Read kalabari Ditẹrọnọmị 29 Bible Online

Ditẹrọnọmị 29 - kalabari bible

Ditẹrọnọmị 29

¹Mịna aị ma anie ọḅọkụ mẹ ḅẹ ẹkwẹn-aḅịḅị ma tẹ KỊNỊNYANAḄỌ ḅe tọn Mozizi pịrịm, Izirẹlịapụ ma na fị nwẹn ḅẹẹ ye mẹ Mohabụ ḅẹ ama mẹ ḅio, ọḅọkụ mẹ tẹ Orẹbụ ḅụ ori inina fị ye mẹ sikima.

²Mozizi Izirẹlị mẹmgba sịn kobiri tẹ ịn ḅẹẹm: Ọmịna tọrọkọ ọ́ tọrụngbọ kẹ KỊNỊNYANAḄỌ ḅe Ijiputi ama mẹ ḅio kẹ Fero na, ori afịrịmẹnjịapụ mamgba na ori ama mamgba na mịẹ aị ma ẹrị tẹ,

³gburo-gburotẹ adaa-ḍiki ma tẹ ọmịna atọrụngbọ ẹrị aị ma, elekima ma na, arị gburo-gburotẹ ḅụụ-gbiripuma-aị ma na;

⁴kụma ọkị-ḅo mịmgba la, KỊNỊNYANAḄỌ ḅe amụ yefieye naa ḅẹ gbọrụ ḅioḅẹngbọ, anịanịa kẹ ye ẹrị ḅẹ atọrụngbọ, anịanịa kẹ ye naa ḅẹ aḅeri kẹ ọ́ pịrị-a.

⁵Kụra amesi à nwẹn kẹ etela kẹ ọ́ ḍie tẹ ịkpa mẹ ḅio; ọmịna akapa amụ ọmịna oju ḅụ kaan-a, anịanịa ọmịna okuro ọmịna aḅụọ ḅụ kaan;

⁶ọmịnị ḅarana ọmịna fịye nyana tẹ fị-a, anịanịa iru, anịanịa kụrọtẹ iru nyana tẹ ḅuu; mịẹtẹ ó nimi ḅẹ ḅara mịnẹ yẹrị anie KỊNỊNYANAḄỌ ọmịna Tamụnọ ḅe.

⁷Anịsakị ọ́ ḅo mị yọ mẹ la tẹso, Siyọnị, Ẹsịbọnị ḅẹ amadaḅọ ḅe na, Ogu, Basani ḅẹ amadaḅọ ḅe na, owu kẹ wa paka ḅẹ paka-ḅom, kụma wa ịn nẹngịmam,

⁸tẹ ịna ama ọkịm, tẹ anị kẹ sime-anga mịẹ Rubẹnị furo-ḅẹ-apụ na, Gadi furo-ḅẹ-apụ na, Manasẹ furo-ḅẹ-apụ kẹ maa anga ḍiya ḅẹ gbọrụ anga mẹ na pịrịm.

⁹Anịẹrẹsị ọ́ mị ọḅọkụ mẹ ḅẹ ẹkwẹn-aḅịḅị ma mịẹ ḅẹ ḅara kẹ ḅụụ ẹbị-ẹbị, mịẹtẹ ọmịnị inetẹ ọ́ mịẹ ḅẹ aị mamgba ḅụ lolo ḅẹ ḅara.

¹⁰Ọmịna afuro ma ḅẹ sịḅịdapụ ma-o, ọmịna omongiapụ ma-o, ọmịna opu fịrịmẹnjịapụ ma-o, Izirẹlị ḅẹ owiapụ mamgba mịmgba ọ́ KỊNỊNYANAḄỌ ọmịna Tamụnọ ḅe tọrọkọ sịẹsime wararị,

¹¹ọmịna ḍọkọḍọkọ-awọmẹ na, ọmịna sime ereme na, jen sịẹ ḅẹ igoniḅọ ḅe tẹ ọmịna kobiri-ogbo mẹ ḅio simearị ḅọ ḅe na, oriḅe tẹ ọmịna fịnị pẹlẹ ḅọ ḅe na, ọmịna minji ḍuu ḅọ ḅe na sọ emi,

¹²mịẹtẹ ọ́ KỊNỊNYANAḄỌ ọmịna Tamụnọ ḅe na ọḅọkụ mẹ tẹ KỊNỊNYANAḄỌ ọmịna Tamụnọ ḅe ye karị ḅara kẹ mịmgba ọmịnị na fị ḅarị ọḅọkụ mẹ fị ḅarị ḅara,

¹³mịẹtẹ mịmgba ḅụ ori ori atomi ḅara kẹ ọ́ sịẹma kụrọma tẹ anie ḅụ ori ọmịna Tamụnọ sọ ḅarị ḅara, ọ̀ wẹrịtẹ kẹ ọ́ karịma ḅara na, ọ̀ kẹ wẹrịtẹ ye karị ḅara kẹ minini ọmịna aḍapụ Ebira-amụ na, Ayịzịkị na, Jekọbụ na, pịrị ḅara ḅụ.

¹⁴Àrị ọmịnị ngẹrị na mị ye karị ọḅọkụ mẹ fị-a, ọmịnị tẹ mịmgba ḅụ wamịnị na KỊNỊNYANAḄỌ wamịna Tamụnọ ḅe tọrọkọ sịẹsime wararị apụ,

¹⁵kụma inima tẹ mịmgba mẹ ḅụ wamịnị na mịanga ofori apụ sọ.

¹⁶Ijiputi ḅẹ ama mẹ ḅio wa anga sime-ḅara na, wa wẹrịtẹ opu asịẹ ma tẹ ọ́ ḅọrọ aị ma ogbo-ḅio tolu-ḅọrọ ḅara ó nimim;

¹⁷tẹ ọmịnị ịn sịn na, ḍụḅarị na kẹ kara, seleḅa na, golu na kẹ tẹmẹ wararị akpokobịa, ḍiki-ḅioḅu na-iḅi aị ma tẹ ịna ogboku sime aị ma ẹrị tẹ.

¹⁸Ọmịnị ọmịna aḅụụ ẹbị anieofori ọmịna ogbo-ḅio gbọrụ owiḅọ, anịanịa ẹrẹḅọ, anịanịa gbọrụ ere-furo, anịanịa furo tẹ amịna ḅioḅẹngbọ mịmgba KỊNỊNYANAḄỌ wamịna Tamụnọ ḅe ḅụụ vuunma pịkị-so tẹ mu fịrịmẹnjị arị opu asịẹ ma ḅẹ oru-atamụnọ ma pịrị ḅẹ ḅọ ḅofa paka-ḅo; anieofori ọmịna ogbo-ḅio kịnị-ḅaaḅa akụarị sịnmgbọlị sụa gbọrụ sịn-kuno ḅofa paka.

¹⁹Gbọrụḅọ-sọ ye karị ḅara kẹ fị ọḅọkụ mẹ ḅẹ ẹkwẹn-aḅịḅị ma naa tẹ ḅioḅẹngbọ ḅụ amịna ḅụụ boma tẹ ḅẹẹ ma: Ị̀ la ḅẹ ye ofori, àrị ị̀ kụrọtẹ ḅioḅẹngbọ ḅụ mẹnjị sọ! Miemẹ anị fomu-ḅara na gulugulu na dogi-ḅo tomi mamgba pịrị ḅa — iḅi-apụ na si-apụ na.

²⁰KỊNỊNYANAḄỌ ḅe ò si-wẹrịso ọ̀ pịrị ḅịa, anie nakara KỊNỊNYANAḄỌ ḅe ịganị na, ori afana na ḅụ fomu-ḅara kẹ anị owiḅọ ḅe da-paka ḅa, tẹ mị ḍiri mẹ ḅio kẹẹ wararị wori-anume ma ori ọgọnọ gbana sime ḅa, tẹ KỊNỊNYANAḄỌ ḅe so mẹ suku-ḅio ḅụ ori ẹrẹ sịkịrị sin ḅa.

²¹Anịsakị mị ḍiri mẹ ḅẹ oloko mẹ ḅio ḅẹ ọḅọkụ mẹ ḅẹ wori-anume mamgba wẹrịtẹ kẹẹ ḅara ḅụ, KỊNỊNYANAḄỌ ḅe Izirẹlị ḅẹ afuro mamgba ḅụ ḅụụ-fụka gotẹ ori ngẹrị sẹlẹ pakama ḅa.

²²Ḅo ḅarị ḅụọ mẹ ḅẹ apụ ḅụ ọmịna awọmẹ tẹ ọ́ ḅọrọ tẹso, saakị ḅarị apụ na, jen sịẹ ḅẹ igoniḅọ ḅe tẹ ala-jụ ḅẹ ama ḅụ sime tẹ ḅo ḅọ ḅe na, anị ama mẹ ḅẹ ḅụụ-fụka ma na, obi ma na tẹ KỊNỊNYANAḄỌ ḅe kẹ anị pịrị tẹ ḅụụ-fụka ma na obi ma na ẹrị ḅa.

²³Bebe ama mẹmgba sọlụfọ nwẹn sịn ye-dọkịmaye na fụn na anị gbaịn ḅa; anị ḅụ ḍiḅi gberie sọ so-paka ḅịa, osuka sọ inetẹ so-paka ḅịa anga. Bebe ama mẹ Sọdọmụ na Gomora na Adima na Zeboyimu na, tẹ KỊNỊNYANAḄỌ ḅe ò ye ḅụụ-ḅẹsọ na, ịganị ḅụ na fama opu ama ma fa tẹ sime-ḅara sime ḅa.

²⁴Karakara-ḅara-ḅụ opu asịẹ mamgba ḅẹẹ ḅa: Tiegotẹ KỊNỊNYANAḄỌ ḅe mị-ḅara mẹ kẹ mị ama mẹ mịẹ? Mị gburo-gburotẹ ye ḅụụ-ḅẹsọ mẹ tiye fie?

²⁵Anịtẹso ọkụma tomi nwẹnị ḅẹẹ ḅa: Anị gotẹ ọkọ mịẹ ye, ịn KỊNỊNYANAḄỌ ịna aḍapụ ma Tamụnọ ḅe ọḅọkụ mẹ tẹ ori Ijiputi ḅẹ ama mẹ ḅio ini ọkị-ḅo sakị mẹ ḅụ ini na fị ye mẹ sịkịm,

²⁶tẹ mu fịrịmẹnjị oru-atamụnọ pịrị, tẹ sunsin ịn pịrịm, oru-atamụnọ tẹ amụ ịn nimi-a aị; arị aị ma tẹ amụ ọ̀ tọn ịn pịrị-a aị ma.

²⁷Anịẹrẹsị KỊNỊNYANAḄỌ ḅe ịganị mẹ kẹngẹma mị ama mẹ ọgọnọ saram, tẹ mị ḍiri mẹ ḅio kẹẹ wararị wori-anume mamgba ọkị-ḅo anị ọgọnọ gbanam;

²⁸tẹ KỊNỊNYANAḄỌ ḅe ye ḅụụ-ḅẹsọ na, ḅụụ-sịnịsịnị na, gburo-gburotẹ ịganị na ḅụ ịna ama mẹ ḅụ ịn soku siinm, tẹ ịn kẹ jen ama ḅio gbin koromam, anị mịmgba simearị ḅara.

²⁹Ḅọị wararị aị ma sime KỊNỊNYANAḄỌ wamịna Tamụnọ ḅe pịrịm, kụma arị aị ma tẹ mịẹfinji tẹ aị ma sime wamịnị na wamịna awọmẹ na pịrị gbamasom, mịẹtẹ wa mị oloko mẹ ḅẹ ẹkwẹn-aḅịḅị mamgba mịẹ ḅẹ ḅara.