Read kalabari Ditẹrọnọmị 15 Bible Online

Ditẹrọnọmị 15 - kalabari bible

Ditẹrọnọmị 15

¹Mozizi nwẹnị pịkị ḅẹẹ: Sọnọma kụra goyegoye kunoma ḅụ, ó ye ḅụ ḅara-siin ḅa.

²Anịsakị mịẹ ó ye mẹ ḅụ ḅara-siin ḅarị ḅara: ye kẹ mḅọ pembe ma ḅọ ḅọlọ ḅọ ḅọlọ ḅọ, mḅọ kẹ mḅọ pembe ma ḅọ ḅọlọ ye mẹ ḅụ ḅara-siin mḅọ pịrị ḅa; mḅọ, mḅọ pembe ma ḅọ ḅe-o, ori iyimbere-o ḅara anị ọkị ma, gbala KỊNỊNYANAḄỌ ḅe ò saa wẹrịso mẹ oloku pakama tẹ ẹrẹsị.

³Jen sịẹ ḅẹ igoniḅọ ḅara ḅụ ọmịnị inetẹ anị ọkị ḅa, kụma ọmịna mịnaḅọ fị saa, ọ́ wẹrịso mḅọ pịrị ḅa.

⁴Ọmịna ogbo-ḅio ḅụ igoinḅọ paka ḅịa, kẹ gotẹ ọkọ ḅẹẹarị, ama mẹ tẹ KỊNỊNYANAḄỌ ọmịna Tamụnọ ḅe kẹ ó nyana ḅẹ ó pịrị sime anga mẹ ḅụ KỊNỊNYANAḄỌ ḅe ó boma ḅa,

⁵ọ́ paa KỊNỊNYANAḄỌ ọmịna Tamụnọ ḅe pọkọ poki-poki, tẹ ḅụụ ẹbị-ẹbị tẹ mị oloko mamgba tẹ mịmgba à tọn ó pịrị aị ma mịẹ-mịẹ.

⁶Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ò wẹrịtẹ ó karịma ḅara ḅụ ó boma ḅa, tẹ ó ye kẹ tọnwa asịẹ ḅọlọ ḅa, kụma ọmịnị ó ye ḅọlọ ma; anịsakị ó ḅẹrẹtọn tọnwa opu asịẹ pịrị ḅa, kụma in ḅẹrẹtọn ó pịrị ḅịa.

⁷Ọmịna ama mẹ tẹ KỊNỊNYANAḄỌ ọmịna Tamụnọ ḅe kẹ ó piri ama mẹ ḅụ, ḅẹẹ ama ḅẹẹ ama ḅio, ọmịna ogbo-ḅio ọmịna mịnapụ ma ḅụụ igoin gbọrụḅọ emi-mii, ọmịnị ọmịna ḅioḅẹngbọ kụrọma ma anịanịa ọmịna ḅara gbaịn ọmịna iyimbere ḅe tẹ igoinḅọ ḅe pịrị ma.

⁸Kụma ọmịnị ọmịna ḅara finji ọ̀ pịrị ḅa tẹ ori na-iḅi ḅẹ ḅara kẹ ḅẹẹye-ḅẹẹye kẹ ò ḅọlọ ḅa.

⁹Ọmịnị ọmịna aḅụụ ẹbị anieofori si kuroma ḅofa ọmịna ḅioḅẹngbọ sọ tẹ ó ḅẹẹ: “ye wẹrịso sọnọma akụra karama kụra ma kpeki tẹẹ,” tẹ ọmịna tọrụ ḅịyama ọmịna iyimbere igoinḅọ ḅe ḍa tẹ ḅarị ye kẹ ọ̀ pịrị ḅịa; ọ̀ tẹmẹ-la ḅara kẹ ọ́ mịẹ ye mẹ ḍuko KỊNỊNYANAḄỌ ḅe sụa tẹ anị ọmịna aḅụụ ḅụ siye sọ ḅa.

¹⁰Sarasara ḅara ḅụ ó kẹ ọ̀ pịrị ḅa, tẹ ọmịna ḅioḅẹngbọ mbụrụmbụrụ ma ó kẹ ọ̀ pịrị sakị, gbala miemẹ mịẹ KỊNỊNYANAḄỌ ọmịna Tamụnọ ḅe kẹ ọmịna kọrịnama mamgba ḅụ na, ó nyana tẹ mịẹ ye mẹmgba ḅụ ó boma ḅarịye ẹrẹsị.

¹¹Kẹ gotẹ ọkọ ḅẹẹarị, igoin-apụ ama mẹ ḅio paka, gbala-gbala kunoma ḅịa, anị ẹrẹsị à tọn ó pịrịarị, ọmịnị ọmịna ḅara finji sara ọmịna iyimbere na, ngiriḅọ ḅe na pịrịị, ama mẹ ḅio.

¹²Ini ọmịna iyimbere Hiburu owiḅọ, anịanịa Hiburu ẹrẹḅọ kẹ ọ́ dẹrị-dẹrị, mḅọ sonio akụra kẹ fịrịmẹnjị ó pịrị ḅa, tẹ sọnọma akụra karama kụra ḅụ ọmịnị mḅọ wẹrịso tẹ mḅọ amịna sịḅị nyana ḅa.

¹³Anịsakị ọmịnị mḅọ wẹrịso tẹ mḅọ amịna sịḅị nyana sakị, ọ́ papaa ḅara kẹ mḅọ wẹrịso ḅịa.

¹⁴Ịmụkụ-a ḅara kẹ KỊNỊNYANAḄỌ ọmịna Tamụnọ ḅe kẹ wẹrịtẹ ó boma tẹ anana na oḅori na ogbo ḅụ na, ọmịna mgbọlụ sẹlẹ kiri ḅụ na, ọmịna iru mịẹ ye na ḅụ ó ye kẹ mḅọ pịrị ḅa.

¹⁵Ọ́ kẹ ḅiokoroma ḅa mịnẹ Ijiputi ḅẹ ama ḅio ọmịnị omoni-sọ simem, tẹ KỊNỊNYANAḄỌ ọmịna Tamụnọ ḅe ọ́ pakịrị ọkịm, anị ẹrẹsị mịmgbaa ḅụ à tọn ọ́ pịrịarị.

¹⁶Kụma ori na, ị́ warị suku na ḅẹlẹmam, ori ọmịnị na iḅiọkụ simearị ẹrẹsị ori ị́ ḅẹẹm: Àrị ị́ ḅụụ ḅụ paka-so ḅịa ḅẹḅẹ,

¹⁷anịrẹ ị́ gbọrụ ye-toluye ọkị tẹ kẹ ḅọkọ ogbo ḅụ ò ḅeri-ḅọkọ ḅụ toluma pakama ḅa, tẹ ori ị́ omoniḅọ sọ gbamaso ḅa. Sime ị́ pịrị gbamaso omoni-ẹrẹḅọ ḅụ sọ ị́ ọkọ mịẹ ḅa.

¹⁸Anị ị́ ḅụụ kụrọ ye sọ ma, ị́ ọ̀ wẹrịso tẹ ori ị́ ḅụụ ḅụ sịḅị nyana sakị, kẹ gotẹ ọkọ ḅẹẹarị, gbọrụ ọkọ fịrịmẹnjịḅọ fị ḅarị igbigi mẹ kẹ maa kiri ḍie ḅẹ gbọrụ kiri mịẹ ọ̀ kẹ sonio akụra ḅụ fịrịmẹnjị ị́ pịrị yee. Miemẹ mịẹ, anịsakị KỊNỊNYANAḄỌ ọmịna Tamụnọ ḅe ọ́ mịẹ ye mịẹ ye ḅụ ó boma ḅa.

¹⁹Furo finji owi anama tẹ ọmịna nambulo na ọmịna anana na iyi aị goyegoye, ọmịnị arị mịẹ fịafịama KỊNỊNYANAḄỌ ọmịna Tamụnọ ḅe pịrị ḅa; ọmịnị ọmịna nama ogbo ḅụ furo finji anama ma kẹ gbọrụ kọrịnama sọ kọrị ma, pịkị anana na, oḅori na ogbo ḅụ furo finji anama ma oju ḅẹ isuke kịrị ma.

²⁰Anị anga mẹ tẹ KỊNỊNYANAḄỌ ḅe sẹlẹ-ọkị ḅarị anga ḅụ ọmịnị na, ọmịna warị-suku na kụra ḅụ KỊNỊNYANAḄỌ ọmịna Tamụnọ ḅe tọrọkọ anị pẹị ḅa.

²¹Kụma ḅẹkụ-ḅẹkụ anị sime iḅi ḅara mẹ sima-sima, anị ekeli-o, anịanịa tọrụngbọ-pụụn-o, anịanịa ḅẹ ḅẹkụ-ḅẹkụ kpọma anị sime iḅi ḅara mẹ sima-sima, ọmịnị anị kẹ agba mịẹ KỊNỊNYANAḄỌ ọmịna Tamụnọ ḅe pịrị ma.

²²Ọmịna ama ma ḅio ọmịnị anị pẹị ḅa, ḅụụ wẹrị fịafịama-a ḅọ-o, ḅụụ wẹrị fịafịama ḅọ-o, gbala ḍuu, anịanịa ḅụọ ḅụ okuro sụa kala nama pẹị ḅara kẹ inetẹ anị pẹị ḅa.

²³Anị ḅẹ ọmbie kịngẹ mịẹ ọ́ pẹị ḅịa ye; ọmịnị anị kẹ minji sara nguma ḅara kẹ anị kẹ nguma ḅa kiri ḅio.