Read kalabari Ditẹrọnọmị 20 Bible Online

Ditẹrọnọmị 20 - kalabari bible

Ditẹrọnọmị 20

¹Ọmịnị ọmịnị na fịya-a apụ na ọmụgbin ḅẹ sakị, tẹ ọ́ tọnwa asụ na, kirimẹnjị-ọmụarụ na, ḍụḅa ọ́ soku-ḅẹ ọmụ-ogbo nẹngị ọmụ-ogbo na ẹrị-ẹrị, ọmịnị in ḍiki ḅalafaa ma; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịnị na emi, oriḅe tẹ Ijiputi ama mẹ ḅụ ó ḍikiḍiki pakama-ḅo ḅọ ḅe.

²Tẹ ọ́ sọma-mu owu mẹ kpeki sakị, agbamịẹapụ ma mẹnjị tọrọkọ ḅọ tẹ ẹkwẹn tomi ma pịrị ḅa,

³tẹ ịn ḅẹẹ ḅa: Ọ́ naa yei Izirẹlị, ọmịnị ọmịnị na fịya-a apụ na owu-sọ ḅẹ sọma kpeki ḅo tẹ mịmgba; yee ọmịna ḅioḅẹngbọ ḅịkịma; siye ḅo ọ́ la ḅẹ kuroma anịanịa oju sẹkị, anịanịa opu ḅalafa nyana ịn pịrị ma.

⁴Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe anie oriḅe tẹ ọmịnị na fịya-a apụ na owu sọ ọ́ pịrị ḅẹ ọmịnị na muarị ḅọ, owu-ḅara-iḅi mẹ kẹ ọ́ pịrị ḅẹ ẹrẹsị.

⁵Anịtẹso ọkụma, fịrịmẹnjị-opuapụ ma ẹkwẹn tomi ma pịrị ḅa, tẹ ḅẹẹm: Tụḅọ emi tẹ gbọrụ ịwọ warị nama tẹ amụ anị finji-a ḅọ? Yee mḅọ ọḅụ pịkị so mḅọ warị mu, anieofori mḅọ ḅofa owu mẹ ḅio fịị, tẹ jen tomḅọ anị finji.

⁶Anịsakị tụḅọ gbọrụ kụrọ ḍụọ ḍiḅi tẹ amụ anị ḅẹ sịnmgbọlụ kẹ tọrụ-ḅẹlẹ-a? Yee mḅọ ọḅụ pịkị so mḅọ warị mu, anieofori mḅọ ḅofa owu mẹ ḅio fịị, tẹ jen tomḅọ anị ḅẹ sịnmgbọlụ kẹ tọrụ-ḅẹlẹ.

⁷Anịsakị tọ owiḅọ emi tẹ ere-sime ḅẹ tẹ gbọrụ ẹrẹḅọ ọlọ, tẹ amụ arị ọkị-a ḅọ? Yee mḅọ ọḅụ pịkị-so mḅọ warị mu, anieofori mḅọ ḅofa owu mẹ ḅio fịị, tẹ jen owiḅọ árị ọkị.

⁸Fịrịmẹnjị-opuapụ ma ẹkwẹn tọrọkọ mu tomi ma pịrị tẹ ḅẹẹ ḅa: Tụḅọ emi tẹ siye ḅụụ la ḅẹ kuroma nyana tẹ ḅioḅẹngbọ ḅịkị tẹ ḅọ? Yee mḅọ ọḅụ pịkị-so mḅọ warị mu, anieofori mḅọ pembema ḅọ ḅioḅẹngbọ ḅofa mḅọ ḅioḅẹngbọ sanị ḅara sanị.

⁹Fịrịmẹnjị-opuapụ ma ẹkwẹn mẹ kọn tomi ma pịrị kunoma tẹso, kụma, anịsakị rẹ ịn tomi ma kẹ sịḅịda ḅẹ ḅẹrẹtọn-apụ tọn ḅa.

¹⁰Ọ́ sọma mu gbọrụ opu ama kpeki tẹ owu kẹ anị paka ḅarị sakị, ó dein pakama ḅarị akiri kẹ anị pịrịị.

¹¹Anịsakị dein anie anị ḅẹ pakịrị ḅịḅị tẹ ịn kẹ ọ́ pịrị ye, tẹ ḅọkọ finji ọ́ pịrị, pịrị, anịrẹ tomi tẹ ọmịnị anị ḅio ḍọkị-ẹrị apụ mamgba kụrọ kọrịnama kọrị tẹ fịrịmẹnjị ọ́ pịrị ḅa.

¹²Kụma anị ọmịnị na gbọrụ dein ḅara sọ mịẹ-a, kụma owu kẹ ọ́ paka, paka, anịrẹ ọmịnị anị ikelema-koro tẹ owu kẹ anị paka ḅa.

¹³Anịsakị KỊNỊNYANAḄỌ ọmịna Tamụnọ ḅe anị kẹ ọmịna ḅara-ḅio ḅụ ọ́ pịrị sakị, ọmịnị okologie mẹ kẹ anị ḅẹ owiapụ mamgba pẹlẹ ḅaa fama ḅa.

¹⁴Kụma ereme ma na ḍọkọḍọkọ-awọmẹ ma na, opu anama ma na, opu ama mẹ ḅio sime ye, sime ye sọ, anị ḅẹ ọmụ ḅio ọmịnị ọkị aị mamgba, ọmịnị ọkị ḍiema ọmịna aḅụụ pịrị ḅa; tẹ ọmịnị na fịya-a apụ ḅara ọkị aị ma tẹ KỊNỊNYANAḄỌ ọmịna Tamụnọ ḅe kẹ ọmụ ḅio ọ́ pịrị aị ma kẹ tọrụ-ḅẹlẹ ḅa.

¹⁵Mị-ḅara mie ọ́ kẹ opu ama mamgba tẹ ọmịna aḅụụ ḅẹlẹma ala lamatẹ anga ḅụ simearị aị ma tẹ mịanga ḅẹ opu asịẹ ma ḅẹ opu ama-a ḅẹ aị ma mịẹ ḅarị ḅara.

¹⁶Kụma mịna atomi ma tẹ KỊNỊNYANAḄỌ ọmịna Tamụnọ ḅe kẹ sime anga ḅụ ọ́ pịrị tẹ opu ama ma ḅio ọwụ nụnụ ọkị-ọkị sara, sara pakamarị gberie-sọ ọ́ ḅọrọma tẹ ḍumo-sime ḅịa.

¹⁷Kụma KỊNỊNYANAḄỌ ọmịna Tamụnọ ḅe wẹrịtẹ tọn tẹ ḅara ḅụ, ọmịnị ịkatakirikọn-a-ḅara kẹ ịn ḅaa fama ḅa; Itayịti apụ ma na, Amọrayịtị apụ ma na, Kenanị ḅẹ apụ ma na, Pẹrịzayịtị apụ ma na, Hivayịtị apụ ma na, pịkị Jebusayịtị apụ ma na;

¹⁸mịẹtẹ ini ịna tọn-tọn amịẹaị mamgba, ịn wẹrịtẹ mịẹ-mịẹ ḅara mẹ kẹ ó toluma tẹ ọ́ mịẹ ḅịa ḅara, arị aị ma tẹ fịrịmẹnjị ịna oru-atamụnọ ma piri ḅụ ịn mịẹ tẹ aị ma, tẹ mị ḅara ḅụ KỊNỊNYANAḄỌ ọmịna Tamụnọ ḅe ḅụụ si mịẹ ḅịa ḅara.

¹⁹Ọ́ gbọrụ opu ama ọkị ḅẹ ẹrẹsị nangwọ sakị kẹ anị ikelema-koro tẹ owu kẹ anị paka ḅarị sakị, ó kumbu kẹ anị ḅẹ opu asịn pẹlẹ pẹlẹ ḅaa ḅụ arị ḅaa ma; kẹ gotẹ ọkọ ḅẹẹarị, ọmịnị inetẹ arịḅẹ asịnmgbọlụ fị ḅa, kụma ọmịnị arị pẹlẹ-gbin ma. Piri-ḅio-ḅẹ opu asịn ma ḅọrọ tomi tẹ ọmịnị ini ikelema-koro tẹ owu kẹ ịn paka na-iḅi?

²⁰Opu asịn ma tẹ ó nimim fịye sụa-a opu asịn mie ọmịnị inetẹ ḅaa tẹ pẹlẹ-gbin ḅarịye, mịẹtẹ ọmịnị inetẹ opu ama mẹ tẹ ọmịnị na ọmụgbin-arị ama mẹ ikelema-koro tẹ owu kẹ anị paka ḅẹ kọrịnama kọrị tẹ owu kẹ anị paka nwenii anị ḅịkị ḅẹ ḅara.