Read kalabari Fịrịmẹnjịapụ 18 Bible Online

Fịrịmẹnjịapụ 18 - kalabari bible

Fịrịmẹnjịapụ 18

¹Miemẹ ḅọrọ tẹso, Pọlụ ḅe Atẹnịsị ḅụ so Kọrịntị mum.

²Anịanga ḅụ ọ̀ nwẹnị Akịwila nwẹn-sịn gbọrụ Juu-ḅẹ-ḅọ na bịama, Pọnịtịyọsị ḅụ iyi ḅọ; Romu tomikiri mẹ da sime ḅọ, Kịladịyọsị, tọnm Juu-ḅẹ-apụ mamgba Romu ḅụ so ẹrẹsị ori ọ̀ ta Pirisila na Italị ḅụ so Kọrịntị ḅo tẹ amụ ala-a. Pọlụ nwẹnị toluma in ḍiki ḅẹ mu,

³tẹ ini na sime tẹ kọrịnama kọrị gboloma, ini na ori na gbọrụ kọrịnama ḅara kọrị tẹ kẹ anga angam ẹrẹsị. Ori Pọlụ ḅe akpụrụ-warị nama ḅịtẹ mie ò gbin-gbin yee, anie pịkị ini sọ kọrị-kọrị yee.

⁴Ịnyọsara-Ene goyegoye ò mu, mu tẹ Juu-ḅẹ-apụ ama-warị mẹ ḅio ini na Girisi ḅẹ apụ na, na ḅịḅị-ọkịya tẹ ini ẹkwẹn pịkị ḅẹ ḍọkị ḍọkịm.

⁵Sayịlasị na Timoti na Masidoniya ḅụ sime tẹ ḅo la tẹso, Pọlụ nwẹnị gbọrsịḅị ọ̀ sakị mamgba kẹ oku mẹ ḍuko Juu-ḅẹ-apụ ma pịrị mẹ pịrị, mịnẹ Jizọsị anie Mẹsaya ḅe.

⁶Ini ori na tụḅụrụ tẹ si ḅịḅị kẹ ọ̀ ḅẹẹ sakị, kẹ in ḍie mịnẹ ịn mịẹ ye mẹ ò gboloma-a ḅẹ ye ḅụ, ori ọ̀ kapa ḅẹ fọọn gugu sara tẹ ịn ḅẹẹm, “Ọ́ ḅọrọma-a ḅẹḅẹ, onyo mẹ ọmịna ọgọnọ emi. Yẹrị ị̀ ḅẹrẹ-a. Mịọkụ saakị tọrọkọ mu à so Ja asịẹ ḅẹ apụ ma dama-mu ḅa.”

⁷Mie ḅụ ori in koroma-so tẹ mu Titiyọsị Jusutusu nwẹn-sịn jen sịẹ ḅẹ ḅọ warị angam, ori Tamụnọ tẹkẹ-tẹkẹ ḅọ, ọ̀ warị pịkị ama-warị mẹ na kpeki wararị.

⁸Kirisipọsị, ama-warị mẹ ḅẹ sịḅịdaḅọ ḅe na ọ̀ warị ḅẹ apụ mamgba na KỊNỊNYANAḄỌ ḅe mininim, tẹ Kọrịntị ḅẹ tọnwa ja apụ sọ oku mẹ naa tẹ, minini tẹ in minji kẹ ịn saram.

⁹Gbọrụ ḍin ḅụ Pọlụ ịkịan ẹrịm, KỊNỊNYANAḄỌ ḅe ọ̀ ḅẹẹm, “Ḅalafa ma, ị́ nwẹn ẹkwẹn-arị ḅara mẹ kẹ ẹkwẹnma muu, ịnyọ ị́ tama,

¹⁰kẹ gotẹ ọkọ ḍukoarị, àrị ị́ na emi. Gbọrụḅọ-sọ inetẹ ye kẹ ị́ lama ḅịa, kẹ gotẹ ọkọ ḍukoarị, mị ama mẹ ḅio tọnwa atomi sime ị́ pịrị wararị.”

¹¹Mie ḅụ Pọlụ anị ama gbọrụ kụra na pakịrị na sime tẹ Tamụnọ ẹkwẹn mẹ kẹ tomi ma tolumam.

¹²Romu ḅẹ apụ Galiyo kẹ Akaya ḅẹ Ḅẹrẹtọnḅọ mịẹ tẹso, Juu-ḅẹ-apụ ma ḅiya tẹ Pọlụ kun tẹ kẹ ọ̀ ḅẹrẹkọn warị mum.

¹³Ini mẹẹ, “Ḅị tomḅọ ḅe tomi ma tolumarị mịnẹ ini oloko mẹ na tụḅụrụ wararị ḅara kẹ Tamụnọ tẹkẹẹ!”

¹⁴Pọlụ ẹkwẹn ḅẹ-yearị ogbo Galiyo Juu-ḅẹ-apụ ma ḅẹẹm, “Miemẹ nwẹnị siye, anịanịa kura-aye tẹ ọ̀ mịẹ ye namịna anị iḅi ḅa mịnẹ à deinma tẹ ó poki, ọmịnị Juu-ḅẹ-apụ!

¹⁵Kụma papaa ẹkwẹn na, ẹrẹ na, ọmịna oloko na gboloma ịgbanịya ḅe sakị, ó mu ḍikitẹ ḍukoo, yẹrị ma-ma ḅẹ ḅẹrẹkọnḅọ sọ ḅịa.”

¹⁶Tẹ ọ̀ nwẹnị ḅẹrẹkọn warị mẹ ḅio in dee-pakama.

¹⁷Inimgba nwẹnị ama-warị mẹ sịḅịdaḅọ, Sosịtinisi kun tẹ ḅẹrẹkọn warị mẹ tọrọkọ ḅụ ò fomu. Kụma anị kẹlẹ sọ kẹ Galiyo tẹmẹ jike-a.

¹⁸Pọlụ ḅe Kọrịntị ḅụ minini apụ ma na tọnwa aḍin sime tẹso, ori na Pirisila na Akịwila na nwẹnị in koroma tẹ so Siriya mu. Amụ ini arụ ḅụkụlọ-a ogbo ọ̀ Kẹnịkịrịya jụ ḅụ, ò minini Tamụnọ pịrị ḅara gotẹ, ọ̀ sịḅị sẹịn siinm.

¹⁹Tẹ in mu Ẹfisọsị la tẹso, Pọlụ nwẹnị Pirisila na Akịwila na koroma so. Ò mu ama-warị mẹ ḅio ḅẹ Juu-ḅẹ-apụ ma na ḅịḅị-ọkịyam.

²⁰Tomi ma ḅiim ò sime alama ò ḅiotọn ḅara nẹngịị, kụma ọ̀ ḍụkụ-a.

²¹Anie nakara ò soarị sakị ori ịn ḅẹẹm, “Anị Tamụnọ ḅụụ-ḅẹlẹm ḅẹḅẹ, à pịkịma ọ́ ḍọkụma-ḅo ḅa.” Mie ḅụ ọ̀ nwẹnị Ẹfisọsị ḅụ arụ ḅụkụlọ tẹ so.

²²Ò mu Sizariya la tẹso, ò so Jeruselemu mu tẹ sịn-ḅịḅị kẹ sọsị ḅẹ apụ ma pịrịm, tẹ so Anịtọkụ mum.

²³Ori anịanga kẹlẹ sime tẹso, ọ̀ nwẹnị Galesiya na Firijiya na iri ma mu tẹ ịnyọ kẹ minini apụ mamgba pịrị.

²⁴Anị sakị mẹ ḅụ Apọlọsị nwẹn-sịn gbọrụ Juu-ḅẹ-ḅọ, tẹ Alẹkịzanịdịrịya ḅụ iyiḅọ, mu Ẹfisọsị lam. Ori ẹkwẹn kụrọ nyanam, anie ọ̀ pịkị Fịafịa Ḍiri mẹ ḍawọ ḍin lama ḅara.

²⁵Jen sakị ịn KỊNỊNYANAḄỌ ḅe Etela mẹ gbolomaye kẹ ó toluma tẹ, tẹ ọ̀ nwẹnị tẹmẹ-la ḅara kẹ Jizọsị gboloma aị ma ḍuko-pakama, tẹ karakara ḅara kẹ anị toluma. Anịsọ Jọnị minji sara mẹ kịngẹ mie ò nimi ye.

²⁶Ọ̀ nwẹnị saakị ḅalafa-a ḅara kẹ mu ama-warị mẹ ḅio ẹkwẹn. Tẹ Pirisila na Akịwila na ọ̀ naa tẹso, ịn nwẹnị ọ̀ kẹ warị mu tẹ Tamụnọ Etela mẹ ḅẹ karakara ḅara ḍuko finji ọ̀ pịrị.

²⁷Anịtẹso Apọlọsị nwẹnị tọn-pẹlẹ mịnẹ ori Akaya mu ḅa, mie ḅụ Ẹfisọsị ḅụ minini apụ ma nwẹnị, ḅarasụa ọ̀ pịrị ḅụ, ḍiri kẹẹ tẹ kẹ Akaya ḅụ minini apụ ma fịrịma tẹ ḍuko kụrọma mịnẹ ini ọ̀ daa-ọkịị. Ò mu laa sakị, ọ̀ kpọma ḅarasụa, Tamụnọ ḍiki-ḅụụjịrị ḅụ, ḅo minini apụ sọ tẹ apụ ma pịrị lamam.

²⁸Anị mịẹ ḅara ò mu Juu-ḅẹ-apụ ma na ama-ogbo ye-nụnụa kụrọma sakị ori ẹkwẹn mẹ kụrọ na, ọ̀ kẹ Fịafịa Ḍiri mẹ ḅio paka-ḅo aị na kẹ Jizọsị anie Mẹsaya ḅe nwẹn ḅẹẹ ye mẹ ḍuko giregirema ḅara mẹ na, mịẹtẹ ini inetẹ ò kuḅu sịẹ-a.