Read kalabari Jọnị 15 Bible Online

Jọnị 15 - kalabari bible

Jọnị 15

¹“Yẹrị anie karakara kụrọ sịn mẹ, anịsakị ị̀ Ḍa ḅe anie ḍụọ-kọrịḅọ ḅee.

²Ị̀ ḅụụ simearị sịn ḅara tẹ mgbọlụ sụa-a ye goyegoye ori anị anyịma sin-arị, tẹ ị̀ ḅụụ simearị sịn ḅara tẹ mgbọlụ sụarị ye goyegoye ori anị tẹlẹma fịafịama tẹ anị ye sụa tarị ḅara nẹngị ḅa.

³Ọmịnị kụma à kẹ ó toluma tẹ ye mẹ ọ́ tẹlẹma fịafịama kụra-ḅio iḅerea.

⁴Ọmịnị ị̀ ḅụụ ọmịnị oḅolo simearị ḅara sime ma tọrọkọ muu, anịsakị yẹrị sọ ọmịna ḅụụ ọkọ kẹ sime ḅa. Gbọrụ sịn ḅara sọ inetẹ anị ngẹrị sikima tẹ koro simearị ḅara kẹ mgbọlụ sụa sụa-a. Anị sịn iyingi mẹ ḅụ emi rẹ mie anị inetẹ mgbọlụ sụa ḅarịye. Mị gbọrụ ḅara ḅụ ọmịnị sọ ọmịnị inetẹ mgbọlụ sụa ḅịa, ọmịnị ị̀ ḅụụ emi sikima.

⁵“Yẹrị anie kụrọ sịn mẹ, ọmịnị anie sịn-aḅara ma. Ị̀ ḅụụ simearị ḅọ goḅọ-goḅọ, tẹ yẹrị sọ mḅọ ḅụụ emi ḅọ, mgbọlụ sụa lama ḅa; yẹrị ofori tẹ ọmịnị inetẹ mịẹ ḅẹ gberie-sọ ofori ẹrẹsị.

⁶Ị̀ ḅụụ ofori ḅọ, ofori ḅọ, ini mḅọ kẹ wakị nguma ḅa, ḅịyatẹ sịn wakị nguma ḅara; ọkọ sime sịn-aḅara ma ini arị kobiri tẹ kẹ fịnị ḅio gbin suu dọkịma dọkịmam.

⁷Ọmịnị ị̀ ḅụụ ḅio emi tẹ ị̀ ẹkwẹn mẹ pịkị ọmịna ḅụụ ḅio emi ḅẹḅẹ ọmịna ḅụụ-ḅẹlẹ tẹ ó ḅii ye, ḅii ye ọ́ nyana ḅa.

⁸Ọmịnị mgbọlụ sụa lama mẹ anie ị̀ Ḍa ḅe ebube mẹ ḍie-pakama ḅarịye, tẹ mị ḅọkọ ḅụ mie ọ́ ḅọrọ tẹ ì ḍukamẹnjịapụ sọ ḅarịye.

⁹Ḍaḅọ ḅe kẹ ị̀ ḅẹlẹmarị gbọrụ ḅara mẹ anie yẹrị sọ kẹ ọ́ ḅẹlẹmarị ḅara; ọmịnị à kẹ ọ́ ḅẹlẹmarị ḅẹlẹma mẹ ḅụ simee.

¹⁰Ọ́ kẹ ị̀ ḅẹlẹma mẹ ḅụ so ḅịa ye anie ọmịnị à tọn ọ́ pịrị aị ma mịẹ, ḅara anie yẹrị sọ kẹ ị̀ Ḍa ḅe tọn ye mịẹ tẹ ọ̀ ḅẹlẹma mẹ ḅụ simearị ḅara.

¹¹“À miemẹ ḍuko ọ́ pịrị tẹ, mịẹtẹ ị̀ ḅioḅẹlẹ mẹ ọmịna ḅụụ ḅio sọ tẹ ọmịna ḅioḅẹlẹ mẹ bebe ye sọ ḅarị ḅara.

¹²Mie ì oloko mẹ mịnẹ ọ́ jụmọ-jụmọ ḅẹlẹmaa, yẹrị sọ kẹ ọ́ ḅẹlẹmarị gbọrụ ḅara mẹ.

¹³Ḍụḅatẹịn ḅẹlẹma tẹ tomḅọ nyana mḅọ ikiapụ pịrị ḅarịye anie mḅọ ḍumo fama mḅọ ikiapụ pịrị.

¹⁴Tẹ ọmịnị anie ì ikiapụ ma, ọmịnị à tọn ọ́ pịrị ye mịẹ ḅẹḅẹ.

¹⁵À ḅarị jen kẹ fịrịmẹnjịapụ kẹ ọ́ sịn ḅịa, gbala fịrịmẹnjịḅọ ọ̀ sịḅịdaḅọ mịẹarị ye nimi nimi-a. Anie nakara ikiapụ mie à kẹ ọ́ sịn ḅarị ye, ị̀ Ḍa ḅe ḍuko ị̀ pịrị ye tẹ à ḍuko ọ́ pịrị-a ye ofori ẹrẹsị.

¹⁶Ọmịnị ị̀ sẹlẹ-ọkị-a, yẹrị rẹ ọ́ sẹlẹ-ọkị tẹ tọnm mịnẹ ó mu mgbọlụ sụa lama, anie sime ene la ḅarị mgbọlụ. Mie ḅụ ọmịnị ị̀ ẹrẹ ḅụ ḅii ye, ḅii ye, Ḍaḅọ ḅe anị kẹ ọ́ pịrị ḅa.

¹⁷Ọkọẹrẹsị, miemẹ mie à tọn ọ́ pịrị ye mẹ, mịnẹ ọ́ jụmọ-jụmọ ḅẹlẹmaa.

¹⁸“Tomikiri ḅẹ atomi ó ḍiki-ḅioḅuarị ḅẹḅẹ, ọ́ paa kẹ ḅiokoroma mịnẹ ịn tarị ì ḍiki-ḅioḅu tẹ.

¹⁹Ó sime tomikiri mẹ pịrị namịna mimgbe ini ọ́ ḅẹlẹma tẹẹ, sime tomikiri mẹ pịrị apụ ḅara ḅụ. Kụma à tomikiri mẹ ḅụ ọ́ sẹlẹ-ọkị tẹ ẹrẹsị ọ́ ḅarị sime tomikiri mẹ pịrị-a. Anie mie tomikiri mẹ gotẹ ó ḍiki-ḅioḅuarị ye.

²⁰À ḍuko ọ́ pịrị tẹ ye mẹ ọ́ nwẹn kẹ ḅiokoromaa. Gbọrụ omoniḅọ sọ amịna nyanaḅọ nẹngị nẹngị-a. Ịn ḅaa-ḅọkọ kẹ ị̀ ḍọkịm ḅẹḅẹ, ịn pịkị ḅaa-ḅọkọ kẹ ọmịnị sọ ḍọkị ḅa; ini ì tolumaye mẹ ḍuko ḅara mịẹm ḅẹḅẹ, ịn pịkị ọmịna nye ḍuko ḅara sọ mịẹ ḅa.

²¹Kụma ó sime ị̀ pịrịm ẹrẹsị ịn mịna aị mamgba kẹ ọ́ mịẹ ḅa, ini ị̀ kẹ fịrịmaḅọ ḅe nimi-a gotẹ.

²²Mimgbe in ḅẹrẹ-ḅarasii nyana-a so tẹ à ḅo ẹkwẹn ịn pịrị-a namịna; mịọkụ anị sime-ḅara ḅụ ịn ḅarị gotẹ so ḅẹ ye nyana-a ịna si ḅụ.

²³Ì ḍiki-ḅioḅuarị ḅọ goḅọ-goḅọ pịkị ị̀ Ḍa ḅe sọ ḍiki-ḅioḅuarị.

²⁴Ịna ogboku à kọrị, jene-jene jụmọ amụ kọrị-a kọrịnama mẹ ofori namịna, mimgbe in ḅẹrẹ-ḅarasii nyana-a apụ sọ tẹ; mịọkụ anị sime-ḅara ḅụ ini à kọrị ye mẹ ẹrị tẹ paa ḍụkụ-a tẹ yẹrị na ị̀ Ḍa ḅe na ḍiki-ḅioḅuarị.

²⁵Anị sime-ḅara, sime-ḅara sọ, miemẹ paka-a so ḅịa, mịẹtẹ ịna oloko ḍiri ḅio kẹẹ wararị ye mẹ karakara ye sọ ḅẹ ḅara, ‘Ini à gberie sọ mịẹ-a ḅara ḅụ ì ḍiki-ḅioḅum.’

²⁶“Ḅarasụaḅọ ḅe ḅo ḅa — Tẹmẹ ḅe, ori anie Tamụnọ gboloma karakara mẹ mịẹfinji ḅẹ ḅọ ḅee, tẹ Ḍaḅọ ḅe ḅụ ọ̀ paka-ḅoarị. Àrị ị̀ Ḍa ḅe ḅara ḅụ ọ̀ kẹ ọ́ fịrịma tẹ ori ì gboloma ye ḍuko ḅa,

²⁷tẹ ọmịnị sọ pịkị ì gboloma ye ḍuko ḅa, sukuyọ-saakị ḅụ ọmịnị ị̀ na sime tẹ ẹrẹsị.