Read kalabari Kịẹn-aḅịḅị 3 Bible Online

Kịẹn-aḅịḅị 3 - kalabari bible

Kịẹn-aḅịḅị 3

¹KỊNỊNYANAḄỌ ḅe Sayịnayị Tụndụ ọgọnọ ḅụ Mozizi na ẹkwẹn sakị mịna apụ ma mie Erọnị na, Mozizi na ḅụụ ḅụ paka-ḅo tẹ apụ.

²Mịna ẹrẹ ma anie Erọnị owiapụ-awọmẹ ma ẹrẹ: Nadabụ anie tarị iyi tụḅọ ḅe na, Abihu na, Ẹlịyeza na, pịkị Itama na.

³Mịna ẹrẹ ma anie Erọnị owiapụ-awọmẹ ma ẹrẹ, pulo sịḅị saratẹ agbamịẹapụ ma; inima tẹ ọ̀ ḅara kẹ sịḅị ḅụ gbana tẹ agbamịẹapụ kọrịnama kiri ḅụ kọrịnama kọrị ḅẹ apụ ma.

⁴Kụma Nadabụ na, Abihu na Sayịnayị ịkpa mẹ ḅio KỊNỊNYANAḄỌ ḅe tọrọkọ ḅụ fịafịa-a fịnị sụa sakị ḅụ KỊNỊNYANAḄỌ ḅe tọrọkọ ḅụ fịịm; tẹ ini awọ iyi-a. Mie ḅụ Ẹlịyeza na, Itama na ịna ḍaḅọ Erọnị ḍumo-sakị ḅụ agbamịẹapụ ḅara kẹ fịrịmẹnjịm.

⁵KỊNỊNYANAḄỌ ḅe nwẹnị Mozizi ḅẹẹ,

⁶“Livayị furo-ḅẹ-apụ ma ọkị-ḅo, tẹ ịn kẹ Erọnị, Agbamịẹḅọ ḅe tọrọkọ sịẹma, mịẹtẹ ịn fịrị mẹnjị ọ̀ pịrị ḅarị ḅara.

⁷Kobiri Akpụrụ-warị mẹ tọrọkọ ịn sime ịn pịrị fịrị mẹnjị ori na, bebe tomina-ogbo mẹ na pịrị ḅa, Akpụrụ-warị mẹ ḅụ fịrị mẹnjị ḅara ḅụ.

⁸Ini Kobiri Akpụrụ-warị mẹ ḅio simearị kọrịnama-kọrịaị mamgba ḍikiḍiki ḅa, tẹ Ọḅọkụ-Igbe koko Akpụrụ-warị mẹ ḅụ fịrịmẹnjịapụ ḅara ḅụ ini Izirẹlịapụ ma nyana akọrịnama kọrị ịn pịrị ḅa.

⁹Anịsakị ị́ Livayị furo-ḅẹ-apụ ma kẹ Erọnị na ori owiapụ-awọmẹ na pịrị ḅa: Izirẹlịapụ ma ogbo-ḅio ḅụ ịn gbọrsịḅị ịn kẹ ọ̀ pịrị tẹ.

¹⁰Tẹ ị́ Erọnị na ori owiapụ-awọmẹ na tọn tẹ ini ịna agbamịẹ kọrịnama kọrị ḅa; kụma sikima jụmọ, sọma ḅo kpeki ḅọ, kpeki ḅọ fịị ḅụ sọ ḅa.”

¹¹KỊNỊNYANAḄỌ ḅe nwẹnị Mozizi ḅẹẹ,

¹²“Ḍikii, Izirẹlịapụ ma ḅụ furo finji tarị tụḅọ mẹ goḅọ-goḅọ nakara, arị Izirẹlịapụ ma ogbo-ḅio ḅụ Livayị furo-ḅẹ-apụ ma ọkị tẹẹ. Livayị furo-ḅẹ-apụ ma sime ị̀ pịrị ḅa.

¹³Kẹ gotẹ ọkọ ḅẹẹarị, tarị awọmẹ mamgba ì nye anị ene mẹ tẹ àrị Ijiputi ama mẹ ḅio tarị awọmẹ mamgba ḅaa ene mẹ ḅụ àrị Izirẹlị ḅụ tarị awọmẹ mamgba mịẹ fịafịama ị̀ ḅụụ pịrịm, tomina awọmẹ na, nama iyi aị na ḅụ ịn sime ị̀ pịrị ḅa. Yẹrị anie KỊNỊNYANAḄỌ ḅee.”

¹⁴KỊNỊNYANAḄỌ ḅe nwẹnị Sayịnayị ịkpa mẹ ḅio Mozizi ḅẹẹ,

¹⁵“Ḍa warị-warị na, furo-furo na ḅụ Livayị owiapụ-awọmẹ ma kịẹẹn; gbọrụ akalụ sịḅị ḅụ ḅọrọtẹ owiḅọ goḅọ-goḅọ ḅụ saakị iwo ị́ kịẹn ḅa.”

¹⁶Mie ḅụ KỊNỊNYANAḄỌ ḅe ẹkwẹn-ḅịḅị mẹ ḅẹẹ tẹ tọn ọ̀ pịrị ḅara ḅụ, Mozizi ịn kịẹnm.

¹⁷Anịsakị mịna apụ ma anie ịna ẹrẹ ḅụ Livayị owiapụ-awọmẹ ma: Gasọnị na, Kohatị na Mẹrarị na.

¹⁸Mịna apụ ma anie ịna; afuro ḅụ Gasọnị owiapụ-awọmẹ ma ẹrẹ: Libini na, Simeyi na.

¹⁹Ịna afuro ḅụ Kohatị owiapụ-awọmẹ ma anie: Amịramụ na, Iza na, Hẹbụrọnị na, Uziyẹlị na.

²⁰Ịna afuro ḅụ Mẹrarị owiapụ-awọmẹ ma anie: Mali na, Musi na. Mịna apụ ma anie ịna aḍapụ awarị ḅụ Livayị furo-ḅẹ-apụ ma afuro ma.

²¹Gasọnị ḅụ mie Libini furo-ḅẹ-apụ ma na, Simeyi furo-ḅẹ-apụ ma na sime ye.

²²Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ owiapụ mamgba ịna kịẹn-ḅịḅị anie: kịnị ẹndẹ sọnọa si finji ofori kịnị puku. (7,500).

²³Gasọnị furo-ḅẹ-apụ ma Akpụrụ-warị mẹ ọḅụjụ ịrụa-ideriarị-anga anga ḅụ akpụrụ-warị pike tẹ kobiri tẹ sime ḅa.

²⁴Ẹlisafụ, Lahẹlị owiḅọtụḅọ ḅe Gasọnị furo mẹ ḅẹ aḍapụ warị mẹ tọrọkọ-tarịḅọ ḅara kẹ ini na sime ḅa.

²⁵Anịsakị Gasọnị owiapụ-awọmẹ ma Kobiri Akpụrụ-warị mẹ ḅụ ḍikiḍiki ḅarịye anie Ọḅọkụ Igbe koko Akpụrụ-warị mẹ; Akpụrụ-warị mẹ na kẹ anị gbaịn-arị ye mẹ na;

²⁶nụngọ mẹ ḅẹ sololo aị ma na, nụngọ mẹ ḅẹ ḅọkọ kikimaye mẹ tẹ Ọḅọkụ-Igbe mẹ simearị pakịrị anga emi ye mẹ na anị ḅẹ aḍigi ma na mịna aị mamgba ḅẹ afịrị mẹnjị na.

²⁷Kohatị ḅụ mie Amịramụ furo-ḅẹ-apụ ma na, Iza furo-ḅẹ-apụ ma na, Hẹbụrọnị furo-ḅẹ-apụ ma na, Uziyẹlị furo-ḅẹ-apụ ma na sime ye. Mịna apụ ma anie Kohatị furo-ḅẹ-apụ ma afuro ma.

²⁸Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ, owiapụ mamgba kịẹn-ḅịḅị anie kịnị gbọrụ puku na ẹndẹ oyi si finji na (8,600) Fịafịa Yọ mẹ ḅẹ akọrịnama kọrịarị.

²⁹Kohatị owiapụ-awọmẹ ma afuro ma Ọḅọkụ-Igbe koko Akpụrụ-warị mẹ ḅẹ suku-jụ da pakịrị anga ḅụ akpụrụ-warị pike tẹ kobiri tẹ sime ḅa;

³⁰Ẹlizafanị, Uziyẹlị owiḅọtụḅọ ḅe Kohatị afuro ma ḅẹ aḍapụ ma warị kẹ sịḅịdaḅọ ḅara kẹ ini na sime ḅa.

³¹Ịn sẹịn onyo anie Ọḅọkụ-Igbe mẹ na, dẹbịlẹ mẹ na, tọnjọ-sịẹmaye mẹ na, agbamịẹ-anga mẹ na mẹ na, fịafịa-namakọrịaị ma tẹ agbamịẹapụ ma kẹ ye mịẹarị aị ma na, kiki-pẹlẹ-ḅịtẹ mẹ na ḍikiḍiki. Mịna aị mamgba gboloma afịrị ma anie ịn mẹnjị afịrị.

³²Ẹlịyeza, Erọnị agbamịẹḅọ ḅe owiḅọtụḅọ ḅe Livayị afuro ma tọrọkọ-tarịapụ ma sịḅịdaḅọ sọ ḅa, tẹ tọrụ kẹ inima tẹ Fịafịa Yọ mẹ ḍikiḍikiarị apụ ma ḅụụ wẹrị ḅa.

³³Mẹrarị ḅụ mie Mali furo-ḅẹ-apụ ma na, Musi furo-ḅẹ-apụ ma na sime ye. Mịna apụ ma anie Mẹrarị afuro ma.

³⁴Ịn wẹrịtẹ gbọrụ akalụ sịḅị ḅụ ḅọrọtẹ owiapụ ḅụ ọkị iwo kịẹn ḅara ḅụ owiapụ mamgba ịna kịẹn-ḅịḅị anie: kịnị jei ẹndẹ, oyia asi finji (6,200).

³⁵Anịsakị Mẹrarị afuro ma ḅẹ ḍapụ ma awarị ma ḅẹ sịḅịdaḅọ anie Zuriyẹlị, Abiyẹlị owiḅọtụḅọ ḅe Akpụrụ-warị mẹ ḅe tọrọkọ-jụ da pakịrị anga ḅụ mie ini akpụrụ-warị pike tẹ kobiri tẹ sime ḅarịye.

³⁶Ịn tọn Mẹrarị owiapụ-awọmẹ ma pịrị tẹ ini onyo-sẹịn pịrị tẹ ḍikiḍiki ḅarị aị anie Ọḅọkụ-Igbe koko Akpụrụ-warị mẹ ḅẹ amasịn ma na, ẹngbẹsẹ ma na, ḅeriaị ma na, otolo ma na, ịn kẹ arị ḅụ kọrịnama-kọrịaị mamgba na; mịna aị ma na gboloma akọrịnama mamgba na;

³⁷pịkị nụngọ mẹ ikelema-koro ḅụ simearị ḅeriaị ma na, arịḅẹ otolo na, dọlịa na, ḍiki ma na kẹ arị ḅụ sụa sọ.

³⁸Inima tẹ Akpụrụ-warị mẹ tọrọkọ ịrụa-saakịarị-anga da anga mẹ ḅụ akpụrụ-warị pike tẹ kobiri tẹ sime ḅarị apụ anie: Mozizi na, Erọnị na ori owiapụ-awọmẹ na, Fịafịa Yọ mẹ ḅio ḅẹ amịẹ-mịẹaị ma onyo-sẹịn, tẹ arị mịẹarị, tẹ Izirẹlịapụ ma mịẹ ḅẹ ḅii ye, ḅii ye mịẹ ịn pịrịarị apụ ma, anịsakị sikima apụ ḅụ ḅẹḅọ-ḅẹḅọ tẹ sọma ḅo kpeki ḅọ, kpeki ḅọ fịị ḅụ sọ ḅa.

³⁹Tomi mamgba tẹ Livayị furo-ḅẹ-apụ ma ḅụ gbọrụ akalụ sịḅị ḅụ ḅọrọtẹ owiapụ ḅụ ọkị iwo tẹ KỊNỊNYANAḄỌ ḅe tọn ḅara ḅụ furo-furo ḅụ Mozizi na, Erọnị na kịẹn apụ kịnị sọnọ ẹndẹ ofori kịnị tẹra puku (22,000).

⁴⁰KỊNỊNYANAḄỌ ḅe nwẹnị Mozizi ḅẹẹ, “Izirẹlịapụ ma tarị iyi owiapụ mamgba kịẹn gbọrụ akalụ ḅụ ḅọrọtẹ apụ ḅụ saakị iwo ịna ẹrẹ kẹẹ, kẹẹ koroma ḅara ḅụ.

⁴¹Anịsakị ị́ Livayị furo-ḅẹ-apụ ma ọkị ị̀ pịrị ḅa, Izirẹlịapụ ma ogbo-ḅio ḅụ furo finji tarị awọmẹ ma nakara; anịsakị Izirẹlịapụ ma opu anama mamgba ḅụ furo finji tarị awọmẹ ma nakara, Livayị furo-ḅẹ-apụ ma opu anama ma mie ị́ ọkị ị̀ pịrị ḅarịye. Yẹrị anie KỊNỊNYANAḄỌ ḅee.”

⁴²Mie ḅụ Mozizi Izirẹlịapụ ma ḅụ furo finji tarị awọmẹ mamgba kịẹnm KỊNỊNYANAḄỌ ḅe tọn ọ̀ pịrị ḅara ḅụ.

⁴³Tẹ gbọrụ akalụ sịḅị ḅụ ḅọrọtẹ furo finji tarị owiapụ ḅụ ọkị iwo mamgba ịn wẹrịtẹ kịẹn ḅara ḅụ kịnị ini ẹndẹ, tẹra apụ fa kịnị sonioa si oyi finji ofori kịnị tẹra puku (22,273).

⁴⁴KỊNỊNYANAḄỌ ḅe nwẹnị Mozizi ḅẹẹ,

⁴⁵“Izirẹlịapụ ma ogbo-ḅio ḅụ furo finji tarị owiapụ mamgba nakara Livayị furo-ḅẹ-apụ ma ọkịị; anịsakị ịna opu anama ma nakara, Livayị furo-ḅẹ-apụ opu anama ma ọkịị, anịsakị Livayị furo-ḅẹ-apụ ma ì nye sọ ḅa; Yẹrị anie KỊNỊNYANAḄỌ ḅee.

⁴⁶Anịsakị Izirẹlịapụ ma furo finji tarị owiapụ ma kịẹn-ḅịḅị kẹ Livayị furo ḅẹ owiapụ ma kịẹn-ḅịḅị nẹngị ye kịnị oyia asi na, tẹra apụ fa kịnị inia si na (273) ma pakịrị ọkị mẹ gotẹ,

⁴⁷tomḅọ sịḅị-sịḅị ḅụ í seleḅa sọnọ apakịrị ọkị ḅa; Fịafịa Yọ mẹ ḅẹ kịẹn ḅara gera nwẹn-sịn igbigi mẹ ḅẹ si mịẹ seleḅa gbọrụ pakịrị;

⁴⁸tẹ igbigi mẹ tẹ kẹ kịẹn ḅara ḅụ gbana apụ ma pakịrị ọkị igbigi mẹ kẹ Erọnị na, ori owiapụ-awọmẹ na pịrịị.”

⁴⁹Mie ḅụ Mozizi inima tẹ Livayị furo-ḅẹ-apụ ma na pii-pii, ḅẹẹ tẹ gbana wararị apụ ma pakịrị ọkị igbigi mẹ;

⁵⁰Izirẹlịapụ ma ḅụ furo finji tarị owiapụ ma ḅara ori igbigi mẹ ọkịm, seleḅa pakịrị tẹra ẹndẹ, na sọnọ apakịrị ofori pakịrị ninea si oyi finji na. (1,365) Fịafịa Yọ mẹ ḅẹ seleḅa apakịrị ḅụ.

⁵¹Tẹ KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara, Mozizi ḅụụ pakịrị igbigi mẹ kẹ Erọnị na ori owiapụ-awọmẹ na pịrịm KỊNỊNYANAḄỌ ḅe tọn Mozizi pịrị ḅara ḅụ.