Read kalabari Ditẹrọnọmị 16 Bible Online

Ditẹrọnọmị 16 - kalabari bible

Ditẹrọnọmị 16

¹Ọmịnị ịn kẹ Abibu sịn akalụ mẹ kẹ elekima sụa, tẹ Saḅaḅọrọ-Alalị mẹ fị-fị KỊNỊNYANAḄỌ ọmịna Tamụnọ ḅe pịrị; kẹ gotẹ ọkọ ḅẹẹarị, ịn kẹ Abibu sịn akalụ mẹ ḅụ, ḍin ḅụ mie KỊNỊNYANAḄỌ ọmịna Tamụnọ ḅe Ijiputi ama mẹ ḅio ọ́ pakama-ḅo ye.

²Anịsakị ọmịnị ọmịna anana na, oḅori na ogbo ḅụ, anịanịa nama ogbo mẹ ḅụ Saḅaḅọrọ-Alalị agba mẹ mịẹ KỊNỊNYANAḄỌ ọmịna Tamụnọ ḅe pịrị ḅa anị anga mẹ tẹ KỊNỊNYANAḄỌ ḅe sẹlẹ-ọkị tẹ mịẹtẹ ori ẹrẹ anị anga ḅụ sime ḅẹ anga mẹ.

³Ọ́ suntẹ fịturu kẹ anị na fị ma; sọnọma aḍin ọ́ nwẹn kẹ sun-a fịturu kẹ anị na fị ḅa, tọrụsiẹrị fịturu mẹ — kẹ gotẹ ọkọ ḅẹẹarị, fọnya mangị ḅụ ọmịnị Ijiputi ḅẹ ama mẹ ḅio paka-ḅom — mịnẹ ọmịna ḍumo ene mamgba ḅụ ọmịnị inetẹ mịmgba mẹ tẹ ọmịnị Ijiputi ḅẹ ama mẹ ḅio paka-ḅo sakị mẹ kẹ ḅiokoroma ḅa.

⁴Ọmịna ye yọ mẹmgba ḅụ, sọnọma aḍin ḅụ kịnị ọmịna ḅara ḅụ gbọrụ suntẹ fịturu sọ ẹrị ma, anịanịa, nama meni mẹ tẹ ọ́ kẹ tarị ene mẹ ḅẹ ḍin ḅụ agba mịẹ ye mẹ ḅẹ ye bebe ḍin mẹmgba ḅụ sime nwenii ḅo dede-ḅio la.

⁵Ọmịnị inetẹ ọmịna ama ma tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama ma ḅẹ gberie ḅio ḅụ sọ Saḅaḅọrọ-Alalị agba mẹ mịẹ ḅịa,

⁶kụma anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị tẹ mịẹtẹ ori ẹrẹ mẹ anịanga ḅụ sime ḅẹ anga mẹ mie ọ́ Saḅa ḅọrọ Alalị agba mẹ mịẹ ḅarịye, ḅoḅiri-so ịrụa mẹ tuuideriarị ogbo anị sakị mẹ tẹ ọmịnị Ijiputi ḅụ paka-ḅo sakị mẹ.

⁷Anị anga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅarị anga mẹ ḅụ ọmịnị anị sọ tẹ pẹị ḅa, tẹ dede-ḅio ḅụ ó so ọmịna akpụrụ-awarị mu ḅa.

⁸Sonio aḍin ọ́ nwẹn kẹ sun-a fịturu fị ḅa; tẹ sọnọma aḍin karama ene ḅụ tẹmẹ-la ḅara kẹ kobiri KỊNỊNYANAḄỌ ọmịna Tamụnọ ḅe pịrị ḅa, anị ḅụ ọ́ gbọrụ kọrịnama sọ kọrị ma.

⁹Ọ́ sọnọma afẹnị-anga kịẹn ḅa; ọ́ tarị saakị mgbọlụ pẹlẹ ogie mẹ kẹ sịẹ, sịẹ wararị mgbọlụ ma pẹlẹ sakị ḅụ ọ́ saakị sọnọma afẹnị-anga ma kịẹn ḅa.

¹⁰Anịtẹrẹmẹ ó fẹnị-anga, fẹnị-anga ḅẹ kopini afịaị alalị mẹ fị KỊNỊNYANAḄỌ ọmịna Tamụnọ ḅe pịrị ḅa, ọmịna ḅara ọ́ pakama-ḅo ye kẹ kuroma ḅụ ḅo agba mịẹ ḅụ, anie mẹ tẹ KỊNỊNYANAḄỌ ọmịna Tamụnọ ḅe wẹrịtẹ kẹ ó boma ḅara;

¹¹anịsakị ọmịnị na, ọmịna owiapụ-awọmẹ na, ọmịna eremịna-awọmẹ na, ọmịna fịrịmẹnjị-owiapụ na, ọmịna fịrịmẹnjị-ereme na, ọmịna ama ma ḅio simearị Livayị furo-ḅẹ-apụ ma na, jen sịẹ ḅẹ igoniḅọ ḅe na, ḍa-na-iyingi-na-fịtẹ-awọmẹ ma na, diapụ-fịtẹ-ereme ma na tẹ ọmịna ogbo-ḅio simearị apụ ma na ḍereku ḅa anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị tẹ mịẹtẹ ori ẹrẹ mẹ sime ḅe anga mẹ ḅụ.

¹²Ọ́ kẹ ḅiokoroma ḅa mịnẹ Ijiputi ḅụ ọmịnị omoni-sọ simem; anịsakị mịna kẹẹ wararị oloko ma kẹ elekima sụa ḅụ ọ́ ḅụụ ẹbị ḅa.

¹³Ọ́ sọnọma aḍin kẹ igurugu awarị ma ḅẹ kopini afịaị alalị fị ḅa ọmịnị ọmịna mgbọlụ sẹlẹ kiri na, ọmịna iru mịẹ anga na ḅụ kobiri sakị.

¹⁴Ọmịnị na, ọmịna owiapụ-awọmẹ na, ọmịna eremịna-awọmẹ na, ọmịna fịrịmẹnjị-owiapụ na, ọmịna fịrịmẹnjị-ereme na, ọmịna ama ma ḅio simearị Livayị furo-ḅẹ-apụ ma na, jen sịẹ ḅe igoniḅọ ḅe na, ḍa-na-iyingi-na-fịtẹ-awọmẹ ma na, diapụ-fịtẹ-ereme ma na, ọmịna kopini afịaị ma ḅụ sọ tẹ ḍereku ḅa.

¹⁵Ọ́ sọnọma aḍin kẹ anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅẹ anga mẹ ḅụ kopini afịaị alalị mẹ fị ḅa; gbala KỊNỊNYANAḄỌ ọmịna Tamụnọ ḅe ọ́ mịẹ pakama-ḅo aị mamgba ḅụ na, ọmịnị ọmịna aḅara kẹ kọrị kọrịnama mamgba na ḅụ ó boma ḅa ẹrẹsị, mịẹtẹ arịmgba gboloma ḅụ ó ḍereku ḅẹ ḅara.

¹⁶Anị anga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅẹ anga mẹ ḅụ ọmịna owiapụ mamgba tẹra asakị kẹ gbọrụ kụra ḅụ ḅụụ kẹ ọ̀ tọrọkọ ḅụ ò ḍie ḅa: sun-a fịturu kopini afịaị alalị mẹ ḅụ na, fẹnị-anga, fẹnị-anga ḅẹ kopini afịaị alalị ḅụ na, igurugu awarị kopini afịaị alalị mẹ na ḅụ. Ịn papaa ḅara kẹ KỊNỊNYANAḄỌ ḅe tọrọkọ ḅụ ḅụụ kẹ ò ḍie ma.

¹⁷Ḅẹẹ owiḅọ-owiḅọ ori inetẹ ḅara pịrị ḅa, boma mẹ tẹ KỊNỊNYANAḄỌ ọmịna Tamụnọ ḅe wẹrịtẹ kẹ ọ́ pịrị tẹ ḅara ḅụ.

¹⁸Ama ma tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mamgba ḅio, ọmịna afuro ma wẹrịtẹ sime-ḅara ḅụ ọ́ ḅẹrẹkọn-apụ na, fịrịmẹnjị-opuapụ na tọn ḅa; tẹ ịn karakara kẹ ḅẹrẹkọn tomi ma pịrị ḅa.

¹⁹Ọ́ karakara ḅẹrẹ pịkị iḅo ma; ọmịnị aḍụa ḅẹrẹ kọn ma; anịsakị ọmịnị ọḅụ fị ma, kẹ gotẹ ọkọ ḅẹẹarị, ọḅụ fị ye-nimiḅọ atọrụngbọ pụnmam, tẹ karakara tomḅọ ḅe etela da pengemam.

²⁰Karakara ḅẹrẹkọn, anịsakị karakara ḅẹrẹkọn ngẹrị, mie ó ḍukamẹnjị ḅarịye, mịẹtẹ ó ḍumo-sime tẹ ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ kẹ ḍuu ḅụ fị ḅẹ ḅara.

²¹Ọ́ nama KỊNỊNYANAḄỌ ọmịna Tamụnọ ḅe pịrị ḅarị agbamịẹ-anga mẹ akaka ḅụ ọ́ ḅẹ sịn, ḅẹ sịn sọ ḍiḅi tẹ kẹ ịn kẹ Asịra sịn oru mẹ sọma ma.

²²Anịsakị ọmịnị ịḅalị tẹ KỊNỊNYANAḄỌ ọmịna Tamụnọ ḅe ḍiki-ḅioḅuarị gbọrụ ịḅalị sọ pike ma.