Read kalabari Fịrịmẹnjịapụ 25 Bible Online

Fịrịmẹnjịapụ 25 - kalabari bible

Fịrịmẹnjịapụ 25

¹Fẹsịtọsị ḅo anị ibe mẹ la tẹ tẹra aḍin ḅọrọ tẹso, ó Sizariya ḅụ sime tẹ Jeruselemu mum.

²Anịanga ḅụ agbamịẹapụ ma na Juu-ḅẹ-apụ ma ḅẹ sịḅịdapụ ma na nwẹnị ḅo ḅẹrẹ kẹ Pọlụ sịḅị sẹịn, tẹ ọ̀ tẹkẹ mịnẹ

³ọ̀ paa Pọlụ kẹ Jeruselemu ḅoo, anie ini etela ḅụ Pọlụ ḅaa ḅẹ tẹ ḅiya tẹ ẹrẹsị.

⁴Fẹsịtọsị nwẹnị pakịrị, “Pọlụ ḅe Sizariya jụ ikoli ḅio ori emi, tẹ yẹrị sọ ala-a sakị pịkịma-so anịanga mu ḅa.

⁵Yee ọmịna sịḅịdapụ ma ị̀ na Sizariya mu, tẹ tomḅọ ḅe mịẹ siye emi-emii ini anịanga ḅụ ḍuko ọ̀ sịḅị sẹịn.”

⁶Fẹsịtọsị nwẹnị anịanga jen nine anịanịa oyi aḍin kẹ ini na sime tẹrẹmẹ so Sizariya mu. Ò mu la tẹ ene-ḅaa ḅụ, ọ̀ nwẹnị ḅẹrẹkọn warị ḅio lẹgị-sime tẹ Pọlụ sịn ḅo.

⁷Pọlụ mu la tẹso, Jeruselemu ḅụ sime tẹ ḅo Juu-ḅẹ apụ ma tẹ ḅẹrẹ ḍuko ọ̀ sịḅị sẹịn ḅẹ apụ ma nwẹnị sịẹ ori ikelema tẹ saakị kụrọ kụrọtẹ aḅẹrẹ tan, tan ọ̀ sịḅị sẹịn, kụma arịḅẹ karakara sọ ini inetẹ ḍuko pakama ḅo-a.

⁸Kụma Pọlụ nwẹnị ọ̀ ḅụụ ḍụa: “À Juu-ḅẹ-apụ Oloko mẹ na tụḅụrụ gbọrụ siye sọ mịẹ-a, anịanịa Tamụnọ-warị mẹ sima ḅẹ ye, anịanịa Romu Tomikiri mẹ Daarị ḅọ ḅe na tụḅụrụ ye.”

⁹Kụma Juu-ḅẹ-apụ ma tọrụ iḅi ọkị gotẹ Fẹsịtọsị nwẹnị Pọlụ gbela, “Í minini tẹ Jeruselemu mu ḅẹ, tẹ anịanga mịna aị ma tẹ ịn kẹ ị́ sịḅị sẹịn aị ma kẹ ị́ kọn ị̀ tọrọkọ?”

¹⁰Pọlụ nwẹnị ḅẹẹ, “Romu Tomikiri mẹ daarị ḅọ ḅe ḅẹrẹkọn warị ḅio arị emi, anịanga mie ịn pịkị ị̀ kọn ḅarịye. Amụ à gbọrụ siye sọ kẹ Juu-ḅẹ-apụ ma mịẹ-a, sọ ḅarana nimi lama ḅara.

¹¹Oloko kan siye tẹ à mịẹ tẹ ḅaa-ḅẹrẹ-pẹlẹ ị̀ pịrị na-iḅi ye emi ḅẹḅẹ à mangị ḅịa. Kụma ịn kẹ ị̀ sịḅị sẹịn-arị aị ma ḅụ karakara ye ofori ḅẹḅẹ, gbọrụḅọ-sọ inetẹ ị̀ saakị ịn pịrị ḅịa. Ị̀ ḅẹrẹ mẹ arị iwoma Romu Tomikiri mẹ daarị ḅọ ḅe pịrịm.”

¹²Anịtẹso Fẹsịtọsị ọ̀ palị apụ na sịḅị gboloma fama tẹso, ọ̀ nwẹnị pakịrị, “Ị́ ḅẹrẹ mẹ ị́ iwoma Romu Tomikiri mẹ daarị ḅọ ḅe pịrị tẹ ḅara, ọ̀ tọrọkọ mie ị́ pịkị mu ḅarịye.”

¹³Sakị kẹlẹ ḅọrọ tẹso, Ama-da Agiripa na Banayịsị na Sizariya ḅụ alụa! kẹ Fẹsịtọsị ḅẹẹ ḅẹ tẹ ḅom.

¹⁴Ịn tọnwa aḍin sime tẹso, Fẹsịtọsị nwẹnị ye Pọlụ na sime-ḅara ḍuko finji amadaḅọ ḅe pịrị. Ori mẹẹ, “Mịanga Fẹlịkisi kẹ ikoli-warị ḅio koroma tẹ so wararị gbọrụḅọ emi;

¹⁵tẹ à Jeruselemu mu sakị Juu-ḅẹ agbamịẹapụ ma na omongiapụ ma na tọnwa aḅẹrẹ ḍuko ọ̀ sịḅị sẹịnm, tẹ ị̀ ḅara ḅiim à ḅẹrẹ-ḅarasii pẹlẹ ọ̀ pịrịị.

¹⁶Kụma à ḍuko ịn pịrịm mịnẹ wamịnị Romu ḅẹ apụ wa ịn ḅẹrẹ kẹ sịḅị ḅụ sẹịn ḅọ saḅama ḅẹrẹ kẹ mḅọ sịḅị sẹịn apụ pịrị pịrị-a, ini mḅọ na dama tẹ mḅọ amịna ḅụụ ḍụa-a ogbo.

¹⁷Mie ḅụ in ḅo mịanga la sakị à sakị fama-a tẹ, ene-ḅaa ḅụ, ḅẹrẹkọn warị ḅio lẹgị tẹ ḅẹẹ tẹ ini ọ̀ kẹ sọ ḅom.

¹⁸Ori na ịgbanịya nyana apụ ma saakị sịẹ sakị à kuromam si-aị tẹ ọ̀ mịẹ tẹ in ḍuko ọ̀ sịḅị sẹịn ḅẹ aị ḅẹ gberie-sọ ịn ḅara lama-a.

¹⁹Ini nyana tẹ ḍuko aị anie ịna Tamụnọ minini ḅara na gbọrụ Jizọsị nwẹn-sịn tomḅọ na gboloma aị, fịị tẹ Pọlụ ọkịm paa ḍumo wararị nwẹn ḅẹẹ ḅọ.

²⁰À paa mịna aị ma gbolomaye nimi ḅẹ ḅara kuroma ḅo-a ḅara ḅụ, à Pọlụ ḅẹẹm ọ̀ ḅọrọ Jeruselemu mu tẹ anịanga ịn kẹ ọ̀ sịḅị sẹịn aị ma ḅụ ọ̀ kọn ḅarị ḅoto.

²¹Kụma Pọlụ ḅẹrẹ mẹ saakị iwoma tẹ ḅiim mịnẹ ò kun-ḅara ḅio sime nwenii Romu Tomikiri mẹ daarị ḅọ ḅe ọ̀ ḅẹrẹ mẹ pẹlẹ sakị la ḅa. Mie ḅụ à tọnm mịnẹ ini ò ḍikiḍiki nwenii arị inetẹ ọ̀ kẹ Romu Tomikiri mẹ daarịḅọ ḅẹ fịrịma sakị la ḅa.”

²²Agiripa nwẹnị Fẹsịtọsị ḅẹẹ, “À ḅarana ḅị tomḅọ ḅe ḅịḅị naa ḅa.” Fẹsịtọsị nwẹnị pakịrị, “Iḅim. Ḅaa la sakị ị́ ọ̀ naa ḅa.”

²³Anị ḅẹ ene-ḅaa ḅụ Agiripa na Banayịsị na ama-kobiri warị mẹ mu sakị ọmụ-alapụ na, ama mẹ ḅẹ opu apụ na sọ ini na gbiima mum, ori opu la ḅara na anị ḅẹ amịẹ-mịẹaị na ḅụ. Fẹsịtọsị tọn tẹ in Pọlụ kẹ sọ-ḅom.

²⁴Fẹsịtọsị nwẹnị ḅẹẹ, “Ama-da Agiripa, na mịanga wamịnị na emi apụ mamgba na, arị ọ́ sịn tẹ: Mịanga ọmịnị ẹrịarị tomḅọ ḅe anie Juu-ḅẹ-apụ mamgba, tẹ mịanga na Jeruselemu ḅụ na emi apụ na, ḅụụ ḅụ ịna ḅụụ-ḅẹlẹ-a aị ḍuko ị̀ pịrị ḅọ ḅee. Ini oloku-oloku tẹ ḅẹẹm mịnẹ ọ̀ ḅarị ḍumo na-iḅi-a.

²⁵Yẹrị kịngẹ kụma arị inetẹ ḅaa-ḅẹrẹ pẹlẹ ọ̀ pịrị-pịrị ye ẹrị-a. Anịsọ ori ḅarana ḅẹrẹ mẹ iwoma Romu Tomikiri mẹ daarị ḅọ ḅe pịrị tẹ ḅẹ sakị, yẹrị sọ ọkị tẹ mịnẹ àrị ọ̀ kẹ fịrịma ḅa.

²⁶Kụma ọ̀ ḅụụ da-da à kẹ ḍiri kẹẹ tẹ kẹ Romu Tomikiri mẹ daarị ḅọ ḅe fịrịma ḅẹ ye à nyana-a. Mie à gotẹ ọ̀ kẹ ọmịna tọrọkọ ḅo yee, jen-a jen-a ị́yẹrị Ama-da Agiripa ḅe tọrọkọ, mịẹtẹ wa iḅiọkụ ọ̀ ḅẹrẹ mẹ sọkịrị ḍiki tẹ à kẹ ḍiri mẹ kẹẹ ḅẹ ye nimi.

²⁷Kun ḅara ḅio sime ḅọ kẹ ọkọ fịrịmarị tẹ giregirema mḅọ mịẹ ye kẹẹ pakama-a mẹ ị̀ ḅụụ kura-a.”