Read kalabari Mayịka 6 Bible Online

Mayịka 6 - kalabari bible

Mayịka 6

¹Mayịka nwẹnị Izirẹlịapụ ma ḅẹẹ, “Ọ́ KỊNỊNYANAḄỌ ḅe nyana ọ́ pịrị ḅẹrẹ mẹ pokii!” “Saakịị, Yei KỊNỊNYANAḄỌ, tẹ ị́ nyana Izirẹlị pịrị ḅẹrẹ mẹ ḍukoo; tụndụ ma tọrọkọ anị ḍukoo, tẹ yee tụndụ ma sọ ị́ pọkọ naa.”

²Ọmịnị tụndụ, ọmịnị tomikiri mẹ ḅẹ sime gbamaso sukutarị-aḍụḅarị, ọ́ KỊNỊNYANAḄỌ ḅe ḅẹrẹ mẹ pokii! KỊNỊNYANAḄỌ ḅe ḅẹrẹ nyana ori atomi pịrị wararị, ori ọ̀ kẹ Izirẹlị ọgọnọ gbana ye mẹ ḍuko ḅẹ tẹẹ.

³KỊNỊNYANAḄỌ ḅe mẹẹ, “yei ị̀ atomi, à tiye kẹ ọ́ mịẹ? À tọ-ḅara kẹ ḅụụ-palịmaye sọ ọ́ pịrị? Ọmịnị ị̀ pakịrịị!

⁴Kẹ gotẹ ọkọ ḅẹẹarị, Arị Ijiputi ama ḅio ọ́ pakama-ḅom, tẹ ọmịnị omoni-sọ anga mẹ ḅụ ọ́ pakịrị ọkịm; etela kẹ ó ḍie gotẹ à Mozizi na, Erọnị na, Mirihamụ na kẹ ọ́ fịrịmam.

⁵Yei, ị̀ atomi, Mohabụ ḅẹ amadaḅọ Balakị ọ́ mịẹ ḅẹ tọn ye, tẹ Bẹyọ owiḅọtụḅọ Balamụ ḅe kẹ ọ̀ pakịrị ye ó gbeke kẹ ḅiokoroma? Sitimu ḅụ ọkị mu Giligalị la ḅụ Akasiya ḅẹ Akpụrụ-warị ḅụ paka ye mẹ ó gbeke kẹ ḅiokoroma? Ọ́ mịna aị ma kẹ ḅiokoroma, tẹ ọ́ ḅọrọma gotẹ à kọrị aị ma lekirii.”

⁶Ḅụụ-ḅalaḅala ḅụ Izirẹlị ḅẹ jen-apụ nwẹnị sịḅị-sịḅị ḅụ ḅẹẹ, “À tiye kẹ KỊNỊNYANAḄỌ, So-ḅio ḅẹ Tamụnọ ḅe tọrọkọ ḅo ḅẹ, à ḅo sunsin ọ̀ pịrị ḅẹ sakị? À gbọrụ kụra sịḅị ḅụ ḅọrọtẹ asambịrịma anambulo kẹ dọkịma-agba mịẹ ḅẹ mụnọọ?”

⁷“Àrị ejimina maa ẹndẹ oyia asi finji kẹ agba mịẹ, anịanịa pulo aposini arụ-arụ kẹ agba mịẹ tẹ anị KỊNỊNYANAḄỌ ḅe ḅụụ ḅẹlẹ ḅẹ? Anịanịa à ḅọrọ ị̀ tarị tụḅọ kẹ à kan oloko ma gotẹ agba mịẹ, anịanịa arị iyi tụḅọ kẹ ị̀ ḅara ḅẹ asi ma gotẹ agba mịẹ ḅẹ mụnọọ?”

⁸Mayịka nwẹnị ịn ḅẹ mịnẹ ọkọ-a, yei Izirẹlịapụ, KỊNỊNYANAḄỌ ḅe kọkọ wa mịẹ ḅẹ iḅiye mẹ kẹ wa ḍie, tẹ ọ̀ wamịna ḅara ḅii ye ḍuko wa pịrị tẹ; arị aị ma anie: karakara ḅẹrẹkọn na, iḅi-yemịẹ-ḅara na ḅẹlẹma na nyana jụmọ-jụmọ pịrị pịkị ḅụụ iderima ḅara kẹ wamịna Tamụnọ ḅe na gbọrụ ḅụụ sime.

⁹KỊNỊNYANAḄỌ ḅe nwẹnị ẹkwẹn opu ama mẹ pịrị tẹ ḅẹẹ, “Ị̀ ẹrẹ mẹ ḍiki ḅalafa mẹ anie gburo-gburotẹ opu nimi; Anịẹrẹsị ọ́ naa, yei ọmịnị furo tẹ opu ama mẹ ḅio kobiriarị apụ!

¹⁰À tọ-ḅara kẹ si-mịẹapụ ma awarị ọ́ furu nyana ngọ ma na, la-a ye-tọn-aị tẹ à ḍiki-ḅioḅu aị ma kẹ tọn aị ma na kẹ ḅioḅọrọma ḅẹ?

¹¹À tọ-ḅara kẹ la-a ye-tọn-aị kẹ ye tọn-tọn tẹ, oḅori kẹ amịna pembema tomi sịn-arị ye-tọn-aị nyana-a apụ ma wẹrịso tẹ in so ḅẹ?

¹²Ọmịna ngọ-kọn apụ ma ḅụụ igoin-apụ inoma ḅakam, anịsakị ọmịna ama mẹ ḅẹ apụ mamgba iruo apụ famam tẹ ịna ḅịḅị-ḅio oḅori-kẹ-kịnịsịn ḅẹlẹ nyana wararị.”

¹³Anịẹrẹsị à saakị ọ́ fomu tẹẹ; mịẹtẹ ọmịna asi ma ẹrẹsị ọ́ fatẹ yọ sọ.

¹⁴Ó fịye fị ḅa, kụma ọmịna afuro ḅin ḅịa, ḅuru paa ọmịna oju ḅio ḅụ ọ́ tarị ḅa; ó ye saakị-saakị pakama ḅa, kụma ọmịnị inetẹ ḍọkị-ḍọkị koko ḅịa; anịsakị ó koko ḅẹ aị ma, ọmụ ḅụ àrị arị sima fama ḅa.

¹⁵Ọ́ fịaị ḍiḅi ḅa, kụma ó soku ḅịa; ọmịna olivu pulo mịẹ pakama-ḅo ḅa, kụma ọmịnị anị ọkị tẹ kẹ gberie-sọ mịẹ ḅịa; ọmịnị iru mịẹ pakama-ḅo ḅa, kụma gbala-gbala ọmịnị anị ḅuu ḅịa.

¹⁶Miemẹ mịẹ ḅa, kẹ gotẹ ọkọ ḅẹẹarị, Ama-da Omuri kan wararị oloko ma na, ori owiḅọtụḅọ Ama-da Ehabụ warị mẹ ḅẹ si amịẹaị mie ó koko tẹ mịẹarị, tẹ ịna atoluma-aị ma ḍiki-mẹnjị tẹ; ọkọẹrẹsị arị ọ́ kẹ fatẹ yọ sọma ḅa, tẹ ḅẹḅọ-ḅẹḅọ ó ḍiki-sima ḅa. Ḅẹẹ-anga ḅẹẹ-anga ḅụ tomi-kụlọkụlọ ma ḅarị ọ́ kẹ ye sịn ḅịa.