Read kalabari Mayịka 7 Bible Online

Mayịka 7 - kalabari bible

Mayịka 7

¹Yei, ḅẹrẹ ị̀ la tẹẹ! À kịkarị ḅo anie, ḅuru-pọkọtarị ḅọ tẹ fịye-soku sakị ḅụ ịn sịnmgbọlụ kaịn fama tẹ gberie-sọ ẹrị-a ḅọ. Girepu-asịnmgbọlụ mamgba na, Figi-asịnmgbọlụ mamgba na gberie-sọ ḅarị ofori.

²Tamụnọ nimi tomḅọ ḅe tomikiri mẹ ḅụ fịị fa tẹ, tẹ tomina-ogbo ḅio ḅụ karakara mịẹarị gbọrụḅọ-sọ ḅarị ofori; inimgba ọmbie ọsụma ḅẹ sime koruarị, tẹ ḅụọ-ḅụọ ịgbọ sụa amịna iyimbere pịrịarị.

³Siye mịẹ ḅẹ ye ḅụ mie ịna aḅara simearị ye, ini iḅiọkụ anị mịẹ sunma ḅẹ ḅara; amadaḅọ owiḅọtụḅọ ḅe na ḅẹrẹkọnḅọ ḅe na, ọḅụ-fị ḅẹ tẹ anị ḅiiarị, tẹ opu tomḅọ ḅe nwẹnị ọ̀ ḅala ḅiiarị siye mẹ ḍukoarị; mị-ḅara ḅụ ịn gbolomatẹ anị ḍorim.

⁴Ịna aḅụụ iḅitẹịn ḅọ ịga nangị piri sime-ḅara simem, ịna aḅụụ karakara tẹịn ḅọ nangị ḅịḅị sime-ḅara simem. Ene mẹ ḅo tẹ, Tamụnọ tomi ma fomu ḅẹ sakị mẹ, ọ̀ wẹrịtẹ ịkịankoroapụ ma ḅụ ịna aḅeri nụnụ ḅara; mịọkụ ịn ḅarị ḅịḅị-kẹ-ogbosọ nyana-a.

⁵Ḅarị ḅioḅẹngbọ kẹ mịnaḅọ ọgọnọ gbana ma, ḅarị ikiaḅọ ḅụụ ḅiokpọ nyana ma; árịma tẹ í ekpe ọgọnọ simearị ḅọ ma sọ, ị́ ẹkwẹn kọn á pịrị ḅẹ ḅara nimii.

⁶Mịna asakị ma ḅụ, owiapụ-awọmẹ ịna aḍapụ kẹ oḅori atomi sịn-arị eremịna-awọmẹ ịna iyingiapụ na tụḅụrụarị Owiapụ sime-ereme ịna adiapụ iyingiapụ na kamụ-sọ ma ḅọrọarị; tomḅọ soku-ḅẹ warị ḅio ḅụ mie mḅọ na fịya-a apụ emi ye.

⁷Kụma yẹrị kịngẹ ọkụma, à tọrụ saakị KỊNỊNYANAḄỌ ḅe ḍiki ḅa, arị ị̀ ḅọrọma mẹ ọkị-ḅo ḅarị Tamụnọ ḅe koru ḅa; ị̀ Tamụnọ ḅe ori ị̀ naa ḅa.

⁸Yei wamịnị na fịya-a apụ, ọ́ wamịna-aḅụụ ḅioḅẹlẹ ma. Wa ḅịkị sakị, wa pịkị saakị ḅa; wa kanakana ḅio lẹgị sakị, KỊNỊNYANAḄỌ ḅe bele sọ wa pịrị ḅa.

⁹Wa KỊNỊNYANAḄỌ ḅe ịganị mẹ inema nwenii, ọ̀ wamịna ḅẹrẹ ịgbanị ḅa, gbala wa ọ̀ ḅụụ ḅụ si mịẹm ẹrẹsị, ọ̀ ḅẹrẹkọn wa da-paka tẹ. Ọ̀ wa ọkị-ḅo bele mẹ ḅio suu ḅa; wa tọrụngbọ kẹ ọ̀ ḍụa-ḅọrọma ẹrị ḅa.

¹⁰Anị sakị mie wamịnị na fịya-a apụ ma ẹrị ḅarịye, tẹ ḅụụ-jịrị nwẹnị inima tẹ ḅẹẹm, “Ndẹẹ KỊNỊNYANAḄỌ ọmịna Tamụnọ ḅe?” ḅẹẹ apụ ma gbaịn ḅa. Wamịna atọrụngbọ ini ẹrị-ẹrị ḅioḅẹlẹ ḅa; mịọkụ wa nwẹnị mẹnjị-ḅọrọ etela ma ḅẹ lịka nanga ḅara kẹ ịn nanga-nanga kiri gbin ḅa.

¹¹Jeruselemu ḅẹ apụ, gbọrụ ene sime ọmịna onu ma nama pịrịm! Anị ene mẹ ḅụ ọmịna ye-yọ mẹ ịn nwẹn mịẹ finjima lama ḅa.

¹²Ọmịna atomi sime anga-sime anga ịn pịkịma ọ́ ḍọkụma-ḅo ḅa, Asiriya ịrụa-saakịarị-anga mẹ ḅụ ọkị mu Ijiputi suku-jụ ḅẹ ama ma la, Yuferetisi ye-yọ mẹ ḅụ ọkị mu Opu Tọrụ mẹ la, gbọrụ tọrụ ḅụ ọkị mu jen tọrụ la, gbọrụ tụndụ ḅụ ọkị mu jen tụndụ la.

¹³Kụma tomikiri mẹ ḅo ịkpa sọ ḅa, tomikiri mẹ ḅụ simearị apụ gotẹ, gbala inima tẹ anị ḅụ angarị apụ ma, sụa si-sịḅịḅio ẹrẹsị.

¹⁴KỊNỊNYANAḄỌ, ị́ mkpara kẹ anana-ḍikiḍikiḅọ sọ ị́ atomi pịrịị, ị́ sẹlẹ ọkị tẹ atomi ma. Wa mu ịkpa mẹ ḅio ḅele tẹ angam ḅẹsọ, ḍụọ ḍiḅi iḅi kiri wa ikelema-korom; yee elemu sakị ḅụ wa Basani na Giliyadi na ḅụ ye kọn fị-fị ḅara kẹ ye kọn fị.

¹⁵KỊNỊNYANAḄỌ, ị́ ḅụụ-gbiripuma kọrịnama kọrị wa pịrịị. Ijiputi ḅụ ị́ wa pakama-ḅo ene ma ḅụ ị́ kọrị wa pịrị ḅara.

¹⁶Opu asịẹ ma nyana ịnyọ mẹmgba ḅụ, ini ẹrị tẹ ḅụụ-jịrị ḅa; ini ịna aḅara kẹ ịna aḅịḅị gbaịn ḅa, tẹ ịna aḅeri iningi ḅa.

¹⁷In oronwi mẹnjị ḅara kẹ fọọn ḅio ikiri ḅa; ḅalafa na ḅụụ-sẹkị na ḅụ, ini ịna kụrọtẹ ḅụụ-kikima anga ḅụụ paka-ḅo ḅa. Opu ḅalafa ḅụ ịn vuunma pịkị KỊNỊNYANAḄỌ, wamịna Tamụnọ ḅe ḍọkụma-ḅo ḅa, tẹ ẹrẹsị ịn siye ịn la ḅẹ kuroma nyana ḅa.

¹⁸Yei KỊNỊNYANAḄỌ, ị́ kịka jen tamụnọ ofori; ị́ atomi ma ḅụ fịị-a tẹ ḍumo apụ ma, í si-wẹrịso ịn pịrị famam. Ị́ ịganị ḅụ sime gbamaso-a; kụma í jike-a ḅẹlẹma kẹ wa ḍie mẹ, ị́ ḅụụ-ḅẹlẹ ye sọm.

¹⁹Ị́ ọkụrụkụrụ mẹ pịkị siin gbọrụ sakị kẹ sime wa pịrị ḅa. Ị́ wamịna asi nanga ḅa ị́ ḅụọ-suku ḅụ, tẹ arịmgba kẹ tọrụ mẹ ḅẹ owolo ḅio wakị nguma ḅa!

²⁰Ị́ wẹrịtẹ kẹ iḅere-iḅerea kụra-ḅio wamịna atẹngịapụ karịma ḅara, ị́ í minini na, jike-a ḅẹlẹma na nyana ị́ atomi, Ebira-amụ ḅụụ paka-ḅo apụ ma na, Jekọbụ ḅụụ paka-ḅo apụ ma na pịrị ḅa.