Read kalabari Fịrịmẹnjịapụ 12 Bible Online

Fịrịmẹnjịapụ 12 - kalabari bible

Fịrịmẹnjịapụ 12

¹Miemẹ mịẹ sakị anie Ama-da Ẹrọdị saakị ḅaa-ḅọkọ kẹ sọsị mẹ ḅẹ ja apụ ḍọkị sakị.

²Ori okologie kẹ Jọnị iyimbere Jemusị ḅaam.

³Ò ḅo ẹrịm mịnẹ ọ̀ mịẹ ye mẹ Juu-ḅẹ-apụ ma ḅioḅẹlẹmam ḅẹ sakị, ọ̀ pịkị Pita sọ kunm. (Sun-a Fịturu Alalị sakị mẹ ḅụ anie miemẹ mịẹ ye.)

⁴Ò Pita kun tẹso, ori ọ̀ kẹ ikoli-warị ḅio wẹrị tẹ ọ̀ kẹ inia ọmụapụ ogbo ḅara sụam, gbọrụ ogbo inia ọmụapụ, inia ọmụapụ. Ẹrọdị tọn ḅara, Saḅaḅọrọ-Alalị mẹ fị ḅọrọ tẹ ḅẹḅẹ ori ọ̀ pakama-ḅo tẹ ama-ogbo ḅụ ọ̀ kọn ḅẹ ḅara.

⁵Mie in Pita kẹ ikoli-warị ḅio wẹrị ḅara, tẹ sọsị mẹ ḅẹ apụ ma tẹmẹ-la ḅara kẹ Tamụnọ tẹkẹ ọ̀ pịrịm.

⁶Finji tẹ Ẹrọdị Pita pakama-ḅo tomi ma pịrị ḅẹ ḍin mẹ ḅụ, ịn maa ikoli kẹ Pita ịkasị tẹ ọ̀ kẹ maa ọmụapụ ogboku monomam, tẹ ikoli-warị mẹ ḅẹ ogigo-ḅọkọ mẹ ḍikiḍikiapụ sọ sime tẹ korum.

⁷Ḅiotọn-a ḅara ḅụ KỊNỊNYANAḄỌ ḅẹ enjẹlị tolu-paka-ḅo sịẹ, tẹ bele nwẹnị ikoli-warị mẹ ḅio ḅịya. Enjẹlị ḅe nwẹnị Pita apana ḅụ ò jike saakị tẹ ḅẹẹ, “Fọnya! Saakị sịẹ!” Anị gbọrụ kiri ịn kẹ ori aḅara ịkasị ikoli ma nwẹnị sin sara.

⁸Anịtẹso enjẹlị ḅe nwẹnị ọ̀ ḅẹẹ, “Í ḅiri pono kụrọmaa, tẹ í okuro ọkị sụa.” Pita ọkọ mịẹ tẹso enjẹlị ḅe nwẹnị pịkị ọ̀ ḅẹẹ, “Í opu kapa ọkị sụa tẹ ì ḍuka-ḅoo.”

⁹Pita nwẹnị ò ḍuka ikoli-warị mẹ ḅio pakaa, enjẹlị ḅe mịẹ ye mẹ tomikiri ḅo ḅara ò nimi-a; ọ̀ sịnm ḍawọ-jụ.

¹⁰Ịn nwẹnị tarị ọmụapụ ma koru sime anga ḅọrọ, ḅo maaịn karama apụ ḅọrọ, tẹ ḅo ikulele ogigo-ḅọkọ mẹ la, anie tolu-ḅọrọ tẹ opu ama mẹ ḅio sọ, sọ ḅọkọ mẹ. Ḅọkọ mẹ nwẹnị ngẹrị amịna ḅụụ finji ịn pịrị tẹ ịn ḅọrọ paka. Ịn gbọrụ etela mẹnjị ideri koro tẹso enjẹlị ḅe nwẹnị ḅiotọn-a ḅara kẹ Pita koroma-so.

¹¹Anịtẹso Pita ọ̀ ḅụụ paka ye mẹ lekiri tẹ ḅẹẹm, “Mịọkụ mie à nimi tẹ ye mịnẹ, miemẹ karakara ye! KỊNỊNYANAḄỌ ḅe ori enjẹlị fịrịma ḅo Ẹrọdị kụrọ ḅara-ḅio na, Juu-ḅẹ-apụ ma ḅiim ị̀ ḅụụ paka ḅẹ aị na ḅio ị̀ pụkọ-pakamaḅo tẹ.”

¹²Ò ye ori na sime-ḅara nimi ḅara ḅụ Pita nwẹnị so Jọnị Makị iyingi Meri warị mu, tọnwa-apụ kobiri tẹ tẹkẹ sime anga mẹ.

¹³Pita nwẹnị etela anga ḅẹ ḅọkọ mẹ ḅakụ, tẹ fịrịmẹnjị-ẹrẹḅọtụḅọ, tẹ Roda nwẹn-sịn ḅọ, nwẹnị ḅịḅị ọkị ḅẹ mu.

¹⁴Á ḅo Pita pọkọ lekiri tẹso, ḅioḅẹlẹ ḅụ á ḅarị ḅọkọ mẹ finji-a, tẹ nwẹnị tarị mangị pịkị mu ḍuko mịnẹ Pita etela anga sịẹ wararị.

¹⁵Ịn nwẹnị á ḅẹẹ, “Ị́ nọmụarị!” Kụma á kẹ anị karakaraye ḅara ḍuko kụrọma ḅara gotẹ ini mẹẹ, “Ẹbịsịya ori enjẹlị ḅa!”

¹⁶Anị sakị mamgba Pita paa ḅọkọ mẹ ḅakụarị. Kunoma ḅụ in ḅo finji tẹ ori ẹrị sakị ịna ḅụụ-buam.

¹⁷Ọ̀ nwẹnị ḅara kẹ in dedema mịnẹ ịn yaụ-simee, tẹ ọ̀ nwẹnị KỊNỊNYANAḄỌ ḅe kẹ ikoli-warị mẹ ḅio ọ̀ pakama-ḅo ḅara mẹ ḍuko ịn pịrị, tẹ nwẹnị fịrịma mịnẹ in mu ḍuko Jemusị na kirikọn Jizọsị minini apụ ma na pịrịị; tẹso, ọ̀ ḅọrọ so jen anga mum.

¹⁸Ene ḅo ḅaa sakị, tiye Pita la tẹ ḅoto ḅẹ kuroma nwẹnị ḅo ikoli-warị ḍikiḍikiapụ ma ḅio pikirima.

¹⁹Ẹrọdị kịnị tọnm in mu ọ̀ ḍọkịị, kụma ini inetẹ ọ̀ ḍọkị-ẹrịa. Mie ḅụ ọ̀ nwẹnị ḅẹrẹ kẹ ikoli-warị ḍikiḍikiapụ ma sịḅị sẹịn tẹ tọn mịnẹ ini ịn ḅaa. Anịtẹso Ẹrọdị Judiya ḅụ so mu Sizariya ḅụ kẹlẹ simem.

²⁰Ẹrọdị kpọma ịganị nyana Taya na Sayịdọnị na ḅẹ apụ pịrịm, tẹ ịn nwẹnị kpoo ḅụ ori na ẹrị-a ḅẹ mu. Tarị ye tẹ ịn mịẹ ye, ini amadaḅọ opu warị mẹ ḅẹ ḅio-koruḅọ, Bilasitọsị nwẹn-sịn ḅọ, fẹẹ ịna aḅụụ pịrịm, ọ̀ ḅarasụa ịn pịrị ḅẹ ḅara. Anịtẹso ịn nwẹnị Ẹrọdị dama-mu tẹ ḅii mịnẹ ori ini na dein mịẹ; in gotẹ ọkọ ḅii ye, ọ̀ daarị sịẹ mẹ ḅụ mie ịna sịẹ fịaị nyana tẹ fẹ arị ye.

²¹Ḅo ịn tọn ene la tẹso, Ẹrọdị nwẹnị ori ama-da ḅiriaị ḅiri, tẹ ḅo ori emine ọgọnọ lẹgị, tẹ ẹkwẹn tomi ma pịrị.

²²Tẹ tomi ma nwẹnị oloku, “Mie tomḅọ pọkọ-a, kụma tamụnọ pọkọ!”

²³Anị gbọrụ kiri KỊNỊNYANAḄỌ ḅe enjẹlị nwẹnị Ẹrọdị fomu gbin, ọ̀ kụn kẹ Tamụnọ pịrị-a ẹrẹsị. Angule nwẹnị ọ̀ pẹị ḅaa.

²⁴Arị aị ma mịẹarị sakị mamgba Tamụnọ ẹkwẹn mẹ wasama wasama tẹ loloarị.

²⁵Anịsakị Banabasị na Sọlụ na Jeruselemu ḅụ in gotẹ mu ye mịẹ fama tẹ pịkị-so ḅẹ tẹ Jọnị Makị ọkị som.