Read kalabari Ditẹrọnọmị 14 Bible Online

Ditẹrọnọmị 14 - kalabari bible

Ditẹrọnọmị 14

¹Ọmịnị anie KỊNỊNYANAḄỌ ọmịna Tamụnọ ḅe owiapụ-awọmẹ; ọmịnị ogie kẹ ọmịna aḅụụ pẹlẹ ma, pịkị ọmịna afụḅara-ḅọkọ kẹngẹ gbana fịtẹ-apụ pịrị ma.

²Kẹ gotẹ ọkọ ḅẹẹarị, ọmịnị anie fịafịa sime KỊNỊNYANAḄỌ ọmịna Tamụnọ ḅe pịrị gbọrụ atomi, anịsakị KỊNỊNYANAḄỌ ḅe ọ́ sẹlẹ-ọkị tẹ kẹ ó soku ḅụ ọ̀ nyana gbọrụ atomi sọma tẹ tomi-kụlọkụlọ ma tẹ tomikiri tọrụ mẹ ḅụ simearị apụ ma ḅụụ ḅụ.

³Ḅẹ tọn-tọnye goyegoye ọ́ pẹị ma.

⁴Mịna anama ma mie ọmịnị inetẹ pẹị ḅarị aị: pootẹ-nambulo ḅe na, anana ḅe na, oḅori ḅe na,

⁵ḅụọ okuro sụa nama ḅe na, ḍuu ḅe na, tụḅara ḅe na piri-oḅori ḅe na, tụndụ ọgọnọ ḅẹ anana ḅe na.

⁶Nama goyegoye tẹ ḅụọ ḅẹ okuro mẹ ḍiema wararị, tẹ okuro mẹ maa apakịrị ḅụ emi, tẹ nama ma ogbo ḅio ḅụ amgba-na-iku-na ḅio fịye fị kọnma wẹrị tẹ pakama-pakama-ḅo tokuruarị anama ma, ọmịnị inetẹ pẹị ḅa.

⁷Anịsọ arị aị ma tẹ amgba-na-iku-na ḅio fịye fị kọnma wẹrịtẹ pakama pakama ḅo tokuruarị anịanịa ḅụọ ḅụ okuro sụa anama ma ḅụ mịna anama ma ọ́ pẹị ma: ike-sụa-nama ḅe na, ịnwa ḅe na, ewita ḅe na, gbala ini amgba-na-iku-na ḅio fịye fị kọnma wẹrị tẹ pakama-pakama-ḅo tokuruarị kụma ịna ḅụọ ḅẹ okuro mẹ ḍiema-a ẹrẹsị ọmịna ḅụụ ḅụ ịn fịafịa-a.

⁸Opuropo ma ịna ḅụọ ḅẹ okuro ma ḍiema wararị kụma ini amgba-na-iku-na ḅio fịye fị kọnma wẹrịtẹ pakama pakama ḅo tokuru-a ẹrẹsị ọmịna ḅụụ ḅụ ịn fịafịa-a. Ịna meni ma ọ́ pẹị ma, anịsakị ịna fịtẹ oju akpakpa ma sọ ọ́ ḅara kẹ lama ma.

⁹Arị aị tẹ minji mẹ ḅio simearị aị mamgba ọmịnị arị pẹị ḅa: ịsịram na, ẹfẹrẹfẹ na sụa inji goyegoye ọmịnị inetẹ pẹị ḅa.

¹⁰Ịsịram na, ẹfẹrẹfẹ na sụa-a inji goyegoye ọ́ pẹị ma, ọmịna aḅụụ ḅụ anị fịafịa-a.

¹¹Ọmịnị inetẹ fịafịatẹ afeni mamgba pẹị ḅa.

¹²Kụma mịna aị ma mie ọ́ pẹị ḅịa afeni ma: igo ḅe na, ẹdẹlẹ ḅe na, ịn kẹ ọsịpire sịn inji-gbọn-feni ḅe na,

¹³ịn kẹ buzadị sịn ja afeni pẹịarị opu feni ḅe na, ekule ḅe na ịn sime-ḅara sime afeni ma na;

¹⁴ịn kẹ revini sịn feni ḅe na ò sime-ḅara sime afeni na;

¹⁵okpo ḅe na, ḍin agụnkwọ ḅe na, kịara ḅe na, agụnkwọ ḅe na, arị sime-ḅara sime afeni ma na,

¹⁶kala mgbukumgbuku ḅe na, opu mgbukumgbuku ḅe na, oḅulongo ḅe na,

¹⁷inji-gbọn-feni ḅe na, ọkpa pẹị ẹdẹlẹ ḅe na, ḅekina-ọḅọkọ ḅụọ sụa minji feni ḅe na,

¹⁸okola ḅe na, ḅu-ọḅọkọ ḅe na arị sime-ḅara sime afeni na; ịn kẹ upo sịn-arị sịḅị ọgọnọ ịkụ sụa feni ḅe na, poku ḅe na.

¹⁹Anịsakị pamba-sụa ḍọkọḍọkọ afeni mamgba ọmịna aḅụụ fịafịa-a aị famam; ọmịnị arị pẹị ma.

²⁰Fịafịatẹ pamba-sụa aị mamgba ọmịnị inetẹ pẹị ḅa.

²¹Ḅẹẹye-ḅẹẹye tẹ ḅarana ngẹrị fịị ye goyegoye, ọ́ pẹị ma; ọmịnị inetẹ anị kẹ jen sịẹ ḅẹ ḅọ tẹ ọmịna ama ma ḅio simearị ḅọ pịrị ḅa mịnẹ mḅọ inetẹ anị pẹị ḅa, anịanịa ọmịnị inetẹ anị kẹ mḅọ dẹrị ḅa. Ọmịnị anie fịafịatẹ sime kẹ KỊNỊNYANAḄỌ ọmịna Tamụnọ ḅe pịrị apụ. Ọmịnị oḅori iyingiḅọ ndo-minji kẹ pịrịarị kala-oḅori sọọ pẹị ma.

²²Kụra-kụra ḅụ, ọmịna apiri ḅụ paka-ḅo fịaị mamgba ọ́ kẹ oyia akiri ḍiya tẹ gbọrụ kiri sikima ḅa.

²³Anịsakị KỊNỊNYANAḄỌ ọmịna Tamụnọ ḅe tọrọkọ mie, anịanga mẹ tẹ ọ̀ sẹlẹ-ọkị tẹ mịẹtẹ ori ẹrẹ mẹ anịanga ḅụ sime ḅarị anga mẹ ḅụ, ọmịnị ọmịna sịnmgbọlị mẹ na, ọmịna iru mẹ na, ọmịna pulo mẹ na, ọmịna anama ogbo mẹ na, ọmịna anana na oḅori na ogbo ma na, furo finji anama ma na, nyana-oyi-ḅụụ-gberie mẹ fị, anịanịa ḅuu, anịanịa taḅa tẹ pịkị pẹị ḅarịye, mịẹtẹ ọ́ sakị mẹmgba inetẹ KỊNỊNYANAḄỌ ọmịna Tamụnọ ḅe mangịma mẹ ḍawọ ḅarị ḅara.

²⁴KỊNỊNYANAḄỌ ọmịna Tamụnọ ḅe ó boma sakị, anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị tẹ ori ẹrẹ mẹ kẹ wẹrị ḅẹ anga mẹ, etela mẹ ọmịna aḅụụ ala ḅakam tẹ ọmịnị inetẹ ọ́ nyana-oyi-ḅụụ-gberie mẹ ọkị-ḅo-a ye-yọ mẹ ó sime anga ḅụ ala ḅakam ẹrẹsị ḅẹḅẹ, miemẹ mịẹẹ:

²⁵ọmịnị anị pịkị tẹ kẹ igbigi dẹrịị, tẹ igbigi mẹ fịna ọmịna ḅara-ḅio sụa tẹ kẹ anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị anga mẹ muu,

²⁶tẹ igbigi mẹ kẹ ó ḅii ye, ḅii ye fẹ ḅa, pootẹ-nambulo-o, anịanịa anana-o, anịanịa iru-o, anịanịa kụrọtẹ iru-o, ị́ pọkọ tarị ye, tarị ye; tẹ ị́yẹrị na, ị́ warị suku na, anịjụ KỊNỊNYANAḄỌ ọmịna Tamụnọ ḅe tọrọkọ arị fị-fị ḍereku ḅa.

²⁷Anịsakị Livayị furo-ḅẹ-apụ ma tẹ ọmịna ama ma ḅio simearị apụ ma ọmịnị ịn sịkị ma, kẹ gotẹ ọkọ ḅẹẹarị, ini ọmịnị na sime anga mẹ ḅụ ḍiekiri nyana-a.

²⁸Tẹra akụra kunoma goyegoye ḅụ, ọmịnị anị gbọrụ kụra mẹ ḅụ ọ́ mịẹ pakama-ḅo aị mamgba kẹ oyia akiri ḍiya tẹ gbọrụ kiri pakama-ḅo ọmịna ama ma ḅio koromaa;

²⁹tẹ Livayị furo-ḅẹ-apụ ma tẹ ọmịnị na ḍiekiri anịanịa sime anga nyana-a apụ ma na, jen sịẹ ḅẹ igoniapụ ma na, ḍaḅọ-na-iyingiḅọ-na-fịtẹ-awọmẹ ma na, diapụ-fịtẹ-ereme ma na, tẹ ọmịna ama ma ḅio simearị apụ ma, ḅo fị furo ḅinma ḅa; mịẹtẹ KỊNỊNYANAḄỌ ọmịna Tamụnọ ḅe kọrịnama mamgba tẹ ọmịnị ọmịna aḅara kẹ kọrị-ye kọrị-ye ḅụ ó boma ḅẹ ḅara.