Read kalabari Zẹkaraya 2 Bible Online

Zẹkaraya 2 - kalabari bible

Zẹkaraya 2

¹Jen ịkịan ḅụ à kiri-tọn-ḍiki ḅara ḅio sime gbọrụ tomḅọ ẹrịm.

²Arị ò gbelam, “Ị́ tọ-anga muarị?” Ọ̀ pakịrịm, “Mu Jeruselemu tọn tẹ ẹrị anị ḅẹ nangwọ na finji na la ḅara.”

³Anịtẹso à jen enjẹlị ẹrịm, anie ẹkwẹn ị̀ pịrị sime ḅọ ḅe ọ̀ kẹlẹ mẹnjị tọrọkọ mum, tẹ jen enjẹlị ḅọ ori na bịama ḅẹ ḅom.

⁴Tarị ḅọ ḅe osi ḅọ ḅe ḅẹẹm, “Mangị mu ḍuko anị kiri ḍiki ḅara ḅụ simearị asatụḅọ ḅe pịrị mịnẹ Jeruselemu ḅụ tọnwa atomi na tomi kokoarị anama na ḅaka ḅẹ-yearị mẹ mịẹtẹ anị ḍụḅa ḅaka ḅa onu gbori anị ikelema ḅụ.

⁵KỊNỊNYANAḄỌ ḅe minini tẹ mịnẹ ò ḅioju fịnị sọ tẹ opu ama mẹ ikelema-koro tẹ anị gbaịn-ḅọrọma ḅa, tẹ anị ḅio anga ḅa ori ebube mẹmgba ḅụ.”

⁶KỊNỊNYANAḄỌ ḅe ori atomi ḅẹẹm, “Yẹrị ọ́ gala-galama anga-anga mamgba mum. Kụma mịọkụ, ọmịnị in kun-so apụ, ọ́ Babịlonịya ḅụ mangị-so tẹ pịkịma Jeruselemu ḅoo.

⁸Ó fomu ḅọ fomu ḅọ, ị̀ ḅụụ yelatẹịn ye fomu tẹẹ.” Mie ḅụ Kụrọmamgba nyana KỊNỊNYANAḄỌ ḅe mịẹ oku mẹ kẹ ị̀ kẹ sịẹ ma tẹ ori atomi fọịn apụ ma fịrịmam:

⁹“KỊNỊNYANAḄỌ ḅe ḅioju owu kẹ ọ́ paka ḅa, tẹ sakị ḅẹ gbọrụ sakị ḅụ ọmịna fịrịmẹnjịapụ ma ọ́ fọịn ḅa.” Miemẹ mịẹarị sakị, ḅẹḅọ-ḅẹḅọ nimi ḅa mịnẹ Kụrọmamgba nyana KỊNỊNYANAḄỌ ḅe ị̀ kẹ fịrịmam.

¹⁰KỊNỊNYANAḄỌ ḅe ḅẹẹm, “Jeruselemu ḅẹ apụ, ó ḍereku kẹ nume-suu. Àrị ọmịna ogboku anga ḅẹ ḅoarị!”

¹¹Anị ene mẹ ḅụ, tọnwa asịẹ KỊNỊNYANAḄỌ ḅe dama-ḅo tẹ ori atomi sọ ḅa. Ori ọmịna ogboku anga ḅa, tẹ ó nimi ḅa mịnẹ ori ị̀ kẹ ọ́ fịrịmam.

¹²Jen gbọrụ sakị ḅụ Juda karakara ḅara kẹ sime KỊNỊNYANAḄỌ ḅe pịrị apụ sọ ḅa fịafịa amakiri mẹ ḅụ, tẹ Jeruselemu arịmgba ḅụ ori ḅẹlẹma tẹịn opu ama sọ ḅa.

¹³Ọrụḅọ-ọrụḅọ yaụ-simee, KỊNỊNYANAḄỌ ḅe tọrọkọ, gbala ori ọ̀ fịafịa sime-yọ ḅụ sime tẹ ḅoarị.