Read kalabari Ditẹrọnọmị 3 Bible Online

Ditẹrọnọmị 3 - kalabari bible

Ditẹrọnọmị 3

¹Anịtẹso wa nwẹnị vuunma pịkị tẹ Basani mu etela mẹ da-mu; tẹ Ogu Basani ḅẹ amadaḅọ ḅe nwẹnị Ẹdẹrẹyi ḅụ owu kẹ wa paka ḅẹ ḅo, ori na ori na ori atomi mamgba na.

²Kụma KỊNỊNYANAḄỌ ḅe nwẹnị ị̀ ḅẹẹ: Ò ḍiki-ḅalafa ma, kẹ gotẹ ọkọ ḅẹẹarị, arị ori na, ori atomi mamgba na, ori ama na kẹ ị́ ḅara-ḅio ḅụ ị́ pịrị tẹ; anịsakị ị́ kẹ Siyọnị, Amọrayịtị apụ ma amadaḅọ ḅe tẹ Ẹsịbọnị ḅụ sime ḅọ ḅe mịẹ ḅara kẹ ị́ ọ̀ mịẹ ḅa.

³Anieḅụ KỊNỊNYANAḄỌ wamịna Tamụnọ ḅe Ogu, Basani ḅẹ amadaḅọ ḅe na, ori atomi mamgba na sọ kẹ wamịna ḅara-ḅio ḅụ wa pịrịm; tẹ wa ọ̀ ḅaam, nwenii ḍumo tẹ kirikọn ọ̀ pịrị gbọrụḅọ-sọ ofori.

⁴Anị sakị mẹ ḅụ ori opu ama mamgba wa ọkị famam, gbọrụ opu ama tẹ wa ịna ḅara ḅụ ọkị-a ye ofori opu ama tesi, bebe Agọbụ ye-yọ mẹ, Basani ḅụ Ogu ama-da mẹ.

⁵Mịna opu ama mamgba anie ịn gele-geletẹ onu na, ogigo-aḅọkọ na, ẹngbẹsẹ na kẹ ọmụ gotẹ mịẹ kụrọma wararị aị, onu gbori-a tọnwa akala-ama sikima.

⁶Wa ịkatakirikọn-a-ḅara kẹ ịn ḅaam, wa kẹ wẹrịtẹ Siyọnị, Ẹsịbọnị ḅẹ amadaḅọ ḅe mịẹ ḅara, opu ama goyegoye ḅụ owiapụ na, ereme na, awọmẹ na ḅaa ḅụ.

⁷Kụma opu anama mamgba na, ọmụ mẹ ḅio wa ọkị opu ama ma na anie wa ḍie ọkị ḅẹ ḅara kẹ ọkị aị.

⁸Anị ḅara mie wa kẹ anị sakị mẹ ḅụ Amọrayịtị apụ ma maa amadapụ ma tẹ Jodanị mẹ ọgọnọ-jụ ḅụ sime apụ ma ḅara Anọnị ḅẹ Tụndụ Ogboku mẹ ḅụ ọkị mu Ẹmọnị Tụndụ mẹ la ọkị ḅara.

⁹(Sayịdọnị ḅẹ apụ ma kẹ Ẹmọnị mẹ sịn ẹrẹ Siriyọnị, anịsakị Amọrayịtị apụ ma anị sịn-arị Sẹnaya).

¹⁰Wa lẹsẹrẹtẹ tụndụ ọgọnọ mẹ ḅẹ opu ama mamgba na, Gilẹdị mẹmgba na, Basani mẹmgba na, ọkị mu salika na, Ẹdẹrẹyi na jụjụ-ḅio la ọkịm Basani ḅụ Ogu ama-da opu ama ma.

¹¹Ogu, Basani ḅẹ amadaḅọ ḅe ngẹrị mie ịn kẹ Rẹfayimu sịn ḍụḅa tomi nẹngị-nẹngịtẹ apụ ma ḅụ kirikọn ḅọ. Ò monoye anie ikulele monoye; Amọnị ḅẹ apụ ma opu ama Raba ḅụ anị ofori? Anị ḅẹ nangwọ anie oyi tẹra ḅụọ-kuḅu finji na pakịrị na (4 m); anị ḅẹ finjima anie sonioa aḅụọ-kuḅu (2 m).

¹²Wa anị sakị mẹ ḅụ mị ama mẹ ọkị nyana tẹso, à ye-yọ mẹ tẹ Arowa ḅụ saakị ye mẹ, aniemẹ tẹ Anọnị ḅẹ Tụndụ Ogboku mẹ ḅẹ agara ḅụ simearị ye mẹ na, Gilẹdị tụndụ ọgọnọ ḅẹ opu sịẹ mẹ kẹ maa anga ḍiya ḅẹ gbọrụ pakịrị na, anị ḅẹ opu ama ma na kẹ Rubẹnị furo-ḅẹ-apụ ma na, Gadi furo-ḅẹ-apụ ma na pịrịm.

¹³Gilẹdị ḅụ kirikọn anga mẹ na, Basani, Ogu ama-da anga mamgba, anie Agọbụ ye-yọ mẹmgba à kẹ Manasẹ furo mẹ kẹ maa anga ḍiya ḅẹ gbọrụ anga pịrịm. (Anị bebe Basani mẹ ini anị sịnm Rẹfayimu.

¹⁴Jayẹ, Manasẹ furo-ḅẹ-ḅọ Agọbụ ye-yọ mẹmgba, anie Basani ḅụ ọkị mu Gẹsọ furo-ḅẹ-apụ ma na, Mahaka furo-ḅẹ-apụ ma na agara la ọkịm, tẹ ò soku-ḅẹ ẹrẹ Avọtị Jayẹ kẹ kala-ama ma kurom, anị wẹrịtẹ sime ḅo mịmgba la ḅara.)

¹⁵À Gilẹdị kẹ Mahaka pịrịm.

¹⁶Anịsakị à Gilẹdị ḅụ ọkị mu Anọnị mẹ ḅẹ Tụndụ Ogboku mẹ jụjụ-ḅio la ye-yọ mẹ kẹ Rubẹnị furo-ḅẹ-apụ ma na, Gadi furo-ḅẹ-apụ ma na pịrịm, tụndụ ogboku mẹ ḅụ ọkị mu Jabọkụ Tọrụ mẹ saḅa jụjụ-ḅio Amọnị furo-ḅẹ-apụ ma oke mẹ la kẹ oke mịẹ ḅara ḅụ.

¹⁷Ịkpa ḅio ḅẹ Ele mẹ na, Jodanị mẹ na sọ kẹ sụa oke mịẹ ḅụ, Kịnẹrẹtị ḅụ ọkị mu Ịkpa ḅio ḅẹ Ele mẹ ḅẹ opu tọrụ Fụn Tọrụ mẹ jụjụ-ḅio la, pịkị ịrụa-saakịarị-anga ḅụ Pisiga Tụndụ mẹ ḅẹ tuma kiri mẹ suku-ḅio la.

¹⁸Anịsakị mẹ ḅụ à tọn ịn pịrị tẹ ḅẹẹm: KỊNỊNYANAḄỌ wamịna Tamụnọ ḅe mị ama mẹ kẹ ó pịrị tẹ ọmịnị anị nyana-a; ọmịna owu-akọnịapụ mamgba owu aị kẹ ḅụụ-tẹlẹma tẹ ọmịna amịnapụ Izirẹlịapụ ma tọrọkọ tarị saḅa-ḅọrọ ḅa.

¹⁹Kụma ọmịna ereme na, ọmịna ḍọkọḍọkọ-awọmẹ na, ọmịna opu anama na (à nimi wararị mịnẹ ọ́ tọnwa opu anama nyana wararị) arị opu ama ma tẹ à kẹ ọ́ pịrị ama ma ḅio sime ḅa;

²⁰nwenii KỊNỊNYANAḄỌ ḅe kẹ ọ́ pịrị ḅara ḅụ ịnyọsara kẹ ọmịna amịnapụ pịrị ḅa, tẹ Jodanị mẹ ọgọnọ-jụ ḅụ ini sọ ama mẹ tẹ KỊNỊNYANAḄỌ ọmịna Tamụnọ ḅe kẹ ịn pịrị ama mẹ ḅio sime ḅa; anịtẹrẹmẹ mie owiḅọ goḅọ-goḅọ pịkịma ḅọ nyana ye tẹ à kẹ ọ̀ pịrị ye ḍọkụma-mu ḅarịye.

²¹Anịsakị àrị anị sakị mẹ ḅụ tọn Jọsụwa pịrịm, “Ị́ atọrụngbọ KỊNỊNYANAḄỌ ị́ Tamụnọ ḅe kẹ mịna maa amadapụ ma mie aị mamgba ẹrị tẹ; anị ḅara mie KỊNỊNYANAḄỌ ị́ Tamụnọ ḅe kẹ ama-da kiri tẹ ị́ sọ-mu tolu ḅẹ amakiri mamgba mịẹ ḅarị ḅara.

²²In ḍiki-ḅalafa ma, kẹ gotẹ ọkọ ḅẹẹarị, owu mẹ sọ ị́ pịrịarị ḅọ anie KỊNỊNYANAḄỌ ị́ Tamụnọ ḅee.”

²³Anị sakị mẹ ḅụ à KỊNỊNYANAḄỌ ḅe tẹkẹm, tẹ ḅẹẹm:

²⁴Yei KỊNỊNYANA-TAMỤNỌ, ị́ ḍụḅa mẹ na, í opu ḅara mẹ na mie ị́ paa kẹ saakị ị́ fịrịmẹnjịḅọ ḍie tẹ ye, kẹ gotẹ ọkọ ḅẹẹarị, tọ oru-tamụnọ So-ḅio anịanịa kiri ḅio emi tẹ inetẹ ị́ akọrịnama ma na, ị́ mịẹ opu aị ma na mịẹ ḅẹ?

²⁵Yee à saḅa-ḅọrọ tẹ Jodanị mẹ ọgọnọ-jụ ḅụ simearị iḅi ama mẹ, anị tụndụ ọgọnọ ḅẹ iḅi opu sịẹ mẹ na, Lẹbanọnị na ẹrị, arị ị́ tẹkẹm.

²⁶Kụma KỊNỊNYANAḄỌ ḅe ó gotẹ ịganị nyana ị̀ pịrịm, tẹ ì poki-a; tẹ KỊNỊNYANAḄỌ ḅe nwẹnị ị̀ ḅẹẹ: Yee anị ị́ na iḅiye sọ; ḅarị jen maaịn kẹ mị ḅẹrẹ mẹ ḅẹ ye ẹkwẹn ị̀ pịrị ma.

²⁷Pisiga Tụndụ mẹ kpọlị iwo mu sịḅị mẹ la, tẹ tọrụ saakị ịrụa-ideriarị-anga na, ọgọnọ-jụ pakịrị na, suku-jụ pakịrị na, ịrụa-saakịarị-anga na daa tẹ ị́ atọrụngbọ kẹ anị ḍikii; kẹ gotẹ ọkọ ḅẹẹarị, ị́ mị Jodanị mẹ saḅa-ḅọrọ ḅịa.

²⁸Kụma tọn Jọsụwa pịrịị, ò ḅiokpọmaa, ịnyọ kẹ ọ̀ pịrịị; kẹ gotẹ ọkọ ḅẹẹarị, ori mie mị atomi ma kẹ sịḅịda tẹ kẹ saḅa ḅarịye, anịsakị ori mie ama mẹ tẹ ị́ ẹrị ḅarịye mẹ ḅio ịn kẹ suu tẹ ịn nyana ḅarịye.

²⁹Anieḅụ wa Bẹtị-pẹyọ na dama-dama wararị tụndụ ogboku mẹ ḅụ simem.