Read kalabari Matiyo 18 Bible Online

Matiyo 18 - kalabari bible

Matiyo 18

¹Anị sakị mẹ ḅụ Jizọsị ḍukamẹnjịapụ ma ọ̀ dama-ḅo tẹ ò gbelam, “Tamụnọ Ama-da suku-ḅio simearị atomi ma ogboku tụḅọ gburo-gburo tẹịn?”

²Mie ḅụ Jizọsị gbọrụ kalatụḅọ sịn ḅo tẹ mḅọ kẹ ịna tọrọkọ sịẹma,

³tẹ ḅẹẹm, “À mịẹtẹ ó nimiarị mịnẹ ọmịnị ọmịna ḅioḅẹngbọ ḍima tẹ ḅo kala awọmẹ kịka sikima, ọ́ Tamụnọ Ama-da mẹ suku-ḅio simearị atomi sọ ḅịa.

⁴Tamụnọ Ama-da mẹ suku-ḅio simearị atomi ma ogboku ye la tẹịn ḅọ anie ḅị kalatụḅọ ḅe kịkatẹ amịna ḅụụ iderima ḅọ.

⁵Tẹ ḅẹḅọ-ḅẹḅọ tẹ ị̀ ẹrẹ ḅụ nwẹn sime kalatụḅọ daa-ọkị ḅọ, ị̀ daa-ọkịm.

⁶“Gbọrụḅọ nwẹnị mịẹtẹ mịna ị̀ ḅụụ minini nyana wararị awọmẹ ma ḅẹ gbọrụḅọ amịna minini fama ḅẹ nakara, in ye gbẹẹ ḍụḅarị kẹ mḅọ kọngọ kpọọ tẹ mḅọ kẹ owolo ḅio gbin tẹ mḅọ ḅile sọ-mu sombi fịị.

⁷Anị kpọma ḅalafama ye sọ tomikiri mẹ pịrịm, mịnẹ mịẹtẹ tomi in nyana minini fama ḅẹ aị pakarị! Anie anị pịkị paka ḅarị ḅara sakị mamgba, kụma tẹkẹlẹ sime mịẹtẹ mịna aị ma pakarị ḅọ mẹ pịrịm!

⁸“Ị́ ḅara, anịanịa ị́ ḅụọ, mịẹtẹ ị́ ị́ nyana minini famarị ḅẹḅẹ, anị pẹlẹ-siin tẹ kẹ wakị ngumaa! Ị́ gbọrụ ḅara, anịanịa ḅụọ, ofori ḅara kẹ mu ḍumo ḅụ sọ iḅi kẹ ị́ maa aḅara na maa aḅụọ na nyana wararị tẹ ini ị́ kẹ gbin kọrị gbamasoarị fịnị ḅio suu nẹngịm.

⁹Tẹ ị́ gbọrụ tọrụngbọ mịẹtẹ ị́ ị́ nyana minini famarị ḅẹḅẹ, anị sọkị sin tẹ kẹ wakị ngumaa! Ị́ gbọrụ tọrụngbọ kẹ ḍumo ḅio sọ-mu iḅi ị́ maa atọrụngbọ nyana wararị tẹ ini ị́ kẹ ẹlị fịnị ḅio gbin suu nẹngịm!

¹⁰“Ọmịnị ẹrị mịnẹ ọ́ mịna kala awọmẹ ma ḅẹ gbọrụḅọ sọ ḍiki-sima-a. À ḍuko ọ́ pịrịarị, So-ḅio ḅụ ịna enjẹlịapụ sakị mamgba ị̀ Ḍa So-ḅio simearị ḅọ ḅe tọrọkọ emi.

¹¹Gbala Tomḅọ Tụḅọ ḅe ḅo fatẹ apụ ma ḅọrọma ḅẹ ḅom ẹrẹsị.

¹²“Ọ́ sịn-arị gbọrụḅọ anana sọnọa si nyana wararị, tẹ ịna ḅụụ gberie iri-faa kụma, ọ̀ tọ-ḅara mịẹ ḅẹ? Ò gberie fa sọnọa si ma kẹ ini osuka fịarị tụndụ mẹ akaka koroma tẹ mu iri-faa tẹ ye ḅe ḍọkị ḅa.

¹³À ḍuko ọ́ pịrịarị, ori ọ̀ ḍọkị-ẹrị sakị, ọ̀ faa tẹ paka-ḅo gbọrụ anana ḅe gotẹ ḅioḅẹlẹ amụ iri-faa-a ḅẹ gberie fa sọnọa si ma nẹngị ḅa.

¹⁴Paa mị gbọrụ ḅara mẹ ḅụ ọmịna Ḍaḅọ So-ḅio simearị ḅọ ḅe ḅii-a mịnẹ mịna kala awọmẹ ma ḅẹ gbọrụḅọ fa.

¹⁵“Ị́ mịnaḅọ si kẹ ị́ mịẹ-mịẹ, mu tẹ jen ḅeri naa ḅịa ḅara kẹ ọ̀ kẹ ị́ mịẹtẹ iḅi-a ye mẹ ḍuko ọ̀ pịrịị, ori na ị́ na ngẹrị ogboku ḅụ. Ori í ḍuko ye ọkị-ọkị, ị́ ị́ mịnaḅọ ḅe nyana ọkị tẹẹ.

¹⁶Kụma ori í ḍuko ye ọkị-a ḅẹḅẹ, jen gbọrụḅọ, anịanịa maa apụ, ọkị ị́ ḅụụ sụa tẹ pịkị muu; anie Fịafịa Ḍiri mẹ sọ ḅẹẹ ḅara mẹ, mịnẹ ịn kẹ tomḅọ sịḅị sẹịn ye ḅụ maa apụ, anịanịa ọkọ nẹngị apụ, tẹ ḅẹrẹ mẹ kiri sime apụ ini anị ḅụ nimi ye ḍuko tẹrẹmẹ anị bebe ye sọ ḅa.

¹⁷Tẹ ori ịna ḅịḅị ọkị-a ḅẹḅẹ, anị sakị rẹ ḅẹrẹ mẹ paka ḅara, paka ḅara ḍuko sọsị ogbo mẹ pịrịị. Anị ḅẹ kunoma ḅụ, ọ̀ sọsị mẹ ḅịḅị sọ ọkị-a ḅẹḅẹ, ọ̀ kẹ Tamụnọ nimi-a ḅọ, anịanịa ama-igbigi da ḅọ ḅara ọkị.

¹⁸“Ọkọẹrẹsị à ḍuko ọmịnị-mgba pịrịarị: tomikiri ḅụ ó kiki ye, kiki ye, So-ḅio sọ ini anị kiki ḅa, tẹ tomikiri ḅụ ọ́ da suu ye, suu ye So-ḅio sọ ini anị da suu ḅa.

¹⁹“À pịkị sin ọ́ ḅẹẹarị, ọmịna ḅụ ḅẹ maa apụ, anịanịa, tẹra apụ, tomikiri ḅụ ḅịḅị-kẹ-ogbosọ tẹ tẹkẹ ḅụ ḅii ye, ḅii ye, ị̀ Ḍa So-ḅio simearị ḅọ ḅe anị mịẹ ọ́ pịrị ḅa.

²⁰Kẹ gotẹ ọkọ ḅẹẹarị, maa apụ, anịanịa tẹra apụ, ị̀ ẹrẹ ḅụ kobiri anga, kobiri anga, arị ini na emi.”

²¹Anịtẹso Pita ḅo Jizọsị la tẹ ò gbelam, “KỊNỊNYANAḄỌ, ị̀ mịnaḅọ nwẹnị si kẹ ị̀ mịẹ-mịẹ-mịẹarị ḅẹ kụma, nda sakị à nwẹn kẹ wẹrịso ọ̀ pịrị ḅẹ? Sọnọma sakị mụnọọ?”

²²Jizọsị nwẹnị pakịrị, “Ẹn-ẹn, sọnọma sakị-a, kụma sakị tesi oyi finji, finji ḅẹ sọnọma akiri,

²³kẹ gotẹ ọkọ ḅẹẹarị, Tamụnọ Ama-da sakị mẹ mie gbala anị sime-ḅara. Sakị ḅẹ gbọrụ sakị ḅụ, gbọrụ amadaḅọ nwẹnị tọn mịnẹ ori ori afịrịmẹnjịapụ na ye kịẹn ḅa.

²⁴Ò ḅo saakị ọkọ mịẹ sakị, ịn nwẹnị fịrịmẹnjịapụ ma ḅẹ gbọrụḅọ kẹ ḅo, ọ̀ ḅara kịẹnkịẹn-ọkụ-ofori igbigi saa ọlọ ḅọ.

²⁵Fịrịmẹnjịḅọ ḅe nyana igbigi anị kịẹnkịẹn-ọkụ-ofori igbigi saa mẹ gbẹẹ la-a ẹrẹsị, amadaḅọ ḅe tọnm mịnẹ ini ori na, ọ̀ ta na, ori awọmẹ na, ọ̀ nyana aị mamgba na dẹrị tẹ kẹ saa mẹ gbẹẹ.

²⁶Fịrịmẹnjịḅọ ḅe nwẹnị amadaḅọ ḅe tọrọkọ kparakị tẹ ọ̀ tẹkẹ. Ori mẹẹ, ‘Sisi, paa sakị kẹ ị̀ pịrịị, saa mẹ à kẹ ị́ gbẹẹ fama ḅa!’

²⁷Ọ̀ mịẹ ḅara mẹ ḅo ẹgwẹ kẹ amadaḅọ ḅe ḅaama ye ḅụ, ọ̀ nwẹnị ò ḍiki-tọrụ-kụrụkụrụ tẹ saa mẹ wẹrịso ọ̀ pịrị, tẹ ọ̀ ḅẹẹ tẹ ò so.

²⁸“Anịtẹso tomḅọ ḅe mẹnjị paka soarị ogbo, ọ̀ nwẹnị ò pembema fịrịmẹnjịḅọ tẹ ọ̀ ḅara boowa igbigi saa ọlọ ḅọ na bịamam. Ọ̀ nwẹnị gịẹsịma ò kun sịẹma, tẹ saakị ọ̀ pọkọ-ḅẹ-ololo pọnjị, tẹ tomḅọ ḅe nwẹnị sinya fịị ḅẹ ḅara sime. Ori ọkọ mịẹarị sakị ọ̀ ḅẹẹm, ‘Ị̀ ḅara ị́ ọlọ saa kẹ ị̀ gbẹẹ.’

²⁹Ò pembema fịrịmẹnjịḅọ ḅe nwẹnị ḅịkị-koro tẹ ọ̀ tẹkẹ, ‘Sisi paa sakị kẹ ị̀ pịrịị, saa mẹ à kẹ ị́ gbẹẹ fama ḅa.’

³⁰Kụma ọ̀ ḍụkụ-a tẹ tomḅọ ḅe kẹ mu ikoli suum, mịnẹ ori anịanga sime nwenii ọ̀ saa mẹ gbẹẹ fama sakị la.

³¹Osi afịrịmẹnjịapụ ma pakaye mẹ ẹrị sakị, anị ịna ḅụụ si lamam, tẹ ịn nwẹnị mu ye goyegoye ḍuko amadaḅọ ḅe pịrị.

³²Mie ḅụ ọ̀ nwẹnị fịrịmẹnjịḅọ ḅe sịn warị ḅo tẹ ḅẹẹ, ‘Ị́yẹrị ḅie gberie ḅụ sọ ofori omoniḅọ! À kọkọ ị́ ị̀ ḅara fị saa mamgba wẹrịso ị́ pịrị, ị́ ị̀ ḅara ḅii ḅara kịngẹ gotẹ.

³³Ị́ ọkụrụkụrụ nyana í pembema fịrịmẹnjịḅọ ḅe pịrị na-iḅi wararị ya, anie yẹrị wẹrịtẹ ọkụrụkụrụ nyana ị́ pịrị gbọrụ ḅara mẹ.’

³⁴Amadaḅọ ḅe kpọma ịganị tẹ fịrịmẹnjịḅọ ḅe kẹ ikoli fịrịmam, mịnẹ ini ọ̀ kẹ tọrụsiẹrịma nwenii ò bebe saa mẹ gbẹẹ sakị la.”

³⁵Tẹ Jizọsị nwẹnị ẹkwẹn gbaịn, “Anị ḅara mie ị̀ Ḍa So-ḅio simearị ḅọ ḅe kẹ ọmịna ḅụ ḅẹḅọ-ḅẹḅọ mịẹ ḅarị ḅara, í í ḅioḅẹngbọ ḅụ si-wẹrịso ị́ mịnaḅọ pịrị sikima.”