Read kalabari Ditẹrọnọmị 22 Bible Online

Ditẹrọnọmị 22 - kalabari bible

Ditẹrọnọmị 22

¹Ị́ í iyimbere pootẹ-nambulo, anịanịa ori anana etela-iriarị tẹ ḅarasụa ịn pịrị ḅụ ị́ ḅụụ ọlọ-sịẹma ma; ị́ ini ọkị ọḅụ pịkị so mu í iyimbere pịrị ḅa.

²Anịsakị ori í kpeki-a tẹ ala-jụ emi, anịanịa í ò nimi-a ḅẹḅẹ, ị́ anị kẹ ị́ ama ḅo ị́ warị koroma ḅa, tẹ anị ị́nịna sime nwenii ị́ iyimbere anị ḍọkị ḅa; anịsakị rẹ ị́ anị kẹ ọ̀ pịrị ḅa.

³Anịsakị mị-ḅara mie ị́ kẹ ò yedogi-nama na mịẹ ḅarị ḅara; ị́ ọkọ kẹ ori opu kapa na mịẹ ḅa; mị-ḅara mie ị́ kẹ í iyimbere nyana ye ḅụ fa ye fa ye, tẹ ọ̀ fama, tẹ ị́ ḍọkị-ẹrị ye, ẹrị ye na mịẹ ḅarị ḅara; ị́ inetẹ ị́ sụa ḅarị ḅara ḅụ, ị́ ḅụụ ọlọ-sịẹma ma.

⁴Ị́ í iyimbere yedogi-nama, anịanịa ò pootẹ-nambulo etela mẹ akaka ḅịkị-koro wararị ẹrị tẹ ḅarasụa ịn pịrị ḅụ ị́ ḅụụ ọlọ-sịẹma ma; ị́ ḅarasụa ọ̀ pịrị tẹ pịkị sin ịn saakị sịẹma ḅa.

⁵Ḅẹ kapa kapa, tẹ owiḅọ gbolomaye gbolomaye, ẹrẹḅọ sụa ma; anịanịa ẹrẹḅọ gbolomaye gbolomaye, owiḅọ sụa ma; kẹ gotẹ ọkọ ḅẹẹarị, mịna aị ma mịẹḅọ mịẹḅọ KỊNỊNYANAḄỌ ọmịna Tamụnọ ḅe ḅụụ tọn-tọnye mịẹm.

⁶Ḅẹ opu sịn opu sịn ọgọnọ, anịanịa kiri-ḅio ḅụ ọ́ bẹkẹ bẹkẹ feni warị ḅio asambịrịma afeni awọmẹ, anịanịa anyị na iyingiḅọ na ẹrịm ọ̀ pamba kẹ awọmẹ ma gbaịn wararị, anịanịa anyị ma ọgọnọ emi ḅẹḅẹ, ó iyingiḅọ ḅe na, asambịrịma afeni ma na ọkị ma.

⁷Ọmịnị iyingiḅọ ḅe wẹrịso tẹ ò so, kụma asambịrịma afeni ma mie ọmịnị inetẹ ọkị ḅụụ pịrị ḅarịye; mịẹtẹ anị ọmịnị na iḅi ma-mu, tẹ ọmịnị inetẹ ḍumo nangwọma ḅẹ ḅara.

⁸Ọmịnị ịwọ warị nama ḅarị sakị ó tẹịn tẹ warị-anga nama ọmịna geletẹ isun akaka pịrị ḅa, mịẹtẹ ọmịnị ọmbie ḅẹrẹ-ḅarasii ọkị-ḅo ọmịna warị pịrị ḅịa ḅara kịnị anị ọgọnọ ḅịkị tẹ fị-fịị.

⁹Ọmịna girepu-ḍụọ ḅio, ọ́ sịnmgbọlị maa aḅara ḍiḅi ma, anieofori bebe ḍụọ mẹ pakama-ḅo ḅarị aị mamgba ḅofa sime fịafịa yọ mẹ pịrị aị sọ.

¹⁰Ó pootẹ-nambulo na yedogi-nama na kẹ gboloma fịye ḍiḅi ḅẹ kiri mẹ soku ma.

¹¹Ọ́ nama isuke na sịnịnị na kẹ gboloma mịẹ akapa sụa ma.

¹²Ḅịtẹ tẹ ọ́ kẹ ọmịna aḅụụ gbaịn ḅarịye ḅụ ọmịnị inia ịkọlị ma ḅụ iri kẹ ịsịram sụa ḅa.

¹³Ḅẹẹ owiḅọ-owiḅọ ẹrẹḅọtụḅọ simem, tẹ á lekiri tẹrẹmẹ á sịkị,

¹⁴tẹ á ḅụụ-jịrịma ḍumo kọnm, kẹ á sịḅị gbana, tẹ si ẹrẹ kẹ ḅo á pịrị tẹ ḅẹẹm: À ma ẹrẹḅọ ma simem, tẹ à sọma-ḅo á kpeki sakị, àrị amụ á ḅụụ-gboloa elekima ẹrị-a ḅẹẹ-ḅẹẹ,

¹⁵yee á ḍa-na-iyingi-na ịn kẹ “àrị-í-lekiri” ḅụ iḅila dẹẹ ḅịtẹ mẹ tẹ ọmbie fị wararị ḅịtẹ mẹ ọkị tẹ kẹ ḅo opu ama mẹ ḅẹ omongiapụ ma ḍie, ḅẹrẹkọn ogigo mẹ ḅụ. Miemẹ elekima sọ ḅa mịnẹ jen sakị amụ árị owiḅọ nimi-a;

¹⁶Á ḍa ḅe nwẹnị omongiapụ ma ḅẹẹ ḅa: Àrị ere-sime gotẹ ị̀ ẹrẹḅọtụḅọ kẹ ḅị owiḅọ ḅe pịrịm, tẹ ori á sịkịm.

¹⁷Anịsakị ḍikii, ọ̀ ḅụụ-jịrịma-aị kẹ á sịḅị sẹịn tẹ ḅẹẹm: Jen sakị ị́ ẹrẹḅọtụḅọ ma amụ owiḅọ nimi-a ḅara kẹ àrị á ḍọkị-ẹrịa. Kụma mịna aị ma anie ẹrẹḅọtụḅọ ma jen sakị amụ owiḅọ nimi-a mẹ ḅẹ elekima. Á ḍa-na-iyingi-na nwẹnị opu ama mẹ ḅẹ omongiapụ ma tọrọkọ ọmbie fị wararị “àrị-í-lekiri” ḅụ iḅila dẹẹ ḅịtẹ mẹ finjima ḅa.

¹⁸Anịtẹso ọkụma anị opu ama mẹ ḅẹ omongiapụ ma owiḅọ ḅe ọkị tẹ fomuye kẹ ò fomu ḅa.

¹⁹Ịn seleḅa pakịrị sọnọa si gbẹẹ fomu-ḅara kẹ ọ̀ pịrị ḅa, tẹ arị kẹ ẹrẹḅọtụḅọ ma ḍaḅọ ḅe pịrị ḅa, gbala ọ̀ si ẹrẹ kẹ Izirẹlị ḅẹ amụ owiḅọ nimi-a ẹrẹḅọ ọgọnọ gbanam ẹrẹsị. Anịsakị árị ọ̀ ta sọ ḅa, tẹ ò ḍumo ene mamgba ḅụ ori inetẹ á siya ḅịa.

²⁰Kụma ye mẹ karakaraye, mịnẹ ẹrẹḅọtụḅọ ma ḅụụ jen sakị amụ á ḅụụ-gboloa elekima ịn nwẹn ḍọkị-ẹrịa ḅẹḅẹ,

²¹anịrẹ ini ẹrẹḅọtụḅọ ma pakama-ḅo ḅa á ḍa warị ḅọkọ ḅụ, tẹ opu ama mẹ ḅẹ owiapụ ma ḍụḅarị kẹ á gbin ḅaa ḅa; gbala á sẹfị oḅori mịẹye mịẹ tẹ ẹrẹsị á ḍa warị ḅio Izirẹlị ḅụ. Mị-ḅara mie ọ́ kẹ ọmịna ogbo-ḅio ḅụ siye sịkịrị sin ḅarị ḅara.

²²Ọ́ gbọrụ owiḅọ na jen owiḅọ ta na gbolomarị ḍọkị-ẹrị-ẹrị, ini maa apụ mamgba fịị ḅa; owiḅọ ḅe tẹ ẹrẹḅọ ma na gbolomarị ḅọ ḅe na, ẹrẹḅọ ma na. Mị-ḅara mie ọ́ kẹ siye mẹ sịkịrị sin ḅarị ḅara Izirẹlị ḅụ.

²³Ịn sime ḅẹ ọlọ wararị amụ owiḅọ nimi-a ẹrẹḅọ emi, tẹ owiḅọ opu ama mẹ ḅio arị na bịama tẹ arị na gboloma gboloma,

²⁴anịrẹ ọmịnị ini maa apụ ma pakama anị opu ama mẹ ḅẹ ogigo-ḅọkọ mẹ ḅo ḅa, tẹ ḍụḅarị kẹ ịn gbin ḅaa ḅa gbala ẹrẹḅọtụḅọ ma opu ama mẹ ḅio emi sọ ḅarasụa gotẹ oloku-a; anịsakị owiḅọ ḅe, ori ọ̀ mịnaḅọ ta pilemam ẹrẹsị; mị-ḅara mie ọ́ kẹ ọmịna ogbo-ḅio ḅụ siye mẹ sịkịrị siin ḅarịye.

²⁵Kụma ama na kpeki-a anga ḅụ owiḅọ ẹrẹḅọtụḅọ tẹ ịn sime ḅẹ tẹ ọlọ wararị ḅọ na bịama tẹ árị na gbolomam ḅẹḅẹ, arị na gboloma owiḅọ ḅe ngẹrị mie ịn ḅaa ḅarị ḅọ.

²⁶Kụma ẹrẹḅọtụḅọ ma ó gberie-sọ kẹ á mịẹ ma; á ḅụụ ḅụ á mịẹ tẹ fịị fomu-ḅara kẹ á pịrị na-iḅi ye ofori, kẹ gotẹ ọkọ ḅẹẹarị, mị ḅẹrẹ mẹ sime-ḅara anie gbala owu kẹ amịna mịnaḅọ paka tẹ mḅọ ḅaa gbọrụ owiḅọ sime-ḅara;

²⁷gbala ama na kpeki-a anga ḅụ ò ḅo arị ọlọm, tẹ ịn sime ḅẹ ọlọ wararị ẹrẹḅọtụḅọ ma ḅarasụa gotẹ oloku sọ, á ḍụa-ḅọrọma ḅẹ gbọrụḅọ-sọ ofori ẹrẹsị.

²⁸Gbọrụ owiḅọ nwẹnị amụ ịn sime ḅẹ ọlọ-a amụ owiḅọ nimi-a ẹrẹḅọtụḅọ na bịama tẹ arị na gboloma, tẹ ini ịn ḍọkị-ẹrị-ẹrị,

²⁹anịrẹ owiḅọ ḅe tẹ arị na gboloma ḅọ ḅe seleḅa pakịrị mesi oyi finji kẹ ẹrẹḅọtụḅọ ma ḍaḅọ ḅe pịrị ḅa, tẹ arị ọ̀ ta sọ ḅa, gbala ori á pilema tẹ ẹrẹsị; ori ene mamgba ḅụ ori inetẹ á siya ḅịa.

³⁰Gbọrụ owiḅọ sọ amịna ḍaḅọ ta ọkị, anịanịa arị ma tẹ sime mḅọ ḍaḅọ pịrị ẹrẹḅọ ma paụma ma.