Read kalabari Ditẹrọnọmị 25 Bible Online

Ditẹrọnọmị 25 - kalabari bible

Ditẹrọnọmị 25

¹Mozizi nwẹnị paa ẹkwẹn tẹ ḅẹẹ, “Maa owiapụ ogboku ịgbanịya paka tẹ ịn ḅẹrẹkọn warị-ḅio sọ-ḅom, tẹ ḅẹrẹkọn-apụ ma ịna ogboku ịgbanịya mẹ kọn ịn pịrị tẹ mịẹye ofori ḅọ ḅe wẹrịso, tẹ ḅẹrẹ-ḅarasii pẹlẹ mịẹkọn nyana ḅọ ḅe pịrị,

²anịrẹ mịẹkọn nyana ḅọ ḅe fomu na-iḅi-ḅii, ḅe ọ̀ mịẹ tẹ ò kiri-ḅio iḅo ḅa, tẹ ini ọ̀ ḅụ ọ̀ mịẹ si mẹ na gbasị ḅẹ fomuye aḅara ma ḅẹ kịẹn-ḅịḅị kẹ ò fomu ḅa ḅẹrẹ-pẹlẹḅọ tọrọkọ.

³Ini inetẹ fomuye ḅara amesi kẹ ò fomu ḅa, kụma ọkọ nẹngị ma; anieofori ọmịnị ọkọ nẹngị ḅara kẹ ò fomu-fomu, ó ḅofa ọmịna ḍiki-tọrụ ḅụ ọmịna iyimbere ḅe mịẹ iderima.

⁴“Ó pootẹ-nambulo ḅe ḅịḅị fịna ma, ori mgbọlị nanga-nanga pakama-ḅoarị sakị ḅụ.”

⁵“Maa owiapụ-amịnapụ anga gboloma tẹ ini ḅẹ gbọrụḅọ owiḅọtụḅọ iyi-a tẹ fị-fịị, furo mẹ ḅụ ḅọ-a igoniḅọ fịtẹ ḅọ ḅe ta ma sime ma; á di ḅe iyimbere mie sọ á ḍọkụma-mu tẹ ọ̀ ta ọkị ḅara kẹ árị ọkị, tẹ sime diḅọ iyimbere pịrị kọrịnama kọrị á pịrị ḅarịye.

⁶Anịsakị tarị owiḅọtụḅọ ḅe tẹ arị iyi ḅọ ḅe ori iyimbere tẹ fịtẹ ḅọ ḅe ẹrẹ go ḅa, mịẹtẹ ori ẹrẹ Izirẹlị ḅụ fa so ḅịa ḅara.

⁷Anịsakị owiḅọ ḅe ori iyimbere ta ma ọkị ḅẹ ḅii-a ḅẹḅẹ, anịrẹ ori iyimbere ta ma iwo ogigo-ḅọkọ mẹ ḅụ omongiapụ ma dama-mu tẹ ḅẹẹ ḅa, ‘Ì di iyimbere ori iyimbere ẹrẹ Izirẹlị ḅụ ḅarị faa ḅịa mẹ sịkịm; ò sime diḅọ iyimbere pịrị kọrịnama mẹ kọrị ị̀ pịrị-a’

⁸Anịtẹso ọkụma ori opu ama ḅẹ omongiapụ ma ọ̀ sịn tẹ ẹkwẹn ọ̀ pịrị ḅa; tẹ ọ̀ paa ḍukoarị, ‘Àrị árị ọkị ḅẹ ḅii-a’ ḅẹḅẹ,

⁹anịrẹ ori iyimbere ta ma omongiapụ ma tọrọkọ mẹnjị ọ̀ dama-mu, tẹ ọ̀ ḅụọ ḅụ ọ̀ sụa wararị okuro pịọnị siin, tẹ fịla kẹ ọ̀ tọrụkuḅu sara ḅa; tẹ á nwẹnị pakịrị tẹ ḅẹẹ ḅa, ‘Mị-ḅara mie ịn kẹ owiḅọ ḅe tẹ ori iyimbere warị pakama ḅẹ-ḅii-a ḅọ mịẹ ḅarị ḅara.’

¹⁰Anịsakị Izirẹlị ḅụ ịn kẹ ọ̀ warị mẹ sịn ḅarị ẹrẹ, ‘Oriḅe tẹ ḅụọ ḅụ ini ori okuro pịọnị sin ḅọ warị.’

¹¹“Owiapụ jụmọ-jụmọ na owu sọm, tẹ gbọrụḅọ ta nwẹnị sọma-mu oriḅe tẹ á di fomuarị ḅọ ḅe ḅara ḅụ ọ̀ ḍụa-ḅọrọma ḅẹ mu, tẹ á ḅara sụn-pakama mu ori owiḅọ-ḅụụ ọlọ-ọlọọ,

¹²anịrẹ ọmịnị á ḅara pẹlẹ-siin ḅa; ọmịnị á ḍiki sịḅị-kụrụkụrụ ma.

¹³“Ọmịna ye-sụa akpa ḅio ọ́ maa iku-laa-ḅara ye-tọn-aị nyana ma, gbọrụ opuye na gbọrụ kalịye na.

¹⁴Ọmịna warị ḅio ọ́ maa ye-tọn-aị nyana ma, gbọrụ opuye na gbọrụ kalịye na.

¹⁵Ḅintẹ karakara gbọrụ iku-laa-ḅara ye-tọnye mie ọ́ nyana ḅarị ye, pịkị ḅintẹ karakara gbọrụ ye-tọnye; mịẹtẹ ọmịna ene ma nangwọ ḅe ḅara ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ ḅio.

¹⁶Kẹ gotẹ ọkọ ḅẹẹarị, inimgba tẹ ọkọ sime aị mịẹarị apụ ma na, inimgba tẹ furu ḅara kẹ ye mịẹarị apụ ma anie KỊNỊNYANAḄỌ ọmịna Tamụnọ ḅe tọn-tọn-aị.”

¹⁷ Mozizi pịkị ḅẹẹm, Ọmịnị Ijiputi ḅụ mẹnjịma paka-ḅoarị etela ḅụ ọmịnị Amalẹkị kẹ ọ́ mịẹ ye kẹ ḅiokoromaa.

¹⁸Ịnyọ ọ́ ta, tẹ ọ́ ḅụụ-ḅalaḅalarị sakị ḅụ, ori etela ḅụ owu kẹ ọ́ paka, tẹ ọmịna ọḅụjụ kunoma ḅụ fọnọma-fọnọma ma-ḅoarị apụ ma ḅaa ḅara, tẹ ọ̀ Tamụnọ ḍiki-ḅalafa-a.

¹⁹Anịẹrẹsị KỊNỊNYANAḄỌ ọmịna Tamụnọ ḅe ọmịnị ikelema-koro wararị ọmịnị na fịya-a apụ mamgba ḅụ ịnyọsara kẹ ọ́ pịrị sakị, anị ama mẹ tẹ KỊNỊNYANAḄỌ ọmịna Tamụnọ ḅe kẹ sime anga gotẹ ọ́ pịrị nyana ḅẹ ama mẹ ḅio, ó so mẹ suku-ḅio ḅụ Amalẹkị emi nwẹn ḅẹẹ kuroma mẹ sịkịrị siin ḅa; ọ́ kẹ ḅioḅọrọma ma.