Read kalabari Jọnị 3 Bible Online

Jọnị 3 - kalabari bible

Jọnị 3

¹Juu-ḅẹ gbọrụ opuḅọ simem, ori ẹrẹ Nikodimọsị, ori Farịsiiḅọ.

²Gbọrụ ḍin ḅụ ọ̀ Jizọsị dama-mu tẹ ọ̀ ḅẹẹm, “Rabayị, wa nimim anie Tamụnọ ḅarana kẹ fịrịma ye-tolumaḅọ. Gbọrụḅọ-sọ inetẹ ị́ mịẹarị ḅụụ-buama-aị ma mịẹ ḅịa Tamụnọ mḅọ na emi sikima tẹ.”

³Tẹ Jizọsị nwẹnị ọ̀ ḅẹẹ, “À karakara mẹ ḍuko ị́ pịrịarị, siin iyi-a tẹ inetẹ Tamụnọ Ama-da mẹ ḅẹ iḅi ẹrị ḅẹ ḅọ ofori.”

⁴Nikodimọsị nwẹnị gbela, “Ndẹẹ omongitẹḅọ ḅo sin iyi ḅarị ḅara? Mḅọ ḅarị inetẹ maa sakị kẹ mḅọ iyingiḅọ furo ḅio sọ tẹ árị mḅọ iyi koroma ḅịa gbamasom!”

⁵Jizọsị nwẹnị pakịrị, “À karakara mẹ ḍuko ị́ pịrịarị mịnẹ minji na Tẹmẹ ḅe na ḅụ ḅọrọtẹ siin iyi-a ḅọ inetẹ Tamụnọ Ama-da mẹ ḅẹ iḅi ẹrị ḅịa.

⁶Meni oju ḅụ, ḍaḅọ-na-iyingiḅọ-na ḅụ mie tomḅọ ḅọrọ tẹ iyiarị ye; kụma tẹmẹ ḅụ, Fịafịa Tẹmẹ ḅe ḅụ mie tomḅọ ḅọrọ tẹ iyiarị ye.

⁷Àrị ‘í siin iyi ḅa’ kẹ ị́ ḅẹẹ ye mẹ ị́ ḅụụ-buama ma, ọmịnị-mgba ó siin iyi-a so ḅịa.

⁸Fẹrụ mẹ anị ḅiotọn anga, tọn anga mie anị fiema muarị ye, tẹ í ḅeri kẹ anị naarị, kụma anị fiema paka-ḅoarị anga na anị fiema muarị anga na í nimi-a. Anie anị pịkị sime Tẹmẹ ḅe ḅụ iyi ḅọ, iyi ḅọ pịrị ḅara.”

⁹Nikodimọsị nwẹnị gbela, “Ndẹẹ miemẹ inetẹ mịẹ ḅẹ ḅara?”

¹⁰Jizọsị nwẹnị pakịrị, “Ị́yẹrị Izirẹlị ḅụ opu ye-tolumaḅọ tẹ miemẹ nimi-a?

¹¹À Karakaraye mẹ ḍuko ị́ pịrịarị, wa nimi ye mie wa ḍuko ọ́ pịrịarị tẹ wa ẹrị ye mie wa kẹ ó ḍiearị, anịsọ ọmịna ḅụ gbọrụḅọ-sọ minini tẹ wamịna oku mẹ daa-ọkịa.

¹²À tomikiri ḅẹ aị ḍuko ị́ pịrị tẹ í minini-a sakị, ndẹẹ à So-ḅio ḅẹ aị ḍuko tẹ ị́ kẹ arị minini ḅarị ḅara?

¹³Nimi mịnẹ Tomḅọ Tụḅọ ḅe, tẹ So-ḅio koro ḅo ḅọ ḅe sikima iwo So mu tẹ gbọrụḅọ-sọ ofori.”

¹⁴Mozizi ịkpa mẹ ḅio ojo kẹ tẹmẹ ododo ḅe saakị gelema ḅara anie ịn pịkị Tomḅọ Tụḅọ ḅe saakị-gelema ḅarị ḅara,

¹⁵mịẹtẹ ọ̀ ḅụụ minini ḅọ, minini ḅọ sime gbamaso ḍumo nyana ḅarị ḅara.

¹⁶Tamụnọ kẹ tomikiri mẹ ḅẹlẹma la ḅara mịẹtẹ ori ọ̀ kpọkpọ gbọrụ Tụḅọ ḅe saakị pịrịm, tẹ ọ̀ ḅụụ minini nyana ḅọ, nyana ḅọ, ḅarị fịị fa ḅịa tẹ sime gbamaso ḍumo nyana ḅẹ ḅara.

¹⁷Tamụnọ tomikiri mẹ kọn ḅẹ ẹrẹsị ọ̀ Tụḅọ ḅe kẹ fịrịma-a, kụma ori anị ḅọrọma ḅẹ ḅom.

¹⁸Tụḅọ ḅe minini ḅọ, minini ḅọ ịn ḅẹrẹ-ḅarasii pẹlẹ mḅọ pịrị ḅịa; kụma ó minini-a ḅọ, minini-a ḅọ ịn Tamụnọ gbọrụ Tụḅọ ḅe minini-a mẹ ḅẹ ḅẹrẹ-ḅarasii pẹlẹ mḅọ pịrị tẹ.

¹⁹Mie ḅẹrẹkọn mẹ simearị ḅara; bele tomikiri mẹ ḅo tẹ, kụma tomi kanakana rẹ ḅẹlẹma bele mẹ nẹngị tẹ, ịn mịẹarị aị ma si amịẹaị ẹrẹsị.

²⁰Si amịẹaị mịẹarị ḅọ, mịẹarị ḅọ bele mẹ ḍiki-ḅioḅuarị, tẹ mḅọ anị ḅio sọ, sọ-a, mḅọ ḅii ḅịa mịnẹ tomi mḅọ si amịẹaị ma ẹrị.

²¹Kụma karakara mẹ mịẹarị ḅọ, mịẹarị ḅọ bele mẹ ḅio sọ-muarị, mịẹtẹ tomi ẹrị mịnẹ mḅọ Tamụnọ ḅịḅị poki amịẹaị mịẹm.

²²Miemẹ ḅọrọ tẹso, Jizọsị na ò ḍukamẹnjịapụ ma na nwẹnị Judiya ibe mu, tẹ anịanga kẹlẹ sime, tẹ minji kẹ kịnị sara.

²³Anị sakị ḅụ Jọnị sọ Salimu na kpeki anga tẹ ịn kẹ Ahinọnị sịn gbọrụ ama ḅụ sime tẹ minji kẹ kịnị saram, anịanga minji emi lamam gotẹ. Tomi ò dama-mu mu tẹ ò minji kẹ ịn saram.

²⁴(Nwẹn ḅẹẹarị sakị mẹ amụ ịn Jọnị kẹ ikoli ḅio suu-a.)

²⁵Jọnị ḍukamẹnjịapụ na Juu-ḅẹ gbọrụḅọ na nwẹnị ini ama-anganga-ḅara ḅụ ḅụụ sịkịrị fịafịama mịẹye gotẹ ye-nụnụa.

²⁶Mie ḅụ ịn nwẹnị mu ḍuko Jọnị pịrị, “Ye-tolumaḅọ, Jodanị tọrụ ḅụ ịrụa saakịarị anga ị́ na sime tẹ ị́ ḅụụ ḅụ ye ḍuko wa pịrị ḅọ ḅe, ị́ ọ̀ kẹ ḅiokoroma? Mịọkụ ori sọ minji kẹ kịnị sararị, tẹ tomi mamgba ọ̀ dama-muarị.”

²⁷Jọnị nwẹnị pakịrị, “Tamụnọ ḅara ḅo-a tẹ tomḅọ inetẹ nyana ḅẹ ye ofori.

²⁸Ọmịnị sọ nimi ḅara ḅụ, à ḅẹẹm, ‘Yẹrị Mẹsaya ḅe-a, kụma Tamụnọ ị̀ kẹ ọ̀ tọrọkọ tarị fịrịmam.’

²⁹Ini ịyarị ẹrẹḅọ ma á sime á di ḅe pịrịm; á di ikiaḅọ ḅe nyana ye anie sịẹsime tẹ poki; ori ere-ịyaḅọ ḅe pọkọ naa tẹ ḅẹḅẹ, ò ḅioḅẹlẹ tẹ. Mị-ḅara mie ì ḅioḅẹlẹ mẹ ḅo bebe ye sọ tẹ ḅara.

³⁰Tomi ori opu nimi ma-muarị ḅara mie yẹrị sọ iderima ma-mu ḅarị ḅara.”

³¹So-ḅio ḅo ḅọ ḅe ḍụḅa kịnị mamgba nẹngịm; tomikiri ḅẹ ḅọ ḅe sime tomikiri pịrịm tẹ tomikiri ḅẹ aị mie mḅọ ḍukoarị; kụma So-ḅio ḅo ḅọ ḅe, kịnị mamgba nẹngịm.

³²Ori ẹrị ye na ọ̀ naa ye na mie ò ḍukoarị, anịsọ ori oku mẹ mininiarị ḅọ ofori.

³³Kụma Tamụnọ oku mẹ daa-ọkị ḅọ, ọkị ḅọ ḍie-pakamarị mịnẹ Tamụnọ ḅe ọ̀ karakaraye ḍukoarị.

³⁴Tamụnọ kẹ fịrịma ḅọ ḅe, Tamụnọ ọ̀ Tẹmẹ kẹ ọ̀ ḅụụ ḅio suu ḅinma wararị ẹrẹsị, Tamụnọ ẹkwẹn ma mie ọ̀ kọn-arị.

³⁵Ḍaḅọ ḅe ọ̀ Tụḅọ ḅe ḅẹlẹmarị, tẹ pịkị ye goyegoye ḅẹ kụrọ saakị ọ̀ pịrị tẹ.

³⁶Tụḅọ ḅe minini ḅọ, minini ḅọ sime gbamaso ḍumo nyanam; Tụḅọ ḅe ḅịḅị kan ḅọ, kan ḅọ ḍumo nyana ḅịa, kụma mḅọ Tamụnọ fomu-ḅara ḅio sọ tẹ.