Read kalabari Ditẹrọnọmị 28 Bible Online

Ditẹrọnọmị 28 - kalabari bible

Ditẹrọnọmị 28

¹Ọ́ KỊNỊNYANAḄỌ ọmịna Tamụnọ ḅe ḅịḅị poki ḅụ, ḅụụ ẹbị-ẹbị ori oloko mamgba tẹ mịmgba à tọn ọ́ pịrị aị ma mịẹ-mịẹ, KỊNỊNYANAḄỌ ọmịna Tamụnọ ḅe ọ́ saakị-gelema tomikiri mẹ ḅẹ opu asịẹ mamgba nẹngị ḅa.

²Mịna aboma mamgba ḅo ọmịna ọgọnọ gbana ḅa, tẹ ọ́ gbaịn-koro ḅa ọ́ KỊNỊNYANAḄỌ ọmịna Tamụnọ ḅe pọkọ poki poki.

³Ó bomatẹ apụ sọ ḅa opu ama mẹ ḅio, anịsakị piri mẹ ḅio sọ ó bomatẹ apụ sọ ḅa.

⁴Ọmịna oju ḅẹ mgbọlụ ma na, ọmịna kiri mẹ ḅẹ asịnmgbọlụ ma na, ọmịna piri-ḅio-ḅẹ anama ma ḅẹ mgbọlụ na, ọmịna opu anama ma kịẹn-ḅịḅị mịẹ ḍụḅama ḅẹ anama ma na, ọmịna ogbo ma ḅẹ asambịrịma aị ma na bomatẹ aị sọ ḅa.

⁵Ọmịna kana mẹ na, ọmịna fịye tẹlẹma aị ma na bomatẹ aị sọ ḅa.

⁶Ọmịna mẹnjị sọ-ḅo na, ọmịna mẹnjị-paka na bomatẹ aị sọ ḅa.

⁷KỊNỊNYANAḄỌ ḅe ọmịnị na fịya-a apụ ma tẹ owu kẹ ọ́ paka ḅarị apụ ma mịẹtẹ owu ịna ḅara sii ḅa; gbọrụ etela ḅụ ịn ḅo ọ́ da-paka ḅa, kụma ọmịna tọrọkọ sọnọma etela ḅụ ịn ḍumo-mangị kọn ḅa.

⁸KỊNỊNYANAḄỌ ḅe tọn ọmịna ọgọnọ ḅẹ boma mẹ pịrị ḅa, tẹ anị ọmịna afịaị koko ayeyọ ma ọgọnọ sịra ḅa; tẹ ama mẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ ḅio ọ́ mịẹ ḅẹ aị mamgba ḅụ ori ó boma ḅa.

⁹Ọ̀ wẹrịtẹ ye karị ḅara kẹ minini ọ́ pịrị tẹ ḅara, sime ò ḅioju pịrị fịafịatẹ gbọrụ atomi ḅara ḅụ, KỊNỊNYANAḄỌ ḅe ọ́ sịẹma kụrọma ḅa, ọ́ KỊNỊNYANAḄỌ ọmịna Tamụnọ ḅe oloko ma koko, tẹ ori etela ma ḅụ mẹnjị-mẹnjị.

¹⁰Anịsakị tomikiri ḅụ simearị tomi-kụlọkụlọ mamgba ẹrị ḅa mịnẹ KỊNỊNYANAḄỌ ḅe ẹrẹ mẹ ḅụ ini ọ́ sịnm, tẹ ó ḍiki-ḅalafaa ḅa.

¹¹KỊNỊNYANAḄỌ ḅe nwẹnị ọ́ mịẹtẹ ọ́ lọkọlọkọ tẹ lolo ḅụ sime ḅa, ọmịna oju ḅẹ mgbọlụ ḅụ na, ọmịna opu anama ma ḅẹ mgbọlụ ḅụ na, ọmịna kịrị mẹ ḅẹ sịnmgbọlụ na ḅụ ama mẹ tẹ KỊNỊNYANAḄỌ ḅe kẹ ọ́ pịrị ḅẹ tẹ ye karị ḅara kẹ minini ọmịna aḍapụ ma pịrị ama mẹ ḅio.

¹²KỊNỊNYANAḄỌ ḅe ọmịna ama mẹ ḅẹ eene mẹ kẹ anị ḅẹ sakị ḅụ ọ́ pịrị, tẹ ọmịna aḅara ḅẹ kọrịnama mamgba boma ḅụ, so ma, ori iḅi ngọ koko warị mẹ finji ọ́ pịrị ḅa; anịsakị ó ye kẹ tọnwa opu asịẹ ḅọlọ ḅa, kụma ó ye ḅọlọ ḅịa.

¹³Anịsakị KỊNỊNYANAḄỌ ḅe ọ́ kẹ sịḅịdapụ mịẹ ḅa, ọmịnị etemi ḅụ sime ḅịa; iwo ngẹrị mie ọmịnị iwo ḅarịye, ọmịnị ideri ḅịa, ọ́ nwẹnị ḅụụ ẹbị-ẹbị KỊNỊNYANAḄỌ ọmịna Tamụnọ ḅe oloko ma tẹ mịmgba à tọn ọ́ pịrị aị ma poki tẹ arị mịẹ-mịẹ,

¹⁴tẹ ọmịnị ẹkwẹn-aḅịḅị ma tẹ mịmgba à tọn ọ́ pịrị aị ma ḅụ tọrụ-pịkị ama-ḅara, anịanịa ere-ḅara da tẹ mu fịrịmẹnjị oru-atamụnọ pịrị ḅẹ kẹ arị ḍukamẹnjị-a ḅẹḅẹ.

¹⁵Kụma ọ́ KỊNỊNYANAḄỌ ọmịna Tamụnọ ḅe pọkọ poki ḅịa, anịanịa ḅụụ ẹbị-ẹbị ori oloko mamgba na, ori oloko ma tẹ kẹẹ wararị aị ma tẹ mịmgba à tọn ọ́ pịrị aị ma mịẹ ḅịa ḅẹḅẹ, anịrẹ mịna wori-anume ma ḅo ọ́ la, tẹ ọ́ gbaịn-koro ḅa.

¹⁶Woritẹ ḅara ọ́ nwẹn sime ḅa opu ama mẹ ḅio, anịsakị woritẹ ḅara ọ́ nwẹn sime ḅa piri mẹ ḅio.

¹⁷Ọmịna kana mẹ na, ọmịna fịye tẹlẹma ye mẹ na, woritẹ ḅara sime ḅa.

¹⁸Ọmịna oju ḅẹ mgbọlụ na, ọmịna kiri mẹ ḅẹ sịnmgbọlụ na, ḅo ọmịna opu anama ma ḅụụ sọ ḅarị aị na, ọmịna anana ogbo ma ḅẹ asambịrịma aị ma na, woritẹ ḅara sime ḅa.

¹⁹Ó woritẹ ḅara sime ḅa ọ́ sọ-ḅo sakị, ó woritẹ ḅara sime ḅa ọ́ paka-so sakị.

²⁰KỊNỊNYANAḄỌ ḅe wori-anume na, ḅịḅị-kẹ-ogbosọ-a na, mịẹye-mịẹye ḅara ḅẹ sọ-a na, kẹ ọ́ fịrịma ḅa ọ́ nyanatẹ mịẹ ḅarị aị mamgba ḅụ, nwenii ọmịnị ọ́ mịẹarị amịẹaị ma ḅẹ siye mẹ ḅụ fịị tẹ fọnya fa fama ḅa, gbala ọmịnị ị̀ sịkịtẹ ẹrẹsị.

²¹KỊNỊNYANAḄỌ ḅe ama gbaịn si-obi mẹ mịẹ tẹ anị ọmịnị oḅolo sime nwenii ori ama mẹ tẹ ọmụ anị ọkị nyana ḅẹ sọ-muarị ama mẹ ḅio ọmịnị ọfịn sin ḅa.

²²KỊNỊNYANAḄỌ ḅe oju ọlọ obi na, akọm na, foin obi na, fie-paka obi na, kụrọ ọfịrị na, ye yọ samụnọ sime na, kụrọ fẹrụ na, otito na kẹ ó fomu ḅa; arị ó ḍuka nwenii ọ́ fịị fa fama ḅa.

²³Ọmịna sịḅị ọgọnọ-jụ ḅụ simearị so mẹ ojo-ikulele sọ ḅa, tẹ ọmịna suku-ḅio ḅẹ kiri mẹ papaa ikulele sọ ḅa.

²⁴KỊNỊNYANAḄỌ ḅe ọmịna ama ḅẹ eene mẹ kẹ gbẹẹtẹ onwi na, fọọn na mịẹ ḅa; So-ḅio anị ideri-ideri ḅo ọmịnị ọgọnọ sara nwenii ọ́ fịị fama ḅa.

²⁵KỊNỊNYANAḄỌ ḅe ọ́ mịẹ tẹ ọmịnị na fịya-a apụ tọrọkọ ḅụ owu ọmịna ḅara si ḅa; ọ́ gbọrụ etela ḅụ paka mu ịn da-paka ḅa, tẹ sọnọma etela ḅụ ịna tọrọkọ ḍumo mangị kọn ḅa, anịsakị tomikiri mẹ ḅẹ amada-kụlọkụlọ mamgba ḅụ ọ́ sịḅị-jịrịma atomi sọ ḅa.

²⁶Anịsakị ọmịna fịtẹ oju akpakpa ma pẹị-pẹị aị sọ So-tọrụ ḅẹ afeni mamgba na, tomikiri mẹ ḅẹ piri-ḅio-ḅẹ anama ma pịrị ḅa, ịna ḅalafama tẹ ịn dee sin ḅẹ gbọrụḅọ-sọ paka ḅịa.

²⁷KỊNỊNYANAḄỌ ḅe Ijiputi ḅẹ ọpọpọlị ma na, aḅaịn sararị ḅịya ḅịya-a ịnọ ma na, ịyaya mẹ na, oju ḅẹlẹ obi mẹ na, arị aị ma tẹ ọmịnị inetẹ gwọ ḅịa obi ma kẹ ó fomu ḅa.

²⁸KỊNỊNYANAḄỌ ḅe maa tọrụ kọn na, tọrụngbọ pụụn na, ḅioḅẹngbọ pikiri na, kẹ ó fomu ḅa.

²⁹Ọ́ tọrụngbọ-pụụntẹ-apụ kanakana ḅio irima-irima ḅara kẹ eneḅaka-fịafịa-ogbo ḅụ irima-irima ḅa; anịsakị ọmịna etela ma ḅụ ọ́ lọkọlọkọ ḅịa; ini ó ponoma-ponoma tẹ sịkọpẹlẹ-a ḅara kẹ kụrọ ḅara kẹ ọ́ nyana aị ọkị ḅa, tẹ ḅarasụa ọ́ pịrị ḅẹ gbọrụḅọ-sọ paka ḅịa.

³⁰“Ọmịnị ẹrẹḅọ sime ḅẹ ọlọ ḅa — kụma jụmọ arị na gboloma ḅa; ọ́ warị nama ḅa — kụma ọmịnị anị ḅio anga ḅịa; ọ́ girepu-ḍụọ ḍiḅi ḅa — kụma ọmịnị anị ḅụ ḅẹ sịnmgbọlụ kẹ ye mịẹ ḅịa.

³¹Ọmịna tọrọkọ ini ọmịna tọrụ-ogbo ḅụ ọmịna pootẹ-nambulo ḅaa ḅa, kụma ọmịnị anị ḅụ nama ọkị pẹị ḅịa, ini ọmịna tọrọkọ ọmịna tọrụ-ogbo ḅụ kụrọ-ḅara ḅụ ọmịna yedogi-nama ọkị so ḅa, tẹ ini anị pịkịma-ḅo ọ́ pịrị ḅịa, ini ọmịna anana kẹ ọmịnị na fịya-a apụ pịrị ḅa, tẹ ḅarasụa ọ́ pịrị ḅẹ gbọrụḅọ-sọ paka ḅịa.

³²Ini ọmịna owiapụ-awọmẹ na, ọmịna eremịna-awọmẹ na kẹ ja atomi pịrị ḅa ó Bio-bioma ịn ḍikiarị ogbo, anị ọmịna ḅara-ḅio sime kụrọ kẹ ọmịnị anị dasịẹma ḅẹ ḅara sọ paka ḅịa, tẹ bebe ene mẹmgba kẹ ịn nyana ḅẹ koru, tẹ gbarị ḅa.

³³Opu sịẹ tẹ amụ ó nimi sọ nimi-a apụ ọmịna kiri mẹ na, ọ́ kọrị kọrịnama mamgba ḅẹ mgbọlụ ma fị siin fama ḅa, tẹ ó ponoma-ponoma tẹ sịkọpẹlẹ-a ḅara kẹ ọ́ gbẹẹ kọsịma ngẹrị mie ịn mịẹ ḅarịye,

³⁴anieḅụ, aniemẹ tẹ ọmịna atọrụngbọ ẹrị ḅarịye ḅụ ọ́ maa tọrụ kọn ḅa.

³⁵KỊNỊNYANAḄỌ ḅe ọmịna aḅụọ-kụkụ na, ọmịna aḅụọ-suku na ḅụ fụka dein-a ọpọpọlị tẹ ọmịnị inetẹ gwọọ ḅịa aị kẹ ó fomu ḅa, ọmịna ḅụọ-kuḅu ḅụ ọkị mu ọmịna sịḅị-ogbo la.

³⁶“KỊNỊNYANAḄỌ ḅe ọmịnị na, ọmịna amadaḅọ tẹ ọ́ kẹ ọmịna sịḅị-dama ḅọ na ọkị-ḅo gbọrụ opu sịẹ tẹ ọmịnị, anịanịa ọmịna aḍapụ sọ amụ nimi-a sịẹ pịrị ḅa; tẹ anịjụ ọ́ fịrịmẹnjị ịn sịn na, ḍụḅarị na kẹ mịẹ ja oru-atamụnọ pịrị ḅa.

³⁷Anịsakị KỊNỊNYANAḄỌ ḅe etela kẹ ó ḍie sọ mu ḅarị anga ḅụ ó ḅo tọrụsiẹrị apụ na, kẹ egberi gbaa ḅẹrẹ ḍuko apụ na, gbaịma ẹkwẹn kọn pịrị apụ na, sọ ḅa tomi-kụlọkụlọ mamgba ogboku ḅụ.

³⁸“Ó gburo-gburoma sịnmgbọlị dogi piri mẹ ḅio sọ-mu ḅa, kụma ịrụtẹ kalịye mie ó kobiri ḅo suu ḅarịye; kẹ gotẹ ọkọ ḅẹẹarị, igurube anị fị fama ḅa.

³⁹Ọ́ girepu-aḍụọ ḍiḅi tẹ arị mịẹ tẹlẹma ḅa, kụma ọmịnị arịḅẹ iru ḅuu ḅịa, pịkị arịḅẹ asịnmgbọlụ kobiri ḅịa; kẹ gotẹ ọkọ ḅẹẹarị, nkpurukpu arị fị fama ḅa.

⁴⁰Ọmịna ye-yọ mẹmgba ikelema-koro ḅụ ọmịnị olivu asịn nyana ḅa, kụma ọmịnị arị ḅụ pulo ọkị kẹ ọmịna oju lama ḅịa, kẹ gotẹ ọkọ ḅẹẹarị, ọmịna olivu asịnmgbọlụ ma sịra fa fama ḅa.

⁴¹Ọmịnị owiapụ-awọmẹ na, eremịna-awọmẹ na iyi ḅa, kụma ịn sime ọ́ pịrị ḅịa; kẹ gotẹ ọkọ ḅẹẹarị, ịn mu kun-ḅara ḅio sọ ḅa.

⁴²Ọmịna opu asịn mamgba na, ọmịna ḍụọ ḅẹ asịnmgbọlụ ma na, igurube arị pẹị kọsịma fama ḅa.

⁴³“Jen sịẹ ḅẹ igoniḅọ tẹ ọmịna ogbo-ḅio sime ḅọ kpọlị iwo gele tọrọkọ-tọrọkọ mu ọ́ nẹngị ḅa, kụma ọmịnị ideri suku-suku-suku pịrị ḅa.

⁴⁴In ye kẹ ọ́ ḅọlọ ḅa, kụma ọmịnị ye kẹ ịn ḅọlọ ḅịa; ịn sịḅịdaḅọ sọ ḅa, ọmịnị etemi ḅụ sime ḅa.

⁴⁵“Mịna wori-anume mamgba ḅo ọmịnị ọgọnọ gbana ḅa, tẹ ó ḍuka tẹ ọ́ gbaịn nwenii ọ́ fịị fama ḅa, gbala ọ́ KỊNỊNYANAḄỌ ọmịna Tamụnọ ḅe pọkọ poki ḅụ ori oloko ma na, kẹẹ wararị oloko ma tẹ ọ̀ tọn ọ́ pịrị aị ma koko-a ẹrẹsị.

⁴⁶Arị ọmịnị ọgọnọ na, ọmịna aḅụụ paka-ḅo aị na ḅụ elekima na, ḅụụ-buamaye na sọ gbamaso ḅa.

⁴⁷Gbala ọ́ tọnwa ḅara kẹ ye mamgba nyana ye ẹrẹsị ó ḍereku na, ḅioḅẹngbọ ḅẹ ḅioḅẹlẹ na ḅụ fịrịmẹnjị kẹ KỊNỊNYANAḄỌ ọmịna Tamụnọ ḅe pịrị-a.

⁴⁸Anịẹrẹsị ọ́ fịrịmẹnjị ọmịnị na fịya-a apụ tẹ KỊNỊNYANAḄỌ ḅe fịrịma tẹ ọ́ da-paka ḅẹ apụ ma pịrị ḅa, ḅuru pọkọ tarị na, minji ḅụụ pọkọ tarị na, paụ na, ye mamgba gbọrụ ye so nyana-a na ḅụ; anịsakị ori ikulele pọkọsụaye kẹ ọmịna kọngọ sụa nwenii ori ọ́ ḅaa fama ḅa.

⁴⁹Ala-jụ tomikiri mẹ ḅẹ kunoma ḅụ mie KỊNỊNYANAḄỌ ḅe gbọrụ opu sịẹ ọkị-ḅo ọ́ da-paka ḅarịye, igo fiin ḅara fiin-arị opu sịẹ, ọmịnị ịn fiearị ama-ḅịḅị fiearị ye naa-a ḅẹ gbọrụ opu sịẹ.

⁵⁰Tọrụ-saka kpọma ye mịẹ ḅarị gbọrụ opu sịẹ, opu sịẹ tẹ omongiḅọ ḅe kẹ ye-sịn ḅịa, anịanịa ḍiki-ḅụụjịrị nyana awọmẹ pịrị ḅịa opu sịẹ,

⁵¹tẹ ọmịna opu anama ma iyi aị ma pẹị, tẹ ọmịna kiri mẹ ḅẹ sịnmgbọlụ mẹ na fị nwenii ọ́ fịị fama ḅa; inima tẹ ọmịna sịnmgbọlụ-o, iru-o, anịanịa pulo-o, ḅo ọmịna opu anama ḅụ sọ aị-o, anịanịa ọmịna anana ogbo ḅẹ asambịrịma aị sọ wẹrịso ọ́ pịrị ḅịa nwenii ini ọ́ mịẹtẹ ọ́ fịị fa fama ḅarị apụ ma.

⁵²Ọmịna ama mamgba ḅụ ini ọmịnị ikelema-koro tẹ owu kẹ ọ́ paka ḅa, nwenii ọmịnị ọmụ gotẹ mịẹ kụrọma geletẹ onu ma tẹ ó ḅioḅẹngbọ kẹ gbana aị ma ịn nwẹn kan sara fama ḅa ọmịna ama mamgba ikelema-koro ḅụ; tẹ ọmịna ama mamgba tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ ama mamgba ḅụ ini ọmịnị ikelema-koro tẹ owu kẹ ọ́ paka ḅa.

⁵³“Anịsakị ọmịnị ḅarana ọmịna soku-ḅẹ oju ḅụ iyi owiapụ-awọmẹ na, eremịna-awọmẹ na, tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ apụ ma meni pẹị ḅa, ini ọmịnị ikelema-koro tẹ owu kẹ ọ́ paka mẹ ḅụ na, ḅụụ-ḅalaḅala tẹ ọmịnị na fịya-a apụ kẹ ọ́ ḅalaḅalama ḅarịye na ḅụ.

⁵⁴Ọmịna ogbo-ḅio owiḅọ ḅe tẹ in ḍẹkị tẹịn tẹ tịrẹ ḅara kẹ ḍikiḍiki ḅọ ḅe fịye gotẹ mbụrụmbụrụ ori iyimbere na, ò ḅio nimi taḅọ ma na, ori awọmẹ ma ḅẹ kunoma ḅọ ḅe tẹ kirikọn ọ̀ pịrị ḅọ ḅe na, pịrị ḅa,

⁵⁵mịẹtẹ ori ori awọmẹ ma ḅẹ mẹnị mẹ tẹ ọ̀ pẹịarị ye mẹ ḅụ nama kẹ ịna aḅụụ ḅẹḅọ-ḅẹḅọ sọ pịrị ḅịa ḅara, gbala ọmịnị ikelema-koro tẹ owu paka mẹ na, ḅụụ-ḅalaḅala mẹ na tẹ ọmịnị na fịya-a apụ kẹ ọmịna ama mamgba ḅio ọ́ ḅalaḅalama ḅarịye ḅụ gberie-sọ kirikọn ọ́ pịrị ḅịa ẹrẹsị.

⁵⁶Ọmịna ogbo-ḅio ịn ḍẹkị tẹịn tẹ tịrẹ ḅara kẹ ḍikiḍiki ẹrẹḅọ ma, tẹ ḅụụ kuroye la-a tẹ tịrẹarị ẹrẹsị ḅụọ-kuḅu kẹ kiri lama ḅara ḅii ḅịa ẹrẹḅọ ma mbụrụmbụrụ á ḅio nimi diḅọ ḅe na, árị iyi owiḅọtụḅọ ḅe na, arị iyi ẹrẹḅọtụḅọ ma na pịrị ḅa,

⁵⁷gbala á ḅọị ḅara kẹ á maa aḅụọ ogboku paka-ḅo furo ḅio tụḅọ-dogi-iyingi mẹ na awọmẹ tẹ arị iyi ịwọ awọmẹ ma na pẹị ḅẹ ḅara ḍọkị ḅa, gbala ama ikelema-koro tẹ owu pakarị ọmụapụ ma na, ḅụụ-ḅalaḅala mẹ na tẹ ọmịnị na fịya-a apụ kẹ ọmịna ama ma ḅio ọ́ ḅalaḅalamarị ye ḅụ ye mamgba gberie-sọ nyana-a gotẹ.

⁵⁸“Ọ́ ḅụụ ẹbị-ẹbị tẹ mị oloko mẹ ḅẹ ẹkwẹn-aḅịḅị mamgba tẹ mị ḍiri mẹ ḅio kẹẹ wararị aị ma, mịẹtẹ ọmịnị inetẹ mị ebube nyana tẹ ḅalafama ẹrẹ mẹ anie KỊNỊNYANAḄỌ ọmịna Tamụnọ ḅe ẹrẹ mẹ mangịma ḅarị ḅara mịẹ-a ḅẹḅẹ,

⁵⁹anịrẹ KỊNỊNYANAḄỌ ḅe kịrị ḅụụ-fụka na, kụrọ ḅụratẹ kpekele pẹlẹ-pẹlẹ-a ḅụụ-fụka na, kpekele gwọ-gwọ-a kịnị kururuma tọnwa obi na ọkị-ḅo ọmịnị na, ọmịna awọmẹ na ọgọnọ gbana ḅa.

⁶⁰Ọ̀ pịkị Ijiputi ḅẹ obi mamgba tẹ ó ḍiki-ḅalafa sime aị ma ọkị-ḅo ọmịna ọgọnọ gbana ḅa; tẹ arị ọmịnị oḅolo sime ḅa.

⁶¹Obi goyegoye sọ, na ḅụụ-fụka goyegoye tẹ mị oloko mẹ ḅẹ ḍiri mẹ ḅio kẹẹ wararị aị ma na, KỊNỊNYANAḄỌ ḅe ọkị-ḅo ọmịnị ọgọnọ gbana ḅa, nwenii ọ́ fịị fama ḅa.

⁶²Ó tomina-ogbo ḅụ So-tọrụ ḅẹ alolia ma ḅin ḅara ḅin sime sọ, kịẹn-ḅịḅị ḅụ ọmịna ḅụụ boowa apụ mie kirikọn ḅarịye; gbala ọ́ KỊNỊNYANAḄỌ ọmịna Tamụnọ ḅe pọkọ poki-a ẹrẹsị.

⁶³Anịsakị iḅi kẹ ọ́ mịẹ na, ọ́ mịẹ tẹ ọ́ kama na ḅụ KỊNỊNYANAḄỌ ḅe tọrụ-ḅẹlẹ nyana ḅara, mie KỊNỊNYANAḄỌ ḅe ọ́ ḅịkị-koro na, fịị-fama na ọkị-ḅo ọmịnị ọgọnọ gbana ḅụ tọrụ-ḅẹlẹ nyana ḅarị ḅara ọ́ sọ tẹ anị ọkị nyana ḅẹ muarị ama mẹ ḅio.

⁶⁴“Anịsakị KỊNỊNYANAḄỌ ḅe ọ́ gala-galama ḅa tomi-kụlọkụlọ mamgba ogbo-ḅio tomikiri mẹ ḅụ gbọrụ kunoma ḅụ ọkị mu osi kunoma la; tẹ anịjụ ḅụ ọ́ fịrịmẹnjị sịn na ḍụḅarị na kẹ tẹmẹ ja oru-atamụnọ ma pịrị ḅa, arị aị ma tẹ ọmịnị, anịanịa ọmịna aḍapụ sọ nimi-a aị ma.

⁶⁵Mịna opu asịẹ ma ogbo-ḅio ḅụ ọ́ gbọrụ ḅụụ-dein sọ ḍọkị-ẹrị ḅịa, ọmịna ḅụọ-kuḅu mẹ ịnyọsara nyana ḅịa; kụma KỊNỊNYANAḄỌ ḅe pịkị anịjụ ḅioḅẹngbọ dein-a na, ḅiotọnye paka-a na, tẹmẹ-lokoloko na kẹ ọ́ pịrị ḅa;

⁶⁶ọmịna tọrọkọ ḅụ ọmịna ḍumo ḅio-maaịn-tọn ọgọnọ sololo sime ḅa, ḍin na, eneḅaka na ḅụ ọmịnị opu ḅalafa ḅụ sime ḅa, tẹ ọmịna ḍumo ḅụ ḅiokpọ nyana ḅịa.

⁶⁷Dede-ḅio ḅụ ọ́ ḅẹẹ ḅa, ‘Mimgbe anị paa ḅoḅiri-so namịna!’ anịsakị ḅoḅiri-so ḅụ ọ́ ḅẹẹ ḅa, ‘Mimgbe anị paa dede-ḅio namịna!’ Opu ḅalafa mẹ tẹ ọmịna ḅioḅẹngbọ ḅụ ọ́ nyana ḅarịye mẹ na, ye-yọ tẹ ọmịna atọrụngbọ ẹrị ḅarị anga ma na ẹrẹsị.

⁶⁸Anịsakị KỊNỊNYANAḄỌ ḅe pịkị ọ́ kẹ pịkị Ijiputi ḅo ḅa tọnwa opu onwi-arụ ḅio ḅụ, igoni tẹ à mininim mịnẹ ọ́ gbala-gbala ḅarị sin mu ḅịa anga mẹ; tẹ anịjụ ḅụ ọmịnị ọmịna aḅụụ kẹ ọmịnị na fịya-a apụ ma dẹrị ḅẹ ḍọkị ḅa owiapụ na, ereme na omoni ḅara ḅụ ini ọ́ fẹẹ, kụma gbọrụ tomḅọ sọ ọ́ fẹẹ ḍụkụ ḅịa.”