Read kalabari Ditẹrọnọmị 8 Bible Online

Ditẹrọnọmị 8 - kalabari bible

Ditẹrọnọmị 8

¹Ọ́ ḅụụ ẹbị-ẹbị tẹ oloko mamgba tẹ à mịmgba tọn ọ́ pịrị aị ma mịẹ ḅa, mịẹtẹ ó ḍumo tẹ kama ḅẹ ḅara, tẹ sọ mu ama mẹ tẹ KỊNỊNYANAḄỌ ḅe ye karị ḅara ḅụ kẹ ọmịna aḍapụ ma karịma wararị ama mẹ nyana ḅẹ ḅara.

²Ọmịnị etela mẹmgba tẹ KỊNỊNYANAḄỌ ọmịna Tamụnọ ḅe mịna kụra amesi ma ḅụ ịkpa mẹ ḅio, mịẹtẹ ọ́ ḅụụ-kpoo ḅẹ ḅara, kẹ ọ́ daaḍiki tẹ ọmịna ḅioḅẹngbọ ḅụ sime ye nimi, ọmịnị ori oloko ma koko ḅarị ḅoto, anịanịa ó koko ḅịa, tẹ ori tọrọkọ tarị ọ́ pịrị etela ma kẹ ḅiokoroma ḅa.

³Ọ̀ mịẹtẹ ọ́ ḅụụ-kpoom, tẹ wẹrịso tẹ ḅuru ọ́ tarị tẹ ori ịn kẹ mana sịn fịye kẹ ó kokom, aniemẹ tẹ ó nimi-a, ọmịna aḍapụ sọ nimi-a ye mẹ; ori ọ́ mịẹtẹ ó nimi ḅẹ ḅara mịnẹ tomi fịye ngẹrị ḅụ ḍumo-a, kụma ḅẹẹye-ḅẹẹye tẹ KỊNỊNYANAḄỌ ḅe ḅịḅị-ḅio paka-ḅo ye ḅụ mie tomḅọ ḍumoarị ye.

⁴Ọmịna kapa ọmịna oju sime kan-a, anịsakị mịna kụra amesi ma ḅụ ọmịna ḅụọ-suku sọ foin-a.

⁵Anieḅụ ọmịna ḅioḅẹngbọ ḅụ ó nimii, mịnẹ owiḅọ amịna owiḅọtụḅọ ḅioḅẹngbọ na, ye-mịẹ-ḅara na datụkụma ḅara, mie KỊNỊNYANAḄỌ ọmịna Tamụnọ ḅe kẹ ọmịna ḅioḅẹngbọ na, ye-mịẹ-ḅara na datụkụma ḅara.

⁶Anieḅụ ọ́ KỊNỊNYANAḄỌ ọmịna Tamụnọ ḅe oloko ma koko ḅa, ori etela ma ḅụ mẹnjị na, ò mangịma na ḅụ.

⁷Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịnị ọkị-ḅo ḅuu-minji tụndụ ogboku na, tụndụ na ḅụ ngụngụḅa na, minji wara-warama sara tẹ tọnwa akuroro pakama wararị iḅi ama ḅio sụarị;

⁸ama tẹ witi na bali na nwẹn-sịn fịaị na, girepu na, figi na, omburo na, olivu na, ḅẹm na ḅin wararị ama;

⁹ama tẹ ó fịye ḍọkị tẹrẹmẹ fịye fị ḅịa ama, ama tẹ ọ́ ḍọkị ḅẹ ye ofori ama, ama tẹ anị ḅẹ aḍụḅarị ma ikulele, anịsakị anị ḅẹ atụndụ ma ḅụ ini ịn kẹ kọpa (anie alapẹlẹa) sịn ye soku-soku pakama-ḅoarị ama mẹ.

¹⁰Anịsakị ó fịye fị furo ḅinma ḅa, tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ iḅi ama mẹ gotẹ ò boma ḅa.

¹¹Ọmịnị ọmịna aḅụụ ẹbị anieofori ó ḅofa KỊNỊNYANAḄỌ ọmịna Tamụnọ ḅe kẹ ḅioḅọrọma ori oloko ma na, kụrọ ọ̀ ḅara-ḅio emi tẹ ọ̀ sụa oloko ma na, ori oloko ma tẹ kẹẹ wararị aị ma na, arị aị ma tẹ mịmgba à tọn ọ́ pịrị aị ma koko-a ḅụ,

¹²ó fịye fị ọmịna furo ḅinma tẹ iḅi awarị nama tẹ arị ḅio anga sakị,

¹³na ọmịna anama-ogbo ma na, anana ma na oḅori-ogbo ma na ḅo gburo-gburo sakị na, ọmịna seleḅa na, golu na tẹ ye tẹ ọ́ nyana aị mamgba sun sakị,

¹⁴anị sakị ḅụ mie ọmịna ḅioḅẹngbọ saakị gele ḅarịye, tẹ ọmịnị ọmịna Tamụnọ ḅe tẹ Ijiputi ama mẹ ḅụ, ọmịnị omoni-sọ anga mẹ ḅio ọ́ pakama-ḅo ḅọ ḅe kẹ ḅioḅọrọma ḅarịye.

¹⁵Oriḅe tẹ tọrọkọ tarị ọ́ pịrị tẹ mị gburo-gburotẹ tẹmẹ-naịn-naịnma ịkpa mẹ na, anị ḅẹ ḅalafama ododo ma na, akpị ma na, kiri tẹ samụnọ-kpakịkị tẹ minji ofori anga mẹ ḅụ ọ́ ḅọrọma toluma, oriḅe tẹ kụrọ-kịkịtẹ ịkụ ḅio minji pakama-ḅo ọ́ pịrị ḅọ ḅe.

¹⁶Oriḅe tẹ ịkpa mẹ ḅio ịn kẹ mana sịn fịye tẹ ọmịna aḍapụ sọ nimi-a fịye kẹ ó koko ḅọ ḅe, mịẹtẹ ọ́ ḅụụ-kpoo, tẹ ọ́ daaḍiki, kunoma ḅụ iḅi kẹ ọ́ mịẹ ḅẹ ḅara.

¹⁷Ọmịnị ọmịna aḅụụ ẹbị, ó ḅofa ọmịna ḅioḅẹngbọ ḅụ ḅẹẹ: Ị̀ kụrọ na, ị̀ ḅara ḅẹ ịnyọ na ḅụ à mị ngọ mẹ kọnm.

¹⁸Ọ́ KỊNỊNYANAḄỌ ọmịna Tamụnọ ḅe kẹ ḅiokoroma ḅa, kẹ gotẹ ọkọ ḅẹẹarị, ori mie kụrọ kẹ ọ́ pịrịtẹ ọmịnị ngọ mẹ kọn ye; mịẹtẹ ori ori ọḅọkụ mẹ tẹ ò ye karị ḅara kẹ fị ọmịna aḍapụ pịrị ye mẹ mịẹ kụrọma ḅẹ ḅara anị wẹrịtẹ mịmgba ḅụ sime-ḅara.

¹⁹Anịsakị ọ́ nwẹnị KỊNỊNYANAḄỌ ọmịna Tamụnọ ḅẹ kẹ ḅioḅọrọma tẹ oru-atamụnọ ḍukamẹnjị, tẹ fịrịmẹnjị ịn pịrị, tẹ sunsin ịn pịrị-pịrị, à mịmgba ḅụ tẹmẹ-la ḅara kẹ ọmịna ḅeri nụnụarị mịnẹ karakara-ḅara-ḅụ ọ́ fịị faa ḅa.

²⁰Opu asịẹ ma tẹ KỊNỊNYANAḄỌ ḅe ọmịna tọrọkọ ḅụ mịẹtẹ ịn fịị fa ḅara, mie ọ́ fịị fa ḅarị ḅara, gbala ọ́ KỊNỊNYANAḄỌ ọmịna Tamụnọ ḅe pọkọ poki-a ẹrẹsị.