Read kalabari Ditẹrọnọmị 33 Bible Online

Ditẹrọnọmị 33 - kalabari bible

Ditẹrọnọmị 33

¹Mie boma mẹ tẹ Mozizi Tamụnọ Fịrịmẹnjịḅọ ḅe tẹrẹmẹ ọ̀ fịị, kẹ Izirẹlị ḅẹ awọmẹ ma boma boma mẹ.

²Ori mẹẹ: KỊNỊNYANAḄỌ ḅe Sayịnayị Tụndụ ḅụ sime tẹ ḅom, tẹ saakị Seya ḅụ ḅịya wa saramam; ò Piranị Tụndụ ḅụ ḅịya pakam fịafịatẹ kịnị apuku sọnọa ẹndẹ, oyia asi finji, finji ma ḅụ ò ḅom ori ama ḅara ḅụ kọrịarị fịnị na ori na.

³Karakara-ḅara-ḅụ ori ori atomi ḅẹlẹmam; ịn mịẹ-fịafịama ọ̀ pịrị apụ mamgba ọ̀ ḅara ḅio emi; anị ḅara mie ini ị́ mẹnjị-aḅụọ ḍukamẹnjị ḅịa, ị́ ḅụụ datụkụma ọkịarị,

⁴sime Jekọbụ tomi ogbo mẹ pịrị ye ḅara ḅụ, Mozizi gbọrụ oloko tọn wa pịrị sakị.

⁵Mị-ḅara mie KỊNỊNYANAḄỌ ḅe ḅo amadaḅọ sọ ḅara Jẹsurun ḅụ tomi ma sịḅịdapụ ma kobiri, Izirẹlị ḅẹ afuro mamgba kobiri gboloma sakị.

⁶Yee Rubẹnị fịị ma, tẹ ḍumo-sime, anịanịa ori atomi kịẹn-ḅịḅị kịsị.

⁷Mie Juda gbolomaye ḅụ ò ḍuko ye: “Yei KỊNỊNYANAḄỌ, Juda pọkọ mẹ naa, tẹ ori ọkị-ḅo ori atomi ḅio suu. Ị́ aḅara kẹ ḅẹrẹ ịgbanị ọ̀ pịrịị, tẹ ḅarasụa ọ̀ pịrị ò ḍiki-ḅioḅẹlẹ-a apụ da-paka ḅụ.”

⁸Livayị gbolomaye ḅụ ori mẹẹ: “Kẹ ị́ ḅịḅị ḅiiarị Yurimu mẹ na Tumimu[1] mẹ na kẹ ḅụụ kẹ gbana na-iḅi fịrịmẹnjịapụ Livayị furo-ḅẹ-apụ ma pịrịị; ini ma tẹ Masa ḅụ ị́ daaḍiki apụ ma, Mẹrịba ḅẹ aminji ḅụ ị́ na ịgbanịya nyana apụ ma.

⁹Ini ma tẹ ịna ḍapụ-na-iyingiapụ-na gbolomaye ḅụ ḅẹẹm, ‘Àrị ịn kẹ ye-sịn-a’; ini ịna owiapụ-amịnapụ sịkịm, tẹ ịna awọmẹ ḍiki-tọrụsinm. Kẹ gotẹ ọkọ ḅẹẹarị, ini ị́ ẹkwẹn-ḅịḅị kẹ elekima sụam tẹ ị́ ọḅọkụ kokom.

¹⁰Ini ị́ sụa oloko ma kẹ Jekọbụ toluma ḅa, tẹ í tọn-aị ma ḍuko Izirẹlị ḅa; ịn kụnụaị dọkịma ḅa ị́ tọrọkọ, na bebe dọkịma agba na, ị́ agbamịẹ-anga ọgọnọ ḅụ.

¹¹Ọ̀ ḅụụ paka-ḅo aị bomaa, Yei KỊNỊNYANAḄỌ, tẹ ori aḅara ḅẹ kọrịnama ọkịị; ò ḍiki-ḅioḅẹlẹ-a apụ ma aḅiri ma kọsịmaa, inima tẹ ò ḍiki-ḅioḅuarị apụ ma nye sọ, mịẹtẹ ịn ḅarị sin saakị ḅịa ḅara.”

¹²Benijamịnị gbolomaye ḅụ ori mẹẹ: KỊNỊNYANAḄỌ ḅe ḅẹlẹmarị ḅọ ọ̀ ḅụụ ḅụ ò ye ḅụụ la-a ḅara angarị bebe ene mamgba ḅụ ori ọ̀ gbaịn ikelemarị, tẹ ori ò kuḅu ḅio angarị.

¹³Josẹfụ gbolomaye ḅụ ori mẹẹ: Ori ama mẹ, KỊNỊNYANAḄỌ ḅe So-ḅio ḅẹ ọgọnọ-jụ, iḅitẹịn aḍiepịrị-aị na, Kiri mẹ ḅẹ pokolo yọ ḅụ paka-ḅo aị na, kẹ bomatẹ ama sọọ,

¹⁴ịrụa mẹ ḅẹ iḅitẹịn asịnmgbọlụ na, akalụ-akalụ ma ḅẹ ngọ kọnma fịye sụa ḅara na,

¹⁵elemu sakị ḅẹ tụndụ ma fịye pakama iḅitẹịn ḅara na sime gbamaso atụndụ ma ḅẹ tọnwa aị ma na,

¹⁶tomikiri mẹ ḅẹ iḅitẹịn aḍiepịrị-aị ma na, anịḅẹ ḅintẹ ḅara na, ori tẹ piri mẹ ḅio angarị ḅọ ḅe ḍiki-ḅụụjịrị na sọ. Yee ma aị ma ḅo Josẹfụ sịḅị ọgọnọ mẹ ḅụ sara, na oriḅe tẹ ori owiapụ-amịnapụ ma ogboku ḅụ ala-owi sọ ḅọ ḅe sịḅị-ogbo na ḅụ.

¹⁷Ọ̀ nambulo tarị iyi owi-nambulo ama-da opu nyanam, tẹ ori ịfalị ma anie piri-ḅio-ḅẹ pootẹ-nambulo ịfalị. Ori arị kẹ tomi-kụlọkụlọ ma sukuruma ḅa inimgba sukuruma mu tomikiri mẹ ḅẹ akunoma ḅụ sara ḅa. Anị ḅara mie anị sime Iferemu puku sọnọ ẹndẹ finji-finji ma pịrị ḅara, anị ḅara mie anị pịkị sime Manasẹ maa ẹndẹ oyia asi finji-finji ma pịrị ḅara.

¹⁸Zẹbulọnị gbolomaye ḅụ ori mẹẹ: Zẹbulọnị, ị́yẹrị ḅe paka ḅụ, ḍerekuu, anịsakị Ịsaka, ị́ akpụrụ-awarị ma ḅio ḍerekuu.

¹⁹Ịn tomi-kụlọkụlọ sịn ịna tụndụ mẹ ḅo ḅa; anịjụ ịn karakara tọnwa agba mịẹ ḅa, gbala ini opu atomi ma ḅio ḅin wararị ngọ ma nọnjịarị pịkị kiri ḅio ḅẹ onwi mẹ ḅio ḅọị wararị ngọ ma nọnjịarị.

²⁰Gadi gbolomaye ḅụ ori mẹẹ: Boma sime oriḅe tẹ Gadi mịẹ ḍụḅama ḅọ, ḍụḅama ḅọ pịrịị! Gadi ọkụkụ ẹbị ḅara ẹbịm, tẹ ḅara-kọngọ mẹ na, sịḅị ẹkẹkẹ mẹ na kanị-saram.

²¹Ori ama mẹ ḅẹ iḅitẹịn anga sẹlẹ ọ̀ ḅụụ pịrịm; anịjụ ịn ḅẹrẹtọnḅọ kiri sikimam; tẹ ò tomi ma ḅẹ sịḅịdapụ ma ḍọkụma-ḅom, Izirẹlị ḅụụ ḅụ ọ̀ ḅẹrẹ mẹ tọnm na KỊNỊNYANAḄỌ ḅe sụa karakara Oloko ma na.

²²Danị gbolomaye ḅụ ori mẹẹ: Danị anie ọkụkụ iyi iwo tụḅọ, tẹ Basani ḅụ ḍosi paka-ḅo ḅọ.

²³Nafutali gbolomaye ḅụ ori mẹẹ: yei Nafutali, ḍiki-ḅụụjịrị na, KỊNỊNYANAḄỌ ḅe boma na ḅụụ ḅụ ḅin wararị ḅo, ḍaḅa mẹ na, suku-jụ mẹ na nyana-a.

²⁴Asa gbolomaye ḅụ ori mẹẹ: Boma owiapụ-awọmẹ mamgba nẹngị ḅọ anie Asa; yee ori ori owiapụ-amịnapụ ma ḅụụ ịn ḅẹlẹma tẹịn ḅọ sọ, anịsakị yee ori ọ̀ ḅụọ kẹ pulo ḅio taụ.

²⁵Ị́ ẹngbẹsẹ ma ikulele na, ojo na sọ ḅa; ị́ ịnyọ, ị́ ene ma sime la ḅara la ḅa.

²⁶Yei Jẹsurun, Tamụnọ pembe ḅọ ofori, oriḅe tẹ ḅarasụa ị́ pịrị ḅẹ so ma dọkụ tolu ḅọ ḅe, tẹ ori ama-da opu ḅụ so atọrụ ma tolu-ḅọrọ ḅọ ḅe.

²⁷Sime gbamaso Tamụnọ ḅe anie ị́ anga yọ anịsakị suku-ḅio kunoma nyana-a aḅara kọngọ ma emii. Tẹ ori ị́ tọrọkọ kịnị na fịya-a apụ ma sukuruma ḅelema tẹ ḅẹẹm, “Ịn ḅaa!”

²⁸Mị-ḅara ḅụ Izirẹlị ye ḅụụ la-a ḅara angam, Jekọbụ ngụngụḅa mẹ ngẹrị simem, sịnmgbọlị na, iru na ama mẹ ḅio; tụkụma ḅara ḅụ ori aso ma igirigi saram.

²⁹Yei Izirẹlị, ḅioḅẹlẹ sime ọ́ pịrịm! Tọ apụ ọmịnị na kịka, KỊNỊNYANAḄỌ ḅe ḍụa-ḅọrọma gbọrụ atomi, ọmịna ḅarasụa ekpeke ḅe! Ọmịnị na fịya-a apụ ḅo, ḅo ọmịna tọrụ iḅi ọkị aị mịẹ ḅa; tẹ ọmịnị ịna gele ayeyọ ma ọgọnọ mẹnjị ḅa.