Read kalabari Mayịka 1 Bible Online

Mayịka 1 - kalabari bible

Mayịka 1

¹KỊNỊNYANAḄỌ ḅe ẹkwẹn-ḅịḅị mẹ tẹ ḅo Mayịka, Morẹsẹtị ḅẹ ḅọ ḅe pịrị ye mẹ Juda ḅẹ amadapụ Jotamụ na, Ahazi na Hẹzịkaya na, Juda ḅụ ama-da sime ene ma ḅụ, ịkịan tẹ Sameriya na, Jeruselemu na gboloma tẹ ori ẹrị ye mẹ.

²Ọ́ naa ọmịnị Izirẹlị na, Juda ḅẹ apụ mẹmgba na; Ó ḅeri-tokoloma tẹ pokii, yei tomikiri na anị ḅio sime apụ mamgba na; anịsakị Kụrọmamgba Nyana Tamụnọ ḅe ḅẹrẹ-kiri sime ḅọ sọ ọmịnị ẹngbẹsẹ ḅa. Ó pokii, So-ḅio ọ̀ fịafịa sime anga ḅụ ori ẹkwẹn-arị.

³KỊNỊNYANAḄỌ ḅe ọ̀ fịafịa yọ ḅụ sime tẹ paka-ḅoarị, tẹ tuuideri-ḅo tụndụ ma sịḅị ọgọnọ ḅụ mẹnjị ḅa.

⁴Anịsakị tụndụ ma ò suku-ḅio ḅẹlẹkị fịnị ḅio sanị ḅara sanị sara ḅa, tẹ tụndụ ogboku ma gẹẹ ḅa, tẹ minji ọsụma tuma kiri ḅụ ideri ḅara kẹ tụndụ ogboku ma ḅụ ideri ḅa.

⁵Mie-mẹmgba Jekọbụ mịẹ-irima ḅụ ḅom, Izirẹlị warị mẹ ḅarị sịḅị-tuu Tamụnọ pịrị-a ḅụ mịẹ asi. Izirẹlị nyana mịẹ-irima mẹ, Sameriya ama mẹ ḅụ ḅo-a? Anịsakị Juda warị mẹ oru-atamụnọ tẹkẹ mẹ, Jeruselemu mẹ ḅioju ḅụ anị saakị paka-ḅo-a?

⁶Anịẹrẹsị yẹrị KỊNỊNYANAḄỌ ḅe Sameriya kẹ kikima-a ḅara ḅụ sara sọma kpolima ḅa, sime kụrọ-aḍụọ ḍiḅi pịrị ọkụ. Ịn kẹ ama mẹ nama aḍụḅarị ma à nwẹn ḅaa sara ḅa, tẹ kẹ tụndụ ogboku mẹ ḅụ sara kuroma ḅa, tẹ anịḅẹ sukutarị-aḍụḅarị ma paụma ḅa.

⁷Á ḅụụ ḅụ yela-ye kịkama mịẹ oru mamgba ịn kẹ pakịrị-pakịrị fomu-fomu puu fama ḅa; oru-awarị ma ḅio ịn sẹfị-fị nyana ḍiepịrị-aị mamgba fịnị arị dọkịma fama ḅa; anịsakị á nyana wararị ḅara kẹ kara aị mamgba, á kẹ fatẹ yọ ḅụ kobiri kpolima ye mịẹ ḅa. Sameriya arị na iḅi sẹfị amịẹaị ḅụ mịna aị ma nyanam, mịọkụ arị na fịya-a apụ pịkị arị pịkịma mu jen anga sẹfị amịẹaị mịẹ ḅa.

⁸Anịtẹso Mayịka nwẹnị ḅẹẹ, “Miemẹ gotẹ à kururu tẹ owu ḅa; Kẹ ì kururu ḍie-pakama, à papaa ḅụọ-kuḅu kẹ paụ tẹ mẹnjị ḅa; à piri-obiri oloku ḅara oloku ḅa, tẹ okpo ma kururu-kururu owu ḅara kẹ owu ḅa.

⁹Sameriya ḅụụ paka ịnọ mẹ gwọ ọkụ ofori; tẹ anị pịkị ḅo Juda la tẹ, fịị mẹ ḅo Jeruselemu ogigo-ḅọkọ mẹ ḅioju la tẹ, ị̀ atomi simearị anga mẹ.”

¹⁰Gati ḅụ ọmịnị anị ḍuko ma, gbala-gbala ọmịnị owu ma; Bẹtị-liyafara ḅẹ apụ, ọ́ fọọn ḅio ikelekele kẹ ọmịna ḅio-lọkọ ḍie-pakamaa.

¹¹Ọmịnị Safẹya ḅẹ apụ, ọmịnị ọmịna etela ḅụ, paụ na, ḅụụ-jịrị na ḅụ paka-so mu omoni sọọ. Inima tẹ Za-ananị ḅụ simearị apụ, ịna opu ama ḅụ paka-ḅo kẹ ḅiotọn ma, Bẹtẹzẹlị ḅẹ apụ kururu tẹ ọ́ naa sakị, ó nimi ḅa mịnẹ anịjụ ḅụụ ḅọị yọ ofori.

¹²KỊNỊNYANAḄỌ ḅe ḅụ fịị na fa na ideri-ḅo, Jeruselemu ogigo-ḅọkọ mẹ la tẹ ẹrẹsị Marọtị ḅẹ apụ ma, ḅio-sẹsẹ ḅara ḅụ ḅarasụa korum.

¹³Ọmịnị ma tẹ Lakisi ḅụ simearị apụ ma, ọmịnị asụ ma kẹ kirimẹnjị-ọmụarụ ma ḅụụ kpọọ. Ọmịnị Izirẹlịapụ mịẹ asi ma ḍikima mịẹm; aniemẹ mịẹtẹ Jeruselemu ọkọ mịẹm.

¹⁴Anịẹrẹsị mịọkụ Juda ḅẹ apụ, ọ́ ḅaaḅaa kẹ Gati ḅẹ Morẹsẹtị ama mẹ ḅẹẹ; Akizibu ḅẹ awarị ma oḅori kẹ Izirẹlị ḅẹ amadapụ ma sịn aị sọ ḅa.

¹⁵Marẹsa ḅẹ apụ, KỊNỊNYANAḄỌ ḅe ọ́ kẹ kịnị na fịya-a gbọrụḅọ piri ḅa ọmịna ama mẹ ọkị ḅarị ḅọ. Izirẹlị ḅẹ ereso tọrọkọ tarị apụ ma mu Adulamụ ḅụ fukuru ḅio ḅọị ḅa.

¹⁶Juda ḅẹ apụ, Ọmịnị ọ́ ḅẹlẹma awọmẹ gotẹ kururu ḅụ ọmịna asịḅị sẹịn siin. Ẹdẹlẹ ma asịḅị firi ḅara kẹ ọmịnị ọmịna asịḅị kịrị firii; gbala ini ọmịna ḅara ọmịna awọmẹ ma ọkị mu omoni sọma ḅa ẹrẹsị.