Read kalabari Kịẹn-aḅịḅị 28 Bible Online

Kịẹn-aḅịḅị 28 - kalabari bible

Kịẹn-aḅịḅị 28

¹KỊNỊNYANAḄỌ ḅe nwẹnị Mozizi ḅẹẹ:

²Tọn Izirẹlịapụ ma pịrị tẹ in ḅẹẹ, “Ị̀ agba, fịnị ḅụ ịn mịẹ ị̀ pịrịarị sime ị̀ pịrị fịye agba mẹ, ị̀ ḅụụ-ḅẹlẹarị kụnụ mẹ, ọ́ ḅụụ ẹbị-ẹbị anị mịẹ-mịẹ ị̀ pịrị ḅa anị ḅẹ sakị ḅụ.”

³“Anịsakị ị́ ịn ḅẹẹ ḅa, miemẹ anie fịnị ḅụ mịẹarị agba mẹ tẹ ọ́ mịẹ KỊNỊNYANAḄỌ ḅe pịrị ḅarịye mẹ; ḅẹkụ ḅụụ ḅụ ofori, gbọrụ kụra sịḅị ḅụ ḅọrọtẹ maa asambịrịma ejimina ọ́ nwẹn kẹ ene-ḅaaene-ḅaaene sịkọpẹlẹ-a ḅara kẹ agba mẹ mịẹ ḅa.

⁴Ọ́ gbọrụ asambịrịma ejimina kẹ dede agba mẹ mịẹ ḅa, ọ́ pịkị osi asambịrịma ejimina ḅe kẹ ḅoḅiri agba mịẹ ḅa;

⁵pịkị ḅara mịẹ pulo elekedi kẹ pikiritẹ iḅiọkụ gbẹẹtẹ iḅi fịlawa kala akpa kẹ oyia akiri ḍiya ḅẹ gbọrụ kiri kẹ mgbọlụ agba mịẹ ḅa.

⁶Miemẹ anie sịkọpẹlẹ-a ḅara kẹ mịẹ ḅarị dọkịma-agba tẹ Sayịnayị Tụndụ ḅụ ḅụụ-ḅẹlẹarị kụnụ fịnị ḅụ mịẹ KỊNỊNYANAḄỌ ḅe pịrị arị agba gotẹ tọn wararị ye.

⁷Anị ḅẹ iru agba anie asambịrịma gbọrụ ejimina goyegoye iru elekedi; Fịafịa Yọ mẹ ḅio mie ọ́ kụrọtẹ iru kẹ sara KỊNỊNYANAḄỌ ḅe pịrị ḅarịye.

⁸Osi asambịrịma ejimina ḅe ḅoḅiri-so ḅụ ọ́ kẹ agba mẹ mịẹ ḅa; dede-ḅio ḅụ mgbọlụ agba mẹ na anị ḅẹ iru agba mẹ na mịẹ ḅara ọ́ nwẹn mịẹ ḅa fịnị ḅụ; KỊNỊNYANAḄỌ ḅe ḅụụ-ḅẹlẹarị kụnụ.”

⁹Ịnyọsara-Ene mẹ ḅẹ agba mẹ anie ḅẹkụ ḅụụ ḅụ ofori gbọrụ kụra sịḅị ḅụ ḅọrọtẹ maa asambịrịma ejimina na, pulo kẹ pikiritẹ iḅiọkụ gbẹẹtẹ iḅi fịlawa kala akpa kẹ oyia akiri ḍiya ḅẹ maa akiri kẹ mgbọlụ agba mịẹ na anị ḅẹ iru agba na anị na.

¹⁰Miemẹ anie Ịnyọsara-Ene mẹ ḅẹ dọkịma-agba mẹ, sịkọpẹlẹ-a ḅara kẹ ene-ḅaaene-ḅaaene ḅụ mịẹarị agba mẹ na anị ḅẹ iru agbamịẹye mẹ na sikima.

¹¹“Ọmịna akalụ ma ḅe suku-saakị ḅụ ọ́ dọkịma agba mịẹ KỊNỊNYANAḄỌ ḅe pịrị ḅa: ḅẹkụ ḅụụ ḅụ ofori asambịrịma maa owi-anambulo na, gbọrụ ejimina na, gbọrụ kụra sịḅị ḅụ ḅọrọtẹ asambịrịma sọnọma ejimina na;

¹²pịkị gbọrụ owi-nambulo goyegoye ḅụ pulo kẹ pikiritẹ iḅiọkụ gbẹẹtẹ iḅi fịlawa gbọrụ kala akpa kẹ oyia akiri ḍiya ḅẹ tẹra kiri kẹ mgbọlụ agba mịẹ ḅa; pịkị gbọrụ ejimina ḅe ḅụ, pulo kẹ pikiritẹ iḅiọkụ gbẹẹtẹ iḅi fịlawa gbọrụ kala akpa kẹ oyi akiri ḍiya ḅẹ maa kiri kẹ mgbọlụ agba mịẹ ḅa;

¹³anịsakị asambịrịma ejimina ma goyegoye ḅụ, pulo kẹ pikiritẹ iḅiọkụ gbẹẹtẹ iḅi fịlawa gbọrụ kala akpa kẹ oyia akiri ḍiya ḅẹ gbọrụ kiri kẹ mgbọlị agba mịẹ ḅa fịnị ḅụ mịẹ KỊNỊNYANAḄỌ ḅe pịrịarị dọkịma-agba, anị sime dọkịma-agba pịrịm ḅụụ-ḅẹlẹmarị kụnụ.

¹⁴Arịḅẹ iru agbamịẹ-aị anie owi-nambulo ḅe ḅẹ gbọrụ ye ḅụ iru gbọrụ karama; ejimina ḅe ḅụ, iru maa akarama kẹ tẹra akiri ḍiya ḅẹ gbọrụ kiri gbọrụ asambịrịma ejimina ḅụ, iru elekedi. Miemẹ anie akalụ goyegoye ḅụ mịẹ ḅarị dọkịma-agba kụra mẹ ikelema-koro ḅụ.

¹⁵Anịsakị pịkị si sin agba mịẹ KỊNỊNYANAḄỌ ḅe pịrị ḅarị gbọrụ ekpe-oḅori na sịkọpẹlẹ-a ḅara kẹ mịẹarị agba mẹ na anị ḅẹ iru agba mẹ na sikima si sin agba mẹ pịkị mịẹ ḅa.”

¹⁶“Tarị akalụ mẹ ḅẹ ngei aḍin fa jei karama eneḅaka mẹ anie KỊNỊNYANAḄỌ ḅe Saḅa-ḅọrọ Alalị eneḅaka mẹ.

¹⁷Anịsakị mị akalụ mẹ ḅẹ jei aḍin karama eneḅaka mẹ anie kopini afịaị fị eneḅaka; sọnọma aḍin ịn nwẹn kẹ sunmaye sọ-a fịturu fị ḅa.

¹⁸Tarị ene mẹ ḅụ ọ́ Fịafịa Kobiri nyana ḅa; ọ́ gbọrụ kọrịnama sọ kọrị ḅịa;

¹⁹kụma ọ́ fịnị ḅụ dọkịma-agba mịẹ KỊNỊNYANAḄỌ ḅe pịrị ḅa; asambịrịma maa owi-anambulo na, gbọrụ ejimina na, gbọrụ kụra sịḅị ḅụ ḅọrọtẹ asambịrịma sọnọma ejimina na ọ́ nwẹn kẹ agba mẹ mịẹ ḅa; ọmịnị ẹrị mịnẹ ḅẹkụ arị ḅụ ofori;

²⁰pịkị arịḅẹ mgbọlụ agbamịẹye: pulo kẹ pikiritẹ iḅiọkụ gbẹẹtẹ iḅi fịlawa gbọrụ kala akpa kẹ oyia akiri ḍiya ḅẹ tẹra kiri gbọrụ owi-nambulo, gbarị owi-nambulo ḅụ; kẹ oyia akiri ḍiya ḅẹ maa akiri ejimina ḅe ḅụ,

²¹anịsakị kẹ oyia akiri ḍiya ḅẹ gbọrụ kiri, gbọrụ kiri ó nwẹn kẹ agba mịẹ ḅa asambịrịma sọnọma ejimina ma ḅẹ gberie-gberie ḅụ;

²²ọ́ pịkị gbọrụ ekpe-oḅori kẹ si sin agba mịẹ ḅa, kẹ si-wẹrịso pịrị ḅẹrẹ fama ọ́ pịrị ḅarị ḅara.

²³Dede-ḅio ḅẹ dọkịma-agba mẹ tẹ sịkọpẹlẹ-a ḅara kẹ mịẹarị ye mẹ sikima ọ́ mịna agba ma mịẹ ḅa.

²⁴Anị gbọrụ ḅara ḅụ ọ́ sọnọma aḍin kẹ ene-ḅaaene-ḅaaene ḅụ fịye agba mẹ mịẹ ḅa fịnị ḅụ, KỊNỊNYANAḄỌ ḅe ḅụụ-ḅẹlẹarị kụnụ. Sịkọpẹlẹ-a ḅara kẹ mịẹarị dọkịma-agba mẹ na anị ḅẹ iru agba mẹ na sikima ọmịnị anị agba mẹ mịẹ ḅa.

²⁵Anịsakị sọnọma aḍin karama ene mẹ ḅụ ọ́ Fịafịa Kobiri nyana ḅa; ọ́ gbọrụ kọrịnama sọ kọrị ma.”

²⁶Tarị asịnmgbọlụ ma ḅẹ ene mẹ ḅụ ọmịnị ịwọ sịnmgbọlụ agba mịẹ KỊNỊNYANAḄỌ ḅe pịrị ḅarị sakị, ọmịna fẹnị-anga ḅẹ kopini afịaị alalị ḅụ, ọ́ fịafịa kobiri nyana ḅa; ọ́ gbọrụ kọrịnama sọ kọrị ḅịa.

²⁷Ọ́ dọkịma-agba mịẹ, KỊNỊNYANAḄỌ ḅe ḅụụ-ḅẹlẹarị kụnụ agba: asambịrịma owi maa anambulo na, gbọrụ ejimina na, gbọrụ kụra sịḅị ḅụ ḅọrọtẹ asambịrịma sọnọma ejimina na;

²⁸pịkị arịḅẹ mgbọlụ agbamịẹye, pulo kẹ pikiritẹ iḅiọkụ gbẹẹtẹ iḅi fịlawa kala akpa kẹ oyi akiri ḍiya ḅẹ tẹra akiri gbọrụ owi-nambulo ḅụ, kẹ oyia akiri ḍiya ḅẹ maa kiri gbọrụ ejimina ḅụ;

²⁹asambịrịma sọnọma ejimina ma ḅụ gbọrụ ejimina goyegoye ḅụ fịlawa mẹ kẹ oyia akiri ḍiya ḅẹ gbọrụ kiri;

³⁰na gbọrụ ekpe-oḅori na, kẹ si-wẹrịso ḅẹrẹ fama ọ́ pịrị ḅẹ ye.

³¹Sịkọpẹlẹ-a dọkịma-agba mẹ na, anị ḅẹ mgbọlị agba mẹ na mịẹ sikima tẹrẹmẹ ọmịnị arị agba ma na arịḅẹ iru agba mẹ na mịẹ ḅa. Ọmịnị ẹrị mịnẹ ḅẹkụ nama ma ḅụ ofori.