Read kalabari Jọnị 16 Bible Online

Jọnị 16 - kalabari bible

Jọnị 16

¹“Ọmịna minini ọmịna ḅụụ ḅio so ḅịa ḅara mie à gotẹ miemẹ ḍuko ọ́ pịrị ye.

²Ama-awarị ma ḅio ini ó dee pakama ḅa, tẹ sakị ḅo ḅa, tẹ ọ́ ḅaa ḅọ, ḅaa ḅọ ọkị ḅa mịnẹ mḅọ mie mịẹarị ye ḅụ mḅọ fịrịmẹnjị Tamụnọ pịrịarị.

³Tomi gotẹ mịna aị ma kẹ ọ́ mịẹ ḅarịye ịn Ḍaḅọ ḅe nimi-a, pịkị yẹrị sọ.

⁴Kụma à miemẹ ḍuko ọ́ pịrị tẹ, mịẹtẹ ịn mịna aị ma kẹ ọ́ mịẹ ḅẹ sakị mẹ ḅo la sakị ọ́ kẹ ḅiokoroma ḅa mịnẹ à tarị ḍuko ọ́ pịrị wẹrị tẹ. “Sukuyọ-saakị ḅụ à mịna aị ma ḍuko ọ́ pịrị-a, anị sakị àrị ọmịnị na emi ẹrẹsị.

⁵Kụma mịọkụ à so ị̀ kẹ fịrịmaḅọ ḅe ḍọkụma-muarị, tẹ ọmịna ḅụ gbọrụḅọ-sọ à muarị anga tọ-anga mọ kẹ ì gbela-a.

⁶Tẹ mịọkụ à ḍuko ọ́ pịrị tẹ ye mẹ mịẹtẹ kururu ọmịna aḅioḅẹngbọ sọ ḅin tẹ.

⁷Kụma à karakara mẹ ḍuko ọ́ pịrịarị: à so mẹ iḅi kẹ ọ́ mịẹ àrị ọmịnị na sime nẹngị ḅa, anie à sọ-a kụma Ḅarasụaḅọ ḅe ḅo ọ́ pịrị ḅịa ẹrẹsị. À so kụma anị sakị rẹ àrị ọ̀ kẹ ọ́ fịrịma ḅa.

⁸Tẹ ò ḅo sakị ọ̀ mịẹtẹ tomikiri ḅẹ atomi ma lekiri ḅa mịnẹ ịn tọkọrọ tẹ si gboloma ye ḅụ, pịkị karakara mẹ gboloma ye ḅụ na, Tamụnọ ḅẹrẹkọn gboloma ye na ḅụ.

⁹Ịn tọkọrọ tẹ si gboloma ye ḅụ, anie ini ì minini-a ẹrẹsị;

¹⁰karakara mẹ gboloma ye ḅụ sọ ịn tọkọrọ tẹ, anie à so Ḍaḅọ ḅe ḍọkụma-muarị, tẹ ọ́ ḅarị jen kẹ ị̀ ẹrị ḅịa ẹrẹsị;

¹¹tẹ pịkị ḅẹrẹkọn gboloma ye mẹ ḅụ sọ ịn tọkọrọ tẹ, anie mị tomikiri mẹ ḅẹ ḅẹrẹtọnḅọ ḅe, Anịngẹ-kụraḅio ini ọ̀ kọn tẹ ẹrẹsị.

¹²“À tọnwa jaị nyana tẹ ḍuko ọ́ pịrị ḅẹm, kụma mịọkụ mẹ ḅụ ḅaka ḅa ọ́ jaị naa kụma.

¹³Anịsọ Tẹmẹ ḅe, tẹ Tamụnọ gboloma karakara mẹ mịẹfinjiarị ḅọ ḅe, ḅo sakị, Ori ọ́ kẹ mu bebe karakara mẹ ḅio suu ḅa. Ori ọ̀ ḅara-kuḅu ḅẹ kụrọ kẹ ẹkwẹn ḅịa, kụma ọ̀ naa ye mie ò ḍuko ḅarịye, tẹ pịkị tọrọkọ-jụ paka ḅarị aị sọ ḍuko ọ́ pịrị ḅa.

¹⁴Ọ̀ mịẹtẹ àrị ebube nyana ḅa, anie ori yẹrị ḍuko ye ọkị ḍuko ọ́ pịrị ḅẹ ẹrẹsị.

¹⁵Ị̀ Ḍa ḅe nyana ye, nyana ye ì nye, anie mie à gotẹ ḅẹẹ ye mịnẹ Tẹmẹ ḅe à kẹ ọ̀ pịrị ḅarị ye ọkị ḍuko ọ́ pịrị ḅa.

¹⁶“Boowa kala-sakị ḅụ ọ́ ḅarị jen kẹ ị̀ ẹrị ḅịa, tẹso, boowa kala-sakị ḅọrọ tẹso, ọ́ pịkị ị̀ ẹrị ḅa.”

¹⁷Ò ḍukamẹnjịapụ ma ḅẹ ja apụ nwẹnị jụmọ-jụmọ gbela, “Miemẹ ḅọrọ tiye fiearị? Ọ̀ wa ḅẹẹarị mịnẹ ḅo-a kala-sakị ḅụ wa ḅarị ori ẹrị ḅịa, tẹso, boowa kala sakị ḅọrọ tẹso, sakị wa pịkị ori ẹrị ḅa; tẹ ọ̀ pịkị ḅẹẹarị, ‘Anie à so Ḍaḅọ ḅe ḍọkụma-muarị ẹrẹsị.’

¹⁸Mie ‘boowa kala-sakị’ mẹ ḅọrọ tiye fiearị? Ò ḍukoarị ye tiye-o, tiye-o wa nimi-a.”

¹⁹Jizọsị nimim mịnẹ ini ò gbela ḅẹ ḅiim ḅẹ sakị ori ịn ḅẹẹm, “À ḅẹẹm, ‘Boowa kala-sakị ḅụ ọ́ ḅarị ị̀ ẹrị ḅịa, tẹso, boowa kala-sakị ḅọrọ tẹso, ọ́ pịkị ị̀ ẹrị ḅa.’ Miemẹ gboloma ye mie ọ́ kẹ jụmọ-jụmọ gbelarị ye, anị-a?

²⁰À karakara mẹ ḍuko ọ́ pịrịarị: ọmịnị owu tẹ owu-aminji ọmịna atọrụ sara ḅa, kụma tomikiri ḅẹ atomi ḅioḅẹlẹ ḅa; ó kururu ḅa, kụma ọmịna kururu mẹ pịkị-ḅo ḅioḅẹlẹ sọ ḅa.

²¹Iyi la tẹ ẹrẹḅọ kururu sime á pịrịm, á tọrụsiẹrị sakị la tẹ ẹrẹsị; kụma á tụḅọ mẹ iyi koroma tẹ ḅẹḅẹ arị á tọrụsiẹrị mẹ kẹ ḅioḅọrọma tẹ, anie á tụḅọ iyi tomikiri koroma tẹ mẹ ḅẹ ḅioḅẹlẹ mẹ ẹrẹsị.

²²Anie anị ọmịnị na sime-ḅara: mịọkụ ó kururuarị, kụma à pịkị sin ọmịnị ẹrị ḅa, anịsakị ḅioḅẹlẹ ọmịna aḅioḅẹngbọ sọ ḅin ḅa, anie gbọrụḅọ-sọ inetẹ ọmịna ḅụ sin ọkị ḅịa ḅioḅẹlẹ.

²³“Anị ene mẹ ḅụ, ọmịnị ị̀ ḅara gberie-sọ ḅii ḅịa. À karakara mẹ ḍuko ọ́ pịrịarị: Ḍaḅọ ḅe ị̀ ẹrẹ ḅụ ọmịnị ọ̀ ḅara ḅii ye, ḅii ye kẹ ọ́ pịrị ḅa.

²⁴Ọkị ḅo mịọkụ la sọ amụ ó gberie-sọ ḅii-a ị̀ ẹrẹ ḅụ; ó ḅii, ọ́ nyana ḅa, mịẹtẹ ọmịna ḅioḅẹlẹ mẹ busunu ḅarị ḅara.

²⁵“Egberima-ẹkwẹn ḅụ à mịna aị ma ḍuko ọ́ pịrị tẹ. Kụma sakị ḅo ḅa anie à ḅarị egberima-ẹkwẹn kọn ọ́ pịrị ḅịa sakị, tẹ giregire ḅara kẹ Ḍaḅọ ḅe gboloma ye ḍuko ọ́ pịrị ḅẹ sakị mẹ.

²⁶Anị ene mẹ ḅụ, ọmịnị ị̀ ẹrẹ ḅụ ọ̀ ḅara ye ḅii ḅa; àrị ọ́ ḅẹẹ-a mịnẹ àrị ọ̀ ḅara ye ḅii ọ́ pịrị ḅa;

²⁷Ḍaḅọ ḅe ḅioju ọ́ ḅẹlẹmarị. Ò gotẹ ọ́ ḅẹlẹmarị ye anie ọmịnị ị̀ ḅẹlẹmarị tẹ minini tẹ mịnẹ Tamụnọ ḅụ à sime tẹ ḅom.

²⁸Ḍaḅọ ḅe ḅụ à sime tẹ mị tomikiri mẹ ḅom; tẹ mịọkụ à tomikiri mẹ koroma soarị, à so Ḍaḅọ ḅe ḍọkụma-muarị.”

²⁹Anịtẹso ò ḍukamẹnjịapụ ma nwẹnị ọ̀ ḅẹẹ, “Mịọkụ í giregirema ẹkwẹn tẹ, ị́ ḅarị egberima-aị kẹ sụa-a.

³⁰Mịọkụ wa nimi tẹ mịnẹ ye goyegoye í nimi fama wararị. Kịnị ye kẹ í gbela tẹrẹmẹ í ye ḍuko na-iḅi-a. Miemẹ mie wa gotẹ mininiarị ye mịnẹ Tamụnọ ḅụ í sime tẹ ḅom.”

³¹Jizọsị nwẹnị ịn pakịrị, “Mịọkụ ó minini tẹ?

³²Sakị mẹ ḅoarị, mịọkụ sọ anị ḅo la tẹ, anie ọmịnị-mgba gala-gala fama ḅarị sakị mẹ, tẹ ọrụ warị-warị mu tẹ yẹrị ngẹrị kọn ḅẹ sakị mẹ. Kụma tomi-juḅẹye, yẹrị ngẹrị ofori, Ḍaḅọ ḅe na ị̀ na emi ẹrẹsị.

³³À miemẹ ḍuko ọ́ pịrị tẹ, mịẹtẹ ọmịnị ị̀ ḅụ oḅolo sime tẹ dein nyana ḅarị ḅara. Tomikiri ḅẹ atomi ọ́ kẹ tọrụsiẹrịma ḅa. Kụma ó ḅiokpọọ! À tomikiri mẹ nẹngịma tẹ!”