Read kalabari Ditẹrọnọmị 32 Bible Online

Ditẹrọnọmị 32 - kalabari bible

Ditẹrọnọmị 32

¹Yei ọmịnị So, ó ḅeri-tokolomaa, anịsakị àrị ẹkwẹn ḅa; tẹ yee Kiri mẹ, ị̀ ḅịḅị ḅẹ ẹkwẹn-aḅịḅị ma naa.

²Yee ì tolumaye eene mẹ koro ḅara koro, ị̀ ẹkwẹn, igirigi ye deinma ḅara deinma, deinma koro eene mẹ kpọ-a osuka ọgọnọ sime-ḅara sime, tẹ nwẹịn-nwẹịn eene asụan ọgọnọ sime-ḅara sime.

³Gbala à KỊNỊNYANAḄỌ ẹrẹ mẹ kẹ kpo-kpo gbolo ḅẹ ẹrẹsị. Opu kẹ wamịna Tamụnọ pịrịị!

⁴Ịkụ Ḅe, ọ̀ kọrịnama kara gbasịm; kẹ gotẹ ọkọ ḅẹẹarị, ori etela mamgba ḅụ, karakara ḅẹrẹkọn emii. Iri mịẹye-ofori, tẹ minini ḅụụ ḅụ ḅin wararị gbọrụ Tamụnọ; karakara na kuraye na anie orii.

⁵Ini ịn sime iḅi ḅara mẹ sima ḅara kẹ ori na mịẹ tẹ, ịna aḅụụ simearị ḅẹkụ gotẹ, ini ḅarị ori awọmẹ-a; ini anie karakaraye mịẹ-a, pịkị gbọrụ ḅụụ mu-a ḅụọ ḅẹ apụ.

⁶Ọmịnị oḅori-sọarị tẹ sịḅịḅio nyana-a tomi, mị-ḅara mẹ mie ọ́ kẹ KỊNỊNYANAḄỌ ḅe gbẹẹ ḅara aro? Oriḅe tẹ ọ́ mịẹ tẹ ọ́ sịẹ kụrọ ḅọ ḅe ọmịna ḍaḅọ, tẹ ọ́ tẹmẹḅọ ḅe ori-a?

⁷Ọmịnị elemu ene ma kẹ ḅiokoromaa, tọnwa aḅụọ ḅọrọtẹ apụ ma ḅẹ akụra ma kẹ ḅiokoromaa; ọmịnị ọmịna ḍaḅọ gbela, anịsakị ọ̀ kẹ ó ḍie ḅa, ọmịna omongiapụ, anịsakị ịn ḍuko ọ́ pịrị ḅaa.

⁸Geletẹịn Ḅọ ḅe ịna sime-anga kẹ opu asịẹ ma pịrị sakị ò tomina owiapụ-awọmẹ ma ḅelema sakị, Tamụnọ owiapụ-awọmẹ ma kịẹn-ḅịḅị ḅụ ò tomi-kụlọkụlọ ma oke ma mie koromam.

⁹Gbala KỊNỊNYANAḄỌ ḅe ḍiekiri, anie ori atomi, Jekọbụ anie ò ḍie ọkị ḍuu.

¹⁰Ịkpa ama ḅio ori ọ̀ ḍọkị-ẹrịm, pịkị ịkpa mẹ ḅẹ gulugulu kẹ olokuarị anga ḅụ; ori ori ikelema-korom, ori ò ḍikiḍikim, ọ̀ tọrụngbọ ḅẹ tụḅọ wẹrị ḅara kẹ ori ọ̀ wẹrịm.

¹¹Igo tẹ fiin kẹ amịna feni awọmẹ tolumarị ye sime-ḅara, tẹ fiin-fiin amịna asambịrịma feni ikelemarị amịna apamba finjima-finjima ịn kuun-ọkịarị tẹ amịna pamba ḅẹ pịkọ ọgọnọ ịn dogiarị.

¹²KỊNỊNYANAḄỌ ḅe ngẹrị etela kẹ ò ḍiem, tẹ ori na sime gbọrụ igoni tamụnọ sọ ofori.

¹³Ori ọ̀ mịẹ tẹ ò kiri mẹ ḅẹ gele anga ma ḅụ dọkụm, tẹ ò piri mẹ pakama-ḅo ye fịm; anịsakị ori ọ̀ mịẹ tẹ ọ̀ ḅẹm nọnjịm ịkụ mẹ ḅụ, na pulo na oḅuarị ịkụ mẹ ḅụ.

¹⁴Kpụtụrụtẹ ndo-minji, nama ogbo mẹ ḅụ, na gilogilotẹ ndo-minji na anana-ogbo mẹ ḅụ, asambịrịma anana ḅẹlẹkị na, ejimina ḅẹlẹkị na anị na, Basani ḅẹ anama ogbo na, oḅori amẹẹ na, witi mẹ ḅẹ iḅitẹịn ye na arị na, tẹ girepu asịnmgbọlụ mẹ ḅẹ ọmbie mẹ ḅụ iru ḅuum.

¹⁵Kụma Jẹsurun ḅẹlẹkị sụam, tẹ ḅụọ tẹịnm; ị́yẹrị ḅẹlẹkị sụam, ị́ kpokorom, í ḅo welewelem; anịtẹso ori ọ̀ Tamụnọ ḅe tẹ ọ̀ tẹmẹḅọ ḅe sịkịm, tẹ ọ̀ ḅọrọma mẹ ḅẹ Ịkụ ḅe kombom.

¹⁶In ò jikemam igoni oru-atamụnọ na afana sọọ Tọn-tọn amịẹaị mịẹ kẹ in ori ịganịmam.

¹⁷In agba mịẹ si-atẹmẹ tẹ tamụnọ-a aị pịrịm, ịn mịẹ gbala-gbala amụ in nimi-a atamụnọ pịrịm, kẹ ịwọ oru-atamụnọ tẹ sakị ḅụra tẹ sọ-ḅo aị pịrịm, arị aị ma tẹ ọmịna aḍapụ gbala-gbala amụ ḍiki-ḅalafa-a aị ma,

¹⁸Ịkụ Ḅe tẹ ọmịnị iyi Ịkụ Ḅe ọmịnị ọ̀ bala-a, tẹ ḍumo kẹ ọ́ pịrị Tamụnọ ḅe kẹ ḅioḅọrọmam.

¹⁹KỊNỊNYANAḄỌ ḅe arị ẹrịm, tẹ ịn sịkị simam, ori owiapụ-awọmẹ na, ori eremịna-awọmẹ na kẹ ori ịganịma ye gotẹ.

²⁰Tẹ ọ̀ ḅẹẹm: Àrị in aḅụụ ị̀ tọrụ ḅọị ḅa, arị ịna kunoma sime ḅẹ ḅara ẹrị ḅa gbala ini anie karakaraye mịẹ-a ḅụọ ḅẹ apụ, awọmẹ tẹ minini ḅụụ ḅụ ofori apụ.

²¹In ì jikema tẹ arị aniemẹ tẹ tamụnọ-a ye na afana sọ tẹ, ini ịna akpokobịa ma kẹ ị̀ ịganịma tẹẹ. Anị ḅara mie à kẹ ịn jikema tẹ ini inima tẹ tomi-a tomi ma na afana sọ ḅarị ḅara; à ye-nimia gbọrụ opu sịẹ ḅụụ sọ tẹ ini ịganịma ḅa.

²²Gbala ị̀ ịganị ḅụ fịnị kẹngẹmarị, tẹ dọkịma ma-mu ḍuḅu mẹ ḅẹ pokolo ayọ laarị. Tomikiri mẹ na, anị ḅụ sọ aị na gulugulumarị, tẹ fịnị kẹ tụndụ ma ḅẹ sukutarị-aḍụḅarị ma ḅụụ sụarị.

²³À si-aị kẹ ịn ọgọnọ kpolima ḅa; àrị ị̀ ḍịẹịn mamgba kẹ ịn ọgọnọ tẹịn ḅa;

²⁴Ḅuru-pọkọtarị ḅụ ịn gulugulu ḅa, tẹ ye dọkịmarị ọfịrị na, ama gbaịn kịnị ḅaa obi na ịn guluguluma ḅa; anịsakị à piri-ḅio-ḅẹ anama kẹ fịrịma ịn da-paka ḅa, fọọn ḅio ikiriarị aị ma kịnị ḅaa fịla arị ḅụụ sọ ḅa.

²⁵Etela-ogbo ḅụ okologie mẹ kịnị ḅaa ḅa tẹ kala-ḅio ḅụ tẹmẹ-naịn-naịn paka ḅa asawọ na iriawọ na fịị ḅa, ndo-ndoarị tụḅọ ḅe na, iḅulu sịḅị ḅụ ḅịyatẹ owiḅọ ḅe na sọ.

²⁶Mimgbe à ḅẹẹ ḅa: Àrị ịn gala-gala ala-jụ mu ḅa à mịẹtẹ tomina-ogbo ḅio kịnị ịn kẹ ḅiokoroma daasịẹ ḅa.

²⁷À kịnị na fịya-a ḅọ ḅe ḅẹ kịnị ịganịma ye ḍiki-ḅalafa-a namịna. Anieofori ịn ḍiki-ḅioḅẹlẹ-a apụ ma ḅẹrẹkọn irima ḅa anieofori ịn ḅofa ḅẹẹ: Owu wamịna ḅara iḅi tẹ, KỊNỊNYANAḄỌ ḅe mie mamgba kọrị-a.

²⁸Gbala ini anie datụkụma nimi ofori ḅẹ opu sịẹ anịsakị ịna aḅụụ yefieye naa ofori,

²⁹Ịn ye-nimi namịna, ịn miemẹ fieye naa ḅa, ini ịna kunoma sime ḅẹ ḅara sẹlẹ nimi ḅa.

³⁰Gbọrụḅọ tọ-ḅara kẹ kịnị maa ẹndẹ oyia asi finji ḍuka na-iḅi, tẹ maa apụ kịnị puku, sọnọ ẹndẹ finji dee mangịma, ịna Ịkụ Ḅe ịn dẹrị tẹ sikima tẹ KỊNỊNYANAḄỌ ḅe ịn wẹrịso tẹ?

³¹Gbala ịna ịkụ wamịna Ịkụ Ḅe sime-ḅara sime-a wamịnị na fịya-a apụ ma ḅioju ḅẹrẹkọn-apụ sọ wararị.

³²Gbala Sọdọmụ na Gomora ḅẹ girepu-ḍụọ mẹ ḅio mie ịna girepu-aḍụọ ma ḅo yee; ịna girepu asịnmgbọlụ ma anie, kịnị-ḅaaḅa girepu asịnmgbọlụ. Arịḅẹ alikali ma akụarị.

³³Arịḅẹ iru anie ododo ma ḅụụ ḅẹ kịnị-ḅa ye mẹ, na fịla-isi-isi ododo ma kịnị ḅaa fịla na.

³⁴Miemẹ ngọ warị ḅio ị̀ na ofori, ị̀ ngọ-koko-aḅio ma ḅio gbaịn sime-a?

³⁵Gbẹẹfị ḅii na, gbẹẹ-pịkị na ị̀ nye, ịna ḅụọ sịnịnị ḅarị sakị ḅụ; gbala ịna ḅụụ-fụka ene mẹ ḅara-ku la tẹ anịsakị ịna fịị ḅẹrẹkọn fọnya ḅoarị.

³⁶Gbala KỊNỊNYANAḄỌ ḅe ori atomi karakara ḍie-pakama ḅa, tẹ ọkụrụkụrụ nyana ori afịrịmẹnjịapụ pịrị ḅa ori ẹrịm mịnẹ ịna kụrọ so tẹ ḅẹẹ-sakị, tẹ kọn gbọrụḅọ-sọ ḅarị ofori, omoni furo-ḅẹ-ḅọ, anịanịa furo tụḅọ sọ.

³⁷Anịtẹrẹmẹ ọ̀ ḅẹẹ ḅa, ndẹẹ ịna oru-atamụnọ ma, ịkụ mẹ tẹ ịn ḅio ḅụ ḅụụ ḅọị anga mẹ,

³⁸tẹ ịna agba ma ḅẹ ḅẹlẹkị taḅa, tẹ ịna iru agba mẹ ḅẹ iru ḅuu apụ ma? Yee ịn saakị tẹ ḅarasụa ọ́ pịrị, yee ini ó ḍikiḍiki apụ sọ!

³⁹Mịọkụ ọmịnị ẹrị mịnẹ yẹrị, jen-a jen-a yẹrị anie orii, anịsakị ì sikima jen tamụnọ ofori; à kịnị-ḅaarị, à pịkị kịnị-ḍumomarị; à ye kẹ kịnị lamarị, à pịkị kịnị gwọarị; anịsakị gbọrụḅọ tẹ inetẹ ị̀ ḅara ḅụ ḍụa pakama-ḅo ḅẹ ḅọ sọ ofori.

⁴⁰Kẹ gotẹ ọkọ ḅẹẹarị, àrị ị̀ ḅara saakị-gelema so da tẹ ye karịm, à sime gbamasom ḅẹẹ-sakị,

⁴¹à nwanam-ma ḅịyarị ì okologie mẹ farị oḅuma, tẹ ị̀ ḅara ḅẹrẹkọn ọkị ọlọ-ọlọọ, arị ì ḍiki-ḅioḅẹlẹ-a apụ ma ḅụụ gbẹẹfị ḅii ḅa, tẹ inima tẹ ì ḍiki-ḅioḅuarị apụ ma mịẹ ye kẹ ịn gbẹẹ ḅa.

⁴²Àrị ì okuro aḍịẹịn mịẹ tẹ arị ọmbie ḅuu tọrụ-ḅama ḅa, tẹ ì okologie meni guluguluma ḅa. Kịnị-na-fịya-a apụ ma ḅẹ sịḅịdapụ ma asịḅị ḅụ saakị mu fịtẹ-apụ ma na, kun-ḅara ḅio emi apụ ma na ọmbie kẹ sụa.

⁴³Ọmịnị ori atomi tokinii, yei opu asịẹ; gbala ori ori afịrịmẹnjịapụ ọmbie gbẹẹfị ḅiim, tẹ ò ḍiki-ḅioḅẹle-a apụ ma ọgọnọ gbẹẹfị ọkịm, tẹ ḅẹrẹ fama kẹ ori atomi ma ama pịrịm.

⁴⁴Mozizi ḅom, tẹ mị nume mẹ ḅẹ ẹkwẹn-aḅịḅị mamgba kọnm tomi ma naarị ḅara ḅụ, ori na, Jọsụwa, Nọnị owiḅọtụḅọ ḅe na.

⁴⁵Mozizi mịna ẹkwẹn-aḅịḅị mamgba kọn Izirẹlị mẹmgba pịrị fama tẹso,

⁴⁶ọ̀ nwẹnị ịn ḅẹẹ, “Ọ́ mịna ẹkwẹn-aḅịḅị tẹ mịmgba à tọn ọ́ pịrị aị ma kẹ ọmịna ḅioḅẹngbọ ḅụ wẹrị, mịẹtẹ ọmịnị inetẹ arị tọn ọmịna awọmẹ pịrị, mịẹtẹ ịn ḅụụ ẹbị-ẹbị mị oloko mẹ ḅẹ ẹkwẹn-aḅịḅị mamgba mịẹ ḅẹ ḅara.

⁴⁷Kẹ gotẹ ọkọ ḅẹẹarị, anị ḅụụ ḅụ yela-a ye sọ ọ́ pịrị ma, kụma anị anie ọmịna ḍumo, anịsakị anie ḅụ mie ama mẹ tẹ Jodanị mẹ saḅa ḅụ ọ́ nyana ḅẹ muarị ama mẹ ḅio ó ḍumo nangwọma ḅarịye.”

⁴⁸KỊNỊNYANAḄỌ ḅẹ nwẹnị anị gbọrụ ene mẹ ḅụ Mozizi ḅẹẹ,

⁴⁹Mie Abarimu ḅẹ tụndụ, ịn kẹ Nebo sịn Tụndụ mẹ tẹ Mohabụ ḅẹ ama ḅụ Jeriko na dama-dama wararị tụndụ mẹ kpọlị iwoo, tẹ Kenanị ḅẹ ama mẹ tẹ à nyana gotẹ kẹ Izirẹlịapụ ma pịrị ḅẹ ama mẹ ḍikii;

⁵⁰tẹ tụndụ mẹ tẹ ị́ kpọlị iwo ye mẹ ọgọnọ fịị, tẹ ini í kobiri mu ị́ atomi pịrị, í iyimbere Erọnị Họ Tụndụ ọgọnọ fịị tẹ ini ò kobiri mu ori atomi pịrị ḅara.

⁵¹Kẹ gotẹ ọkọ ḅẹẹarị, ị́ Izirẹlịapụ ma ogboku ḅụ ị́ ị̀ na sime-sime ḅara simam Mẹrịbatị-kadẹsị ḅẹ aminji ma ḅụ Zini ḅẹ ịkpa mẹ ḅio, gbala ị́ fịafịa ḅara kẹ opu mangịma ḅụ ị̀ kẹ ye-sịn-a Izirẹlịapụ ma ogboku ḅụ.

⁵²Ị́ gbala tọrụngbọ kẹ ị́ tọrọkọ simearị ama mẹ ẹrị; kụma anịjụ, ama mẹ tẹ à kẹ Izirẹlịapụ pịrị ama mẹ ḅio ị́ sọ-mu ḅịa.