Read kalabari Ditẹrọnọmị 18 Bible Online

Ditẹrọnọmị 18 - kalabari bible

Ditẹrọnọmị 18

¹Livayị furo ḅẹ agbamịẹapụ ma, anie, Livayị furo-ḅẹ-apụ mamgba Izirẹlị ḅụụ sọ tẹ gbọrụ ḍiekiri anịanịa, sime anga sọ nyana ma; fịnị ḅụ ịn kẹ agba mịẹ KỊNỊNYANAḄỌ ḅe pịrị aị na, sime ịn pịrị na-iḅi aị mie ịn fị ḅarị ye.

²Ini ịna amịnapụ ma ogbo-ḅio ḅụ gbọrụ sime anga sọ nyana ma, KỊNỊNYANAḄỌ ḅe anie ịna sime anga, ọ̀ wẹrịtẹ kẹ ịn karịma ḅara.

³Anịsakị mie tomi ma ḅara ḅụ sime agbamịẹḅọ ḅe pịrị ye; ini tẹ agba mịẹarị apụ ma, anị pootẹ-nambulo-o, anịanịa anana sọ, ini apana mẹ na, maa amgba ma na furo mẹ na kẹ agbamịẹḅọ ḅe pịrị ḅa.

⁴Ọmịna sịnmgbọlị ḅụ tarị paka-ḅo sịnmgbọlụ ma ḅụ, ọmịna iru-o, ọmịna pulo-o, ọmịna anana na oḅori na isuke kẹ ọ́ mịẹ kapa sọ, ọ́ kẹ ọ̀ pịrị ḅa.

⁵Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịna afuro mamgba ḅụ ọ̀ sẹlẹ pakama-ḅom, tẹ ori na, ori owiapụ-awọmẹ na sịẹsime tẹ KỊNỊNYANAḄỌ ḅe ẹrẹ mẹ ḅụ fịrịmẹnjị gbamaso ḅẹ ḅara.

⁶Livayị furo ḅẹ gbọrụḅọ, ọmịna ama ma ḅụ Izirẹlị ḅẹ ama mamgba ḅụ, ḅẹẹ ama ḅẹẹ ama ḅụ ò simearị tẹ anị anga sime tẹ ḅo ḅoo, tẹ inetẹ ò ḅii sakị ḅụ anị anga mẹ tẹ KỊNỊNYANAḄỌ ḅe sẹlẹ-ọkị ḅẹ anga mẹ ḅom,

⁷anị sakị mẹ ori inetẹ ò pembe Livayị furo-ḅẹ-apụ mamgba tẹ anịjụ fịrịmẹnjị ḅẹ KỊNỊNYANAḄỌ ḅe tọrọkọ sịẹsime apụ ma sịẹsime ḅara kẹ sịẹsime tẹ KỊNỊNYANAḄỌ ọ̀ Tamụnọ ḅe ẹrẹ ḅụ fịrịmẹnjị ḅa.

⁸Inimgba gbasịtẹ aḍiekiri nyana tẹ fị ḅa, ọ̀ ḍa, anịanịa ori atẹngịapụ dẹrị ye ḅụ ori ọkị ye sikima.

⁹Ọmịnị ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ ḅio sọ-ḅo sakị, ọmịnị arị opu ama ma mịẹarị tọn-tọn amịẹaị ma ḍukamẹnjị ḅẹ ḍawọ ma.

¹⁰Ọmịna ogbo-ḅio ḅẹḅọ-ḅẹḅọ tẹ ori owiḅọtụḅọ, anịanịa ori ẹrẹḅọtụḅọ kẹ agbamịẹ ḅara ḅụ dọkịma ḅọ, ḅẹḅọ-ḅẹḅọ tẹ ḅịrịkọn-amịẹaị-mịẹḅọ, okoḅa-sarasara-ye-gbelaḅọ, anịanịa feni fieye naa tẹ tọrọkọ paka ḅẹ ye ḍuko ḅọ anịanịa arịḅọ,

¹¹anịanịa agba-pileḅọ, anịanịa ḅarakuḅu-ḍiki-ḅịrịḅọ, anịanịa majịkị-mịẹḅọ, anịanịa ḍụẹịn sịn pakama-ḅo tẹ ye gbela ḅọ ịn nwẹn ḍọkị-ẹrị ma ọmịna ogbo-ḅio ḅụ.

¹²Kẹ gotẹ ọkọ ḅẹẹarị, mịna aị ma mịẹḅọ, mịẹḅọ KỊNỊNYANAḄỌ ḅe ḅụụ tọn-tọnye mịẹarị; anịsakị mịna tọn-tọn amịẹaị ma mie KỊNỊNYANAḄỌ ọmịna Tamụnọ ḅe kẹ ọmịna tọrọkọ ịn dee pakamarị ye.

¹³KỊNỊNYANAḄỌ ọmịna Tamụnọ ḅe tọrọkọ ó ye kẹ ọmịnị ọlọ-ọlọ ọkụ ofori ḅara simee.

¹⁴Kẹ gotẹ ọkọ ḅẹẹarị, mịna opu asịẹ ma tẹ ọ́ ḅara ḅụ ịn nyana ye ọkị ḅẹ mịẹarị apụ ma okoḅa-sarasara-ye-gbelapụ na, ḅịrịkọn-apụ na mie ịn tọrụ kẹ ḍikiarị; kụma, ọmịnị kụma KỊNỊNYANAḄỌ ọmịna Tamụnọ ḅe amụ ḍụkụ-a ọmịnị ọkọ mịẹ.

¹⁵KỊNỊNYANAḄỌ ọmịna Tamụnọ ḅe ì pembe gbọrụ ịkịankoroḅọ saakị pakama-ḅo ọ́ pịrị ḅa ọmịna ogbo-ḅio, ọmịna amịnapụ ma ḅụ ori mie ó poki ḅarịye.

¹⁶Paa ọ́ wẹrịtẹ Orẹbụ ḅụ KỊNỊNYANAḄỌ ọmịna Tamụnọ ḅe ḅara ḅii ḅara pembe ḅara, kobiri-ogbo mẹ ene mẹ ḅụ, anị sakị mẹ tẹ ọ́ ḅẹẹm: Yee wa ḅarị jen-maaịn kẹ KỊNỊNYANAḄỌ wamịna Tamụnọ ḅe pọkọ naa ma, anịanịa mị gburo-gburotẹ opu kọrị fịnị mẹ ẹrị, anieofori wa ḅofa fịị.

¹⁷Tẹ KỊNỊNYANAḄỌ ḅe nwẹnị ị̀ ḅẹẹ: Kura ḅara ḅụ ini ịn ḍuko ḅarị aị mamgba ḍuko tẹẹ.

¹⁸Àrị ịna mịnapụ ma ogbo-ḅio ị́ pembe ịkịankoroḅọ saakị pakama-ḅo ịn pịrị ḅa; tẹ ị̀ ẹkwẹn-aḅịḅị kẹ ọ̀ ḅịḅị ḅio suu ḅa, tẹ ori à tọn ịn pịrị aị mamgba ḍuko ịn pịrị ḅa.

¹⁹Anịsakị ḅẹḅọ-ḅẹḅọ tẹ ị̀ ẹkwẹn-aḅịḅị ma tẹ ọ̀ ẹrẹ ḅụ ọ̀ kọn ḅarị ẹkwẹn mẹ pokiḅọ-pokiḅọ, yẹrị ḅarana mḅọ ḅara ḅụ anị ḅii ḅa.

²⁰Kụma gbọrụ ịkịankoroḅọ tẹ ọkọ tẹ ị̀ ẹrẹ ḅụ gbọrụ ẹkwẹn-ḅịḅị tẹ amụ à tọn ọ̀ pịrị-a ye ḍuko anịanịa oru-atamụnọ ẹrẹ ḅụ ẹkwẹn ḅọ, ẹkwẹn ḅọ anị gbọrụ ịkịankoroḅọ ḅe ọ̀ fịị.

²¹Ọ́ nwẹnị ọmịna ḅioḅẹngbọ ḅụ gbelam: Wa tọ-ḅara kẹ inetẹ ẹkwẹn-ḅịḅị mẹ tẹ KỊNỊNYANAḄỌ ḅe kọn ye mẹ nimi ḅẹ? ḅẹḅẹ,

²²gbọrụ ịkịankoroḅọ KỊNỊNYANAḄỌ ḅe ẹrẹ ḅụ ẹkwẹnm, tẹ ẹkwẹn-ḅịḅị mẹ ḅo paka tẹ ḅọrọ-a anịanịa ḅo karakaraye sọ-a ḅẹḅẹ, aniemẹ anie ẹkwẹn-ḅịḅị tẹ KỊNỊNYANAḄỌ ḅe amụ kọn-a ye, ịkịankoroḅọ ḅe ò ḅio ḅụ ọkọ tẹ anị ḍukom. Ọmịnị ò ḍiki-ḅalafa ma.