Read kalabari Kịẹn-aḅịḅị 10 Bible Online

Kịẹn-aḅịḅị 10 - kalabari bible

Kịẹn-aḅịḅị 10

¹KỊNỊNYANAḄỌ ḅe nwẹnị Mozizi ḅẹẹ,

²Maa seleḅa ọdụ tẹmẹẹ; ị̀ amana kẹ ḅakụ-ḅakụ arị kọrị ḅa; ị̀ arị ofuro-ofuro tẹ kẹ tomi ogbo mẹ kobiri ḅa, pịkị kẹ kobiri mẹ kan ḅa.

³In maaịn mamgba ofuro sakị ofuro sakị, tomi ogbo mẹmgba ịna ḅụụ kobiri tẹ mẹnjịị, kobiri Akpụrụ-warị mẹ sọarị ḅọkọ mẹ ḅụ ị́ ḍọkụma-ḅo ḅa,

⁴Kụma in gberie ngẹrị ofuro-ofuro, anịrẹ tọrọkọ tarị apụ ma, Izirẹlị ḅẹ afuro ma sịḅịdapụ ma ịna ḅụụ kobiri tẹ ị́ ḍọkụma-ḅo ḅa.

⁵Ị́ gbala ḅẹrẹ paka tẹ ḅara kẹ anị ofuro-ofuro, kobiri-ogbo ma tẹ ịrụa-saakịarị-anga anga emi akobiri-ogbo ma saakị mẹnjị ḅa.

⁶Anị maaịn karama sakị kẹ ọkọ fie-fie, kobiri-ogbo ma tẹ suku-jụ pakịrị anga simearị apụ ma saakị mẹnjị ḅa in saakị mẹnjị ḅarị sakị goyegoye, gbala ḅẹrẹ paka tẹ ḅara in nwẹn kẹ anị ofuro ḅa.

⁷Kụma inweni-ogbo mamgba ḅo kobiri gboloma ḅarị sakị, í anị ofuro ḅa, kụma í gbala ḅẹrẹ paka tẹ nwẹn ḅẹẹ ḅara mẹ kẹ anị ofuro ḅịa.

⁸Anịsakị Erọnị owiapụ-awọmẹ ma agbamịẹapụ ma ọdụ ma ofuro ḅa. Ọmịna aḅụụ mu ḅụọ-fa-ḅụọ-paka la, ọdụ ma kẹẹ-koro wararị oloko sọ ọ́ pịrị mu ḅẹẹ-sakị ḅẹẹ-sakị la ḅa.

⁹Ọmịnị ọmịna ama ḅio mu ọmịnị na fịya-a ọmụapụ tẹ ó ponomarị apụ ma na ọmụgbin ḅarị sakị mẹ ḅụ, ọ́ ḅẹrẹ paka tẹ ḅara mẹ kẹ ọdụ ma ofuro ḅa, mịẹtẹ KỊNỊNYANAḄỌ ọmịna Tamụnọ ḅe tọrọkọ ini ọ́ kẹ ḅiokoroma ḅarị ḅara, anịsakị ini ọmịnị na fịya-a apụ ma ḅara ḅio ọ́ ḅọrọma ḅa.

¹⁰Ọmịna ḅioḅẹlẹ ene ḅụ na, ọ́ sakị pẹlẹ pịrị tẹ fịarị kopini afịaị alalị asakị ḅụ na, ọmịna akalụ ma suku-saakị asakị na ḅụ sọ, ọmịnị ọdụ ma ofuro ḅa; ọ́ pịkị ọdụ ma ofuro ḅa ọmịna dọkịma-agba mịẹ asakị ḅụ na ọmịna dein-pịrị-agba mịẹ asakị ḅụ na; arị ọmịna Tamụnọ tọrọkọ ḅụ ḅiokoromaye sọ ọ́ pịrị ḅa. Yẹrị anie KỊNỊNYANAḄỌ ọmịna Tamụnọ ḅee.

¹¹Maaịn karama kụra mẹ ḅẹ maa akalụ karama akalụ mẹ ḅẹ si aḍin karama eneḅaka mẹ ḅụ, ḅụụ ḍie-pakama akpụrụ-warị mẹ ọgọnọ-jụ ḅụ oḅuto mẹ iwom,

¹²tẹ Izirẹlịapụ ma Sayịnayị ḅẹ ịkpa mẹ ḅio saakị mẹnjịm ḅiri-ḅiri ḅụ tẹ oḅuto mẹ mu Peranị ḅẹ ịkpa mẹ ḅio sịẹsimem.

¹³Mịẹ mẹ anie ini ḅẹ tarị sakị KỊNỊNYANAḄỌ ḅe Mozizi ḅụ tọn in pịrị ḅara kẹ sakị mẹnjị.

¹⁴Juda kobiri-ogbo mẹ ḅẹ atomi ma in la ḅara ḅụ tarị kpoo-kpo ḅụ saakị mẹnjịm, anịsakị ịna kobiri-ogbo mẹ ḅẹ ḅẹrẹtọnḅọ anie Nasọnị, Amịnadabụ owiḅọtụḅọ ḅe.

¹⁵Anịsakị Ịsaka furo mẹ ḅẹ atomi ma kpo mẹ ḅẹ ḅẹrẹtọnḅọ anie Natanịyẹlị Zụha owiḅọtụḅọ ḅe

¹⁶tẹ Zẹbulọnị furo mẹ ḅẹ atombi ma kpo mẹ ḅẹ ḅẹrẹtọnḅọ anie Ẹlịyabụ, Hẹlọnị owiḅọtụḅọ ḅe.

¹⁷Ini ọḅọkụ igbe koko akpụrụ-warị mẹ kan tẹ sin koroma tẹso, Gasọnị owiapụ-awọmẹ ma na Mẹrarị owiapụ-awọmẹ ma tẹ ọḅọkụ Igbe koko Akpụrụ-warị mẹ dogi apụ ma saakị mẹnjịm.

¹⁸Rubẹnị kobiri-ogbo mẹ nwẹnị in la ḅara ḅụ kpoo-kpo ḅụ saakị mẹnjịm anịsakị ịna inweni-ogbo mẹ ḅẹ ḅẹrẹtọnḅọ anie Elizọ, Sẹdiyọ owiḅọtụḅọ ḅe.

¹⁹Anịsakị Simiyọnị furo mẹ ḅẹ atomi ma kpo mẹ ḅẹ ḅẹrẹtọnḅọ anie Sẹlumẹlị, Zurisadayị owiḅọtụḅọ ḅe.

²⁰Anịsakị Gadi furo mẹ ḅẹ atomi ma kpo mẹ ḅẹ ḅẹrẹtọnḅọ anie Ẹlịsafatị, Duhẹlị owiḅọtụḅọ ḅe.

²¹Anịtẹso Kohatị furo-ḅẹ-apụ ma fịafịa aị ma dogi tẹ saakị mẹnjịm, anịsakị tẹrẹmẹ in ḅo laa, ọḅọkụ igbe koko akpụrụ-warị mẹ pike tẹ.

²²Iferemu atomi ma kobiri-ogbo mẹ nwẹnị in la ḅara ḅụ kpoo-kpo ḅụ saakị mẹnjịm anịsakị ịna kobiri-ogbo mẹ ḅẹ ḅẹrẹtọnḅọ anie Ẹlịsama, Amihudu owiḅọtụḅọ ḅe.

²³Anịsakị ḅẹrẹtọn Manasẹ furo mẹ ḅẹ atomi ma kpo mẹ pịrị ḅọ anie Gamalịyẹlị, Padazo owiḅọtụḅọ ḅe.

²⁴Abidani, Gidehọni owiḅọtụḅọ ḅe anie Benijamịnị furo mẹ ḅẹ atomi ma ḅẹrẹtọnḅọ.

²⁵Anịtẹso Danị atomi ma kobiri-ogbo mẹ, kobiri-ogbo mamgba ḅụ kunoma tẹ ọḅụ ḍikiḍiki ḅara kẹ ye mịẹarị apụ ma in la ḅara ḅụ kpoo-kpo ḅụ saakị mẹnjịm; ịna kobiri-ogbo mẹ Ayiheze, Amisadayị owiḅọtụḅọ ḅe anị ḅẹ ḅẹrẹtọnḅọ.

²⁶Asa furo mẹ ḅẹ atomi ma kpo mẹ ḅẹ ḅẹrẹtọnḅọ anie Pagiyẹlị, Okirani owiḅọtụḅọ ḅe.

²⁷Anịsakị Nafutali furo mẹ ḅẹ atomi ma kpo mẹ ḅẹ ḅẹrẹtọnḅọ anie Ayira, Ẹnanị owiḅọtụḅọ ḅe.

²⁸Izirẹlịapụ ma saakị tẹ mẹnjị sakị mịẹ mẹ anie ịna saakị mẹnjị mẹ ḅẹ ọrụtọn ḅara mẹ, kpoo-kpo ma wẹrịtẹ sime-ḅara ḅụ.

²⁹Mozizi nwẹnị ọ̀ fụanḅọ Ruwẹlị (Jetiro sọ ori ẹrẹ), Midiyanị ḅẹ ḅọ ḅe owiḅọtụḅọ Hobabu ḅẹẹ, “Wa saakị so ye-yọ mẹ tẹ KỊNỊNYANAḄỌ ḅe ḅẹẹm, ‘À kẹ ó pịrị ḅa’ nwẹn ḅẹẹ anga mẹ mu ḅẹ-yearị; wamịna-aḅụụ sọ tẹ sọ ḅoo, anịsakị wa iḅi kẹ í mịẹ ḅa, kẹ gotẹ ọkọ ḅẹẹarị, KỊNỊNYANAḄỌ ḅe iḅi kẹ Izirẹlị karịma tẹẹ”

³⁰Kụma Obabu nwẹnị ọ̀ ḅẹẹ, “À mu ḅịa, à so ị̀ ama mu tẹ ì amịnapụ ḍọkụma-mu ḅa”

³¹Mozizi nwẹnị Obabu ḅẹẹ, “Àrị ị́ tẹkẹm wa koroma-so ma, kẹ gotẹ ọkọ ḅẹẹarị, wa ịkpa mẹ ḅio akpụrụ-warị pike tẹ sime ḅarị ḅara í nimim, í wamịna atọrụngbọ sọ wa pịrị ḅa.

³²Anịsakị í wamịna-aḅụụ sọ tẹ wamịnị na mu muu, iḅi goyegoye tẹ KỊNỊNYANAḄỌ ḅe kẹ wa mịẹ ye mịẹ ye, anị iḅi mẹ wa kẹ í mịẹ ḅa.”

³³Mịẹ ḅụ in KỊNỊNYANAḄỌ ḅe tụndụ mẹ ḅụ saakị mẹnjị tẹra aḍin igoni mum tẹ KỊNỊNYANAḄỌ ḅe ọḅọkụ mẹ ḅẹ igbe mẹ ịnyọsara yọ ḍọkị in pịrị ḅẹ ẹrẹsị tẹra aḍin igoni mẹ ḅụ ịna tọrọkọ-tarịm.

³⁴Ini in kobiri sime anga ḅụ saakị mẹnjị sakị mẹnjị sakị eneḅaka ḅụ KỊNỊNYANAḄỌ ḅe oḅuto mẹ ịna ọgọnọ-jụ ḅụ sime tẹ etela kẹ in ḍiem.

³⁵Anị sakị Ọḅọkụ-Igbe mẹ saakị mẹnjị sakị mẹnjị sakị Mozizi ḅẹẹm: “Saakịị, Yei KỊNỊNYANAḄỌ! Tẹ yee í na fịya-a apụ ma gala-gala, tẹ yee í ḍiki-ḅioḅuarị apụ ma ị́ tọrọkọ ḍumo-mangị kọn.”

³⁶Anịsakị anị ịnyọsara sakị goyegoye ọ̀ ḅẹẹm, “Pịkịma-ḅoo, Yei KỊNỊNYANAḄỌ!”