Read kalabari Ditẹrọnọmị 19 Bible Online

Ditẹrọnọmị 19 - kalabari bible

Ditẹrọnọmị 19

¹KỊNỊNYANAḄỌ ọmịna Tamụnọ ḅe opu asịẹ ma pẹlẹ sin, arịḅẹ ama ma, tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama ma, tẹ ọmịnị ịna ḅara ọkị, tẹ ịna opu ama ma na, ịna awarị ma na ḅio anga sakị,

²ọ́ tẹra opu ama sikima ọmịna ḅụụ pịrị ḅa ama ma tẹ KỊNỊNYANAḄỌ ọmịna Tamụnọ ḅe kẹ ọ́ pịrị nyana ḅẹ ama ma ḅụ.

³Ama mẹ tẹ KỊNỊNYANAḄỌ ọmịna Tamụnọ ḅe kẹ ọmịna nye ḅẹ ḅara kẹ ọ́ pịrị ama mẹ, ọmịnị opu etela ma tẹlẹma ḅa, tẹ ama mẹ ḍụḅa la ḅara mẹ kẹ tẹra akiri ḍiya ḅa, mịẹtẹ kịnị ḅaa ḅọ ḅaa ḅọ inetẹ ḍumo-mangị kọn arị anga mu ḅẹ ḅara.

⁴Miemẹ anie sime ḅiotọn-a ḅara kẹ kịnị-ḅaḅọ ḅe pịrị ḅụụ-wẹrịma ye, oriḅe tẹ ḍumo-mangị kọn anịjụ mu ḅụ inetẹ ò ḍumo ḅọrọma ḅarị ḅọ ḅe. Ḅẹḅọ-ḅẹḅọ nwẹnị ḅio tọn-a ḅara, pịkị ḅọrọtẹ sakị ḅụ fịya-a ḅara sime-a, tẹ amịna mịnaḅọ ḅaa ḅọ ḅaa ḅọ,

⁵anie ọkịị mịnẹ tomḅọ amịna mịnaḅọ na piri-ḅio sịn pẹlẹ ḅẹ mum, tẹ opu sịn mẹ pẹlẹ-gbin ḅẹ ḅara kẹ kumbu mẹ saakị sakị anị pẹlẹarị tẹ kumbu-sịḅị mẹ pịọnị mu ọ̀ mịnaḅọ ḅe la tẹ ọ́ fịị fịị — ori inetẹ ḍumo-mangị kọn mịna opu ama ma ḅẹ gberie mu tẹ ò ḍumo ḅọrọma ḅa;

⁶anieofori ọmbie gbẹẹfị ḅii ḅọ ḅe ḅofa ḅio-fụkụfụkụ ḅụ ḅiotọn-a ḅara kẹ kịnị-ḅaḅọ ḅe ḍụa tẹ etela mẹ ala wararị ẹrẹsị mu ọ̀ la tẹ ḅaa ḅara kẹ ye kẹ ọ̀ lama, tomḅọ ḅẹ fịị gbẹẹ-a sọ, ori ọ̀ mịnaḅọ ḅe na ḅọrọtẹ sakị ḅụ fịya-a ḅara sime-a ḅẹẹ-sakị,

⁷Anịẹrẹsị à tọn ọ́ pịrịm, ọ́ tẹra opu ama sikima koroma ḅa.

⁸Anịsakị KỊNỊNYANAḄỌ ọmịna Tamụnọ ḅe ọ̀ wẹrịtẹ ye karị ḅara kẹ minini ọmịna aḍapụ pịrị ḅara ọmịna agara mịẹ ḍụḅama, tẹ ama mẹ tẹ ọ̀ kẹ ọmịna aḍapụ pịrị ḅẹ karịma ama mamgba kẹ ọ́ pịrị-pịrị,

⁹ọmịnị ọmịna aḅụụ ẹbị-bịtẹ mị oloko mẹmgba tẹ mịmgba à tọn ọ́ pịrị ye mẹ koko-koko, KỊNỊNYANAḄỌ ọmịna Tamụnọ ḅe ḅẹlẹma, tẹ ḅẹẹ-sakị ḅẹẹ-sakị ḅụ ori etela ma ḅụ mẹnjị ḅụ — anịrẹ ọ́ ja tẹra opu ama kẹ mịna tẹrẹị ma ḅụ sụa ḅa.

¹⁰Anie ofori mịẹye-ofori apụ ọmbie ḅofa ama mẹ tẹ KỊNỊNYANAḄỌ ọmịna Tamụnọ ḅe kẹ sime anga gotẹ ọ́ pịrị ama mẹ ḅio sara, tẹ anieḅụ ọmbie ọsụma ḅẹrẹ-ḅarasii ḅofa ọmịna ọgọnọ gbana.

¹¹Kụma tomḅọ amịna mịnaḅọ ḍiki-ḅioḅu tẹ sime koru tẹ ori ẹbị, tẹ owu kẹ ọ̀ paka, tẹ ḅaa ḅara kẹ ye kẹ ọ̀ lama, tẹ ọ̀ fịị, tẹ tomḅọ ḅe ḍumo-mangị kọn mu mịna opu ama ma ḅe gbọrụ ye ḅio sọ, sọ,

¹²anịrẹ opu ama mẹ ḅẹ omongiapụ ma fịrịma mu anịanga ḅụ ori ọkị-ḅo ḅa, tẹ ọ̀ saakị saḅama ọmbie gbẹẹfị ḅii ḅọ ḅe pịrị ḅa, mịẹtẹ ọ̀ fịị ḅẹ ḅara.

¹³Ọmịnị ò ḍiki sịḅị-jịrị ma, kụma ọmịnị Izirẹlị ḅụ mịẹye-ofori ọmbie ḅẹrẹ-ḅarasii mẹ sịkịrị sin ḅa, mịẹtẹ anị ọmịnị na iḅi ḅẹ ḅara.

¹⁴Ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ ọ́ nyana ḅẹ ama mẹ ḅio ọmịnị ọlọ-sịẹma ḅẹ sime anga mẹ ḅụ, ọmịnị ọmịna mịnaḅọ kiri ḅẹ oke tẹ elemu sakị ḅẹ apụ ma sụa koroma ye sin ma.

¹⁵Gbọrụ ogbo-sịẹḅọ ḅịḅị, ḅẹẹ si ḅẹẹ si, anịanịa kura-aye tẹ tomḅọ mịẹ ye mịẹ ye ḅụ, mịẹtẹ ye mḅọ ọlọ ḅịa; maa ogbo-sịẹ apụ, anịanịa tẹra ogbo-sịẹ apụ ḅịḅị ḅo ye ḅụ mie tomḅọ mịẹ ye mḅọ ọgọnọ gbana ḅarịye.

¹⁶Si kuroma ḅụ ogbo-sịẹ ye saakịm, tẹ kura-aye mịẹ kẹ ḅẹ tomḅọ, tomḅọ sịḅị ḅụ sẹịn sẹịn,

¹⁷anịrẹ ịgbanịya mẹ ḅẹ maa apakịrị ḅẹ apụ ma KỊNỊNYANAḄỌ ḅe tọrọkọ, agbamịẹapụ ma na, ḅẹrẹkọn-apụ ma na tẹ arị ene ma ḅụ kọrịnama kọrị warị mẹ ḅio simearị apụ ma tọrọkọ ḅo ḅa;

¹⁸ḅẹrẹkọn-apụ ma iḅiọkụ sọkịrịtẹ gbela ḅa, tẹ ogbo-sịẹḅọ mẹ nwẹnị iruo ogbo-sịẹḅọ, tẹ iruo ye kẹ ori iyimbere sịḅị sẹịn sẹịn,

¹⁹anịrẹ ọmịnị ọ̀ kẹ ori iyimbere mịẹ ḅẹ ḅii ḅara mẹ kẹ ọ̀ mịẹ ḅa; mị-ḅara mie ọ́ kẹ ọmịna ogbo-ḅio siye mẹ sịkịrị sin ḅarị ḅara.

²⁰Anịsakị kirikọn-apụ ma nwẹnị naa, tẹ ḅalafa ḅa, tẹ gbala-gbala ḅarị jen-maaịn kẹ ọmịna ogbo-ḅio ọkọ sime siye mịẹ ma.

²¹Ọmịna atọrụngbọ anị ẹrị tẹ sịḅị-jịrị ma; anị sime ḅarị ḅara ḍumo sime ḍumo pịrịm, tọrụngbọ sime tọrụngbọ pịrịm, aka gbọrụmgbọ sime aka gbọrụmgbọ pịrịm, ḅara sime-ḅara pịrịm, ḅụọ sime ḅụọ pịrịm.