Read kalabari Kịẹn-aḅịḅị 24 Bible Online

Kịẹn-aḅịḅị 24 - kalabari bible

Kịẹn-aḅịḅị 24

¹Balamụ ẹrịm mịnẹ Izirẹlị boma mẹ anị KỊNỊNYANAḄỌ ḅe ḅụụ-ḅẹlẹm ḅẹ sakị, ọ̀ ḅarị osi asakị ḅụ ò mu paka ḅẹ ye ḅẹ elekima ḍiki, ḍiki ḅara mẹ mu-a, kụma ori ọ̀ tọrụ kẹ ịkpa mẹ da wẹrịm.

²Balamụ nwẹnị ọ̀ tọrụ saakị tẹ Izirẹlị ẹrị furo-furo ḅụ ini akpụrụ-warị pike, pike tẹ kobiri wararị. Tẹ Tamụnọ Tẹmẹ ḅe nwẹnị ḅo ori ọgọnọ gbana,

³tẹ ọ̀ nwẹnị ori ẹkwẹn saakị kọọn, tẹ ḅẹẹ, Balamụ, Bẹyọ owiḅọtụḅọ ḅe oku-ḅịḅị mẹ, oriḅe tẹ tọrụngbọ finji wararị ḅọ ḅe oku-ḅịḅị mẹ,

⁴ori ḅe tẹ Tamụnọ ẹkwẹn-aḅịḅị naarị ḅọ ḅe oku-ḅịḅị mẹ, Kụrọmamgba Nyanaḅọ ḅe ịkịan ẹrịarị ḅọ ḅe, ḅịkị koroarị kụma ori atọrụngbọ finji wararị:

⁵yei Jekọbụ, ị́ akpụrụ-awarị ma kọn iḅi, yei Izirẹlị, ị́ akobiri-ogbo ma tọrụ-gbẹ ḅara!

⁶Gbala tụndụ ogboku tẹ sụụn ala-jụ mu wararị aị sime-ḅara; gbala tọrụ akaka emi aḍụọ sime-ḅara; gbala ịn kẹ alosi sịn-arị sịn mẹ tẹ KỊNỊNYANAḄỌ ḅe ḍiḅi ye sime-ḅara; gbala minji mẹ akaka simearị sida nwẹn sin opu asịn sime-ḅara.

⁷Minji ori agbakuru ma ḅụ seri ḅa, tẹ ọ̀ sịnmgbọlị tọnwa minji ḅio sime ḅa. Ori amadaḅọ gele Egagị nẹngị ḅa, tẹ ori ama-da saakị gele ḅa.

⁸Tamụnọ Ijiputi ḅụ ọ̀ pakama-ḅom; Ori owu-sọ ịn pịrịarị ḅara gbala piri-ḅio-ḅẹ pootẹ-nambulo ọkụ; ori ori na ọmụ gbin-arị opu asịẹ ma pẹị-siin fama ḅa, tẹ ịna mgbe ma kẹ pakịrị, pakịrị anyịma ḅa, tẹ ịna aḍịẹịn ma kẹ ịn kpịra kpịra toluma ḅa.

⁹Ori ikom, ori ọkụkụ mono ḅara monom, na ịyọrọ ọkụkụ mono ḅara na tụḅọ ò jike saakịma ḅẹ? Í boma ḅọ goḅọ-goḅọ, boma sime mḅọ pịrịị; anịsakị wori-nume sime í wori ḅọ goḅọ-goḅọ pịrịị.

¹⁰Balakị nwẹnị ịganị nyana Balamụ pịrị, tẹ nwẹnị ori aḅara farị; tẹ Balakị nwẹnị Balamụ ḅẹẹ, “Àrị ị́ sịnm ḅo ị̀ na fịya-a apụ worii, kụma ḍikii, mịna tẹra sakị ma ḅụ boma mie í ịn boma ye.

¹¹Anịẹrẹsị mịọkụ ḍumo-mangị kọn ị́ ama muu. À ḅẹẹm, ‘Piki-pikiye-ofori ḅara ḅụ à kụn kẹ ị́ pịrị ḅa’, kụma KỊNỊNYANAḄỌ ḅe gbẹẹ-ye nyana ḅụ ị́ ọlọ ọḅụ dama tẹẹ.”

¹²Balamụ nwẹnị Balakị pakịrị, “Í oku-mẹnjịapụ, inima tẹ ị́ kẹ ị̀ fịrịma apụ ma ịn ḍuko ị́ pịrị-a.

¹³Balakị nwẹnị ọ̀ warị golu na, seleḅa na ḅin wararị ye kẹ ị̀ pịrị sọ, à KỊNỊNYANAḄỌ ḅe ẹkwẹn-ḅịḅị mẹ saḅa, tẹ yẹrị tọn ye iḅiye, anịanịa siye mịẹ ḅịa, KỊNỊNYANAḄỌ ḅe ẹkwẹn ye mẹ anie mie àrị ẹkwẹn ḅarịye?”

¹⁴Anịsakị mịọkụ ḍikii, à so ị̀ atomi ḍọkụma-muarị; ḅoo, à mịẹtẹ mịna atomi ma kẹ kunoma ene ma ḅụ ị́ atomi mịẹ ḅarịye í nimi ḅa.

¹⁵Tẹ ọ̀ nwẹnị ori ẹkwẹn saakị kọn, tẹ ḅẹẹ: Balamụ, Bẹyọ owiḅọtụḅọ ḅe oku-ḅịḅị mẹ; oriḅe tẹ tọrụngbọ finji wararị ḅọ ḅe oku-ḅịḅị mẹ;

¹⁶oriḅe tẹ Tamụnọ ẹkwẹn-aḅịḅị naarị ḅọ ḅe oku-ḅịḅị mẹ, tẹ Geletẹịn ḅọ ḅe nimi mẹ lekiri wararị ḅọ, Kụrọmamgba Nyanaḅọ ḅe ịkịan ẹrịarị ḅọ ḅịkị koroarị kụma ori atọrụngbọ finji wararị ḅọ.

¹⁷Àrị ori ẹrịm, kụma mịọkụ-a; àrị ò ḍikim, kụma ò kpeki-a; Jekọbụ ḅụụ ḅụ gbọrụ lolia paka-ḅo ḅa, anịsakị Izirẹlị ḅụ gbọrụ ama-da mkpara paka-ḅo ḅa; anị Mohabụ sịḅị gbẹẹ kọsịma ḅa, tẹ opu amịẹaị na, ye kẹ kịnị lamarị apụ ma owiapụ-awọmẹ mamgba ḅaa fama ḅa.

¹⁸Idọmụ nyana apụ ḅarị paka ḅịa. Siya sọ arị na fịya-a apụ, anị nyanapụ ḅarị paka ḅịa, Izirẹlị paa owu-ḅara-iḅi-ḅi ḅa.

¹⁹Jekọbụ ḅụ kụrọ paka tẹ ọ̀ nanga ḅọrọ ḅa, tẹ opu ama ma ḅẹ kirikọn-apụ ma fịị fama ḅa!

²⁰Anịtẹso ọ̀ nwẹnị tọrụ saakị Amalẹkị ḍiki, tẹ nwẹnị ori ẹkwẹn saakị kọn, tẹ ḅẹẹ: Amalẹkị anie opu asịẹ ma ḅụ tọrọkọ tarị sime ye kụma kunoma ḅụ ò ḅo ḅa, fịị fa ḅụ sọ ḅa.

²¹Ọ̀ nwẹnị tọrụ saakị Kenayịtị apụ ma ḍiki tẹ ori ẹkwẹn saakị kọn, tẹ ḅẹẹ: Ọmịnị angarị anga mẹ ye ọ́ la ḅịa, anịsakị ịkụ ọgọnọ ọmịnị ọmịna awarị nama.

²²Anị sime-ḅara, sime-ḅara sọ, Keni gulugulu fatẹ yọ sọ ḅa, Asọ kun-ḅara kẹ ọmịnị ọkị so sakị.

²³Ọ̀ nwẹnị ori ẹkwẹn saakị kọn, tẹ ḅẹẹ: Ịyaa, tụḅọ ḍumo-sime ḅa, Tamụnọ miemẹ mịẹ sakị?

²⁴Kụma opu onwi-arụ Kitimu ḅụ ḅo ḅa, tẹ ḅụụ-fụka kẹ Asọ na, Ẹba na pịrị ḅa, tẹ ini sọ ḅọ fịị gulugulu fa ḅa.

²⁵Anịtẹso Balamụ saakịm, tẹ so ori ama mum, tẹ Balakị sọ so ori anga dam.