Read kalabari Obadaya 1 Bible Online

Obadaya 1 - kalabari bible

Obadaya 1

¹Mie KỊNỊNYANAḄỌ ḅe kẹ Idọmụ sịẹ mẹ gbolomaye ḅụ Obadaya ḍie ịkịan mẹ: KỊNỊNYANAḄỌ ḅe ori oku-mẹnjịḅọ kẹ sịẹ-sịẹ ma fịrịma tẹ wa ori oku mẹ naa tẹẹ: “Ọ́ tẹlẹmaa! Ó yee wa mu ọmụ kẹ Idọmụ paka!”

²KỊNỊNYANAḄỌ ḅe Idọmụ ḅẹẹm, Àrị ị́ mịẹ tẹ ịnyọ ị́ ḅụụ faa ḅa; ḅẹḅọ-ḅẹḅọ í ḍiki-iderima ḅa.

³Ị́ ḅụụ-gelema mẹ oḅori kẹ ị́ sịn tẹẹ. Ị́ sịḅịda opu ama mẹ anie paịn-paịn-a kụrọ tẹ ḍụḅarịị; Ị́ angarị yọ mẹ nwẹnị gele faa, tụndụ ma ḅio, tẹ mie ḅụ ị́ ị́ ḅụụ ḅẹẹarị, “Tụḅọ inetẹ ị̀ nụnụ iderima ḅẹ mọ?”

⁴Ị́ nwẹnị igo feni fiin ḅara kẹ gele-faatẹ anga la tẹẹ sọ, anịanịa lolia ma ogboku ị́ warị nama tẹẹ sọ, àrị ị́ nụnụ ideri kiri ḅio gbin ḅa.

⁵Furuapụ ḍin kẹ ḅo sakị, ini ọkị ḅii ye kịngẹ mie ini ọkịarị. Tomi girepu-asịnmgbọlụ kolokoloarị sakị, in boowa kalịye kọnma-kọnmam. Kụma ị́yẹrị, ị́nịna fịya-a apụ ma ye kọnma-a ḅara kẹ ị́ fama tẹẹ!

⁶Ọmịnị Ịsọ furo-ḅẹ-apụ, ọmịna ngọ ma kịnị fọịn tẹẹ!

⁷Ị́ jụ ḅẹ apụ ma oḅori kẹ ị́ sịn tẹẹ; ini í bebe amakiri mẹ ḅụ í dee-siin tẹẹ. Ị́nịna ḅẹrẹ ofori ḅara sime apụ ma owu kiri ị́ nẹngịma tẹẹ; Ị́nịna fị gboloma-gboloma ikiapụ ma ḍiein tuu ị́ pịrị tẹẹ, kụma í nimi-a; Ini ị́ kẹ fiearị, “Ori opu ye-nimi mẹmgba ndẹẹ anị?” Mie KỊNỊNYANAḄỌ ḅe ḅẹẹ yee:

⁸Anị ene mẹ ḅụ, àrị Idọmụ fomu ḅa; àrị ịna opu ye-nimiapụ ma ḅaa guluguluma ḅa, tẹ ịna ye-nimi mẹmgba kọrọrọ-siin ḅa.

⁹Tẹmanị ama ḅẹ ọmụapụ ma tẹmẹ-naịn-naịn ḅa, tẹ Idọmụ ḅẹ ọmụḅọ goḅọ-goḅọ ịn ḅaa ḅa.

¹⁰Ị́ ị́ amịnapụ, Izirẹlịapụ ma aị furu tẹ ịn ḅaa ye ẹrẹsị, kịnị í guluguluma tẹ ị́ kẹ kụn nyana-a ḅara wẹrị gbamaso ḅa.

¹¹Anị ene mẹ ḅụ, í ḅele tẹ sịẹsimem, inina fịya-a apụ ịna onu-aḅọkọ ma kan-sara sakị. Arị kịnị tọrụ nimi-a apụ ma si laa ḅara, mie ị́yẹrị sọ si laa ḅara; anie Jeruselemu ngọ ma dogi-so tẹ ịna ogboku anị ḍiya ọkị apụ ma.

¹²Í gotẹ ị́ amịnapụ Izirẹlịapụ ma ḅụ paka si ḅẹrẹ mẹ ḍikiḍiki tẹ ḅioḅẹlẹ-ḅẹlẹ ye ofori ya. Ịn fa ene mẹ ḅụ í ḅioḅẹlẹ na-iḅi-a. Ịna ḅụụ-ḅalaḅala ḅụ ị́ ịn ḍẹrị na-iḅi-a.

¹³Ị̀ atomi ma opu ama mẹ ḅio ị́ sọ-mu na-iḅi-a, paa ịna tọrụsiẹrị ḍiki tẹ ḅioḅẹlẹ, tẹ ịna ngọ ma ọkị-so, opu ḅẹrẹ ịna ḅụụ paka ene mẹ ḅụ.

¹⁴Ị́ tẹra-isira mẹ ḅụ sịẹsime na-iḅi-a, ḅụụkụrọmatẹ mangị-soarị apụ ma ḅaa ḅẹ ḅara. Ị́ ịn saḅama inina fịya-a apụ ma pịrị na-iḅi-a, ịn ḅụụ-ḅalaḅala ene mẹ ḅụ.

¹⁵Ene mẹ ḅo kpeki tẹẹ, yẹrị KỊNỊNYANAḄỌ ḅe sịẹ-sịẹ mamgba kọn ḅẹ sakị mẹ. Ị́yẹrị Idọmụ, ị́ mịẹ tẹ ye mẹ ịn kẹ ị́ mịẹ ḅa. Ị́ pịrị pakama ye mẹ, mie ị́ pịkị ọkị ḅarịye.

¹⁶Àrị ị̀ atomi fomu ḅara ị̀ fịafịa tụndụ mẹ ọgọnọ ḅụ, anie à pịkị in gbori-ikelema wararị asịẹ ma fomu ḅarị ḅara; à fomu-ḅara kẹ ịn pịrị ḅa, tẹ in tomikiri mẹ ḅụ ḅọrọ so ḅa, gbala jene amụ in sime-a.

¹⁷KỊNỊNYANAḄỌ ḅe ḅẹẹm mịnẹ Zayọnị Tụndụ ọgọnọ jen-apụ mangị-so ḅa, tẹ anị fịafịa yọ sọ ḅa. Jekọbụ atomi ma pịkị siin ịna amakiri mẹ nyana ọkị ḅa.

¹⁸Jekọbụ na Josẹfụ na atomi ma kọrị-fịnị kịka ḅa; ini Ịsọ guluguluma ḅa, fịnị samụnọtẹ afun dọkịma ḅara. Ịsọ furo-ḅẹ-ḅọ tẹ fịị-a so ḅọ paka ḅịa.

¹⁹Juda suku-jụ ḅẹ apụ Idọmụ ọkị anga ḅa, ịrụa-ideriarị-anga ḅẹ apụ tẹ ḅụọ-kẹ-mẹnjị-saḅarị tụndụ mẹ ḅụ ḅo apụ ma Filisiteni nẹngịma ḅa; ịn pịkị Iferemu na Sameriya na nyana amakiri mẹ kẹ amịna nye sọma ḅa. Benijamịnị ḅẹ apụ ma Giliyadi ọkị ḅa.

²⁰Izirẹlị ọgọnọ-jụ kun-soapụ ma ọmụ-ogbo mẹ ḅo Fohinisiya ọkị ḅa, ọkị mu ọgọnọ-jụ Zarẹfatị la. Jeruselemu ḅụ kun-soapụ ma tẹ Sadisi ḅụ emi apụ ma, Juda ḅẹ suku-jụ ḅẹ ama ma ọkị ḅa.

²¹Owu-ḅara-iḅiapụ ma[2] kpọlị Zayọnị mu ḅa; in ḅẹrẹtọn Idọmụ pịrị ḅa. Tẹ KỊNỊNYANAḄỌ ḅe amadaḅọ sọ ḅa.