Read kalabari Emọsị 8 Bible Online

Emọsị 8 - kalabari bible

Emọsị 8

¹À KỊNỊNYANAḄỌ ḅe ḅara ḅo jen ịkịan ẹrịm. Anị ḅio ḅụ à sịnmgbọlụ ḅin wararị kana ẹrịm.

²KỊNỊNYANAḄỌ ḅe gbelam, “Emọsị í tiye ẹrịarị?” À pakịrịm, “Sịnmgbọlụ ḅin wararị kana.” KỊNỊNYANAḄỌ ḅe ị̀ ḅẹẹm, “Kunoma mẹ ḅo ị̀ atomi Izirẹlị pịrị tẹẹ. À jen kẹ ì kuroma ḍima ḅịa in fomu ḅụ.

³Anị ene mẹ ḅụ, Amada-Opu-warị mẹ ḅẹ anume ma ḅo ḍụẹịn ḍu nume sọ ḅa. Fịtẹ oju akpakpa anịanga mamgba sara ḅa. Ịn ḅịḅị-fie-a ḅara kẹ arị kẹ wakị pakama ḅa.”

⁴Ó miemẹ pokii, ọmịnị mịẹḅẹ-ọkụ-ofori apụ ma nanga ḅọrọarị apụ, tẹ bebe amakiri mẹ ḅẹ igoin-apụ ma ḅaa guluguluma ḅẹ ḍọkịarị apụ.

⁵Ọmịnị ọmịna aḅụụ ḅẹẹarị, “Wa inetẹ koru tẹ fịafịa ene ma ḅọrọ tẹrẹmẹ wa wamịna mbịaka dẹrị ḅẹ ḅara sime-a. Tọ sakị Ịnyọsara-Ene mẹ kunoma ḅẹ, mịẹtẹ wa inetẹ saakị siin ye dẹrị ḅẹ ḅara? Anịsakị wa dẹrị-ḅịḅị mẹ ḅụ ye gbana ḅụrama ḅa, la-a ye-tọn-aị kẹ ye tọn ḅa, tẹ wamịna tuḅoniapụ inoma ḅẹ ye gotẹ iku-tọn-ye mẹ kẹ wamịna ḅiotọn ḅara wẹrị ḅa.

⁶Wa inetẹ yela-a witi kẹ opu ḅịḅị dẹrị ḅa. Wa inetẹ ọ̀ saa gbẹẹ-a igoinḅọ ḍọkị-ẹrị ḅa, anị ḅọrọ ḅụọ ọgọnọ gbaịn-a okuro la ḅẹ igbigi kịngẹ sọ nyana-a ḅọ, tẹ ọ̀ fẹ ọkị ḅa omoni ḅara ḅụ.”

⁷KỊNỊNYANAḄỌ ḅe, Izirẹlịapụ tẹkẹarị Tamụnọ ḅe karị tẹẹ, “Gbala-gbala ịna si amịẹaị ma à kẹ ḅioḅọrọma ḅịa.

⁸Anịtẹso kiri mẹ jike ḅa, tẹ amakiri mẹ ḅụ sime-ḅọ sime-ḅọ ḅụụ-ḅalaḅala ḅa. Bebe amakiri mẹ jike ḅa; anị saakị gele tẹ ḅịkị ḅa Nayịlị Tọrụ mẹ mịẹ ḅara.

⁹Anị ene mẹ ḅụ, à mịẹ tẹ ịrụa mẹ eneḅaka-fịafịa-ogbo ḅụ ideri tẹ eneḅaka ḅụ tomikiri mẹ ḅo kanakana ḅa sakị mẹ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

¹⁰Àrị ọmịna alalị ma pịkị-ḅo ḍụẹịn ḍiḅi asakị sọma ḅa tẹ ọmịna ḅioḅẹlẹ anume ma ḍima ḅo kururu owu sọma ḅa. Àrị ọ́ mịẹtẹ ọ́ sịḅị sẹịn tẹ akpa ḅiri ḅa, tẹ ó ḅo ḍaḅọ-na-iyingiḅọ-na amịna ngẹrị owiḅọtụḅọ ḍuarị apụ kịka ḅa. Anị ene mẹ akụ nwenii ḅo kunoma ḅa.”

¹¹“Sakị mẹ ḅoarị à ḅuru-kụrọ kẹ amakiri mẹ ọgọnọ gbana ḅarị sakị mẹ. Ḅuru tomi tarị ḅa, kụma fịturu fịye-a; minji ịna pọkọ tarị ḅa, kụma ḅuu-minji ẹrẹsị-a. KỊNỊNYANAḄỌ ḅe ḅara ḅo oku mie ḅuru na minji na ḅara kẹ ịn tarị ḅarịye. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

¹²Kịnị etela-iri apụ ḅara kẹ mẹnjị ikelekele ḅa ọgọnọ-jụ ḅụ ọkị-ḅo suku-jụ la, pịkị ịrụa saakịarị pakịrị ọkị mu anị tuuideriarị anga la. Ini anga goyegoye mu KỊNỊNYANAḄỌ oku mẹ nyana ḅẹ ḍọkị ḅa kụma ini anị ḍọkị ẹrị ḅịa.

¹³Anị ene ḅụ ịnyọ nyana wararị asawọ na iriawọ na sọ naịn-ḅọrọ ḅa minji pọkọ tarị gotẹ.

¹⁴Sameriya ḅẹ oru-afụḅara ma kẹ ye karị tẹ ḅẹẹarị apụ ma, ‘Danị ḅẹ oru-tamụnọ ḅe ẹrẹ ḅụụ’, anịanịa ‘Biyasẹba ḅẹ tamụnọ ḅe ẹrẹ ḅụụ’ — arị apụ ma ịn ḅịkị tẹ ḅarị jen kẹ saakị ḅịa.”