Read kalabari Kịẹn-aḅịḅị 21 Bible Online

Kịẹn-aḅịḅị 21 - kalabari bible

Kịẹn-aḅịḅị 21

¹Aradi ḅẹ amadaḅọ, anie Kenanị ḅẹ ḅọ ḅe tẹ Kenanị suku-jụ mẹ ḅio angarị ḅọ ḅe naam mịnẹ, Izirẹlị Atarimu ḅẹ etela mẹ ḅụ ḅoarị tẹso, ọ̀ nwẹnị owu kẹ Izirẹlị paka, tẹ ini ḅẹ ja apụ kuun-ọkị.

²Anịtẹso Izirẹlị nwẹnị ịlọ minini KỊNỊNYANAḄỌ ḅe pịrị tẹ ḅẹẹ, “Ị́yẹrị nwẹnị karakara ḅara kẹ mịna atomi ma kẹ ị̀ ḅara ḅio suu ḅẹḅẹ anịrẹ arị ịkatakirikọn-a-ḅara kẹ ịna opu ama ma ḅaa fama ḅa.”

³KỊNỊNYANAḄỌ ḅe nwẹnị Izirẹlị pọkọ naa, tẹ Kenanị ḅẹ apụ ma saakị saḅama ịn pịrị, tẹ ini ịkatakirikọn-a-ḅara kẹ ini na, ịna opu ama ma na ḅaa fama famam; mie ḅụ ini ẹrẹ kẹ anịjụ mẹ sịnm, Ọma[2].

⁴Họ Tụndụ ḅụ in saakị ḅọrọ Awụ Tọrụ mẹ mu etela mẹ ḅụ Idọmụ ama mẹ mẹnjị kana-koro ḅẹ ḅara mẹnjịm; tẹ etela mẹ ḅụ tomi ma ḅarị inetẹ inema tẹ dein-simea.

⁵Tomi ma nwẹnị Tamụnọ na Mozizi na tụḅụrụ ẹkwẹn kọn, “Í tiegotẹ Ijiputi ḅụ wa pakama-ḅo tẹ kẹ ịkpa mẹ ḅio ḅaa ḅẹ ḅo? Kẹ gotẹ ọkọ ḅẹẹarị, fịye ofori, minji pịkị ofori, anịsakị wa pịkị mie ye ḅụ ofori fịye mẹ ḍiki-ḅioḅuarị.”

⁶Anịtẹso KỊNỊNYANAḄỌ ḅe nwẹnị ḅalafama si oronwi kẹ tomi ma ogbo-ḅio fịrịma, tẹ ịn tomi ma gbọnm, anie mịẹtẹ Izirẹlị ḅẹ tọnwa apụ fịịm.

⁷Tomi ma nwẹnị ḅo Mozizi la tẹ ḅẹẹ, “Wa si mịẹ tẹ; kẹ gotẹ ọkọ ḅẹẹarị, wa KỊNỊNYANAḄỌ ḅe na ịna ḅụ tụḅụrụ ẹkwẹn kọn tẹ; KỊNỊNYANAḄỌ ḅe tẹkẹ wa pịrịị, mịẹtẹ ọ̀ wamịna ḅụụ mịna oronwi ma sin ḅarị ḅara.” Mie ḅụ Mozizi tẹkẹ tomi ma pịrịm.

⁸Tẹ KỊNỊNYANAḄỌ ḅe nwẹnị Mozizi ḅẹẹ, “Ḅalafama gbọrụ si oronwi tẹmẹ, tẹ anị kẹ nangwọtẹ gbọrụ si oronwi tẹmẹ, tẹ anị kẹ nangwọtẹ gbọrụ sịn ikiḅa ḅịḅị ḅụ sololo; ḅẹḅọ-ḅẹḅọ tẹ oronwi ḅe gbọn ḅọ gbọn ḅọ, mḅọ anị ẹrị sakị, mḅọ ḍumo ḅa.”

⁹Mie ḅụ Mozizi gbọrụ ojo oronwi tẹmẹm, tẹ anị kẹ gbọrụ nangwọtẹ sịn ikiḅa ọgọnọ sololo wẹrịm, tẹ oronwi ḅẹḅọ-ḅẹḅọ gbọn ḅẹḅẹ, mḅọ ojo oronwi ḅe ḍiki tẹ ḍumom.

¹⁰Izirẹlịapụ ma saakị mẹnjị tẹ mu Oboti ḅụ akpụrụ-warị pike tẹ kobirim.

¹¹Oboti ḅụ ịn saakị mẹnjịm tẹ mu Iye-abarimu ḅụ, anị yọ mẹ tẹ ịkpa mẹ ḅio Mohabụ na dama-dama wararị, ịrụa-saakịarị-anga anga da-mu anga ḅụ akpụrụ-warị pike tẹ kobirim.

¹²Anịjụ ḅụ ịn pịkị saakị mẹnjịm, tẹ ḅo Zẹrẹdị ḅẹ Tụndụ Ogboku ḅụ Akpụrụ-warị pike tẹ kobirim.

¹³Anịjụ ḅụ in saakị mẹnjịm, tẹ mu Anọnị Tọrụ saḅa-anga ḅụ akpụrụ-warị pike tẹ kobirim anịjụ mẹ tẹ ịkpa mẹ ḅio Amọrayịtị apụ oke mẹ ḅụ finjima mu wararị anga mẹ; Anọnị Tọrụ mẹ anie Mohabụ oke Amọrayịtị apụ ma na Mohabụ na ogboku ḅụ.

¹⁴Anie mẹ ẹrẹsị KỊNỊNYANAḄỌ ḅe Ọmụ ma ḅẹ Ḍiri mẹ ḅio anị ḅẹẹ wararị, “Sufa iri ḅụ simearị Wahebu ḅẹ ama, na tụndụ ogboku ma na; Anọnị Tọrụ,

¹⁵na tụndụ ogboku ma ḅẹ tuma, tẹ ọkị mu A-a nwẹn-sịn ama la ye mẹ, tẹ Mohabụ agara da-mu ye mẹ.”

¹⁶Anịjụ ḅụ ịn mẹnjị ma-mu Bẹya (anie Suḅe); aniemẹ anie suḅe mẹ tẹ KỊNỊNYANAḄỌ ḅe Mozizi ḅẹẹm, “Tomi ma kobiri ḅo gbolomaa anịsakị à minji kẹ ịn pịrị ḅa” ḅẹẹ suḅe mẹ lam.

¹⁷Anịtẹso Izirẹlị mị nume mẹ pakama tẹ sunm: yei Suḅe, minji sara sara pakama-ḅoo! Nume su su anị pịrịị!

¹⁸Suḅe mẹ tẹ sịḅịdapụ ma soku ye mẹ; aniemẹ tẹ tomi ma ḅẹ opu apụ ma soku ye mẹ, ama-da mkpara mẹ na ịna ḅụụ da mkpara na ini na. Tẹ ịkpa mẹ ḅụ ịn mẹnjị ma-mu Matana lam,

¹⁹tẹ Matana ḅụ mu Nahalịyẹlị lam, Nahalịyẹlị ḅụ in mu Bamọtị lam;

²⁰anịsakị Bamọtị ḅụ ịn mu Mohabụ iri ḅụ simearị tụndụ ogboku mẹ lam, Pisiga Tụndụ sịḅị ọgọnọ tẹ ḍiki ideri ma-mu ịkpa mẹ ọgọnọ laarị pakịrị ḅụ.

²¹Anịtẹso Izirẹlị oku-mẹnjịapụ fịrịma Siyọnị, Amọrayịtị apụ ma amadaḅọ ḅe dama-mum, mịnẹ ịn ọ̀ ḅẹẹ,

²²“Minini wa pịrịị wa ị́ ama ḅio mẹnjị-toluḅọrọ, wa tọrụ-pịkị akaka da tẹ ḍụọ anịanịa girepu-ḍụọ ḅio ḍiki ḅịa; gbọrụ suḅe ḅio ḅẹ minji sọ wa ḅuu ḅịa. ‘Amadaḅọ-Opu-Etela’ mẹ ḅụ mie wa gono-gonoma mẹnjị nwenii wa í ye-yọ mẹ mẹnjị-toluḅọrọ ḅarịye.”

²³Kụma Siyọnị ḍụkụ tẹ Izirẹlị ò ye-yọ mẹ ḅụ mẹnjị-toluḅọrọ-a. Ọ̀ nwẹnị ori atomi mamgba kobiri ḅo gboloma, tẹ paka ịkpa mẹ ḅio Izirẹlị da-paka ḅẹ tẹ ḅo Jehazi la, tẹ owu kẹ Izirẹlị pakam.

²⁴Tẹ Izirẹlị nwẹnị okologie mẹ kẹ ọ̀ ḅaa, tẹ nwẹnị ori ama Anọnị mẹ ḅụ saakị mu Jabọkụ la, mu Amọrayịtị apụ ma sime ala-jụ la ọkị nyana. Jabọkụ anie Amọnị ḅe apụ ma oke mịẹ sime anga.

²⁵Izirẹlị nwẹnị mịna opu ama mamgba ọkị, tẹ Izirẹlị koro Amọrayịtị apụ opu ama mamgba ḅio angam, Ẹsịbọnị ḅụ na, anị ḅe kala-ama mamgba na ḅụ.

²⁶Gbala Ẹsịbọnị anie Siyọnị, Amọrayịtị apụ ma amadaḅọ ḅe sime-sime opu ama, oriḅe tẹ Mohabụ ḅẹ tarị amadaḅọ ḅe na owu sọ, tẹ ọ̀ ḅara ḅụ ori ama mamgba ọkị fama mu Anọnị mẹ sime jụjụ-ḅio la ḅọ ḅe.

²⁷Anịẹrẹsị nume pakama ḍin apụ ma sunm: “Ọmịnị Ẹsịbọnị ḅoo, yee anị nama, yee Siyọnị opu sịẹ mẹ mịẹ paka-ḅo,

²⁸Gbala orumo Ẹsịbọnị ḅụ ḅom, fịnị-ḅẹlẹ Siyọnị opu ama ḅụ kọrị pakam. Anị Mohabụ ḅẹ A-a nwẹn-sịn ama mẹ gulugulumam, Anọnị mẹ ḅẹ gele ayọ ma nyana apụ ma.

²⁹Sule-ḅịḅị sime ị́ pịrịị, yei Mohabụ! Ọ́ tẹkẹlẹ tẹẹ, yei Kẹmosi atomi! Ori ori owiapụ-awọmẹ mịẹtẹ ịn ḅarị sịẹ-kiri nyana-a tẹ ori eremịna-awọmẹ, Siyọnị, Amọrayịtị ḅẹ gbọrụ amadaḅọ ịn kun-so tẹẹ.

³⁰Kụma mịọkụ ịna ḅụụ paka-ḅo aị fịị fama tẹẹ, Ẹsịbọnị ḅụ saakị mu Dibọnị la, Nọfa ḅụ ọkị mu Medeba la.”

³¹Mị-ḅara ḅụ Izirẹlị Amọrayịtị apụ ma ama mẹ ḅio angam.

³²Tẹ Mozizi fịrịma Jaza opu ama mẹ ẹnyẹ ḅẹ mum tẹ Izirẹlịapụ ma opu ama mẹ na anị ḅẹ kala-ama ma na ọkị tẹ arị ḅio anga sime Amọrayịtị apụ ma dee-siinm.

³³Anịtẹso ịn nwẹnị vuunma pịkị tẹ so Basani mu etela mẹ ḅụ mẹnjị mu; tẹ Ogu, Basani ḅẹ amadaḅọ ḅe nwẹnị ori atomi mamgba na ori na Ẹdẹrẹyi ḅụ owu kẹ ịn paka ḅẹ ḅara kẹ paka-ḅo in da-paka.

³⁴Kụma KỊNỊNYANAḄỌ ḅe nwẹnị Mozizi ḅẹẹ, “Ịn ḍiki-ḅalafa ma; kẹ gotẹ ọkọ ḅẹẹarị, àrị ori na ori atomi mamgba na, ori ama na kẹ ị́ ḅara-ḅio ḅụ ị́ pịrị tẹẹ; anịsakị ị́ kẹ Siyọnị Amọrayịtị apụ ma amadaḅọ ḅe tẹ Ẹsịbọnị ḅụ anga ḅọ ḅe mịẹ ḅara kẹ ọ̀ mịẹ ḅa.”

³⁵Mie ḅụ ini ori na, ori owiapụ-awọmẹ na, ori atomi mamgba na ḅaa nwenii ḍumo tẹ kirikọn ọ̀ pịrị kpọkpọ gbọrụḅọ-sọ ofori.