Read kalabari Zẹkaraya 4 Bible Online

Zẹkaraya 4 - kalabari bible

Zẹkaraya 4

¹Ẹkwẹn ị̀ pịrị tẹ so tẹ enjẹlị ḅe siin ḅo tẹ ị̀ jike saakịm, à mono sime ye ọkụ.

²Ò gbelam, “Í tiye ẹrịarị?” À pakịrịm, “Golu-golu tọnjọ-gbanaye. Anị ḅẹ sịḅị-jụ ḅụ pulo sụa bọlị emi. Tọnjọ-gbanaye mẹ ọgọnọ sọnọma atọnjọ emi, gberie-gberie sọnọma aḅịḅị nyana wararị.

³Tọnjọ-gbanaye mẹ akaka maa olivu asịn emi, gberie gbọrụ pakịrị gbọrụ pakịrị.”

⁴Anịtẹso àrị enjẹlị ḅe gbelam, “Ị̀ nyanaḅọ, ma aị ma ḅọrọ sịẹ tiye pịrị?”

⁵Ori ì gbelam, “Í nimi-a aro?” À pakịrịm, “Ẹn-ẹn, ị̀ nyanaḅọ, à nimi-a.”

⁶Enjẹlị ḅe ḍuko ị̀ pịrịm à mị KỊNỊNYANAḄỌ ḅe ḅara ḅo oku mẹ kẹ Zerubabẹlị pịrị: “Ye ị́nịna iḅi ḅa, ọmụ opu kụrọ ḅụ-a, pịkị í soku-ḅẹ ịnyọ ḅụ-a, kụma yẹrị kẹ ị́ pịrị ḅarị kụrọ ḅụ.

⁷Ị́ tọrọkọ ḅụ í etela kiki ḅẹ aị, ḅọrọ ḍụḅa tụndụ ma na gbasị sọ, arị ịmaịn-faa ḅa. Ị́yẹrị Tamụnọ-warị mẹ nama ḅa, tẹ kunoma ḍụḅarị mẹ gbanarị sakị tomi ma oloku ḅa, ‘anị kọn iḅi, anị kọn iḅi!’ ”

⁸KỊNỊNYANAḄỌ ḅe nwẹnị pịkị ẹkwẹn ị̀ pịrị.

⁹Ori mẹẹ, “Zerubabẹlị Tamụnọ warị mẹ ḅẹ suku mẹ saakị tẹẹ, ori pịkị nama kịrama ḅa. Miemẹ paka sakị ì atomi ma nimi ḅa yẹrị anie ị́ fịrịma ḅọ ḅe.”

¹⁰ “Ye ịna ḅiotọn ḅara paka-a mẹ ịna ḅioḅẹngbọ simarị, anị ḅẹ tọrọkọ mu mẹ ịrụ ḅakam ẹrẹsị. Kụma ịn Zerubabẹlị ẹrị ḅa ọ̀ Tamụnọ-warị mẹ nama tọrọkọ-tọrọkọ muarị, tẹ in ḅioḅẹlẹ ḅa.” Enjẹlị ḅe ị̀ ḅẹẹm, “Sọnọma tọnjọ-gbana-aị ma anie KỊNỊNYANAḄỌ ḅe sọnọma atọrụngbọ ma tẹ bebe tomikiri mẹ ẹrị-ikelemarị aị ma.”

¹¹Anịtẹso àrị ò gbelam, “Maa olivu-asịn ma tẹ pakịrị gberie-gberie kẹ tọnjọ-gbanaye mẹ akaka simearị aị ma tiye fiearị?

¹²Anị sakị maa olivu sịn aḅara ma tẹ maa ḅio-foo wararị golu aị ma tẹ olivu olo sarasara paka-ḅoarị aị ma akaka emi aị ma tiye fiearị?”

¹³Ori ì gbelam, “Ị́ nimi-a aro?” À nwẹnị pakịrị, “à nimi-a, ị̀ nyanaḅọ.”

¹⁴Anịtẹso ọ̀ ḅẹẹm, “Mịna maa atomi ma anie Tamụnọ sẹlẹ pakama-ḅo tẹ fịrịmẹnjị ọ̀ pịrị ḅẹ apụ, bebe tomikiri mẹ Nyanaḅọ ḅe.”