Read kalabari Ditẹrọnọmị 6 Bible Online

Ditẹrọnọmị 6 - kalabari bible

Ditẹrọnọmị 6

¹Mịọkụ mie oloko mẹ na, kẹẹ wararị oloko ma na, kụrọ ḅara-ḅio sime apụ sụa oloko ma na tẹ KỊNỊNYANAḄỌ ọmịna Tamụnọ ḅe tọn ị̀ pịrịm à kẹ ó toluma ḅẹ aị ma, mịẹtẹ ama mẹ tẹ ọ́ saḅa-ḅọrọ tẹ nyana ḅẹ muarị ama mẹ ḅio ọmịnị arị mịẹ ḅẹ ḅara.

²Mịẹtẹ ọmịnị na, ọmịna afuro ḅẹ apụ na ọmịna ḍumo-ene mamgba kẹ KỊNỊNYANAḄỌ ọmịna Tamụnọ ḅe mangịma ḅẹ ḅara, ọ́ kẹẹ wararị oloko ma na, ori oloko mamgba na tẹ à tọn ọ́ pịrị aị ma koko ḅụ; mịẹtẹ ọmịna ene ma nangwọ ḅẹ ḅara.

³Yei Izirẹlịapụ, anịẹrẹsị ọ́ naa, tẹ ḅụụ ẹbị-ẹbị tẹ arị mịẹẹ, mịẹtẹ anị ọmịnị na iḅi ma-mu ḅẹ ḅara, mịẹtẹ KỊNỊNYANAḄỌ ọmịna aḍapụ ma sunsin pịrị Tamụnọ ḅe wẹrịtẹ kẹ ọ́ karịma tẹ ḅara, ó gburo-gburoma lolo-kama ḅẹ ḅara, anị ḅụụ-ḅẹlẹmatẹ iḅiọkụma fịye so-pakamarị amakiri mẹ ḅụ.

⁴Ọ́ naa, yei Izirẹlị: KỊNỊNYANAḄỌ wamịna Tamụnọ ḅe anie gbọrụ Tamụnọ.

⁵Anịsakị ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na, ọmịnị ịnyọ mẹmgba na, kẹ KỊNỊNYANAḄỌ ọmịna Tamụnọ ḅe ḅẹlẹma ḅa.

⁶Mịna ẹkwẹn-aḅịḅị ma tẹ mịmgba à tọn ọ́ pịrị aị ma ọmịna ḅioḅẹngbọ ḅụ simee.

⁷Ọ́ karakara ḅara kẹ arị kẹ ọmịna awọmẹ toluma ḅa, tẹ ọmịnị ọmịna warị ḅio lẹgị-sime sakị na, etela ḅụ ọ́ mẹnjịarị sakị ḅụ na, ọ́ ḅọlọlọ sakị ḅụ na, ọ́ saakị sakị na ḅụ arị gbolomaye kẹ ẹkwẹn ḅa.

⁸Ọmịnị arị kẹ elekima sọma ọmịna ḅara ḅụ fịna ḅa, tẹ arị ọmịna tọrụ-ogbo emi aị sime-ḅara sime ọ́ pịrị ḅa.

⁹Anịsakị ọmịnị arị kẹ ọmịna warị ḅọkọ ḅẹ amasịn ma ọgọnọ na, ọmịna ogigo-aḅọkọ na ḅụ kẹẹ ḅa.

¹⁰KỊNỊNYANAḄỌ ọmịna Tamụnọ ḅe ọmịnị ọkị-ḅo ama mẹ tẹ ò ye karị ḅara kẹ minini ọmịna aḍapụ Ebira-amụ na, Ayịzịkị na, Jekọbụ na pịrịm ọ̀ kẹ ọ́ pịrị ḅẹ ama mẹ, gburo-gburotẹ, iḅitẹ opu ama ma tẹ ọmịnị nama-a ḅẹ ama ma ḅio suu sakị;

¹¹warị tẹ iḅi aị tẹ ọmịnị fẹ suu-a aị mamgba ḅin wararị awarị na, minji wẹrị anga tẹ ọmịnị pẹlẹ pakama-a anga na, kụrọ-aḍụọ na olivu opu asịn tẹ ọmịnị ḍiḅi-a aị na, anịsakị ọ́ fị tẹ ọmịna furo ḅin sakị,

¹²ọmịnị ọmịna aḅụụ ẹbị, anieofori ọ́ ḅofa KỊNỊNYANAḄỌ ḅe tẹ Ijiputi ama mẹ ḅụ, omoni-sọ anga mẹ ḅio ọ́ pakama-ḅo ḅọ ḅe kẹ ḅioḅọrọma.

¹³Ọ́ KỊNỊNYANAḄỌ ọmịna Tamụnọ ḅe mangịma ḅa; ọ́ fịrịmẹnjị ọ̀ pịrị ḅa, tẹ ori ẹrẹ ngẹrị ḅụ ḅụụ-pikima ḅa.

¹⁴Ó tomi ma tẹ ọmịnị ikelema-koro wararị apụ ma oru-atamụnọ ma ḅụ gbọrụ oru-tamụnọ sọ ḍukamẹnjị ma.

¹⁵Kẹ gotẹ ọkọ ḅẹẹarị, ọmịna ogbo-ḅio mẹ ḅụ simearị KỊNỊNYANAḄỌ ọmịna Tamụnọ ḅe anie afana Tamụnọ. Ori opu ịganị ḅofa kẹngẹma ọmịna ọgọnọ sara, tẹ tomikiri mẹ ḅụ ọ́ ḅaa sin fama.

¹⁶Masa ḅụ ọ́ KỊNỊNYANAḄỌ ọmịna Tamụnọ ḅe daaḍiki ḅara kẹ ḅarị ọ̀ daaḍiki ma.

¹⁷Ọ́ karakara ḅara kẹ KỊNỊNYANAḄỌ ọmịna Tamụnọ ḅe oloko ma na, kẹẹ wararị oloko ma na tẹ ọ̀ tọn ọ́ pịrị tẹ aị ma kọkọ ḅa, tẹ ọ̀ mịẹ aị ma ḍuko-pakama ḅa.

¹⁸Anịsakị ọ́ KỊNỊNYANAḄỌ ḅe ḍiki-tọrụ ḅụ kura-aị na, iḅi aị na mịẹ ḅa mịẹtẹ anị ọmịnị na iḅi ma mu ḅẹ ḅara, mịẹtẹ ọ́ sọ-mu iḅi ama mẹ tẹ KỊNỊNYANAḄỌ ḅe ye karị ḅara kẹ minini ọmịna aḍapụ ma pịrị ama mẹ ọkị nyana ḅẹ ḅara,

¹⁹ọmịna tọrọkọ ọmịnị na fịya-a apụ ma sukuruma pakama ḅụ, KỊNỊNYANAḄỌ ḅe wẹrịtẹ minini tẹ ḅara.

²⁰Ḅaa fa-a berembe ḅụ ọmịna awọmẹ mịẹ tẹ aị ḍuko-pakama mẹ na, kẹẹ wararị oloko ma na, kụrọ ḅara-ḅio sime apụ sụa oloko ma na tẹ KỊNỊNYANAḄỌ wamịna Tamụnọ ḅe tọn aị ma tiye fiearị kẹ ó gbela sakị,

²¹anịrẹ ọmịnị ọmịna owiapụ-awọmẹ ma ḅẹẹ ḅa: Wa Ijiputi ḅụ Fero omoniapụ sọ simem; tẹ KỊNỊNYANAḄỌ ḅe kụrọtẹ opu ḅara kẹ wa pakama-ḅom.

²²KỊNỊNYANAḄỌ ḅe gburo-gburotẹ opu kururu ḍie-pakamam tọnwa elekima na, ḅụụ-gbiripuma aị na kẹ Ijiputi na, Fero na, ọ̀ warị suku mẹmgba na ọgọnọ gbana ḅụ wamịna atọrọkọ ogbo ḅụ;

²³tẹ ori anịjụ wa pakama-ḅom, mịẹtẹ ọ̀ wa ọkị-ḅo tẹ wa kẹ ama mẹ tẹ ò ye karị ḅara ḅụ kẹ wamịna aḍapụ pịrị ama mẹ ḅio suu tẹ kẹ wa pịrị ḅẹ ḅara.

²⁴Tẹ KỊNỊNYANAḄỌ ḅe tọn wa pịrịm wa mịna kẹẹ wararị oloko mamgba koko tẹ mịẹ, wa sakị mẹmgba wamịna iḅi gotẹ KỊNỊNYANAḄỌ wamịna Tamụnọ ḅe mangịma ḅẹ ḅara, mịẹtẹ mịmgba mẹ ḅụ anị sime-ḅara ọ̀ wa wẹrị kpaịnma ḍumoma ḅẹ ḅara.

²⁵Anịsakị anị karakara ye sọ wa pịrị ḅa KỊNỊNYANAḄỌ wamịna Tamụnọ ḅe tọrọkọ, wa nwẹnị ḅụụ ẹbị tẹ ọ̀ tọn wa pịrị tẹ ḅara ḅụ ma oloko mamgba koko tẹ mịẹ kụma.