Read kalabari Ditẹrọnọmị 34 Bible Online

Ditẹrọnọmị 34 - kalabari bible

Ditẹrọnọmị 34

¹Mozizi Mohabụ ḅẹ ele ma ḅio mẹnjị iwo Nebo Tụndụ ọgọnọ aniemẹ tẹ Jeriko na dama-dama ḅụ simearị Pisiga Tụndụ ọgọnọ mẹ sịḅị mum. KỊNỊNYANAḄỌ ḅe nwẹnị ama mamgba kẹ ò ḍiem, Gilẹdị ḅụ ọkị mu Danị ala jụjụ-ḅio la,

²Nafutali mẹmgba na, Iferemu na, Manasẹ na ama ma na, Juda ama mẹmgba ọkị mu Opu Tọrụ mẹ ḅẹ ịrụa-ideriarị-anga ala jụjụ-ḅio la,

³Kenanị suku-jụ mẹ na, Ele mẹ na — anie Jeriko tụndụ ogboku mẹ, Eneme Akụrọ Opu ama mẹ ḅụ — ọkị mu Zoha ala jụjụ-ḅio la.

⁴KỊNỊNYANAḄỌ ḅe nwẹnị ọ̀ ḅẹẹ, “Mie à ye karị ḅara kẹ minini Ebira-amụ na, Ayịzịkị na, Jekọbụ na pịrịm, ‘À kẹ ị́ ḅụụ ḅụ paka-ḅo apụ ma pịrị ḅa’ ama mẹ; àrị ị́ mịẹ tẹ ị́ ị́ atọrụngbọ kẹ anị ẹrị tẹẹ, kụma ị́ saḅa anịjụ mu ḅịa.”

⁵Anieḅụ Mozizi, KỊNỊNYANAḄỌ ḅe fịrịmẹnjịḅọ ḅe anịjụ, Mohabụ ḅẹ ama mẹ ḅio fịịm, KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara,

⁶tẹ Mohabụ ḅẹ ama mẹ ḅio Bẹtị-pẹyọ na dama-dama tụndụ ogboku ḅụ ori ò ḍiḅim; kụma ọkị-ḅo mịmgba la gbọrụḅọ sọ ò ḍiḅi anga nimi-a.

⁷Mozizi fịị sakị ọ̀ sịḅị kụra sonioa si ḅọrọ tẹ ori atọrụngbọ ḅutuḅụtu-a, Tamụnọ kẹ ọ̀ tẹmẹ ịnyọ sọ ọ̀ ḅụụ ideri-a ọ̀ fịị sakị.

⁸Izirẹlịapụ ma Mozizi gotẹ Mohabụ ḅẹ ele ma ḅio ḍin suei kẹ tẹmẹ-la ḅara kẹ owum; anịtẹrẹmẹ Mozizi gotẹ owu mẹ na, kururu mẹ na kunomam.

⁹Nimi tẹmẹ mẹ nwẹnị Jọsụwa, Nọnị owiḅọtụḅọ ḅe ḅụụ sọ ḅin; gbala Mozizi ori aḅara kẹ ori ọgọnọ gbana tẹ ẹrẹsị; anieḅụ Izirẹlị ḅẹ apụ ma ọ̀ ḅịḅị pokim, tẹ KỊNỊNYANAḄỌ ḅe wẹrịtẹ tọn Mozizi pịrị ḅara mịẹm.

¹⁰Anịngẹ-kụraḅio Mozizi pembema ịkịankoroḅọ amụ saakị paka-ḅo-a Izirẹlị ḅụ, oriḅe tẹ KỊNỊNYANAḄỌ ḅe na tọrụ kẹ dama-dama tẹ ò nimi ḅọ.

¹¹Elekima ma na, ḅụụ-gbiripuma aị mamgba na, tẹ KỊNỊNYANAḄỌ ḅe ọ̀ fịrịma tẹ Ijiputi ḅụ ọ̀ kẹ Fero na, ori afịrịmẹnjịapụ mamgba na, ori ama mẹmgba na mịẹ aị ḅụ ò pembema ḅọ ofori.

¹²Anịsakị opu kụrọ mẹmgba na, gburo-gburotẹ tẹmẹ-naịn-naịnma amịẹaị tẹ Mozizi Izirẹlị ḅẹ apụ mamgba tọrọkọ ḅụ mịẹ aị ma ḅụ ò pembema ḅọ ofori.