomu ḅa, tẹ Filisiteniapụ tẹ kirikọn-apụ ma fịị ḅa.”

⁹KỊNỊNYANAḄỌ ḅe ḍukoarị, “Taya ḅẹ apụ ma si mịẹ-mịẹ-mịẹ tẹẹ, tẹ mie gotẹ gbarị-a ḅara ḅụ àrị in fomu ḅa. In bebe sịẹ dogi-so mu Idọmụ amakiri ḅụ kun-ḅara ḅio wẹrịm tẹ ịn mịẹ wararị ikia ḅịḅị-kẹ-ogbosọ mẹ sọ in koko-a.

¹⁰Mie ḅụ à fịnị kẹ Taya opu ama ḅẹ onu ma ḅụ sụa tẹ anị ḅẹ kụrọnị-ayọ ma dọkịma kiri lama ḅa.”

¹¹KỊNỊNYANAḄỌ ḅe ḍukoarị, “Idọmụ ḅẹ apụ ma si mịẹ-mịẹ-mịẹ tẹẹ, tẹ mie gotẹ gbarị-a ḅara ḅụ àrị in fomu ḅa. Ini ịna mịnapụ Izirẹlịapụ ḍọkị-ẹrị tẹ in kunm, tẹ gbọrụ ọkụrụkụrụ sọ kẹ in ḍie-a. Ịna ịganị dasịẹma anga nyana-a, tẹ gbala-gbala ịn ḍụkụ tẹ anị dein koro-koro-a.

¹²Mie ḅụ à fịnị kẹ Tẹmanị opu ama mẹ ḅụ sụa tẹ anị Bozara ḅẹ kụrọnị-ayọ ma dọkịma kiri lama ḅa.”

¹³KỊNỊNYANAḄỌ ḅe ḍukoarị, “Amọnị ḅẹ apụ si mịẹ-mịẹ-mịẹ tẹẹ, tẹ mie gotẹ gbarị-a ḅara ḅụ àrị in fomu ḅa. Ịna kiri ḍụḅama gotẹ in gbin ọmụ ma ḅio Giliyadi ḅụ in furatẹ-ereme afuro puu-puu finjim.

¹⁴Mie ḅụ à fịnị kẹ Raba opu ama ḅẹ onu ma ḅụ sụa tẹ kẹ anị ḅẹ kụrọnị-ayọ ma dọkịma kiri lama ḅa. Anịtẹso ọmụ gbin ene mẹ ḅụ ini oloku-oloku ḅa, tẹ owu mẹ ḍarị-paka ḅarị ḅara gbala erise.

¹⁵Anịtẹso ịna amadaḅọ na ọ̀ fịrịmẹnjị-opuapụ na mu jen sịẹ ḅụ sime ḅa, kun-so apụ ḅara ḅụ.”