Read kalabari Kịẹn-aḅịḅị 36 Bible Online

Kịẹn-aḅịḅị 36 - kalabari bible

Kịẹn-aḅịḅị 36

¹Anịtẹso Giliyadi, anie Maka owiḅọtụḅọ, pịkị Manasẹ taa-owiḅọtụḅọ, pịkị Josẹfụ ile-owiḅọtụḅọ ḅe furo mẹ ḅẹ ḍa awarị-warị asịḅịdapụ ma sọma ḅo Mozizi na, Izirẹlịapụ ma ḅẹ ḍa awarị-warị kẹ tọrọkọ-tarịapụ ma na tọrọkọ kpeki tẹ ẹkwẹnm.

²Ini mẹẹ, “KỊNỊNYANAḄỌ ḅe tọn ị̀ nyanaḅọ ḅe pịrị ma apịan sụa ḅụ ò sime sime-anga pịrị kiri kẹ Izirẹlịapụ ma pịrịị tẹ KỊNỊNYANAḄỌ ḅe ḅẹrẹtọn ị̀ nyanaḅọ ḅe pịrịm ò Zelofehadi wamịna iyimbere ḅe ḍuu kẹ ori eremịna-awọmẹ pịrịị.

³Kụma Izirẹlịapụ ma ḅẹ osi afuro ma ḅụ, ḅẹ owiḅọtụḅọ, owiḅọtụḅọ ịn sime ọkị-ọkịị, anị sakị ḅụ, ịna ḍuu mẹ wamịna aḍapụ ma sime-anga ḅụ ye sin mu furo mẹ tẹ ịn sime piri furo mẹ ḅụ sọ tẹ, anie ḅụ wamịna aḍapụ ma sime anga ḅụ ye ọkị so tẹ.

⁴Anịsakị anị ḅo Izirẹlịapụ ye mịẹ sakị kẹ ḅiokoroma opu tii kọn sakị la sakị, anị sakị ḅụ, ịna ḍuu mẹ nwẹnị mu furo mẹ tẹ ịn sime pịrị furo mẹ ḅụ sọ ḅa, tẹ nwẹnị wamịna aḍapụ ma sime-anga ḅụ ịn fị ḍuu mẹ sịn ḅa.”

⁵Tẹ Mozizi nwẹnị KỊNỊNYANAḄỌ ḅe ẹkwẹn-ḅịḅị wẹrịtẹ ḅẹẹ ḅara ḅụ tọn Izirẹlịapụ ma pịrị tẹ ḅẹẹ, “Josẹfụ furo ḅẹ owiapụ-awọmẹ ma ḍuko ye mẹ kuram.

⁶Zelofehadi eremịna-awọmẹ ma gbolomaye ḅụ, miemẹ anie KỊNỊNYANAḄỌ ḅe tọn ye: ‘Yee ini inema tẹ ịn ḅiokoromam iḅitẹịn apụ na sime; kụma ịna ḍaḅọ ḅe furo mẹ ḅẹ furo ngẹrị ḅụ mie ini owiapụ sime ḅarị ye.

⁷Izirẹlịapụ ma nyana ye mẹ ịn gbọrụ anga saḅama jen anga pịrị ḅịa; kẹ gotẹ ọkọ ḅẹẹarị, Izirẹlịapụ ma ḅụ ọrụḅọ-ọrụḅọ amịna furo ḅụ mḅọ aḍapụ nyana ye fịnamaa.

⁸Anịsakị ẹrẹḅọtụḅọ goḅọ-goḅọ, tẹ Izirẹlịapụ ma afuro ḅụ ḅẹẹ-furo, ḅẹẹ-furo ḅụ ḍuu fị anga fị anga, árị á ḍa furo mẹ ḅẹ gbọrụ owiḅọ taḅọ sọ ḅa, mịẹtẹ Izirẹlịapụ ma ḅụ ọrụḅọ-ọrụḅọ mḅọ ḍaḅọ nyana ye nyana ḅarị ḅara.

⁹Mie ḅụ kịnị nyanatẹ gberie-sọ ḅarị gbọrụ furo ḅụ saḅa so jen anga mu ḅịa; kẹ gotẹ ọkọ ḅẹẹarị, Izirẹlị ḅẹ afuro ma, ọrụ furo-furo amịna soku-ḅẹ ye fịnama sịẹma ḅa.’ ”

¹⁰Zelofehadi eremịna-awọmẹ ma KỊNỊNYANAḄỌ ḅe tọn Mozizi pịrị ḅara mịẹm;

¹¹kẹ gotẹ ọkọ ḅẹẹarị, Mala na, Tariza na, Hogila na, Milika na, Noha na, Zelofehadi eremịna-awọmẹ ma ịna ḍaḅọ iyimbere amịnapụ awọmẹ mie ini na sime ye.

¹²Josẹfụ owiḅọtụḅọ Manasẹ afuro ḅẹ owiapụ-awọmẹ mie ini na sime apụ, tẹ ịna ḍuu mẹ ịna ḍaḅọ ḅe furo mẹ ḅẹ furo ḅụ simem.

¹³Mịna aị ma anie oloko ma na, kụrọ ḅara-ḅio simearị ḅọ sụa oloko ma tẹ KỊNỊNYANAḄỌ ḅe Jeriko ḅụ, Jodanị mẹ akaka, Mohabụ ḅẹ ele mẹ ḅio Mozizi ḅụ tọn Izirẹlịapụ ma pịrị aị ma.