Read kalabari Makị 13 Bible Online

Makị 13 - kalabari bible

Makị 13

¹Jizọsị Tamụnọ-warị mẹ koroma soarị ogbo ò ḍukamẹnjịapụ ma ḅẹ gbọrụḅọ ḅẹẹm, “Ye-tolumaḅọ, mịna aḍụḅarị ma na warị ma na ḅụụ-buama ḅara ḍikii!”

²Jizọsị nwẹnị pakịrị, “Mịna opu awarị ma ọmịnị ẹrị tịya? Kpọkpọ gbọrụ ḍụḅarị sọ ḅarị mịanga anị sime kiri ḅụ sime ḅịa; arị ḅụ gberie-gberie ịn nwẹn sukuruma-gbin fama ḅa.”

³Jizọsị Olivu Tụndụ mẹ, tẹ Tamụnọ-warị mẹ na dama-dama ye mẹ, ọgọnọ lẹgị wararị ogbo Pita na, Jemusị na, Jọnị na Anduru na, ori ngẹrị sime anga, ọ̀ dama-ḅom.

⁴Ịn nwẹnị ḅẹẹ, “Sisi miemẹ mịẹ ḅẹ sakị ḍuko wa pịrịị, pịkị paka tẹ kẹ ḍie ḅa mịnẹ mịna aị mamgba mịẹ ḅẹ sakị mẹ ḅo la tẹ mẹ na.”

⁵Jizọsị nwẹnị ịn ḅẹẹ, “Ọmịnị ẹbịị, ọ́ ḍụkụ tẹ gbọrụḅọ-sọ oḅori kẹ ọ́ sịn ma.

⁶Tọnwa atomi ị̀ ẹrẹ kẹ ẹkwẹn-arị ḅẹẹ tẹ ḅo ḅẹẹ ḅa, ‘Yẹrị anie orii!’ tẹ ini oḅori kẹ tọnwa apụ sịn ḅa.

⁷Tẹ ó kpeki anga ḅụ ọmụgbin ḅịḅị fiearị ye naa naa, ọ́ tẹmẹ-naịn-naịn nyana ma, ọ́ pịkị ala-jụ ḅẹ ọmụ ịba naa sọ. Ọkọ sime aị paka-a so ḅịa, kụma árị fie-a mịnẹ kunoma mẹ ḅo tẹ.

⁸Sịẹ-sịẹ ma jen jen na owu sọ ḅa; amadapụ ma daarị anga ma pịkị owu kẹ jen jen paka ḅa. Anga mamgba kiri jike ḅa, tẹ ḅuru-ḅa paka-paka-paka ḅa. Mịna aị ma kịkarị ye anie tụḅọ iyi ḅẹ ẹrẹḅọ ḅụ tarị saakịarị fụka aị.

⁹“Ọmịnị ma ḅioju ẹbị ḅụ simee. Ini ó kun tẹ ọ́ kẹ ḅẹrẹkọn warị mu ḅa. Ama-awarị ma ḅio ini ó fomu ḅa; ọ́ ḅẹrẹtọn-apụ na, amadapụ na tọrọkọ sịẹ ḅa ị̀ sịḅị ẹrẹsị, tẹ Iḅi-Oku mẹ ḍuko ịn pịrị ḅa.

¹⁰Kụma tẹrẹmẹ kunoma mẹ ḅo la ini Iḅi-Oku mẹ ḍuko tomi mamgba pịrị ḅa.

¹¹Tẹ ini ò kun ḅẹrẹkọn warị mu sakị, tẹrẹmẹ ḅẹrẹkọn sakị mẹ laa, ó ḅio-sẹsẹ ó ḍuko ḅẹ ye pịrị ma; sakị mẹ la sakị anị sakị mẹ ḅụ Tamụnọ kẹ ọ́ pịrị ye, pịrị ye mie ó ḍuko ḅarịye. Kẹ gotẹ ọkọ ḍukoarị, ọ́ kọn ḅarị ẹkwẹn ma ọmịna nye-a; Fịafịa Tẹmẹ ḅe ḅara mie arị ḅo ḅarịye.

¹²Tomi ịna amịnapụ pakama-ḅo tẹ ini ịn ḅaa ḅa, tẹ ḍapụ pịkị anị gbọrụ ḅara mẹ kẹ ịna awọmẹ mịẹ ḅa. Awọmẹ ịna ḍapụ-na-iyingiapụ-na tụḅụrụ ḅa, tẹ mịẹtẹ ini ịn ḅaa ḅa.

¹³Ḅẹḅọ-ḅẹḅọ ì gotẹ ó ḍiki-ḅioḅu ḅa. Kụma sịẹsime mu kunoma mẹ laa ḅọ laa ḅọ, ḅọrọma ḅa.

¹⁴“Ọ́ ‘Ḅalafama Opu Ye’ ẹrị ḅa ori ò sime na-iḅi-a anga ḅụ sịẹ wararị.” (Gooarị ḅọ kẹ elekima sụa ḅẹ ye: ẹrị mịnẹ miemẹ fiearị ye ị́ naarị!) “Anịsakị Judiya ḅụ sime apụ ịna ḍumo-mangị kọn mu tụndụ ma kpọlị nyanam.

¹⁵Amịna warị isun ọgọnọ sime ḅọ sakị famatẹ ideri mu warị ḅio gberie-sọ ọkị tẹ kẹ so ḅẹ ḍọkị ma.

¹⁶Ḍụọ ḅio sime ḅọ amịna ọgọnọ ḅẹ kapa ọkị ḅẹ gotẹ pịkị warị mu ma.

¹⁷Anị kpọma si furatẹ-ereme na ḍọkọḍọkọ-awọmẹ ọlọ iyingiapụ na pịrị ḅa.

¹⁸Ọ́ Tamụnọ tẹkẹẹ mịnẹ mịna aị ma okiringa oḅoku sakị ḅụ pakama!

¹⁹Kẹ gotẹ ọkọ ḍukoarị, arị ene ma ḅẹ ḅụụ-fụka mẹ tomikiri mẹ bịan tẹmẹ kụra-ḅio ḅo mịmgba la ḅụ tomi da tẹ ḅụụ-fụka mamgba ḅụ kpọma sii tẹịn ḅa. Anị kịkaye sọ jen sakị, jen sakị ḅarị paka ḅịa.

²⁰Kụma KỊNỊNYANAḄỌ ḅe ene ma kịẹn-ḅịḅị ḅụ ye sin tẹ; ori ọkọ mịẹ-a namịna, gbọrụḅọ-sọ ḍumo ḅịa. Anị sime-ḅara, sime-ḅara sọ, ori sẹlẹ-ọkị tẹ atomi ma sịḅị ẹrẹsị ori arị ene ma ḅụ ye sin tẹ.

²¹“Anịẹrẹsị, gbọrụḅọ ọ́ ḅẹẹ mịnẹ, ‘Ḍikii, ḅie Mẹsaya ḅe!’ anịanịa ‘Ḍikii, anịanga ori emi!’ ḅẹẹm ḅẹḅẹ, ọmịnị mḅọ minini ma.

²²Gotẹ ọkọ ḅẹẹarị, iruo-mẹsayapụ na, iruo ịkịankoroapụ na tolu-sịẹ ḅa. Ịn ḅụụ-gbiripuma aị na ḅụụ-buama-aị na mịẹ ḅa, kẹ oḅori kẹ, anị inetẹ mịẹ ḅẹ kụma, Tamụnọ sẹlẹ-ọkị tẹ apụ ma sọ sịn ḅa.

²³Ọ́ ḅụụ ẹbị ḅụ simee! Tẹrẹmẹ sakị mẹ ḅo la, à ye goyegoye ḍuko ọ́ pịrị tẹ.

²⁴“Arị ene ma ḅụ, ḅụụ-fụka sakị mẹ ḅo ḅọrọ tẹso, ịrụa mẹ saakị kanakana ḅa, akalụ mẹ ḅarị jen kẹ ḅịya ḅịa,

²⁵lolia ma So-tọrụ sime tẹ siin-koro ḅa, tẹ So-tọrụ ḅẹ akụrọ ma ḅarị ọrụ tọn-a ḅara sime ḅa.

²⁶Anịtẹrẹmẹ Tomḅọ Tụḅọ ḅe, opu kụrọ na ebube na kẹ, oḅuto mẹ ḅụ ḅo tolu-paka ḅa.

²⁷Ori enjẹlị apụ kẹ tomikiri ḅẹ ini ịkọlị ma fịrịma tẹ ịn Tamụnọ sẹlẹ-ọkị tẹ atomi ma kobiri ḅa, tomikiri ḅụ gbọrụ ịkọlị ḅụ mu osi anga la.

²⁸“Yee kụrọ Sịn mẹ ye kẹ ó toluma. Anị ḅẹ aḅara ma saakị ịwọ ịnyịnya sụatẹ eleleinda tọrụ ḅịyarị sakị ó nimi wararị mịnẹ ịrụa-kụra kpeki tẹ.

²⁹Anị gbọrụ ḅara ḅụ mịna aị ma paka tẹ ọmịnị ẹrịarị sakị ó nimi ḅa mịnẹ nwẹn ḅẹẹ sakị mẹ kpeki tẹ, saakị ḅẹ tẹlẹma tẹ.

³⁰Ọ́ kẹ ḅiokoromaa mịnẹ mịọkụ ḍumo wararị atomi mamgba fịị fama-a ogbo mịna aị mamgba paka fama ḅa.

³¹So na Kiri na ḅọrọ-so ḅa, kụma ị̀ ẹkwẹn ma gbala-gbala ḅọrọ-so ḅịa.

³²“Anị sime-ḅara, sime-ḅara sọ, gbọrụḅọ-sọ ene mẹ anịanịa sakị mẹ ḅo ḅẹ sakị nimi-a, So-ḅio ḅẹ enjẹlị apụ-o, Tụḅọ ḅe-o, nimi ḅọ ofori; Ḍaḅọ ḅe kịngẹ mie nimi ye.

³³Ọmịnị ẹbịị, ọ́ tọrụ kiri la ḅara simee, sakị mẹ ḅo ḅẹ sakị mẹ ó nimi-a mẹ ẹrẹsị.

³⁴Anị kịka ḅarịye anie warị koroma tẹ ye muarị tomḅọ, tẹ warị mẹ kẹ ori afịrịmẹnjịapụ ḅara sụa ḅọ, tẹ ọrụḅọ-ọrụḅọ kọrị ḅẹ ye tọn mḅọ pịrị tẹ, pịkị ḍuko ḅọkọ ḍikiḍikiḅọ ḅe sọ pịrị tẹ mịnẹ ori ẹbị lamaa.

³⁵Ọkọẹrẹsị ọmịnị ẹbị ḅụ simee, warị nyanaḅọ ḅe ḅoarị sakị ó nimi-a ẹrẹsị, ẹbịsịya ḅoḅiri, ḅoḅiri ḅa, anịanịa ḍin karakara ogbo ḅa, anịanịa ḅaaso ḅa, anịanịa ịrụa pakarị sakị ḅa.

³⁶Ọ̀ bẹkẹ-ḅara-kẹ ḅoo ḅo, ori ó monoarị kẹ ọmịnị ẹrị ma.

³⁷Ọkọẹrẹsị à ḍuko ọ́ pịrịarị ye mẹ, à ḍuko inweni-mgba pịrịarị: Ọmịnị ẹbịị!”